ਨਵੀਂ ਦਿੱਲੀ, 3 ਜਨਵਰੀ – ਸਿਡਨੀ ਕ੍ਰਿਕਟ ਗਰਾਊਂਡ ‘ਤੇ ਚੱਲ ਰਹੇ ਪੰਜਵੇਂ ਅਤੇ ਆਖਰੀ ਬਾਰਡਰ-ਗਾਵਸਕਰ ਟਰਾਫੀ ਟੈਸਟ ਨੇ ਇਤਿਹਾਸ ਦੇ ਪੰਨਿਆਂ ‘ਚ ਆਪਣਾ ਨਾਂ ਦਰਜ ਕਰ ਲਿਆ ਹੈ। ਪਹਿਲੇ ਦਿਨ ਚਾਹ ਦੀ ਬਰੇਕ ਦੇ ਸਮੇਂ ਮੈਚ ਦੇਖਣ ਲਈ 47,566 ਦਰਸ਼ਕ ਮੌਜੂਦ ਸਨ। 1976 ਤੋਂ ਬਾਅਦ ਇਹ ਪਹਿਲਾ ਮੌਕਾ ਹੈ ਜਦੋਂ ਸਿਡਨੀ ‘ਚ ਟੈਸਟ ਮੈਚ ਦੇ ਪਹਿਲੇ ਦਿਨ ਇੰਨੀ ਵੱਡੀ ਗਿਣਤੀ ‘ਚ ਕ੍ਰਿਕਟ ਪ੍ਰਸ਼ੰਸਕ ਮੈਚ ਦੇਖਣ ਆਏ। ਇਸ ਤੋਂ ਪਹਿਲਾਂ ਭਾਰਤ-ਆਸਟ੍ਰੇਲੀਆ ਮੈਚ ਦੇ ਪਹਿਲੇ ਦਿਨ ਦਰਸ਼ਕਾਂ ਦੀ ਗਿਣਤੀ ਦਾ ਰਿਕਾਰਡ 44,901 ਸੀ, ਜੋ ਕਿ ਜਨਵਰੀ 2004 ਵਿੱਚ ਬਣਿਆ ਸੀ।ਦਿਲਚਸਪ ਗੱਲ ਇਹ ਹੈ ਕਿ ਇਹ ਮੈਚ ਪੰਜ ਦਿਨਾਂ ਵਿੱਚ 189,989 ਦਰਸ਼ਕਾਂ ਦੀ ਹਾਜ਼ਰੀ ਦਾ ਰਿਕਾਰਡ ਤੋੜਨ ਦੀ ਕਗਾਰ ‘ਤੇ ਹੈ। ਇਹ ਰਿਕਾਰਡ ਆਸਟ੍ਰੇਲੀਆਈ ਕਪਤਾਨ ਸਟੀਵ ਵਾ ਦੇ ਜਨਵਰੀ 2004 ‘ਚ ਭਾਰਤ ਖ਼ਿਲਾਫ਼ ਆਖਰੀ ਟੈਸਟ ਦੌਰਾਨ ਦਰਜ ਕੀਤਾ ਗਿਆ ਸੀ। ਇਸ ਦੇ ਨਾਲ ਹੀ ਇਸ ਤੋਂ ਪਹਿਲਾਂ ਮੈਲਬੌਰਨ ਟੈਸਟ ਨੇ ਵੀ ਰਿਕਾਰਡ ਤੋੜੇ ਸਨ। ਮੈਲਬੌਰਨ ‘ਚ ਖੇਡੇ ਗਏ ਟੈਸਟ ਮੈਚ ਨੂੰ ਦੇਖਣ ਲਈ 373,691 ਪ੍ਰਸ਼ੰਸਕ ਪਹੁੰਚੇ। ਇਸ ਨੇ 1937 ਵਿੱਚ ਇਸ ਸਟੇਡੀਅਮ ਵਿੱਚ 350,534 ਦਰਸ਼ਕਾਂ ਦਾ ਰਿਕਾਰਡ ਤੋੜ ਦਿੱਤਾ ਸੀ।
ਪਤਾਨੀ ਕਰ ਰਹੇ ਹਨ ਜਸਪ੍ਰੀਤ ਬੁਮਰਾਹ
ਸਿਡਨੀ ਟੈਸਟ ਦੇ ਪਹਿਲੇ ਦਿਨ ਦੀ ਖੇਡ ਦੀ ਗੱਲ ਕਰੀਏ ਤਾਂ ਜਸਪ੍ਰੀਤ ਬੁਮਰਾਹ ਦੀ ਅਗਵਾਈ ਵਾਲੀ ਟੀਮ ਨੇ ਟਾਸ ਜਿੱਤ ਕੇ ਪਹਿਲਾਂ ਬੱਲੇਬਾਜ਼ੀ ਕਰਨ ਦਾ ਫੈਸਲਾ ਕੀਤਾ। ਹਾਲਾਂਕਿ, ਪਹਿਲੇ ਸੈਸ਼ਨ ਵਿੱਚ ਯਸ਼ਸਵੀ ਜੈਸਵਾਲ (10), ਕੇਐਲ ਰਾਹੁਲ (4), ਸ਼ੁਭਮਨ ਗਿੱਲ (20) ਦੇ ਆਊਟ ਹੋਣ ਕਾਰਨ ਭਾਰਤ ਦਾ ਫੈਸਲਾ ਉਲਟ ਗਿਆ। ਹਾਲਾਂਕਿ ਵਿਰਾਟ ਕੋਹਲੀ (17) ਨੇ ਰਿਸ਼ਭ ਪੰਤ (40) ਦੇ ਨਾਲ ਦੂਜੇ ਸੈਸ਼ਨ ਵਿੱਚ ਟੀਮ ਲਈ ਵਾਪਸੀ ਕਰਨ ਦੀ ਕੋਸ਼ਿਸ਼ ਕੀਤੀ।
