ਔਕਲੈਂਡ, 21 ਮਈ – ਅੱਜ ਵਿਸ਼ਵ ਸਭਿਆਚਾਰਕ (ਸੰਸਕ੍ਰਿਤਿਕ) ਵਿਭਿੰਨਤਾ ਦਿਵਸ ਮਨਾਇਆ ਜਾ ਰਿਹਾ ਹੈ ਜਿਸਦਾ ਉਦੇਸ਼ ਇਸ ਉਤੇ ਸੰਵਾਦ ਕਰਨਾ ਅਤੇ ਵਿਕਾਸ ਕਰਨਾ ਹੈ। ਸੰਸਕ੍ਰਿਤਿਕ ਵਿਭਿੰਨਤਾ ਕਿਸੇ ਵੀ ਸਮਾਜ ਦੀ ਤਾਕਤ ਹੁੰਦੀ ਹੈ। ਇਹ ਵਿਭਿੰਨ ਭਾਸ਼ਾਵਾਂ, ਧਰਮਾਂ, ਰਿਵਾਜਾਂ ਅਤੇ ਜੀਵਨ ਸ਼ੈਲੀਆਂ ਨੂੰ ਇੱਕ-ਦੂਜੇ ਨਾਲ ਜੋੜਦੀ ਹੈ। 21 ਮਈ ਨੂੰ ਯੂਨੈਸਕੋ (UNESCO) ਦੁਆਰਾ ਵਿਸ਼ਵ ਸੰਸਕ੍ਰਿਤਿਕ ਵਿਭਿੰਨਤਾ ਦਿਵਸ ਵਜੋਂ ਮਨਾਇਆ ਜਾਂਦਾ ਹੈ, ਜੋ ਸੰਵਾਦ ਅਤੇ ਵਿਕਾਸ ਲਈ ਸੰਸਕ੍ਰਿਤਿਕ ਵਿਭਿੰਨਤਾ ਦੀ ਮਹੱਤਤਾ ਨੂੰ ਉਜਾਗਰ ਕਰਦਾ ਹੈ।
ਨਿਊਜ਼ੀਲੈਂਡ ਵਿੱਚ ਸੰਸਕ੍ਰਿਤਿਕ ਵਿਭਿੰਨਤਾ
ਨਿਊਜ਼ੀਲੈਂਡ ਇੱਕ ਬਹੁ-ਸੰਸਕ੍ਰਿਤਿਕ ਦੇਸ਼ ਹੈ, ਜਿੱਥੇ ਵਿਭਿੰਨ ਭਾਸ਼ਾਵਾਂ, ਧਰਮ ਅਤੇ ਰਿਵਾਜਾਂ ਦੇ ਲੋਕ ਰਹਿੰਦੇ ਹਨ। 2023 ਦੀ ਮਰਦਮਸ਼ੁਮਾਰੀ ਮੁਤਾਬਕ, 150 ਤੋਂ ਵੱਧ ਭਾਸ਼ਾਵਾਂ ਇੱਥੇ ਬੋਲੀ ਜਾਂਦੀਆਂ ਹਨ। 28.8% ਲੋਕ ਨਿਊਜ਼ੀਲੈਂਡ ਤੋਂ ਬਾਹਰ ਜਨਮੇ ਹੋਏ ਹਨ, ਜੋ 2013 ਦੀ ਮਰਦਮਸ਼ੁਮਾਰੀ ਤੋਂ 25.2% ਵੱਧ ਹਨ। 2023 ਮਰਦਮਸ਼ੁਮਾਰੀ ਮੁਤਾਬਕ, ਨਿਊਜ਼ੀਲੈਂਡ ਵਿੱਚ ਪੰਜਾਬੀ ਭਾਸ਼ਾ ਬੋਲਣ ਵਾਲਿਆਂ ਦੀ ਗਿਣਤੀ 49,656 ਹੋ ਗਈ ਹੈ, ਜੋ 2018 ਨਾਲੋਂ 45.1% ਵੱਧ ਹੈ। ਇਹ ਪੰਜਾਬੀ ਨੂੰ ਦੇਸ਼ ਦੀ ਸਭ ਤੋਂ ਤੇਜ਼ ਵਧ ਰਹੀ ਭਾਸ਼ਾ ਬਣਾਉਂਦੀ ਹੈ।
ਇਸ ਵਾਧੂ ਗਿਣਤੀ ਦਾ ਕਾਰਨ ਪੰਜਾਬ ਤੋਂ ਵਧ ਰਿਹਾ ਪ੍ਰਵਾਸ , ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਅਤੇ ਕਾਮਿਆਂ ਦੀ ਆਮਦ ਹੋ ਸਕਦਾ ਹੈ। ਪੰਜਾਬੀ ਭਾਈਚਾਰੇ ਵੱਲੋਂ ਆਪਣੀ ਭਾਸ਼ਾ ਨੂੰ ਸੰਭਾਲਣ ਦੀ ਤੀਬਰ ਇੱਛਾ ਹੈ। ਕਈ ਸੰਸਥਾਵਾਂ ਆਪਣੇ ਅਦਾਰਿਆਂ ਅਤੇ ਸਕੂਲਾਂ ਵਿੱਚ ਪੰਜਾਬੀ ਪੜ੍ਹਾ ਰਹੀਆਂ ਹਨ। ਹੁਣ ਇਥੇ ਵੀ ਮਾਓਰੀ ਭਾਸ਼ਾ ਹਫ਼ਤੇ ਵਾਂਗ ਪੰਜਾਬੀ ਭਾਸ਼ਾ ਹਫ਼ਤਾ ਮਨਾਉਣਾ ਸ਼ੁਰੂ ਹੋ ਗਿਆ ਹੈ ਅਤੇ ਇਸ ਸਾਲ 03 ਨਵੰਬਰ ਤੋਂ 9 ਨਵੰਬਰ 2025 ਤੱਕ ਮਨਾਇਆ ਜਾ ਰਿਹਾ ਹੈ। ਮਾਓਰੀ ਭਾਸ਼ਾ ਬੋਲਣ ਵਾਲਿਆਂ ਦੀ ਗਿਣਤੀ 213,849 ਹੋ ਗਈ ਹੈ, ਜੋ 2018 ਦੇ 185,955 ਨਾਲੋਂ 15% ਵੱਧ ਹੈ।
