ਬੀਜਿੰਗ : ਵਾਂਗ ਯਾਪਿੰਗ ਨੇ ਸੋਮਵਾਰ ਨੂੁੰ ਸਪੇਸ ਵਾਕ ਕਰਨ ਵਾਲੀ ਚੀਨ ਦੀ ਪਹਿਲੀ ਮਹਿਲਾ ਪੁਲਾੜ ਯਾਤਰੀ ਬਣ ਕੇ ਇਤਿਹਾਸ ਰਚ ਦਿੱਤਾ। ਉਹ ਆਪਣੇ ਪੁਰਸ਼ ਸਹਿਕਰਮੀ ਝਾਈ ਝਿਗਾਂਗ ਨਾਲ ਨਿਰਮਾਣ ਅਧੀਨ ਪੁਲਾੜ ਕੇਂਦਰ ਤੋਂ ਬਾਹਰ ਨਿਕਲੀ ਤੇ ਲਗਪਗ ਸਾਢੇ ਛੇ ਘੰਟੇ ਤਕ ਕਈ ਸਰਗਰਮੀਆਂ ‘ਚ ਹਿੱਸਾ ਲਿਆ।
ਚੀਨ ਦੀ ਸਰਕਾਰੀ ਨਿਊਜ਼ ਏਜੰਸੀ ਸ਼ਿਨਹੁਆ ਦੀ ਰਿਪੋਰਟ ਮੁਤਾਬਕ ਦੋਵੇਂ ਪੁਲਾੜ ਕੇਂਦਰ ਦੇ ਕੋਰ ਮਾਡਿਊਲ ਤਿਯਾਨਹੇ ਤੋਂ ਸੈੱਲ ਤੋਂ ਬਾਹਰ ਨਿਕਲੇ ਤੇ ਸਾਢੇ ਛੇ ਘੰਟੇ ਤਕ ਪੁਲਾੜ ‘ਚ ਚਹਿਲਕਦਮੀ ਕਰਨ ਤੋਂ ਬਾਅਦ ਵਾਪਸ ਪਰਤ ਆਏ। ਚਾਈਨਾ ਮੇਂਡ ਸਪੇਸ ਏਜੰਸੀ ਨੇ ਇਕ ਬਿਆਨ ‘ਚ ਕਿਹਾ ਕਿ ਦੇਸ਼ ਦੇ ਇਤਿਹਾਸ ‘ਚ ਪਹਿਲੀ ਵਾਰ ਕਿਸੇ ਮਹਿਲਾ ਪੁਲਾੜ ਯਾਤਰੀ ਨੇ ਸਪੇਸ ਵਾਕ ਕੀਤੀ। ਵਾਂਗ ਤੇ ਝਾਈ ਸੋਮਵਾਰ ਨੂੰ ਜਦੋਂ ਚਹਿਲਕਦਮੀ ਕਰ ਰਹੇ ਸਨ, ਉਦੋਂ ਉਨ੍ਹਾਂ ਦੇ ਤੀਸਰੇ ਸਹਿਯੋਗੀ ਯੇ ਗੁਆਂਗਫੂ ਮਾਡਿਊਲ ਦੇ ਅੰਦਰੋਂ ਉਨ੍ਹਾਂ ਦੀ ਅਹਿਮ ਸਹਾਇਤਾ ਮੁਹੱਈਆ ਕਰਵਾ ਰਹੇ ਸਨ।
ਚੀਨ ਨੇ 16 ਅਕਤੂਬਰ ਨੂੰ ਤਿੰਨ ਪੁਲਾੜ ਯਾਤਰੀਆਂ ਨੂੰ ਛੇ ਮਹੀਨੇ ਲਈ ਸ਼ੇਨਜੋ-13 ਪੁਲਾੜ ਜਹਾਜ਼ ਰਾਹੀਂ ਰਵਾਨਾ ਕੀਤਾ ਸੀ। ਇਨ੍ਹਾਂ ਨੂੰ ਆਰਬਿਟਿੰਗ ਸਟਰਕਚਰ (ਪੁਲਾੜ ਕੇਂਦਰ) ਦਾ ਕੰਮ ਪੂਰਾ ਕਰਨ ਲਈ ਭੇਜਿਆ ਗਿਆ ਹੈ। ਚੀਨ ਨੂੰ ਉਮੀਦ ਹੈ ਕਿ ਕੇਂਦਰ ਨਿਰਮਾਣ ਦਾ ਕੰਮ ਅਗਲੇ ਸਾਲ ਤਕ ਪੂਰਾ ਹੋ ਜਾਵੇਗਾ। ਇਹ ਪੁਲਾੜ ਕੇਂਦਰ ਲਈ ਚੀਨ ਦਾ ਦੂਜਾ ਮਨੁੱਖੀ ਮਿਸ਼ਨ ਹੈ। ਇਸ ਤੋਂ ਪਹਿਲਾਂ 17 ਸਤੰਬਰ ਨੂੰ ਤਿੰਨ ਹੋਰ ਯਾਤਰੀਆਂ ਨੂੰ ਤਿੰਨ ਮਹੀਨੇ ਲਈ ਪੁਲਾੜ ਕੇਂਦਰ ‘ਤੇ ਭੇਜਿਆ ਗਿਆ ਸੀ। ਇਸ ਦਾ ਨਿਰਮਾਣ ਪੂਰਾ ਹੋਣ ‘ਤੇ ਚੀਨ ਦੁਨੀਆ ਦਾ ਪਹਿਲਾ ਦੇਸ਼ ਬਣ ਜਾਵੇਗਾ ਜਿਸ ਕੋਲ ਆਪਣਾ ਪੁਲਾੜ ਕੇਂਦਰ ਹੋਵੇਗਾ।ਸ਼ਾਂਦੋਂਗ ਸੂਬੇ ਦੀ ਮੂਲ ਵਾਸੀ ਤੇ ਪੰਜ ਸਾਲ ਦੀ ਬੱਚੀ ਦੀ ਮਾਂ ਵਾਂਗ (41) ਪੀਪਲਜ਼ ਲਿਬਰੇਸ਼ਨ ਆਰਮੀ (ਪੀਐੱਲਏ) ਏਅਰ ਫੋਰਸ ਨਾਲ ਅਗਸਤ 1997 ‘ਚ ਜੁੜੀ ਸੀ। ਪੀਐੱਲਏ ਦੀ ਪੁਲਾੜ ਇਕਾਈ ਦੇ ਦੂਸਰੇ ਸਮੂਹ ਦੇ ਪੁਲਾੜ ਯਾਤਰੀਆਂ ਨਾ ਮਈ 2010 ‘ਚ ਜੁੜਨ ਤੋਂ ਪਹਿਲਾਂ ਉਹ ਉਪ ਸਕਵਾਡ੍ਨ ਕਮਾਂਡਰ ਸੀ। ਪੁਲਾੜ ‘ਚ ਜਾਣ ਵਾਲੀ ਉਹ ਦੂਜੀ ਚੀਨੀ ਅੌਰਤ ਹੈ। ਮੌਜੂਦਾ ਮਨੁੱਖੀ ਮਿਸ਼ਨ ਲਈ ਵਾਂਗ ਦੀ ਚੋਣ ਦਸੰਬਰ 2019 ‘ਚ ਕੀਤਾ ਗਿਆ ਸੀ।
ਗਲੋਬਲ ਟਾਈਮਜ਼ ਮੁਤਾਬਕ ਵਾਂਗ ਪੁਲਾੜ ‘ਚ ਚਹਿਲਕਦਮੀ ਕਰਨ ਵਾਲੀ ਦੁਨੀਆ ਦੀ 16ਵੀਂ ਔਰਤ ਹੈ। ਅਕਤੂਬਰ 2019 ਤਕ ਦੀਆਂ ਕੁੱਲ 42 ਸਪੇਸ ਵਾਕ ‘ਚ 15 ਔਰਤਾਂ ਸ਼ਾਮਲ ਰਹੀਆਂ। 1984 ‘ਚ ਸੋਵੀਅਤ ਸੰਘ (ਰੂਸ) ਦੀ ਸਵੇਤਲਾਨਾ ਸਾਵਿਤਸਕਾਯ ਪੁਲਾੜ ‘ਚ ਚਹਿਲਕਦਮੀ ਕਰਨ ਵਾਲੀ ਦੁਨੀਆ ਦੀ ਪਹਿਲੀ ਔਰਤ ਬਣੀ ਸੀ।
