ਵਾਸ਼ਿੰਗਟਨ, 6 ਜਨਵਰੀ – ਅਮਰੀਕੀ ਰਾਸ਼ਟਰਪਤੀ ਜੋਅ ਬਾਇਡਨ ਨੇ ਸਾਬਕਾ ਵਿਦੇਸ਼ ਮੰਤਰੀ ਹਿਲੇਰੀ ਕਲਿੰਟਨ, ਫੁਟਬਾਲ ਸੁਪਰਸਟਾਰ ਲਿਓਨੇਲ ਮੈਸੀ, 94 ਸਾਲਾ ਵਿਵਾਦਤ ਸਮਾਜਸੇਵੀ ਜੌਰਜ ਸੋਰੋਸ ਤੇ ਅਦਾਕਾਰ ਡੈਂਜਲ ਵਾਸ਼ਿੰਗਟਨ ਸਣੇ 19 ਵਿਅਕਤੀਆਂ ਦਾ ਦੇਸ਼ ਦੇ ਸਿਖਰਲੇ ਨਾਗਰਿਕ ਪੁਰਸਕਾਰ ‘ਪ੍ਰੈਜ਼ੀਡੈਂਜ਼ੀਅਲ ਮੈਡਲ ਆਫ ਫਰੀਡਮ’ ਨਾਲ ਸਨਮਾਨ ਕੀਤਾ ਹੈ। ਇਹ ਪੁਰਸਕਾਰ ਉਨ੍ਹਾਂ ਵਿਅਕਤੀਆਂ ਨੂੰ ਦਿੱਤਾ ਜਾਂਦਾ ਹੈ, ਜਿਨ੍ਹਾਂ ਅਮਰੀਕਾ ਦੀ ਖੁਸ਼ਹਾਲੀ, ਉਸ ਦੀਆਂ ਕਦਰਾਂ-ਕੀਮਤਾਂ ਤੇ ਆਲਮੀ ਸ਼ਾਂਤੀ ਨੂੰ ਵਧਾਉਣ ਵਿੱਚ ਅਹਿਮ ਯੋਗਦਾਨ ਪਾਇਆ ਹੋਵੇ ਜਾਂ ਫਿਰ ਜਨਤਕ ਜਾਂ ਨਿੱਜੀ ਖੇਤਰ ’ਚ ਅਹਿਮ ਕੰਮ ਕੀਤੇ ਹੋਣ। ਅਰਜਨਟੀਨਾ ਦਾ ਫੁਟਬਾਲ ਖਿਡਾਰੀ ਮੈਸੀ ਪਹਿਲਾਂ ਤੋਂ ਨਿਰਧਾਰਤ ਪ੍ਰੋਗਰਾਮਾਂ ਕਰਕੇ ਇਹ ਪੁਰਸਕਾਰ ਲੈਣ ਲਈ ਵ੍ਹਾਈਟ ਹਾਊਸ ਵਿੱਚ ਨਿੱਜੀ ਰੂਪ ’ਚ ਮੌਜੂਦ ਨਹੀਂ ਸੀ।
ਬਾਇਡਨ ਨੇ ਵ੍ਹਾਈਟ ਹਾਊਸ ਦੇ ਈਸਟ ਰੂਮ ਵਿਚ ਰੱਖੇ ਸਮਾਗਮ ਦੌਰਾਨ ਕਿਹਾਮੈਨੂੰ ਰਾਸ਼ਟਰਪਤੀ ਵਜੋਂ ਆਖਰੀ ਵਾਰ ਦੇਸ਼ ਦੇ ਸਰਬਉੱਚ ਨਾਗਰਿਕ ਸਨਮਾਨ ਨਾਲ ਅਸਧਾਰਨ ਲੋਕਾਂ ਨੂੰ ਸਨਮਾਨਤ ਕਰਨ ਦਾ ਮੌਕਾ ਮਿਲਿਆ ਹੈ। ਅਜਿਹੇ ਲੋਕ, ਜਿਨ੍ਹਾਂ ਅਮਰੀਕਾ ਦੇ ਸਭਿਆਚਾਰ ਤੇ ਟੀਚੇ ਨੂੰ ਆਕਾਰ ਦੇਣ ਵਿਚ ਯੋਗਦਾਨ ਪਾਇਆ। ਓਪਨ ਸੁਸਾਇਟੀ ਫਾਊਂਡੇਸ਼ਨਜ਼ ਦੇ ਬਾਨੀ ਤੇ ਦਾਨ ਕਰਨ ਲਈ ਮਸ਼ਹੂਰ ਜੌਰਜ ਸੋਰੋਸ ਨੂੰ ਉਸ ਦੀਆਂ ਉਨ੍ਹਾਂ ਸੰਸਾਰ ਪਹਿਲਕਦਮੀਆਂ ਲਈ ਸਨਮਾਨਤ ਕੀਤਾ ਗਿਆ ਹੈ, ਜਿਹੜੀਆਂ ਜਮਹੂਰੀਅਤ, ਮਨੁੱਖੀ ਅਧਿਕਾਰਾਂ, ਸਿੱਖਿਆ ਤੇ ਸਮਾਜੀ ਨਿਆਂ ਨੂੰ ਮਜ਼ਬੂਤ ਕਰਦੀਆਂ ਹਨ। ਸੋਰੋਸ ਨੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਖੁੱਲ੍ਹੇਆਮ ਅਲੋਚਨਾ ਕੀਤੀ ਸੀ ਤੇ ਭਾਰਤ ਸਰਕਾਰ ਦਾ ਵਿਸ਼ਵਾਸ ਹੈ ਕਿ ਉਸ ਨੇ ਭਾਰਤੀ ਚੋਣਾਂ ਵਿੱਚ ਸਿੱਧਾ ਦਖਲ ਦਿੱਤਾ।
