April 9, 2025

ਤਾਮਿਲਨਾਡੂ ਦੇ ਰਾਜਪਾਲ ਆਰਐੱਨ ਰਵੀ ਦੀ ਸੁਪਰੀਮ ਕੋਰਟ ਵੱਲੋਂ ਕੀਤੀ ਖਿਚਾਈ ਦੇਸ਼ ਭਰ ’ਚ ਕੇਂਦਰ ਸਰਕਾਰ ਦੇ ਅਜਿਹੇ ਨੁਮਾਇੰਦਿਆਂ ਲਈ ਚਿਤਾਵਨੀ ਹੋਣੀ ਚਾਹੀਦੀ ਹੈ, ਖ਼ਾਸ ਤੌਰ ’ਤੇ ਉੱਥੇ ਜਿੱਥੇ ਭਾਜਪਾ ਸੱਤਾ ’ਚ ਨਹੀਂ। ਡੀਐੱਮਕੇ ਸਰਕਾਰ ਦੇ ਪੱਖ ’ਚ ਵੱਡਾ ਫ਼ੈਸਲਾ ਸੁਣਾਉਂਦਿਆਂ ਅਦਾਲਤ ਨੇ ਕਿਹਾ ਕਿ ਰਾਜਪਾਲ ਰਵੀ ਵੱਲੋਂ 10 ਬਿੱਲ ਰਾਸ਼ਟਰਪਤੀ ਦੇ ਗ਼ੌਰ ਲਈ ਰਾਖਵੇਂ ਰੱਖਣਾ ਗ਼ੈਰ-ਕਾਨੂੰਨੀ, ਪੱਖਪਾਤੀ ਤੇ ਸੰਵਿਧਾਨਕ ਤਜਵੀਜ਼ਾਂ ਦੇ ਖ਼ਿਲਾਫ਼ ਹੈ। ਅਦਾਲਤ ਵੱਲੋਂ ਅਤਿ ਮਹੱਤਵਪੂਰਨ ਸੁਨੇਹਾ ਇਹ ਹੈ ਕਿ ਰਾਜਪਾਲ ਨੂੰ ਤਾਂ ਆਦਰਸ਼ ਰੂਪ ’ਚ ਰਾਜ ਸਰਕਾਰ ਦਾ ਮਿੱਤਰ, ਦਾਰਸ਼ਨਿਕ ਤੇ ਮਾਰਗਦਰਸ਼ਕ ਹੋਣਾ ਚਾਹੀਦਾ ਹੈ; ਬਲਕਿ ਉਸ ਨੂੰ ਤਾਂ ਚਾਹੀਦਾ ਹੈ ਕਿ ਉਹ ਰਾਜਨੀਤਕ ਵਿਚਾਰਾਂ ਨੂੰ ਸੰਵਿਧਾਨ ਪ੍ਰਤੀ ਆਪਣੇ ਸਮਰਪਣ ਦੇ ਰਾਹ ਵਿੱਚ ਬਿਲਕੁਲ ਨਾ ਆਉਣ ਦੇਵੇ। ਵਿਰੋਧੀ ਪਾਰਟੀਆਂ ਵੱਲੋਂ ਸ਼ਾਸਿਤ ਰਾਜਾਂ ’ਚ ਮੁੱਖ ਮੰਤਰੀਆਂ ਤੇ ਰਾਜਪਾਲਾਂ ਵਿਚਾਲੇ ਟਕਰਾਅ ਆਮ ਹੋ ਚੁੱਕੇ ਹਨ। ਪਿਛਲੇ ਕੁਝ ਸਾਲਾਂ ’ਚ, ਤਾਮਿਲਨਾਡੂ ਵਿੱਚ ਸਥਿਤੀ ਬਦਤਰ ਹੋ ਗਈ ਹੈ, ਜਿੱਥੇ ਐੱਮਕੇ ਸਟਾਲਿਨ ਦੀ ਸਰਕਾਰ ਕਈ ਮੁੱਦਿਆਂ ’ਤੇ ਰਾਜਪਾਲ ਰਵੀ ਨਾਲ ਟਕਰਾਅ ’ਚ ਰਹੀ ਹੈ, ਰਾਜ ਵਿਧਾਨ ਸਭਾ ਵੱਲੋਂ ਪਾਸ ਕੀਤੇ ਬਿੱਲਾਂ ਨੂੰ ਪ੍ਰਵਾਨਗੀ ਦੇਣ ਵਿੱਚ ਕੀਤੀ ਬੇਹਿਸਾਬੀ ਦੇਰੀ ਇਨ੍ਹਾਂ ’ਚੋਂ ਇੱਕ ਪ੍ਰਮੁੱਖ ਮੁੱਦਾ ਹੈ। ਸਾਲ 2023 ਵਿੱਚ, ਰਾਜਪਾਲ ਮੁੱਖ ਮੰਤਰੀ ਨੂੰ ਪੁੱਛੇ ਬਿਨਾਂ ਇੱਕ ਦਾਗ਼ੀ ਮੰਤਰੀ ਨੂੰ ਰਾਜ ਕੈਬਨਿਟ ਵਿੱਚੋਂ ਬਰਖ਼ਾਸਤ ਕਰਨ ਤੱਕ ਚਲੇ ਗਏ ਸਨ। ਉਹ ਗ਼ਲਤੀ ਸੁਧਾਰਨ ਲਈ ਕੇਂਦਰੀ ਗ੍ਰਹਿ ਮੰਤਰਾਲੇ ਨੂੰ ਦਖ਼ਲ ਦੇਣਾ ਪਿਆ ਸੀ, ਜੋ ਰਾਜ ਸਰਕਾਰ ਨੂੰ ਨੀਵਾਂ ਦਿਖਾਉਣ ਜਾਂ ਪ੍ਰਭਾਵਹੀਣ ਕਰਨ ਵੱਲ ਸੇਧਿਤ ਸੀ। ਇਸ ਤੋਂ ਇਲਾਵਾ ਹੋਰਨਾਂ ਰਾਜਾਂ ਵਿੱਚ ਵੀ ਰਾਜਪਾਲ ਤੇ ਸਰਕਾਰਾਂ ਦਰਮਿਆਨ ਟਕਰਾਅ ਦੇਖੇ ਗਏ ਹਨ ਜਿੱਥੇ ਅਹਿਮ ਕਾਰਜ ਦੋਵਾਂ ਧਿਰਾਂ ਦੇ ਆਹਮੋ-ਸਾਹਮਣੇ ਹੋਣ ਕਾਰਨ ਰੁਕੇ ਰਹੇ। ਇਹ ਸਮਝਣਾ ਬਿਲਕੁਲ ਔਖਾ ਨਹੀਂ ਕਿ ਚੰਗਾ ਸ਼ਾਸਨ ਮੁੱਖ ਮੰਤਰੀ ਤੇ ਰਾਜਪਾਲ ਦੋਵਾਂ ਦੀ ਸਿਖ਼ਰਲੀ ਤਰਜੀਹ ਹੋਣੀ ਚਾਹੀਦੀ ਹੈ। ਅਦਾਲਤ ਨੇ ਦਰੁਸਤ ਫਰਮਾਇਆ ਹੈ ਕਿ ਵਿਧਾਨਪਾਲਿਕਾ ਦੇ ਮੈਂਬਰ, ਚੁਣੇ ਹੋਏ ਪ੍ਰਤੀਨਿਧੀਆਂ ਦੇ ਤੌਰ ’ਤੇ, ਰਾਜ ਦੇ ਲੋਕਾਂ ਦਾ ਕਲਿਆਣ ਯਕੀਨੀ ਬਣਾਉਣ ਲਈ ਜ਼ਿਆਦਾ ਤਿਆਰੀ ਨਾਲ ਲੈਸ ਹੁੰਦੇ ਹਨ। ਸਿਆਸੀ ਕਾਰਨਾਂ ਕਰ ਕੇ ਅੜਿੱਕੇ ਖੜ੍ਹੇ ਕਰਨਾ ਸੰਵਿਧਾਨਕ ਅਹੁਦੇ ’ਤੇ ਬੈਠੇ ਵਿਅਕਤੀ ਨੂੰ ਫੱਬਦਾ ਨਹੀਂ।

ਨਵੀਂ ਦਿੱਲੀ, 9 ਅਪ੍ਰੈਲ – ਬੰਗਲਾਦੇਸ਼ ਦੇ ਪ੍ਰਧਾਨ ਮੰਤਰੀ ਦੇ ਅਹੁਦੇ ਤੋਂ ਹਟਾਈ ਜਾ ਚੁੱਕੀ ਆਗੂ ਸ਼ੇਖ ਹਸੀਨਾ ਨੇ ਉਨ੍ਹਾਂ ਦੀ ਪਾਰਟੀ ਆਵਾਮੀ ਲੀਗ ਦੇ ਸਮਰਥਕਾਂ ਨਾਲ ਸੋਸ਼ਲ ਮੀਡੀਆ ’ਤੇ ਗੱਲਬਾਤ ਦੌਰਾਨ ਦੇਸ਼ ਪਰਤਣ ਦਾ ਸੰਕਲਪ ਲਿਆ। ਉਨ੍ਹਾਂ ਨਾਲ ਹੀ ਵਾਅਦਾ ਕੀਤਾ ਕਿ ਉਨ੍ਹਾਂ ਦੀ ਪਾਰਟੀ ਦੇ ਮੈਂਬਰਾਂ ਨੂੰ ਨਿਸ਼ਾਨਾ ਬਣਾਉਣ ਵਾਲਿਆਂ ਨੂੰ ਨਿਆਂ ਦੇ ਕਟਹਿਰੇ ਵਿੱਚ ਖੜ੍ਹਾ ਕੀਤਾ ਜਾਵੇਗਾ। ਆਵਾਮੀ ਲੀਗ ਦੀ ਪ੍ਰਧਾਨ ਨੇ ਕਿਹਾ, ‘‘ਅੱਲ੍ਹਾ ਨੇ ਮੈਨੂੰ ਕਿਸੇ ਕਾਰਨ ਜਿਊਂਦਾ ਰੱਖਿਆ ਹੈ ਅਤੇ ਉਹ ਦਿਨ ਆਵੇਗਾ ਜਦੋਂ ਨਿਆਂ ਮਿਲੇਗਾ।’’ ਪਿਛਲੇ ਸਾਲ ਦੇਸ਼ ਵਿੱਚ ਰਾਖਵਾਂਕਰਨ ਵਿਵਾਦ ਨੂੰ ਲੈ ਕੇ ਹੋਏ ਬੇਮਿਸਾਲ ਵਿਦਿਆਰਥੀ ਪ੍ਰਦਰਸ਼ਨਾਂ ਤੋਂ ਬਾਅਦ ਸਰਕਾਰ ਡਿੱਗਣ ਮਗਰੋਂ ਉਨ੍ਹਾਂ ਨੇ ਭਾਰਤ ਵਿੱਚ ਸ਼ਰਨ ਲਈ। ਉਨ੍ਹਾਂ ਕਿਹਾ, ‘‘ਮੈਂ ਇਕ ਹੀ ਦਿਨ ਵਿੱਚ ਆਪਣੇ ਪਿਤਾ, ਮਾਤਾ, ਭਰਾ ਤੇ ਸਾਰਿਆਂ ਨੂੰ ਗੁਆ ਦਿੱਤਾ ਅਤੇ ਫਿਰ ਉਨ੍ਹਾਂ ਨੇ ਸਾਨੂੰ ਦੇਸ਼ ਨਹੀਂ ਪਰਤਣ ਦਿੱਤਾ। ਮੈਨੂੰ ਆਪਣੇ ਲੋਕਾਂ ਨੂੰ ਗੁਆਉਣ ਦਾ ਦਰਦ ਹੈ। ਅੱਲ੍ਹਾ ਮੇਰੀ ਰੱਖਿਆ ਕਰਦਾ ਰਹਿੰਦਾ ਹੈ, ਸ਼ਾਇਦ ਉਹ ਮੇਰੇ ਰਾਹੀਂ ਕੁਝ ਚੰਗਾ ਕਰਵਾਉਣਾ ਚਾਹੁੰਦਾ ਹੈ। ਜਿਨ੍ਹਾਂ ਲੋਕਾਂ ਨੇ ਇਹ ਅਪਰਾਧ ਕੀਤੇ ਹਨ, ਉਨ੍ਹਾਂ ਨੂੰ ਸਜ਼ਾ ਮਿਲਣੀ ਚਾਹੀਦੀ ਹੈ। ਇਹ ਮੇਰਾ ਸੰਕਲਪ ਹੈ।’’ ਸੋਸ਼ਲ ਮੀਡੀਆ ’ਤੇ ਆਪਣੇ ਸਮਰਥਕਾਂ ਨਾਲ ਗੱਲਬਾਤ ਦੌਰਾਨ ਉਨ੍ਹਾਂ ਬੰਗਲਾਦੇਸ਼ ਸਰਕਾਰ ਦੇ ਅੰਤਰਿਮ ਮੁਖੀ ਮੁਹੰਮਦ ਯੂਨਸ ’ਤੇ ਨਿਸ਼ਾਨਾ ਸੇਧਦਿਆਂ ਕਿਹਾ ਕਿ ਉਹ ਅਜਿਹਾ ਵਿਅਕਤੀ ਹੈ ਜਿਸ ਨੇ ਕਦੇ ਵੀ ਲੋਕਾਂ ਨਾਲ ਪਿਆਰ ਨਹੀਂ ਕੀਤਾ।

ਚੰਡੀਗੜ੍ਹ, 9 ਅਪ੍ਰੈਲ – ਟਰੰਪ ਵੱਲੋਂ ਚੀਨ ’ਤੇ ਲਾਏ 104 ਫੀਸਦ ਟੈਕਸ ਦੇ ਨਤੀਜੇ ਵਜੋਂ ਅਮਰੀਕੀ ਲੋਕ ਕੀਮਤਾਂ ਵਧਣ ਤੋਂ ਪਹਿਲਾਂ ਆਈਫੋਨ ਸਮੇਤ ਆਪਣੀ ਲੋੜ ਦੀਆਂ ਚੀਜ਼ਾਂ ਖਰੀਦਣ ਲਈ ਭੱਜ ਦੌੜ ਕਰ ਰਹੇ ਹਨ। ਟਰੰਪ ਦੇ ਟੈਕਸਾਂ ਕਾਰਨ ਆਈਫੋਨ ਅਤੇ ਹੋਰ ਬੁਨਿਆਦੀ ਚੀਜ਼ਾਂ ਜਿਵੇਂ ਕਿ ਟਾਇਲਟ ਪੇਪਰ ਆਦਿ ਦੀਆਂ ਕੀਮਤਾਂ ਵਧ ਜਾਣਗੀਆਂ। ਇਸ ਕਾਰਨ ਐਪਲ ਨੂੰ ਇਕ ਵੱਡੀ ਸਮੱਸਿਆ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ ਕਿਉਂਕਿ ਇਨ੍ਹਾਂ ਟੈਕਸਾਂ ਨਾਲ ਆਈਫੋਨ 50 ਫੀਸਦੀ ਤੱਕ ਮਹਿੰਗੇ ਹੋ ਸਕਦੇ ਹਨ। ਮਾਹਿਰਾਂ ਦਾ ਕਹਿਣਾ ਹੈ ਕਿ ਜੇ ਐਪਲ ਆਪਣੇ ਆਈਫੋਨਾਂ ਦੇ ਉਤਪਾਦਨ ਨੂੰ ਅਮਰੀਕਾ ਵਿਚ ਲੈ ਜਾਂਦਾ ਹੈ ਤਾਂ ਆਈਫੋਨ ਦੀ ਕੀਮਤ $2,000 ਤੋਂ ਵੀ ਵੱਧ ਹੋ ਸਕਦੀ ਹੈ। ਕਿਆਸ ਹਨ ਕਿ ਐਪਲ 9 ਅਪਰੈਲ ਨੂੰ ਨਵੇਂ ਟੈਕਸਾਂ ਦੇ ਅਮਲ ਵਿਚ ਆਉਣ ਕਰਕੇ ਫੋਨ ਸਟਾਕ ਕਰਨ ਦੀ ਕੋਸ਼ਿਸ਼ ਕਰ ਰਿਹਾ ਹੈ ਅਤੇ ਕਈਆਂ ਦਾ ਮੰਨਣਾ ਹੈ ਕੰਪਨੀ ਵੱਲੋਂ ਆਈਫੋਨ 17 ਦੇ ਆਉਣ ਤੱਕ ਕੀਮਤਾਂ ਦੇ ਵਾਧੇ ਵਿਚ ਦੇਰੀ ਕੀਤੀ ਜਾ ਸਕਦੀ ਹੈ। ਉਤਪਾਦਨ ਨੂੰ ਦੂਜੇ ਦੇਸ਼ਾਂ ਵਿਚ ਲੈ ਜਾਣ ਨਾਲ ਜਾਂ ਛੋਟ ਪ੍ਰਾਪਤ ਕਰਨ ਨਾਲ ਕੰਪਨੀ ਨੂੰ ਮਦਦ ਤਾਂ ਮਿਲ ਸਕਦੀ ਹੈ ਪਰ ਅਜੇ ਵੀ ਬੇਯਕੀਨੀ ਦਾ ਮਾਹੌਲ ਹੈ। ਐਪਲ ਆਪਣੇ ਜ਼ਿਆਦਾਤਰ ਫੋਨਾਂ ਦਾ ਉਤਪਾਦਨ ਚੀਨ ਤੋਂ ਕਰਦਾ ਹੈ ਇਸ ਲਈ ਉਸ ਨੂੰ ਜਵਾਬੀ ਟੈਕਸਾਂ ਦੀ ਵੱਡੀ ਮਾਰ ਸਹਿਣੀ ਪੈ ਸਕਦੀ ਹੈ। ਜੇਪੀ ਮੋਰਗਨ ਚੇਜ਼ ਦੇ ਮਾਹਿਰਾਂ ਦਾ ਕਹਿਣਾ ਹੈ ਕਿ ਟੈਕਸ ਲਾਗਤਾਂ ਦੀ ਪੂਰਤੀ ਲਈ ਐਪਲ ਨੂੰ ਦੁਨੀਆ ਭਰ ਵਿਚ ਕੀਮਤਾਂ ਵਿਚ 6% ਵਾਧਾ ਕਰਨਾ ਪੈ ਸਕਦਾ ਹੈ। ਹੋਰ ਵਿਸ਼ਲੇਸ਼ਕਾਂ ਦਾ ਮੰਨਣਾ ਹੈ ਕਿ ਜੇ ਐਪਲ ਕੀਮਤਾਂ ਨਹੀਂ ਵਧਾਉਂਦਾ ਹੈ ਤਾਂ ਉਹ ਆਪਣੀ ਕਮਾਈ ਦਾ 15% ਤੱਕ ਗੁਆ ਸਕਦਾ ਹੈ। ਭਾਵੇਂ ਐਪਲ ਨੇ ਆਪਣੇ ਕੁਝ ਉਤਪਾਦਨਾਂ ਨੂੰ ਦੂਜੇ ਦੇਸ਼ਾਂ ਵਿਚ ਤਬਦੀਲ ਕਰ ਦਿੱਤਾ ਹੈ, ਪਰ ਇਨ੍ਹਾਂ ਥਾਵਾਂ ’ਤੇ ਅਜੇ ਵੀ ਟੈਕਸ ਲੱਗ ਸਕਦੇ ਹਨ, ਜੋ ਐਪਲ ਦੇ ਵਿਕਲਪਾਂ ਨੂੰ ਸੀਮਤ ਕਰਦੇ ਹਨ। ਕੁਝ ਵਿਸ਼ਲੇਸ਼ਕ ਕਹਿੰਦੇ ਹਨ ਕਿ ਨਤੀਜੇ ਵਜੋਂ ਐਪਲ ਅਮਰੀਕਾ ਵਿਚ ਆਈਫੋਨਾਂ ਦੀਆਂ ਕੀਮਤਾਂ ਵਿਚ 17 ਤੋਂ 18 ਫੀਸਦ ਤੱਕ ਵਧਾ ਸਕਦਾ ਹੈ।

ਨਵੀਂ ਦਿੱਲੀ, 9 ਅਪ੍ਰੈਲ – ਭਾਰਤੀ ਰਿਜ਼ਰਵ ਬੈਂਕ ਦੇ ਗਵਰਨਰ ਸੰਜੇ ਮਲਹੋਤਰਾ ਨੇ ਬੁੱਧਵਾਰ (9 ਅਪ੍ਰੈਲ) ਨੂੰ ਵਿੱਤੀ ਸਾਲ 2025-26 (ਵਿੱਤੀ ਸਾਲ 2025-26) ਦੀ ਪਹਿਲੀ ਮੁਦਰਾ ਨੀਤੀ ਦੇ ਨਤੀਜਿਆਂ ਦਾ ਐਲਾਨ ਕੀਤਾ। ਇਸ ਦੌਰਾਨ, ਉਨ੍ਹਾਂ ਨੇ ਰੈਪੋ ਰੇਟ ਵਿੱਚ 25 ਬੇਸਿਸ ਪੁਆਇੰਟ (0.25%) ਦੀ ਕਟੌਤੀ ਦਾ ਐਲਾਨ ਕੀਤਾ। ਇਸ ਐਲਾਨ ਦੇ ਨਾਲ, ਰੈਪੋ ਰੇਟ ਹੁਣ ਘੱਟ ਕੇ 6% ਹੋ ਗਿਆ ਹੈ। ਪਹਿਲਾਂ ਰੈਪੋ ਰੇਟ 6.25% ਸੀ। ਆਰਬੀਆਈ ਦੇ ਇਸ ਫੈਸਲੇ ਨਾਲ, ਆਪਣੇ ਕਰਜ਼ੇ ਦੀ ਈਐਮਆਈ ਅਦਾ ਕਰਨ ਵਾਲਿਆਂ ਨੂੰ ਵੱਡੀ ਰਾਹਤ ਮਿਲਣ ਦੀ ਉਮੀਦ ਹੈ। ਤੁਹਾਨੂੰ ਦੱਸ ਦੇਈਏ ਕਿ ਫ਼ਰਵਰੀ ਦੇ ਸ਼ੁਰੂ ਵਿੱਚ, ਨਵੀਂ ਮੁਦਰਾ ਨੀਤੀ ਦਾ ਐਲਾਨ ਕਰਦੇ ਸਮੇਂ, ਆਰਬੀਆਈ ਗਵਰਨਰ ਨੇ ਬੈਂਚਮਾਰਕ ਦਰਾਂ ਵਿੱਚ 25 ਬੀਪੀਐਸ ਕਟੌਤੀ ਦਾ ਐਲਾਨ ਕੀਤਾ ਸੀ, ਜਿਸ ਤੋਂ ਬਾਅਦ ਰੈਪੋ ਰੇਟ 6.25% ‘ਤੇ ਆ ਗਿਆ ਸੀ। ਭਾਰਤੀ ਰਿਜ਼ਰਵ ਬੈਂਕ (RBI) ਨੇ ਲਗਾਤਾਰ ਦੂਜੀ ਵਾਰ ਵਿਆਜ ਦਰਾਂ ਵਿੱਚ ਕਟੌਤੀ ਕੀਤੀ ਹੈ। ਵਿੱਤੀ ਸਾਲ 2025-26 ਲਈ ਪਹਿਲੀ ਦੋ-ਮਾਸਿਕ ਮੁਦਰਾ ਨੀਤੀ ਦਾ ਐਲਾਨ ਕਰਦੇ ਹੋਏ, ਆਰਬੀਆਈ ਗਵਰਨਰ ਸੰਜੇ ਮਲਹੋਤਰਾ ਨੇ ਕਿਹਾ ਕਿ ਮੁਦਰਾ ਨੀਤੀ ਕਮੇਟੀ (ਐਮਪੀਸੀ) ਨੇ ਰੈਪੋ ਦਰ ਨੂੰ 25 ਬੀਪੀਐਸ ਘਟਾ ਕੇ 6 ਪ੍ਰਤੀਸ਼ਤ ਕਰਨ ਦਾ ਫ਼ੈਸਲਾ ਕੀਤਾ ਹੈ। ਤਾਂ ਆਓ ਸਮਝੀਏ ਕਿ ਰੈਪੋ ਰੇਟ ਵਿੱਚ ਕਟੌਤੀ ਨਾਲ ਆਮ ਆਦਮੀ ਨੂੰ ਕਿੰਨਾ ਫਾਇਦਾ ਹੋਵੇਗਾ ਅਤੇ ਇਸ ਨਾਲ ਉਸ ਦਾ EMI ਬੋਝ ਕਿੰਨਾ ਘੱਟ ਹੋਵੇਗਾ। ਇਹ ਵੀ ਜਾਣੋ ਕਿ ਰੈਪੋ ਰੇਟ ਵਿੱਚ ਕਮੀ ਕਾਰਨ ਤੁਹਾਡਾ ਹੋਮ ਲੋਨ ਅਤੇ ਹੋਰ ਲੋਨ ਸਸਤੇ ਕਿਉਂ ਹੋ ਜਾਂਦੇ ਹਨ… ਰੈਪੋ ਰੇਟ ਵਿੱਚ 0.25 ਪ੍ਰਤੀਸ਼ਤ ਦੀ ਕਟੌਤੀ ਘਰ ਖ਼ਰੀਦਦਾਰਾਂ ਨੂੰ ਵੱਡੀ ਰਾਹਤ ਦੇਵੇਗੀ। ਪਿਛਲੇ ਕੁਝ ਸਾਲਾਂ ਵਿੱਚ ਰੀਅਲ ਅਸਟੇਟ ਸੈਕਟਰ ਦੀ ਮੰਗ ਵਧੀ ਹੈ। ਇਹ ਖੇਤਰ ਦੇਸ਼ ਦੇ ਆਰਥਿਕ ਵਿਕਾਸ ਵਿੱਚ ਮਹੱਤਵਪੂਰਨ ਭੂਮਿਕਾ ਨਿਭਾਉਣ ਲਈ ਤਿਆਰ ਹੈ। ਕਿਉਂਕਿ ਕੇਂਦਰੀ ਬੈਂਕ ਨੇ ਰੈਪੋ ਰੇਟ ਵਿੱਚ ਕਟੌਤੀ ਕੀਤੀ ਹੈ, ਇਸ ਨਾਲ ਰੀਅਲਟੀ ਸੈਕਟਰ ਅਤੇ ਪ੍ਰਾਪਰਟੀ ਮਾਰਕੀਟ ਦੇ ਵਿਕਾਸ ਨੂੰ ਹੁਲਾਰਾ ਮਿਲੇਗਾ। ਇਸ ਨਾਲ EMI ਵਿੱਚ ਕਿੰਨਾ ਫ਼ਰਕ ਪਵੇਗਾ? ਜੇਕਰ ਬੈਂਕਾਂ ਨੂੰ ਆਰਬੀਆਈ ਤੋਂ ਸਸਤੀਆਂ ਵਿਆਜ ਦਰਾਂ ‘ਤੇ ਕਰਜ਼ਾ ਮਿਲਦਾ ਹੈ, ਤਾਂ ਬੈਂਕ ਵੀ ਗਾਹਕਾਂ ਨੂੰ ਘੱਟ ਵਿਆਜ ਦਰਾਂ ‘ਤੇ ਕਰਜ਼ਾ ਦਿੰਦੇ ਹਨ। ਰੈਪੋ ਰੇਟ ਵਿੱਚ ਕਮੀ ਦੇ ਕਾਰਨ, ਬੈਂਕਾਂ ਨੂੰ ਫੰਡ ਇਕੱਠਾ ਕਰਨ ਵਿੱਚ ਘੱਟ ਖਰਚ ਕਰਨਾ ਪਵੇਗਾ, ਜਿਸ ਦਾ ਫਾਇਦਾ ਗਾਹਕਾਂ ਨੂੰ ਹੋਵੇਗਾ। ਘਰ ਖ਼ਰੀਦਣ ਦੀ ਯੋਜਨਾ ਬਣਾ ਰਹੇ ਲੋਕਾਂ ਨੂੰ ਵੀ ਇਸ ਦਾ ਲਾਭ ਮਿਲੇਗਾ। ਇਸ ਵੇਲੇ ਘਰੇਲੂ ਕਰਜ਼ਿਆਂ ‘ਤੇ ਵਿਆਜ 8.10-9.5 ਪ੍ਰਤੀਸ਼ਤ ਦੇ ਵਿਚਕਾਰ ਹੈ। ਅਜਿਹੀ ਸਥਿਤੀ ਵਿੱਚ, ਹੁਣ ਰੈਪੋ ਰੇਟ ਵਿੱਚ ਕਟੌਤੀ ਕਾਰਨ ਇਸ ਵਿੱਚ ਕਟੌਤੀ ਹੋਵੇਗੀ ਅਤੇ ਸਿਰਫ਼ ਘਰੇਲੂ ਕਰਜ਼ਾ ਹੀ ਨਹੀਂ, ਰੈਪੋ ਰੇਟ ਵਿੱਚ ਕਟੌਤੀ ਦਾ ਅਸਰ ਕਾਰ ਲੋਨ ਦੇ ਵਿਆਜ ‘ਤੇ ਵੀ ਪਵੇਗਾ। ਰੈਪੋ ਰੇਟ ਕੀ ਹੈ? ਰੈਪੋ ਰੇਟ ਉਹ ਦਰ ਹੈ ਜਿਸ ‘ਤੇ ਆਰਬੀਆਈ ਬੈਂਕਾਂ ਨੂੰ ਕਰਜ਼ਾ ਦਿੰਦਾ ਹੈ। ਇਸ ਦੀ ਕਮੀ ਦੇ ਕਾਰਨ, ਤੁਹਾਡੇ ਹੋਮ ਲੋਨ, ਪਰਸਨਲ ਲੋਨ ਅਤੇ ਕਾਰ ਲੋਨ ਦੀ EMI ਘੱਟ ਜਾਂਦੀ ਹੈ।

ਨਵੀਂ ਦਿੱਲੀ, 9 ਅਪ੍ਰੈਲ – ਆਮ ਲੋਕਾਂ ਲਈ ਆਧਾਰ ਦੀ ਵਰਤੋਂ ਹੁਣ ਹੋਰ ਵੀ ਆਸਾਨ ਹੋ ਗਈ ਹੈ। ਕੇਂਦਰ ਸਰਕਾਰ ਨੇ ਆਧਾਰ ਕਾਰਡ ਦੀ ਭੌਤਿਕ ਕਾਪੀ ਦੀ ਲੋੜ ਨੂੰ ਖਤਮ ਕਰਦਿਆਂ ਇੱਕ ਨਵਾਂ QR ਕੋਡ ਅਧਾਰਤ ‘ਆਧਾਰ ਐਪ’ ਲਾਂਚ ਕੀਤਾ ਹੈ। ਇਸ ਐਪ ਰਾਹੀਂ ਹਵਾਈ ਅੱਡਿਆਂ, ਹੋਟਲਾਂ ਜਾਂ ਰੇਲਵੇ ਸਟੇਸ਼ਨਾਂ ਉੱਤੇ ਆਪਣੀ ਪਛਾਣ ਦੀ ਤਸਦੀਕ ਸਿੱਧਾ QR ਕੋਡ ਸਕੈਨ ਕਰਕੇ ਕੀਤੀ ਜਾ ਸਕੇਗੀ। IT ਮੰਤਰੀ ਵੱਲੋਂ ਐਲਾਨ ਕੇਂਦਰੀ ਆਈਟੀ ਮੰਤਰੀ ਅਸ਼ਵਨੀ ਵੈਸ਼ਨਵ ਨੇ ਮੰਗਲਵਾਰ ਨੂੰ ਇਸ ਨਵੇਂ ਐਪ ਦੀ ਘੋਸ਼ਣਾ ਕਰਦਿਆਂ ਕਿਹਾ ਕਿ, “ਹੁਣ ਨਾਗਰਿਕਾਂ ਨੂੰ ਆਧਾਰ ਦੀ ਫੋਟੋਕਾਪੀ ਲੈ ਕੇ ਫਿਰਨ ਦੀ ਲੋੜ ਨਹੀਂ ਰਹੇਗੀ। ਇਹ ਡਿਜੀਟਲ ਭਾਰਤ ਵੱਲ ਇੱਕ ਹੋਰ ਮਜ਼ਬੂਤ ਕਦਮ ਹੈ।” ਨਵਾਂ ਆਧਾਰ ਐਪ: ਕੀਮਤੀ ਖ਼ਾਸੀਅਤਾਂ QR ਕੋਡ ਰਾਹੀਂ ਤਸਦੀਕ: ਉਪਭੋਗਤਾ ਐਪ ‘ਚ ਲੌਗਇਨ ਕਰਕੇ ਵਿਲੱਖਣ QR ਕੋਡ ਤਿਆਰ ਕਰ ਸਕਦੇ ਹਨ, ਜੋ ਕਿਸੇ ਵੀ ਸਥਾਨ ‘ਤੇ ਸਕੈਨ ਕਰਕੇ ਤੁਰੰਤ ਤਸਦੀਕ ਕਰ ਸਕਦਾ ਹੈ। ਚਿਹਰਾ ਪ੍ਰਮਾਣਿਕਤਾ : ਐਪ ਵਿੱਚ ਇਹ ਸਹੂਲਤ ਵੀ ਹੋਵੇਗੀ, ਜੋ ਪੂਰੀ ਤਰ੍ਹਾਂ ਸੁਰੱਖਿਅਤ ਹੈ। ਕੋਈ ਫੋਟੋਕਾਪੀ ਨਹੀਂ: ਆਧਾਰ ਦੀ ਨਕਲ ਜਮ੍ਹਾਂ ਕਰਨ ਦੀ ਲੋੜ ਨਹੀਂ ਰਹੇਗੀ। ਤੁਰੰਤ ਕਾਰਵਾਈ: UPI ਵਾਂਗ ਤਸਦੀਕ ਵੀ ਇਕ ਸੈਕਿੰਡ ‘ਚ ਪੂਰੀ। ਮੌਜੂਦਾ mAadhaar ਤੋਂ ਵੱਖਰਾ ਐਪ ਇਹ ਨਵਾਂ ਐਪ ਮੌਜੂਦਾ mAadhaar ਐਪ ਤੋਂ ਵੱਖਰਾ ਹੋਵੇਗਾ ਅਤੇ ਜ਼ਿਆਦਾ ਤੇਜ਼, ਭਰੋਸੇਮੰਦ ਅਤੇ ਸੁਰੱਖਿਅਤ ਤਕਨਾਲੋਜੀ ਨਾਲ ਤਿਆਰ ਕੀਤਾ ਗਿਆ ਹੈ। ਆਧਾਰ ਕਾਰਡ ਬਣਾਉਣ ਦੀ ਪ੍ਰਕਿਰਿਆ ਜੇਕਰ ਤੁਸੀਂ ਆਧਾਰ ਕਾਰਡ ਨਹੀਂ ਬਣਾਇਆ, ਤਾਂ ਤੁਹਾਨੂੰ ਆਪਣੇ ਨਜ਼ਦੀਕੀ ਆਧਾਰ ਨਾਮਾਂਕਣ ਕੇਂਦਰ ‘ਤੇ ਜਾ ਕੇ ਇੱਕ ਫਾਰਮ ਭਰਨਾ ਹੋਵੇਗਾ। ਫਿਰ ਤੁਹਾਡੀ ਬਾਇਓਮੈਟ੍ਰਿਕ ਜਾਣਕਾਰੀ (ਫਿੰਗਰਪ੍ਰਿੰਟ, ਅੱਖਾਂ ਦੀ ਸਕੈਨਿੰਗ ਅਤੇ ਫੋਟੋ) ਲਈ ਜਾਏਗਾ। ਫਾਰਮ ਭਰਨ ਤੋਂ ਬਾਅਦ ਤੁਹਾਨੂੰ ਇੱਕ ਰਸੀਦ ਮਿਲੇਗੀ ਅਤੇ ਕੁਝ ਹਫ਼ਤਿਆਂ ਵਿੱਚ ਤੁਹਾਡਾ ਆਧਾਰ ਕਾਰਡ ਡਾਕ ਰਾਹੀਂ ਤੁਹਾਡੇ ਪਤੇ ‘ਤੇ ਆ ਜਾਵੇਗਾ। ਤੁਸੀਂ UIDAI ਦੀ ਵੈੱਬਸਾਈਟ ਤੋਂ ਵੀ ਇਸਨੂੰ ਡਾਊਨਲੋਡ ਕਰ ਸਕਦੇ ਹੋ।

ਵਾਸ਼ਿੰਗਟਨ, 9 ਅਪ੍ਰੈਲ – ਅਮਰੀਕਾ ਨੇ ਚੀਨ ‘ਤੇ 104% ਟੈਰਿਫ ਲਗਾਇਆ ਹੈ। ਇਹ ਟੈਰਿਫ ਅੱਜ 9 ਅਪ੍ਰੈਲ ਤੋਂ ਲਾਗੂ ਹੋ ਗਿਆ ਹੈ। ਇਸਦਾ ਮਤਲਬ ਹੈ ਕਿ ਹੁਣ ਤੋਂ, ਅਮਰੀਕਾ ਆਉਣ ਵਾਲੇ ਚੀਨੀ ਸਮਾਨ ਨੂੰ ਦੁੱਗਣੀ ਤੋਂ ਵੀ ਵੱਧ ਕੀਮਤ ‘ਤੇ ਵੇਚਿਆ ਜਾਵੇਗਾ। ਟਰੰਪ ਨੇ ਕਿਹਾ ਕਿ ਅਸੀਂ ਟੈਰਿਫਾਂ ਤੋਂ ਬਹੁਤ ਪੈਸਾ ਕਮਾ ਰਹੇ ਹਾਂ। ਅਮਰੀਕਾ ਨੂੰ ਹਰ ਰੋਜ਼ 2 ਬਿਲੀਅਨ ਡਾਲਰ ਹੋਰ ਮਿਲ ਰਹੇ ਹਨ। ਕਈ ਦੇਸ਼ਾਂ ਨੇ ਸਾਨੂੰ ਹਰ ਤਰ੍ਹਾਂ ਨਾਲ ਲੁੱਟਿਆ ਹੈ, ਹੁਣ ਸਾਡੀ ਲੁੱਟ ਹੋਣ ਦੀ ਵਾਰੀ ਹੈ। ਟਰੰਪ ਨੇ ਮੰਗਲਵਾਰ ਨੂੰ ਵ੍ਹਾਈਟ ਹਾਊਸ ਵਿੱਚ ਕਿਹਾ ਕਿ ਟੈਰਿਫ ਦੀ ਆਲੋਚਨਾ ਕਰਨ ਵਾਲਾ ਕੋਈ ਵੀ ਠੱਗ ਅਤੇ ਧੋਖੇਬਾਜ਼ ਹੈ। ਜਦੋਂ ਅਮਰੀਕਾ ਨੇ 90 ਹਜ਼ਾਰ ਫੈਕਟਰੀਆਂ ਗੁਆ ਦਿੱਤੀਆਂ ਤਾਂ ਉਨ੍ਹਾਂ ਨੇ ਇਸ ਬਾਰੇ ਨਹੀਂ ਸੋਚਿਆ। ਜੋ ਸਾਡੀ ਆਲੋਚਨਾ ਕਰਦੇ ਹਨ, ਉਹ ਹਰ ਪੱਖੋਂ ਗਲਤ ਹਨ। ਅਮਰੀਕੀ ਸਟਾਕ ਮਾਰਕੀਟ ਵਿੱਚ ਹੁਣ ਤੱਕ ਦੀ ਸਭ ਤੋਂ ਵੱਡੀ ਗਿਰਾਵਟ ਟਰੰਪ ਵੱਲੋਂ ਟੈਰਿਫ ਦਾ ਐਲਾਨ ਕਰਨ ਤੋਂ ਬਾਅਦ ਅਮਰੀਕੀ ਸਟਾਕ ਐਕਸਚੇਂਜ ਵਿੱਚ ਤੇਜ਼ੀ ਨਾਲ ਗਿਰਾਵਟ ਆਈ ਹੈ। ਐਸ ਐਂਡ ਪੀ 500 ਕੰਪਨੀਆਂ ਦੇ ਸਟਾਕ ਮਾਰਕੀਟ ਮੁੱਲ ਵਿੱਚ 5.8 ਟ੍ਰਿਲੀਅਨ ਡਾਲਰ (47 ਹਜ਼ਾਰ ਕਰੋੜ ਰੁਪਏ) ਦਾ ਨੁਕਸਾਨ ਹੋਇਆ ਹੈ। 1957 ਵਿੱਚ ਬੈਂਚਮਾਰਕ ਸੂਚਕਾਂਕ ਪੇਸ਼ ਕੀਤੇ ਜਾਣ ਤੋਂ ਬਾਅਦ ਇਹ ਚਾਰ ਦਿਨਾਂ ਦੀ ਸਭ ਤੋਂ ਵੱਡੀ ਗਿਰਾਵਟ ਹੈ। S&P 500 ਕੰਪਨੀਆਂ ਵਿੱਚ ਅਮਰੀਕਾ ਦੀਆਂ ਚੋਟੀ ਦੀਆਂ 500 ਕੰਪਨੀਆਂ ਸ਼ਾਮਲ ਹਨ। ਫਰਵਰੀ ‘ਚ ਚੀਨ ਤੇ 10 ਫੀਸਦ ਟੈਰਿਫ ਲਗਾਇਆ ਸੀ ਟਰੰਪ ਨੇ ਫਰਵਰੀ ਵਿੱਚ ਚੀਨ ‘ਤੇ 10% ਟੈਰਿਫ ਲਗਾਇਆ ਸੀ। ਫਿਰ ਉਨ੍ਹਾਂ ਨੇ ਮਾਰਚ ਵਿੱਚ 10% ਟੈਰਿਫ ਦੁਬਾਰਾ ਲਾਗੂ ਕਰ ਦਿੱਤਾ। ਇਸ ਮਹੀਨੇ ਦੇ ਸ਼ੁਰੂ ਵਿੱਚ, ਟਰੰਪ ਨੇ ਚੀਨ ‘ਤੇ 34% ਹੋਰ ਟੈਰਿਫ ਲਗਾਉਣ ਦਾ ਐਲਾਨ ਕੀਤਾ। ਇਸ ਦੇ ਜਵਾਬ ਵਿੱਚ, ਚੀਨ ਨੇ ਵੀ ਅਮਰੀਕਾ ‘ਤੇ 34% ਟੈਰਿਫ ਲਗਾ ਦਿੱਤਾ। ਟਰੰਪ ਨੇ ਸੋਮਵਾਰ ਨੂੰ ਕਿਹਾ ਕਿ ਜੇਕਰ ਚੀਨ ਨੇ ਅਮਰੀਕਾ ‘ਤੇ ਲਗਾਇਆ ਗਿਆ 34% ਟੈਰਿਫ ਵਾਪਸ ਨਹੀਂ ਲਿਆ, ਤਾਂ ਉਸਨੂੰ ਮਾਰਚ ਵਿੱਚ ਲਗਾਏ ਗਏ 20% ਟੈਰਿਫ ਅਤੇ 2 ਅਪ੍ਰੈਲ ਨੂੰ ਲਗਾਏ ਗਏ 34% ਟੈਰਿਫ ਤੋਂ ਇਲਾਵਾ ਬੁੱਧਵਾਰ ਤੋਂ 50% ਵਾਧੂ ਟੈਰਿਫ ਦਾ ਸਾਹਮਣਾ ਕਰਨਾ ਪਵੇਗਾ। ਟ੍ਰੇਡ ਵਾਰ ਲਈ ਚੀਨ ਤਿਆਰ ਕੱਲ੍ਹ, ਚੀਨ ਨੇ ਟਰੰਪ ਦੇ ਬਿਆਨ ਦੇ ਜਵਾਬ ਵਿੱਚ ਕਿਹਾ ਕਿ ਅਮਰੀਕਾ ਸਾਡੇ ‘ਤੇ ਟੈਰਿਫ ਹੋਰ ਵਧਾਉਣ ਦੀ ਧਮਕੀ ਦੇ ਕੇ ਇੱਕ ਤੋਂ ਬਾਅਦ ਇੱਕ ਗਲਤੀਆਂ ਕਰ ਰਿਹਾ ਹੈ। ਇਹ ਧਮਕੀ ਅਮਰੀਕਾ ਦੇ ਬਲੈਕਮੇਲਿੰਗ ਰਵੱਈਏ ਨੂੰ ਪ੍ਰਗਟ ਕਰਦੀ ਹੈ। ਚੀਨ ਇਸਨੂੰ ਕਦੇ ਵੀ ਸਵੀਕਾਰ ਨਹੀਂ ਕਰੇਗਾ। ਜੇਕਰ ਅਮਰੀਕਾ ਆਪਣੀ ਮਰਜ਼ੀ ‘ਤੇ ਚੱਲਣ ‘ਤੇ ਜ਼ੋਰ ਦਿੰਦਾ ਹੈ, ਤਾਂ ਚੀਨ ਵੀ ਅੰਤ ਤੱਕ ਲੜੇਗਾ।

ਚੰਡੀਗੜ੍ਹ, 9 ਅਪ੍ਰੈਲ – ਅੱਜ ਚੰਡੀਗੜ੍ਹ ਦੇ ਇੰਡਸਟਰੀਅਲ ਏਰੀਆ ਫੇਜ਼ 2 ‘ਚ ਸਥਿਤ ਪਾਸਪੋਰਟ ਦਫ਼ਤਰ ਦਾ ਸਰਵਰ ਅਚਾਨਕ ਡਾਊਨ ਹੋਣ ਨਾਲ ਲੋਕਾਂ ਨੂੰ ਕਈ ਤਰ੍ਹਾਂ ਦੀਆਂ ਮੁਸੀਬਤਾਂ ਦਾ ਸਾਹਮਣਾ ਕਰਨਾ ਪਿਆ। ਤਪਦੀ ਗਰਮੀ ਕਾਰਨ ਲੋਕਾਂ ਨੂੰ ਦਫ਼ਤਰ ਦੇ ਬਾਹਰ ਖੜ੍ਹੇ ਹੋਣਾ ਵੀ ਔਖਾ ਹੋ ਗਿਆ। ਜ਼ਿਕਰਯੋਗ ਹੈ ਕਿ ਦਫ਼ਤਰੀ ਅਮਲੇ ਵਲੋਂ ਲੋਕਾਂ ਨੂੰ ਅਲੱਗ-ਅਲੱਗ ਸਮੇਂ ‘ਤੇ ਫਿੰਗਰ ਪ੍ਰਿੰਟਸ ਲਈ ਬੁਲਾਇਆ ਜਾਂਦਾ ਹੈ। ਲੋਕ ਆਪਣੇ ਸਮੇਂ ਤੋਂ ਪਹਿਲਾਂ ਹੀ ਪਹੁੰਚ ਜਾਂਦੇ ਹਨ। ਜੇਕਰ ਕੁਝ ਸਮੇਂ ਲਈ ਸਰਵਰ ਰੁਕ ਜਾਂਦਾ ਹੈ ਤਾਂ ਸੁਭਾਵਿਕ ਹੈ ਕਿ ਲੋਕਾਂ ਦੀ ਭੀੜ ਵਧੇਗੀ। ਇਸ ਤਰ੍ਹਾਂ ਇਕ-ਇਕ ਕਰ ਕੇ ਲੋਕ ਜੁੜਦੇ ਰਹੇ ਤੇ ਅੰਦਰ ਸਰਵਰ ਡਾਊਨ ਹੋਣ ਕਾਰਨ ਦਫ਼ਤਰੀ ਅਮਲਾ ਪਰੇਸ਼ਾਨ ਦਿਸਿਆ।

ਚੰਡੀਗੜ੍ਹ, 9 ਅਪ੍ਰੈਲ – ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ (ਐਸਜੀਪੀਸੀ) ਦੇ ਮੁੱਖ ਖਜ਼ਾਨਚੀ ਨੇ ਨਹਿਰ ਵਿੱਚ ਛਾਲ ਮਾਰ ਕੇ ਆਪਣੀ ਜੀਵਨਲੀਲਾ ਸਮਾਪਤ ਕਰ ਲਈ ਗਈ ਹੈ। ਮ੍ਰਿਤਕ ਦੀ ਪਛਾਣ ਤਰਸੇਮ ਸਿੰਘ ਵਾਸੀ ਤਰਨ ਤਾਰਨ ਵਜੋਂ ਹੋਈ ਹੈ। ਮੀਡੀਆ ਰਿਪੋਰਟਾਂ ਮੁਤਾਬਿਕ, ਤਰਸੇਮ ਸਿੰਘ ਪਿਛਲੇ ਕੁਝ ਦਿਨਾਂ ਤੋਂ ਮਾਨਸਿਕ ਤੌਰ ‘ਤੇ ਪ੍ਰੇਸ਼ਾਨ ਚੱਲ ਰਹੇ ਸਨ। ਘਟਨਾ ਦੀ ਸੂਚਨਾ ਮਿਲਦੇ ਹੀ ਪੁਲਿਸ ਨੇ ਮੌਕੇ ‘ਤੇ ਪਹੁੰਚ ਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।

ਜੀਵਨ ਵਿੱਚ ਇਨਸਾਨ ਨੂੰ ਹਰ ਰੋਜ਼ ਕੋਈ ਨਾ ਕੋਈ ਉਸਤਾਦ ਮਿਲਦਾ ਹੈ। ਉਹ ਛੋਟਾ ਬੱਚਾ ਵੀ ਹੋ ਸਕਦਾ ਹੈ। ਉਹ ਵੱਡਾ ਬੱਚਾ ਵੀ ਹੋ ਸਕਦਾ ਹੈ । ਉਹ ਬੰਦਾ ਵੀ ਹੋ ਸਕਦਾ ਹੈ ਤੇ ਉਹ ਕੋਈ ਜਾਨਵਰ ਵੀ ਹੋ ਸਕਦਾ ਹੈ। ਇਸ ਗੱਲ ਤੋਂ ਨਹੀਂ ਮੁਕਰਿਆ ਜਾ ਸਕਦਾ ਕਿ ਮਨੁੱਖ ਨੇ ਆਪਣੇ ਆਲੇ ਦੁਆਲੇ ਤੋਂ ਹੀ ਸਿੱਖਣਾ ਹੁੰਦਾ ਹੈ। ਮੈਂ ਵੀ ਕੁਝ ਨਾ ਕੁਝ ਆਪਣੇ ਆਲੇ ਦੁਆਲੇ ਤੋਂ ਸਿੱਖਣ ਦੀ ਕੋਸ਼ਿਸ਼ ਕੀਤੀ ਹੈ ਜਾਂ ਮੈਨੂੰ ਸਿਖਾ ਦਿੱਤਾ ਗਿਆ। ਅੱਜ ਮੈਂ ਇੱਕ ਇਹੋ ਜਿਹੇ ਇਨਸਾਨ ਦੀ ਗੱਲ ਕਰਨ ਲੱਗਾ ਹਾਂ, ਜਿਸਨੇ ਮੇਰੀ ਤਕਨੀਕੀ ਮੁਹਾਰਤ ਦੇ ਵਿੱਚ ਮੁੱਢਲੀ ਮਦਦ ਕੀਤੀ। ਗੱਲ ਕਰਦੇ ਹਾਂ, ਨਰਿੰਦਰ ਉਸਤਾਦ ਦੀ । ਸਕੂਲ ਵਿੱਚ ਪੜ੍ਹਦੇ ਹੋਏ ਮੈਨੂੰ ਸ਼ੌਕ ਸੀ ਕਿ ਇੰਜਣਾਂ ਬਾਰੇ ਜਾਣਕਾਰੀ ਲਈ ਜਾਵੇ, ਇੰਜਣ ਕਿਵੇਂ ਕੰਮ ਕਰਦੇ ਹਨ ਤੇ ਕਿਵੇਂ ਉਹਨਾਂ ਦੇ ਵਿੱਚ ਤਾਕਤ ਪੈਦਾ ਹੁੰਦੀ ਹੈ । ਇਸ ਕੰਮ ਲਈ ਮੈਂ ਛੁੱਟੀ ਵਾਲੇ ਦਿਨ ਜਾਂ ਸਕੂਲ ਤੋਂ ਬਾਅਦ, ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ ਫਾਰਮ ਸੁਪਰਡੈਂਟ ਦੀ ਵਰਕਸ਼ਾਪ ਵਿੱਚ ਜਾਣਾ ਸ਼ੁਰੂ ਕਰ ਦਿੱਤਾ । ਉੱਥੇ ਟਰੈਕਟਰਾਂ ਦੀ ਰਿਪੇਅਰ ਦਾ ਕੰਮ ਹੁੰਦਾ ਸੀ ਜਾਂ ਹੋਰ ਛੋਟੇ ਮੋਟੇ ਇੰਜਣਾਂ ਦਾ ਕੰਮ ਹੁੰਦਾ ਸੀ । ਉਥੇ ਕਈ ਜਣੇ ਕੰਮ ਕਰਦੇ ਸਨ, ਉਹਨਾਂ ਦੇ ਵਿੱਚ ਇੱਕ ਜਿਹੜਾ ਮੁਖੀ ਸੀ, ਉਹ ਨਰਿੰਦਰ ਨਾਮ ਦਾ ਬੰਦਾ ਸੀ ਉਸ ਨੂੰ ਸਾਰੇ ਉਸਤਾਦ ਜੀ ਕਹਿੰਦੇ ਸਨ। ਮੈਂ ਛੋਟਾ ਸੀ, ਇਸ ਲਈ ਉਹ ਮੇਰਾ ਖਿਆਲ ਰੱਖਣ ਲੱਗ ਪਿਆ। ਮੈਂ ਉਹਦੇ ਨਾਲ ਗੱਲਾਂ ਕਰਨੀਆਂ, ਕੰਮ ਕਰਾਉਣਾ ਅਤੇ ਹਾਸਾ ਠੱਠਾ ਵੀ ਕਰ ਲੈਣਾ , ਜੋ ਮੇਰੀ ਬਚਪਨ ਤੋਂ ਹੀ ਆਦਤ ਰਹੀ ਹੈ । ਉਹ ਮੈਨੂੰ ਬਹੁਤ ਪਿਆਰ ਕਰਦਾ ਸੀ। ਉਸਨੇ ਇੰਜਣਾਂ ਬਾਰੇ ਮੈਨੂੰ ਬਹੁਤ ਕੁਝ ਸਿਖਾਇਆ, ਜਿਹਦੇ ਵਿੱਚੋਂ ਅੱਜ ਜਿਹੜੀ ਮੈਂ ਇੱਕ ਗੱਲ ਕਰਨ ਲੱਗਾ ਹਾਂ, ਉਹ ਹੈ ਕਿ ਕਿਸੇ ਨਟ ਨੂੰ ਖੋਲਣ ਜਾਂ ਕਸਣ ਦਾ ਗੁਰ। ਨਟ ਤੇ ਬੋਲਟ ਤੁਹਾਨੂੰ ਪਤਾ ਹੈ ਦੋ ਚੀਜ਼ਾਂ ਹੁੰਦੀਆਂ ਹਨ, ਜਿਹੜੀ ਚੀਜ਼ ਦੇ ਉੱਤੇ ਕਸਿਆ ਜਾਂਦਾ ਹੈ ਉਸ ਨੂੰ ਬੋਲਟ ਕਹਿੰਦੇ ਹਨ ਅਤੇ ਜਿਹੜੀ ਚੀਜ਼ ਕੱਸੀ ਜਾਂਦੀ ਹੈ ਉਸ ਨੂੰ ਨਟ ਕਹਿੰਦੇ ਹਨ । ਜਦੋਂ ਉਹਨਾਂ ਨੂੰ ਅਸੀਂ ਆਪਸ ਵਿੱਚ ਕਸਦੇ ਹਾਂ ਤਾਂ ਉਸ ਨੂੰ ਕਲੋਕ ਵਾਈਜ ਕਸਿਆ ਜਾਂਦਾ ਹੈ ਅਤੇ ਜਦੋਂ ਖੋਲਣਾ ਹੁੰਦਾ ਹੈ ਤਾਂ ਐਂਟੀ ਕਲੋਕਵਾਈਜ ਖੋਲਿਆ ਜਾਂਦਾ। ਹਾਲਾਂਕਿ ਇਹ ਬੜੀ ਇੰਟਰਸਟਿੰਗ ਗੱਲ ਹੈ ਕਿ ਕਈ ਨਟ ਬੋਲਟ ਪੁੱਠੇ ਵੀ ਖੁੱਲਦੇ ਜਾਂ ਬੰਦ ਹੁੰਦੇ ਹਨ, ਪਰ ਉਹ ਬਹੁਤ ਖਾਸ ਹਾਲਾਤ ਦੇ ਵਿੱਚ, ਜਿੱਥੇ ਕਿ ਇੰਜਣ ਦੀ ਜਿਹੜੀ ਚਾਲ ਹੈ, ਉਹ ਇਸ ਤਰੀਕੇ ਦੀ ਹੁੰਦੀ ਹੈ ਕਿ ਉੱਥੇ ਅਗਰ ਇਸ ਤਰਾਂ ਨੱਟ ਕੱਸੇ ਹੋਣ ਤਾਂ ਉਹ ਖੁੱਲ ਸਕਦੇ ਹਨ, ਇਸ ਲਈ ਉਥੇ ਪੁੱਠੀ ਚੂੜੀ ਦੇ ਨੱਟ ਬਣਾਏ ਜਾਂਦੇ ਹਨ । ਇੱਕ ਜਿਹੜੀ ਇਹਦੇ ਵਿੱਚ ਖਾਸ ਗੱਲ ਹੈ ਕਿ ਇਹਨੂੰ ਜ਼ੋਰ ਕਿਵੇਂ ਲਾਉਣਾ ? ਕਸਣਾ ਕਿਵੇਂ ? ਬਹੁਤ ਹੀ ਕੰਮ ਦੀ ਗੱਲ ਦੱਸੀ ਹੈ। ਅਸੀਂ ਅਕਸਰ ਦੇਖਦੇ ਹਂ ਕਿ ਨਟ ਬੋਲਟ ਕਸਣ ਵੇਲੇ ਅਸੀਂ ਜ਼ੋਰ ਲਾਉਂਦੇ ਹਾਂ ਤੇ ਉਹ ਟੁੱਟ ਜਾਂਦਾ ਹੈ ਜਾਂ ਜਿਹੜਾ ਨਟ ਹੈ ਉਹ ਫਰੀ ਹੋ ਜਾਂਦਾ ਹੈ। ਇਹ ਸਮੱਸਿਆ ਆਮ ਮਕੈਨਿਕਾਂ ਨੂੰ ਆਉਂਦੀ ਹੈ ਤੇ ਘਰਾਂ ਦੇ ਵਿੱਚ ਵੀ ਨਟ ਕਸਣ ਲੱਗੇ ਆਮ ਹੋ ਜਾਂਦੀ ਹੈ। ਇਸ ਦਾ ਹੱਲ ਉਹਨੇ ਬਹੁਤ ਸਾਦਾ ਜਿਹਾ ਦੱਸਿਆ ਕਿ , ਜਦੋਂ ਅਸੀਂ ਬੋਲਟ ਕੱਸਣ ਲੱਗਦੇ ਹਾਂ ਜਾਂ ਨਟ ਕਸਣ ਲੱਗਦੇ ਹਾਂ ਤਾਂ ਕਈ ਵਾਰੀ ਅਸੀਂ ਉਹਨੂੰ ਜ਼ੋਰ ਲਾ ਦਿੰਦੇ ਹਾਂ , ਜਿਵੇਂ ਅਸੀਂ ਚਾਬੀ ਉੱਤੇ ਪੈਰ ਮਾਰ ਕੇ ਉਹਨੂੰ ਜੋਰ ਦੀ ਧੱਕਾ ਦੇ ਦਿੰਦੇ ਹਾਂ ਜਾਂ ਉਹਦੇ ਉੱਤੇ ਜ਼ੋਰ ਦੀ ਪੈਰ ਮਾਰ ਦਿੰਨੇ ਹਾਂ , ਤਾਂ ਕਿ ਉਹ ਪੂਰੀ ਤਰ੍ਹਾਂ ਕਸ ਹੋ ਜਾਵੇ। ਇਹ ਸਭ ਤੋਂ ਵੱਡੀ ਗਲਤੀ ਹੈ, ਕਿਉਂਕਿ ਅਗਰ ਤੁਸੀਂ ਜੋਰ ਦੀ ਉਹਨੂੰ ਹੁਜਕਾ ਮਾਰੋਗੇ ਤਾਂ ਉਹ ਨਟ ਜਾਂ ਬੋਲਟ ਟੁੱਟਣ ਦੇ ਪੂਰੇ ਚਾਂਸ ਬਣ ਜਾਂਦੇ ਹਨ। ਪਰ ਜਦੋਂ ਖੋਲਣਾ ਹੈ ਉਦੋਂ ਉਹਦੇ ਟੁੱਟਣ ਦੇ ਚਾਂਸ ਬਹੁਤ ਘੱਟ ਹੁੰਦੇ ਹਨ। ਜੇਕਰ ਜਾਮ ਹੋਣ ਤਾਂ ਉਹਦੇ ਵਿੱਚ ਮਿੱਟੀ ਦਾ ਤੇਲ ਜਾਂ ਥੋੜਾ ਡੀਜਲ ਪਾ ਦਿਓ। ਥੋੜੀ ਦੇਰ ਉਹਨੂੰ ਪਿਆ ਰਹਿਣ ਦਿਓ। ਉਹਦਾ ਜੰਗਾਲ ਉਤਰ ਜਾਏਗਾ। ਫਿਰ ਤੁਸੀਂ ਝਟਕਾ ਮਾਰ ਕੇ ਉਹਨੂੰ ਖੋਲ ਸਕਦੇ ਹੋ । ਪਰ ਕੱਸਣ ਵੇਲੇ ਝਟਕਾ ਮਾਰ ਕੇ ਕਸੋਗੇ, ਤੁਹਾਡਾ ਨਟ ਬੋਲ ਟੁੱਟਣ ਦੇ 90% ਚਾਂਸ ਹੁੰਦੇ ਹਨ। ਇਹ ਗੁਰ ਮੇਰੇ ਸਾਰੀ ਜ਼ਿੰਦਗੀ ਬੜਾ ਕੰਮ ਆਇਆ। ਨਟ ਤਾਂ ਇੱਕ ਪਾਸੇ, ਮੈਂ ਤਾਂ ਜਦ ਬੰਦੇ ਨੂੰ ਕਸਦਾ ਹਾਂ ਤਾਂ ਉਦੋਂ ਝਟਕਾ ਨਹੀਂ ਮਾਰਦਾ, ਪਰ ਜਦੋਂ ਬੰਦੇ ਨੂੰ ਮੈਂ ਖੋਲਣਾ ਹੁੰਦਾ , ਤਾਂ ਮੈਂ ਇੱਕੋ ਝਟਕੇ ਨਾਲ ਖੋਲ ਦਿੰਨਾ। ਇਹ ਅਸੂਲ, ਇਹ ਨੁਕਤਾ, ਇਹ ਗੱਲ, ਹਰ ਥਾਂ ਲਾਗੂ ਹੁੰਦੀ ਹੈ। ਚਾਹੇ ਉਹ ਨਟ ਹੋਣ, ਚਾਹੇ ਉਹ ਬੰਦੇ ਹੋਣ, ਚਾਹੇ ਉਹ ਜਾਨਵਰ ਹੋਣ, ਚਾਹੇ ਰੁੱਖ ਹੋਣ। ਰੁੱਖ ਨੂੰ ਝਟਕੇ ਨਾਲ ਪੱਟ ਸਕਦੇ ਹੋ, ਰੁੱਖ ਗੱਡਣਾ ਹੋਵੇ ਉਹਨੂੰ ਝਟਕੇ ਨਾਲ ਨਹੀਂ ਗੱਡ ਸਕਦੇ। ਮੈਂ ਅੱਜ ਆਪਣੇ ਉਸਤਾਦ ਨਰਿੰਦਰ ਨੂੰ ਯਾਦ ਕਰਦਾ ਹੋਇਆ (ਉਹ ਪਤਾ ਨਹੀਂ ਹੁਣ ਕਿੱਥੇ ਆ) ਉਸਨੂੰ ਨਮਨ ਹਾਂ ਤੇ ਉਸ ਨੂੰ ਧੰਨਵਾਦ ਕਰਦਾ ਹਾਂ, ਕਿ ਸਾਰੀ ਜਿੰਦਗੀ ਉਸਦਾ ਇਹ ਨੁਕਤਾ ਮੇਰੇ ਬਹੁਤ ਕੰਮ ਆਇਆ। ਬਹੁਤ ਬਹੁਤ ਧੰਨਵਾਦ ਨਰਿੰਦਰ ਉਸਤਾਦ ਬਹੁਤ ਬਹੁਤ ਧੰਨਵਾਦ ਨਰਿੰਦਰ ਉਸਤਾਦ। ਜਨਮੇਜਾ ਸਿੰਘ ਜੌਹਲ

ਪਟਿਆਲਾ, 9 ਅਪ੍ਰੈਲ – ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ਵਿਖੇ ਕਾਰਜਸ਼ੀਲ ਸ਼੍ਰੋਮਣੀ ਪੰਜਾਬੀ ਬਾਲ ਸਾਹਿਤ ਲੇਖਕ, ਸਾਹਿਤ ਅਕਾਦਮੀ ਬਾਲ ਸਾਹਿਤ ਐਵਾਰਡੀ, ਸਟੇਟ ਐਵਾਰਡੀ ਅਤੇ ਪੰਜਾਬੀ ਸਾਹਿਤ ਸਭਾ (ਰਜਿ.) ਪਟਿਆਲਾ ਦੇੇ ਪ੍ਰਧਾਨ ਡਾ. ਦਰਸ਼ਨ ਸਿੰਘ ‘ਆਸ਼ਟ` ਦੀ ਬਾਲ ਨਾਟ-ਪੁਸਤਕ ‘ਨਾਟਕ ਵੰਨ ਸੁਵੰਨੇ` ਕੁਰਕਸ਼ੇਤਰ ਯੂਨੀਵਰਸਿਟੀ ਕੁਰਕਸ਼ੇਤਰ ਦੇ ਪੰਜਾਬੀ ਵਿਭਾਗ ਦੇ ਪੋਸਟਗ੍ਰੈਜੂਏਟ ਕਲਾਸਾਂ ਦੇ ਸਿਲੇਬਸ ਵਿਚ ਸ਼ਾਮਿਲ ਕੀਤੀ ਗਈ ਹੈ।ਯੂਨੀਵਰਸਿਟੀ ਦੇ ਪੰਜਾਬੀ ਵਿਭਾਗ ਦੇ ਮੁਖੀ ਪ੍ਰੋਫ਼ੈਸਰ ਡਾ. ਕੁਲਦੀਪ ਸਿੰਘ ਅਨੁਸਾਰ ਪੰਜਾਬੀ ਅਕਾਦਮੀ, ਦਿੱਲੀ ਵੱਲੋਂ ਛਾਪੀ ਗਈ। ਇਸ ਪੁਸਤਕ ਨੂੰ ਪੰਜਾਬੀ ਵਿਭਾਗ ਦੇ ਨਵੇਂ ਅਕਾਦਮਿਕ ਸੈਸ਼ਨ ਤੋਂ ਲਾਗੂ ਕੀਤਾ ਗਿਆ ਹੈ।ਇਸ ਸੰਬੰਧੀ ਹੋਰ ਵੇਰਵੇ ਦਿੰਦਿਆਂ ਉਘੇ ਵਿਦਵਾਨ ਡਾ. ਕੁਲਦੀਪ ਸਿੰਘ ਨੇ ਦੱਸਿਆ ਕਿ ਇਸ ਨਾਲ ਜਿੱਥੇ ਪੰਜਾਬ ਤੋਂ ਬਾਹਰ ਦੇ ਵਿਦਿਆਰਥੀ ਪੰਜਾਬੀ ਬਾਲ ਸਾਹਿਤ ਪਰੰਪਰਾ ਤੋਂ ਜਾਣੂੰ ਹੋਣਗੇ ਉਥੇ ਵਿਦਿਆਰਥੀਆਂ ਵਿਚ ਅਕਾਦਮਿਕ ਪੱਧਰ ਤੇ ਪੰਜਾਬੀ ਬਾਲ-ਮਨ ਦੀ ਸੰਵੇਦਨਾ ਨੂੰ ਸਮਝਣ ਦੀ ਸੂਝ ਵੀ ਪੈਦਾ ਹੋਵੇਗੀ। ਜ਼ਿਕਰਯੋਗ ਹੈ ਕਿ ਡਾ. ‘ਆਸ਼ਟ` ਦੀ ਇਹ ਬਾਲ ਨਾਟਕ ਪੁਸਤਕ ਪੰਜਾਬੀ ਅਕਾਦਮੀ ਦਿੱਲੀ ਦੇ ਤਤਕਾਲੀਨ ਸਕੱਤਰ ਐਮ.ਐਸ.ਬਤਰਾ ਦੀ ਅਗਵਾਈ ਅਧੀਨ ਪੰਜਾਬੀ ਦੇ ਉਘੇ ਵਿਦਵਾਨ ਡਾ.ਹਰਿਭਜਨ ਸਿੰਘ,ਗਲਪਕਾਰ ਗੁਰਬਚਨ ਸਿੰਘ ਭੁੱਲਰ ਅਤੇ ਸਿੱਖਿਆ ਸ਼ਾਸਤਰੀ ਸ੍ਰੀ ਜਗਦੀਸ਼ ਕੌਸ਼ਲ ਤੇ ਆਧਾਰਿਤ ਬਾਲ ਸਾਹਿਤ ਕਮੇਟੀ ਨੇ ਛਾਪੀ ਸੀ ਜਿਸ ਦਾ ਕੁਝ ਸਾਲ ਪਹਿਲਾਂ ਦੂਜਾ ਸੰਸਕਰਣ ਖ਼ਤਮ ਹੋਣ ਉਪਰੰਤ ਤੀਜਾ ਸੰਸਕਰਣ ਛਾਪਣ ਦੀ ਤਿਆਰੀ ਹੈ।ਇਹਨਾਂ ਬਾਲ ਨਾਟਕਾਂ ਵਿਚ ਬੱਚਿਆਂ ਨੂੰ ਪੰਜਾਬੀ ਭਾਸ਼ਾ,ਸਾਹਿਤ ਅਤੇ ਸਭਿਆਚਾਰ ਦੇ ਬਹੁਦਿਸ਼ਾਵੀ ਵਿਕਾਸ ਦੇ ਆਸ਼ੇ ਅਧੀਨ ਗਿਆਨ-ਵਿਗਿਆਨ ਅਤੇ ਉਸਾਰੂ ਜੀਵਨ ਮੁੱਲਾਂ ਨਾਲ ਜੋੜਨ ਦੀ ਪ੍ਰੇਰਣਾ ਦਿੱਤੀ ਗਈ ਹੈ। ਇੱਥੇ ਇਹ ਵੀ ਜ਼ਿਕਰਯੋਗ ਹੈ ਕਿ ਭਾਰਤ ਦੀ ਕਿਸੇ ਯੂਨੀਵਰਸਿਟੀ ਨੇ ਪਹਿਲੀ ਵਾਰੀ ਪੰਜਾਬੀ ਬਾਲ ਸਾਹਿਤ ਨੂੰ ਅਕਾਦਮਿਕ ਪੱਧਰ ਤੇ ਪ੍ਰਮਾਣਿਕਤਾ ਅਤੇ ਪ੍ਰਵਾਨਗੀ ਦਿੰਦੇ ਹੋਏ ਆਪਣੇ ਸਿਲੇਬਸ ਦਾ ਹਿੱਸਾ ਬਣਾਇਆ ਹੈ।ਇਸ ਸਾਰਥਿਕ ਉੁਦਮ ਨਾਲ ਭਵਿੱਖ ਵਿਚ ਬਾਲ ਸਾਹਿਤ ਵਿਸ਼ੇਸ਼ ਕਰਕੇ ਪੰਜਾਬੀ ਬਾਲ ਨਾਟਕ ਪਰੰਪਰਾ ਹੋਰ ਡੂੰਘੀ ਖੋਜ ਦੀਆਂ ਸੰਭਾਵਨਾਵਾਂ ਮੋਕਲੀਆਂ ਹੋ ਗਈਆਂ ਹਨ।ਇਸ ਪੁਸਤਕ ਤੋਂ ਪਹਿਲਾਂ ਵੀ ਡਾ. ‘ਆਸ਼ਟ` ਦੀਆਂ ਪੰਜਾਬ,ਹਰਿਆਣਾ,ਮਹਾਰਾਸ਼ਟਰ,ਦਿੱਲੀ ਆਦਿ ਪ੍ਰਾਂਤਾਂ ਦੇ ਸਰਕਾਰੀ ਸਕੂਲਾਂ ਦੀਆਂ ਵੱਖ ਵੱਖ ਸ਼੍ਰੇਣੀਆਂ ਦੀਆਂ ਪੰਜਾਬੀ ਪਾਠ-ਪੁਸਤਕਾਂ ਵਿਚ ਸਿਲੇਬਸ ਵਜੋਂ ਪਿਛਲੇ ਕਾਫੀ ਅਰਸੇ ਤੋਂ ਪੜ੍ਹਾਇਆ ਜਾ ਰਿਹਾ ਹੈ।