ਨਵੀਂ ਦਿੱਲੀ, 13 ਮਾਰਚ – ਭਾਰਤੀ ਫੌਜ ਵਿੱਚ ਭਰਤੀ ਹੋਣ ਦਾ ਸੁਪਨਾ ਲੈਣ ਵਾਲਿਆਂ ਲਈ ਇੱਕ ਸੁਨਹਿਰੀ ਮੌਕਾ ਆ ਗਿਆ ਹੈ। ਭਾਰਤੀ ਫੌਜ ਵਿੱਚ ਅਗਨੀਵੀਰ ਭਰਤੀ ਲਈ ਅਰਜ਼ੀ ਦੀ ਪ੍ਰਕਿਰਿਆ ਸ਼ੁਰੂ ਹੋ ਗਈ ਹੈ। ਕੋਈ ਵੀ ਉਮੀਦਵਾਰ ਜੋ ਅਗਨੀਵੀਰ ਨਾਲ ਜੁੜਨਾ ਚਾਹੁੰਦਾ ਹੈ, ਭਾਰਤੀ ਫੌਜ ਦੀ ਅਧਿਕਾਰਤ ਵੈੱਬਸਾਈਟ joinindianarmy.nic.in ‘ਤੇ ਜਾ ਕੇ ਆਨਲਾਈਨ ਅਪਲਾਈ ਕਰ ਸਕਦਾ ਹੈ। ਧਿਆਨ ਰਹੇ ਕਿ ਅਪਲਾਈ ਕਰਨ ਦੀ ਆਖਰੀ ਤਰੀਕ 10 ਅਪ੍ਰੈਲ ਹੈ।
ਕਿਹੜੀਆਂ ਅਸਾਮੀਆਂ ਲਈ ਭਰਤੀ ?
ਭਾਰਤੀ ਫੌਜ ਵਿੱਚ, ਅਗਨੀਵੀਰ ਜਨਰਲ ਡਿਊਟੀ (ਜੀ.ਡੀ.), ਟੈਕਨੀਕਲ, ਕਲਰਕ ਅਤੇ ਸਟੋਰ ਕੀਪਰ ਟੈਕਨੀਕਲ, ਟਰੇਡਸਮੈਨ, ਸੈਨਿਕ ਫਾਰਮਾ, ਸੈਨਿਕ ਟੈਕਨੀਕਲ ਨਰਸਿੰਗ ਅਸਿਸਟੈਂਟ ਅਤੇ ਮਹਿਲਾ ਪੁਲਿਸ ਦੀਆਂ ਅਸਾਮੀਆਂ ‘ਤੇ ਭਰਤੀ ਕੀਤੀ ਜਾਵੇਗੀ। ਇਸ ਤੋਂ ਇਲਾਵਾ ਹੌਲਦਾਰ (ਸਰਵੇਅਰ), ਹੌਲਦਾਰ (ਸਿੱਖਿਆ), ਜੇਸੀਓ (ਧਾਰਮਿਕ ਅਧਿਆਪਕ), ਜੇਸੀਓ (ਕੇਟਰਿੰਗ) ਅਤੇ ਆਟੋਮੇਟਿਡ ਕਾਰਟੋਗ੍ਰਾਫਰ ਵਰਗੀਆਂ ਅਸਾਮੀਆਂ ਲਈ ਵੀ ਅਸਾਮੀਆਂ ਦਾ ਐਲਾਨ ਕੀਤਾ ਗਿਆ ਹੈ।
ਹੁਣ ਇੱਕ ਫਾਰਮ ਨਾਲ ਦੋ ਅਸਾਮੀਆਂ ਲਈ ਕਰੋ ਅਪਲਾਈ
ਇਸ ਵਾਰ ਅਗਨੀਵੀਰ ਭਰਤੀ ਪ੍ਰਕਿਰਿਆ ਵਿੱਚ ਕੁਝ ਮਹੱਤਵਪੂਰਨ ਬਦਲਾਅ ਕੀਤੇ ਗਏ ਹਨ। ਹੁਣ ਉਮੀਦਵਾਰ ਇੱਕ ਅਰਜ਼ੀ ਫਾਰਮ ਰਾਹੀਂ ਦੋ ਅਸਾਮੀਆਂ ਲਈ ਅਪਲਾਈ ਕਰ ਸਕਦੇ ਹਨ। ਅਰਜ਼ੀ ਦੀ ਫੀਸ 250 ਰੁਪਏ ਰੱਖੀ ਗਈ ਹੈ, ਜੋ ਉਮੀਦਵਾਰਾਂ ਨੂੰ ਆਨਲਾਈਨ ਮਾਧਿਅਮ ਰਾਹੀਂ ਅਦਾ ਕਰਨੀ ਪਵੇਗੀ।
ਦੌੜ ਦੇ ਸਮੇਂ ਵਿੱਚ ਤਬਦੀਲੀ
ਇਸ ਵਾਰ ਅਗਨੀਵੀਰ ਭਰਤੀ ਪ੍ਰੀਖਿਆ ਲਈ ਦੌੜ ਦਾ ਸਮਾਂ ਵੀ ਬਦਲਿਆ ਗਿਆ ਹੈ। ਹੁਣ 1600 ਮੀਟਰ ਦੌੜ ਲਈ ਚਾਰ ਵਰਗ ਨਿਰਧਾਰਤ ਕੀਤੇ ਗਏ ਹਨ। ਉਮੀਦਵਾਰਾਂ ਨੂੰ ਦੌੜ ਪੂਰੀ ਕਰਨ ਲਈ ਪਹਿਲਾਂ ਨਾਲੋਂ 30 ਸਕਿੰਟ ਵੱਧ ਸਮਾਂ ਮਿਲੇਗਾ। ਹੁਣ 6 ਮਿੰਟ 15 ਸਕਿੰਟ ਵਿੱਚ ਦੌੜ ਪੂਰੀ ਕਰਨ ਨੂੰ ਯੋਗ ਮੰਨਿਆ ਜਾਵੇਗਾ। ਪਹਿਲਾਂ ਇਹ ਸਮਾਂ 5 ਮਿੰਟ 45 ਸਕਿੰਟ ਸੀ। 5 ਮਿੰਟ 30 ਸਕਿੰਟ ਵਿੱਚ ਦੌੜ ਪੂਰੀ ਕਰਨ ਨਾਲ ਤੁਹਾਨੂੰ 60 ਅੰਕ ਮਿਲਣਗੇ। 5 ਮਿੰਟ 31 ਸਕਿੰਟ ਤੋਂ 5 ਮਿੰਟ 45 ਸਕਿੰਟ ਵਿੱਚ ਦੌੜ ਪੂਰੀ ਕਰਨ ਨਾਲ ਤੁਹਾਨੂੰ 48 ਅੰਕ ਮਿਲਣਗੇ।
