ਬੁੱਧ ਬਾਣ ਚਿੱਟੀ ਸਿਉੰਕ ਨੇ ਪੰਜਾਬ ਚੱਟਿਆ?

ਸਾਹਿਤ ਮੰਚ, ਸਾਹਿਤਕ ਲੇਖ, ਸਿਹਤ ਅਤੇ ਤੰਦਰੁਸਤੀ, ਪੰਜਾਬ, ਮੁੱਖ ਖ਼ਬਰਾਂ
December 1, 2024

ਬੁੱਧ ਬਾਣ

*ਚਿੱਟੀ ਸਿਉੰਕ ਨੇ ਪੰਜਾਬ ਚੱਟਿਆ?*

ਸਾਧਾਂ ਤੇ ਸੰਤਾਂ, ਅਖੌਤੀ ਬ੍ਰਹਮਗਿਆਨੀ ਦੇ ਡੇਰਿਆਂ, ਠਾਠਾਂ ਦੇ ਸਾਨਾਂ ਤੇ ਝੋਟਿਆਂ ਨੇ ਪੰਜਾਬ ਦੇ ਅਣਖੀਲੇ ਪੰਜਾਬੀਆਂ ਨੂੰ ਨਿਪੁੰਸਕ ਬਣਾਉਣ ਵਿੱਚ ਅਹਿਮ ਭੂਮਿਕਾ ਨਿਭਾਈ ਹੈ। ਅੱਜ ਇਹਨਾਂ ਝੋਟਿਆਂ ਦੀਆਂ ਕਾਲੀਆਂ ਕਰਤੂਤਾਂ ਸਾਹਮਣੇ ਆ ਰਹੀਆਂ ਹਨ। ਇਹਨਾਂ ਡੇਰਿਆਂ ਤੇ ਠਾਠਾਂ ਨਾ ਗੁਰੂ ਦਾ ਬਖਸ਼ਿਆ ਨਿਸ਼ਾਨ ਸਾਹਿਬ ਹੈ, ਨਾ ਕੜਾਹ ਪ੍ਰਸ਼ਾਦ ਦੀ ਦੇਗ਼ ਤੇ ਨਾ ਹੀ ਨਗਾਰਾ ਵੱਜਦਾ ਹੈ। ਇਥੇ ਮਿਸ਼ਰੀ ਦਾ ਭੋਗ ਦਿੱਤਾ ਜਾਂਦਾ ਹੈ। ਮਨਘੜ੍ਹਤ ਕਹਾਣੀਆਂ ਤੇ ਸਾਖੀਆਂ ਦਾ ਪ੍ਰਚਾਰ ਕਰਨ ਲਈ ਹਰ ਤਰ੍ਹਾਂ ਦਾ ਤਰੀਕਾ ਵਰਤਿਆ ਜਾਂਦਾ ਹੈ। ਦੁੱਖ ਇਸ ਗੱਲ ਦਾ ਹੈ ਕਿ ਅੰਨ੍ਹੀ ਸ਼ਰਧਾ ਦੇ ਵਿੱਚ ਲਿਪਟੀ ਭੀੜ ਇਹਨਾਂ ਵੱਲ ਦੌੜੀ ਜਾ ਰਹੀ ਹੈ। ਪੰਜਾਬੀ ਤੇ ਸਿੱਖ ਕੌਮ ਜਿਸਦੇ ਜਰਨੈਲਾਂ ਨੇ ਦੁਨੀਆ ਭਰ ਵਿੱਚ ਆਪਣੇ ਡੌਲ਼ਿਆਂ ਦੇ ਜ਼ੋਰ ਨਾਲ ਸਿੱਕਾ ਚਲਾਇਆ ਸੀ। ਅੱਜ ਉਹਨਾਂ ਦੀ ਔਲਾਦ ਗੋਡਿਆਂ ਭਾਰ ਰੀਂਗਣ ਲੱਗੀ ਹੋਈ ਹੈ। ਇਹ ਚਿੱਟੀ ਸਿਉਂਕ ਨੇ ਪੰਜਾਬ ਦੀ ਅਣਖ਼ ਨੂੰ ਚੱਟ ਲਿਆ ਹੈ। ਅੰਗਰੇਜ਼ਾਂ ਨੇ ਹਾਰ ਸ਼ਿੰਗਾਰ ਕੇ ਇਹਨਾਂ ਬਾਬਿਆਂ ਨੂੰ ਲਾਂਚ ਕੀਤਾ ਸੀ। ਜਿਹੜੇ ਅਮਰ ਵੇਲ ਵਾਂਗ ਸਮਾਜ ਤੇ ਸਿੱਖ ਸੰਗਤਾਂ ਦੇ ਦਿਮਾਗ਼ ਨੂੰ ਚੱਟ ਗਏ। ਹੁਣ ਇਹ ਚਿੱਟੀ ਸਿਉਂਕ ਦੇ ਡੇਰਿਆਂ ਤੇ ਠਾਠਾਂ ਉਪਰ ਕਿਵੇਂ ਬੱਚਿਆਂ ਤੇ ਬੀਬੀਆਂ ਦਾ ਸਰੀਰਿਕ ਸ਼ੋਸ਼ਣ ਹੁੰਦਾ ਸੀ, ਇਸ ਦੀਆਂ ਵੀਡੀਓਜ਼ ਸਾਹਮਣੇ ਆਉਣ ਲੱਗੀਆਂ ਹਨ। ਪਰ ਅਕਲ ਦੇ ਅੰਨ੍ਹਿਆਂ ਵਲੋਂ ਇਹਨਾਂ ਦੇ ਡੇਰਿਆਂ ਤੇ ਠਾਠਾਂ ਵਿੱਚ ਜਾਣ ਤੋਂ ਅਜੇ ਵੀ ਗੁਰੇਜ਼ ਨਹੀਂ ਕੀਤਾ ਜਾ ਰਿਹਾ। ਪੰਜਾਬੀ ਗਾਇਕ ਦੀਦਾਰ ਸੰਧੂ ਦੇ ਗੀਤ ਦੀਆਂ ਸਤਰਾਂ ਯਾਦ ਆਉਂਦੀਆਂ ਹਨ!
*ਰੰਗ ਵਿੱਚ ਭੰਗ ਪਾਉਣ ਵਾਲੀਆਂ ਬੁਲਾਵਾਂ*
*ਨੀ ਤੂੰ ਦੁਪਹਿਰ ਕੱਟ ਜਾਣ ਲਈ ਬੁਲਾ ਲੀਆਂ*
*ਜੀਹਦੇ ਚੱਟੇ ਹੋਏ ਰੁੱਖ ਵੀ ਨਾ ਹਰੇ*
*ਨੀ ਤੂੰ ਹੱਥਾਂ ਦੀਆਂ ਤਲੀਆਂ ਚਟਾ ਲੀਆ*
ਧਰਤੀ ਦੇ ਉਪਰ ਜੋ ਵੀ ਜੀਵ ਜੰਤੂ, ਬਨਸਪਤੀ ਤੇ ਮਨੁੱਖ ਤੋਂ ਬਿਨਾਂ ਕੋਈ ਵੀ ਵਸਤੂ ਹੈ , ਸਭ ਦਾ ਅੰਤ ਨਿਸ਼ਚਿਤ ਹੈ । ਫੇਰ ਨਰਕ ਸਵਰਗ ਦਾ ਧੰਦਾ ਕਰਨ ਵਾਲਿਆਂ ਦੇ ਮਗਰ ਤੇ ਮੂਹਰੇ ਲੋਕ ਕਿਉਂ ਮੱਥੇ ਰਗੜ ਦੇ ਹਨ ? ਹਰ ਚੋਣਾਂ ਦੇ ਵਿੱਚ ਇਹ ਸਾਧ ( ਸਾਨ੍ਹ ) ਸੰਗਤਾਂ ਨੂੰ ਵੇਚਦੇ ਹਨ । ਸਿਆਸੀ ਪਾਰਟੀਆਂ ਸਾਧਾਂ ਨੂੰ ਤੇ ਸਾਧ ਸਰਕਾਰਾਂ ਬਣਾਉਣ ਵਾਲਿਆਂ ਨੂੰ ਖਰੀਦੇ ਵੇਚਦੇ ਹਨ , ਸੰਗਤਾਂ ਜੈਕਾਰੇ ਲਗਾਉਦੀਆਂ । ਪਿਛਲੇ ਸਮਿਆਂ ਦੇ ਵਿੱਚ ਇਕ ਸਾਧ ਦੀ ਚੇਲੀ ਦੀ ਆਡੀਓ ਵਾਇਰਲ ਹੋਈ ਸੀ, ਜਿਸਨੇ ਇੱਕ ਠਾਠ ਦੇ ਝੋਟੇ ਵਲੋਂ ਉਸ ਦੇ ਸਮੇਤ ਹੋਰ ਬੀਬੀਆਂ ਦੇ ਸਰੀਰਿਕ ਸੰਬੰਧਾਂ ਨੂੰ ਉਜਾਗਰ ਕੀਤਾ ਹੈ। ਇਹ ਝੋਟਾ ਮੀਡੀਏ ਸਾਹਮਣੇ ਕਿਵੇਂ ਆਪਣੀਆਂ ਕਰਤੂਤਾਂ ਤੇ ਗੁਨਾਹਾਂ ਨੂੰ ਮਿਥਿਹਾਸ ਦੇ ਹਵਾਲਿਆਂ ਨਾਲ ਥੱਥੀ ਜ਼ੁਬਾਨ ਵਿੱਚ ਕੰਬਦਾ ਹੋਇਆ ਦੱਸਦਾ ਹੈ। ਸਿਰੇ ਦੀ ਬੇਸ਼ਰਮੀ ਹੈ। ਪੰਜਾਬ ਪੁਲਿਸ ਜਿਹੜੀ ਹੁਣ ਅੰਦੋਲਨਕਾਰੀਆਂ ਦੀ ਸਿਹਤ ਦਾ ਖਿਆਲ ਵੀ ਰੱਖਣ ਲੱਗੀ ਉਹਨਾਂ ਇਸ ਝੋਟੇ ਸਾਨ੍ਹ ਨੂੰ ਬਲਾਤਕਾਰ ਦਾ ਪਰਚਾ ਦਰਜ ਕਰ ਕੇ ਗ੍ਰਿਫਤਾਰ ਨਹੀਂ ਕੀਤਾ। ਇਹ ਚੁੱਪ ਤੇ ਨਜ਼ਰ ਅੰਦਾਜ਼ੀ ਕੁਲਦੀਪ ਮਾਣਕ ਦੇ ਗੀਤ ਦੇ ਬੋਲ ਚੇਤੇ ਕਰਵਾਉਂਦੀ ਹੈ ;
*” ਮੇਰੇ ਯਾਰ ਮੰਦਾ ਨਾ ਬੋਲੀ ਤੇ ਮੇਰੀ ਭਾਵੇਂ ਜਿੰਦ ਕੱਢ ਲੈ !”*
ਹੁਣ ਇਹ ਸੱਚ ਸਾਹਮਣੇ ਆਇਆ ਹੈ ਕਿ ਚਿੱਟੇ, ਹਰੇ, ਨੀਲੇ, ਭਗਵੇਂ ਚੋਲਿਆਂ ਦੇ ਹੇਠਾਂ ਕਿਹੜਾ ਕੁਕਰਮ ਨਹੀਂ ਹੁੰਦਾ ? ਹੁਣ ਤਾਂ ਬਹੁਤ ਕੁੱਝ ਦਾ ਅੰਦਰਲਾ ਸੱਚ ਬਾਹਰ ਆ ਗਿਆ ਹੈ ਪਰ ਬਹੁਗਿਣਤੀ ਲੋਕਾਂ ਦੀਆਂ ਭੀੜ ਇਹਨਾਂ ਵੱਲ ਵਹੀਰ ਘੱਤੀ ਜਾਂਦੀ ਹੈ । ਧਰਮ ਦਾ ਕਾਰੋਬਾਰ ਚੱਲਦਾ ਹੈ ਪਰ ਜਦੋਂ ਕਦੇ ਕੋਈ ਕੁਦਰਤੀ ਜਾਂ ਸਰਕਾਰੀ ਮਾਰ ਪੈਦੀ ਹੈ ਤਾਂ ਸਾਧ ਲਾਣਾ ਗਧੇ ਸਿੰਗਾਂ ਵਾਂਗੂੰ ਅਲੋਪ ਹੋ ਜਾਂਦਾ ਹੈ। ਦਿੱਲੀ ਦੇ ਵਿੱਚ ਲੱਗੇ ਕਿਸਾਨ ਮਜ਼ਦੂਰ ਅੰਦੋਲਨ ਵਿੱਚ ਸਵਰਗ ਦੀਆਂ ਟਿਕਟਾਂ ਵੰਡਣ ਵਾਲਾ ਸਾਧ ਲਾਣਾ ਗੁਆਚ ਗਿਆ ਸੀ ? ਟਰਾਲੀਆਂ ਭਰ ਭਰ ਉਹਨਾਂ ਦੇ ਡੇਰਿਆਂ ਵੱਲ ਜਾਣ ਵਾਲਿਆਂ ਨੂੰ ਜੇ ਹੁਣ ਵੀ ਅਕਲ ਨਾ ਆਈ, ਫੇਰ ਕਦੇ ਵੀ ਨੀ ਆ ਸਕਦੀ। ਇਸਂ ਵਿਹਲੜ ਫੌਜ ਨੇ ਬਹੁਤ ਮੌਜਾਂ ਲੁੱਟੀਆਂ ਹਨ ਤੇ ਲੁੱਟ ਰਹੀਆਂ ਹਨ। ਲੋਕਾਂ ਨਾਲ ਖੜਨ ਦਾ ਜਦੋਂ ਮੌਕਾ ਆਇਆ ਐ ਤਾਂ ਸਭ ਭੋਰਿਆਂ ਵਿੱਚ ਵੜ ਗਏ। ਅਸਲ ਸੱਚ ਇਹ ਹੈ ਕਿ ਇਹ ਸਭ ਸਰਕਾਰੀ ਸਾਧ ਹਨ, ਦੇਸ਼ ਦੀ ਵੰਡ ਸਮੇਂ ਪੰਜ ਸਾਧ ਪੈਦਾ ਕੀਤੇ ਸਨ। ਪੰਜੇ ਅੰਗਰੇਜ਼ ਦੇ ਫੌਜੀ ਸਨ। ਜਿਹਨਾਂ ਨੇ ਲੋਕਾਂ ਦੇ ਹੱਥਾਂ ਵਿੱਚੋਂ ਹਥਿਆਰਾਂ ਨੂੰ ਛੁਡਾ ਕੇ ਇੱਕ ਸੌ ਅੱਠ ਮਣਕਿਆਂ ਵਾਲੀ ਮਾਲਾ ਫੜਾਕੇ ਅੰਗਰੇਜ਼ਾਂ ਦੇ ਵਿਰੁੱਧ ਸੰਘਰਸ਼ ਜਰਨ ਦੀ ਵਜਾਏ ਸਵਰਗ ਜਾਣ ਦੇ ਤੋਤਾ ਰਟਨ ਦੇ ਲੜ ਲਾਇਆ ਸੀ । ਇਹੋ ਜਿਹੇ ਡੇਰੇ ਹੁਣ ਹਰ ਪਿੰਡ ਵਿੱਚ ਹਨ । ਲੁਧਿਆਣਾ ਜਿਲੇ ਇਕ ਡੇਰੇ ਵਿੱਚ ਤਾਂ ਲੋਕ ਉਸ ਦੀਆਂ ਜੁੱਤੀਆਂ ਤੇ ਚੋਲਿਆਂ ਨੂੰ ਈ ਮੱਥਾ ਟੇਕਦੇ ਹਨ। ਸਵਰਗ ਦਾ ਨਜ਼ਾਰਾ ਲੈਂਦਾ ਇੰਝ ਸਾਧ ਤਾਂ ਚਾਲੀ ਸਾਲ ਪਹਿਲਾਂ ਦੇਹ ਮੁਕਤ ਹੋ ਗਿਆ ਪਰ ਇਲਾਕੇ ਦੇ ਵਿੱਚ ਅੰਧ ਵਿਸ਼ਵਾਸ ਦਾ ਬੂਟਾ ਲਾ ਗਿਆ। ਜਿਸ ਨੇ ਆਲੇ ਦੁਆਲੇ ਨੂੰ ਘੇਰ ਲਿਆ ਐ । ਹੁਣ ਸਾਧ ਲਾਣੇ ਦੇ ਘੇਰੇ ਵਿੱਚ ਪੰਜਾਬ ਐ। ਲੋਕਾਂ ਦੇ ਅੱਖਾਂ ਵਿੱਚ ਘੱਟਾ ਪਾਉਣ ਲਈ ਇਹ ਸਕੂਲ ਤੇ ਹਸਪਤਾਲ ਖੋਲ੍ਹਦੇ ਹਨ ਤੇ ਉਧਰੋਂ ਵੀ ਮਾਇਆ ਇਕੱਠੀ ਕਰਦੇ ਹਨ। ਪੰਜਾਬ ਵਿੱਚ ਪਿੰਡ ਤੇਰਾਂ ਹਜ਼ਾਰ ਨੇ ਡੇਰੇ ਸਵਾ ਲੱਖ ਤੋਂ ਵੱਧ ਹਨ। ਇਸ ਚਿੱਟੀ ਸਿਉਂਕ ਨੇ ਲੋਕਾਂ ਦੇ ਦਿਮਾਗ਼ ਨੂੰ ਚੱਟ ਲਿਆ ਐ। ਲੋਕਾਂ ਨੂੰ ਮਾਨਸਿਕ ਤੌਰ ਉੱਤੇ ਨਿਪੁੰਸ਼ਕ ਕਰ ਦਿੱਤਾ ਹੈ। ਦੁੱਧ ਘਿਓ ਤੇ ਕਾਜੂ ਬਦਾਮ ਛਕਣ ਵਾਲਿਆਂ ਕੋਲੋਂ ਲੋਕ ਦੁੱਧ ਤੇ ਪੁੱਤ ਮੰਗਣ ਜਾਂਦੇ ਹਨ।
*ਸਾਧ ਕੋਲੋਂ ਪੁੱਤ ਮੰਗਦੀ ਨੰਗੇ ਪੈਰ ਸੁੰਭਰ ਦੀ ਡੇਰਾ।* *ਸਾਧਣੀ ਦੇ ਡੇਰੇ ਦੁਪਹਿਰੇ ਕੁੱਤੀ ਭੌਕਦੀ ।*
ਇਹਨਾਂ ਦਾ ਸਮਾਜ ਨਾਲ ਕੀ ਰਿਸ਼ਤਾ ਐ? ਸਮਝੋ ਬੀਬੀਓ, ਸਮਝੋ। ਇਹਨਾਂ ਦਾ ਚਿੱਟੇ ਰੰਗ ਨਾਲ ਬਹੁਤ ਗੂੜ੍ਹਾ ਰਿਸ਼ਤਾ ਹੈ ਪਰ ਇਹ ਰਿਸ਼ਤਾ ਸੁਹਜ ਤੇ ਸੁਹੱਪਣ ਦਾ ਹੈ। ਜਿੱਥੇ ਦੇਹਾਂ ਨੂੰ ਵਰਤਿਆ ਜਾਂਦਾ ਹੈ। ਜਦੋਂ ਅੰਗਰੇਜ਼ਾਂ ਨੇ ਦੇਸ਼ ਦੀ ਵਾਗਡੋਰ ” ਕਾਲੇ ਅੰਗਰੇਜ਼ਾਂ ” ਦੇ ” ਪਾਵਰ ਆਫ ਟਰਾਂਸਫਰ ” ਕੀਤੀ ਤਾਂ ” ਜਿਹੜੀ 2046 ਨੂੰ ਖਤਮ ਹੋ ਜਾਣੀ ਹੈ । ਭਾਰਤੀ ਲੋਕ ਪਹਿਲਾਂ ਵਾਂਗੂੰ ਹੀ ਗੁਲਾਮ ਹਨ । ਦੇਸ ਨੂੰ ਆਜ਼ਾਦ ਕਰਨ ਦਾ ਨਾਟਕ ਹੋਇਆ ਸੀ ਤੇ ਇਸ ਨਾਟਕ ਦੇ ਵਿੱਚ ਨਹਿਰੂ, ਗਾਂਧੀ, ਪਟੇਲ ਤੇ ਜਨਾਹ ਵਰਗੇ ਖੱਟੀ ਖੱਟਗੇ । ਉਦੋਂ ਗਊ ਭਗਤਾਂ ਤੇ ਲੱਗੜ ਬੱਗਿਆਂ ” ਨੇ ਬਚਿਆ ਮਾਸ ਛਕਣਾਂ ਅਰੰਭਿਆ ਤੇ ਕਾਵਾਂ ਨੇ ਰੌਲਾ ਪਾ ਦਿੱਤਾ ” ਦੇਸ਼ ਆਜ਼ਾਦ ” ਹੋ ਗਿਆ । ਪੰਜਾਬ ਨੂੰ ਧਰਮ ਦੇ ਆਰੇ ਨਾਲ ਦੋਫਾੜ ਕਰ ਦਿੱਤਾ। ਇਹ ਵੀ ਸੱਚ ਐ ਕਿ ਅੰਗਰੇਜ਼ਾਂ ਦੇ ਨਾਲ ਯੁੱਧ ਕਰਨ ਵਾਲਾ ਵੀ ਪੰਜਾਬ ਸੀ ਤੇ ਦੋਫਾੜ ਹੋਣ ਵਾਲਾ ਵੀ ” ਪੰਜਾਬ ਸੀ “। ਫਿਰ ਤੀਜੀ ਵਾਰ 1966 ਵਿੱਚ ਦੋਫਾੜ ਕਰ ਦਿੱਤੇ! ਪਰ ਜਿਹੜਾ ਸਭ ਤੋਂ ਵੱਡਾ ਅਸਹਿ ਤੇ ਅਕਹਿ ਸੰਤਾਪ ਭੋਗਿਆ ਪੰਜਾਬੀਆਂ ਨੇ..। ਉਸ ਦਾ ਦਰਦ ਹੁਣ ਵੀ ਹੁੰਦਾ ਹੈ! ਲੱਗੜ ਬੱਗਿਆਂ ਨੇ ਪੰਜਾਬ ਦੇ ਵਿੱਚ ” ਚਿੱਟੀ ਸਿਉੰਕ, ਚਿੱਟੀ ਮੱਖੀ, ਗੁਲਾਬੀ ਸੁੰਡੀ ਤੇ ਚਿੱਟਾ ” ਖਲਾਰਿਆ। ਉਸ ਨੇ ਪੰਜਾਬ ਦੀ ਜੁਆਨੀ ਨੂੰ ਤਬਾਹ ਕਰ ਦਿੱਤਾ।
*” ਚਿੱਟੀ ਮੱਖੀ “ਨੇ ਕਿਸਾਨ ਤੇ ਚਿੱਟੇ ਨੇ ਜੁਆਨੀ ਨੂੰ ਚੱਟਿਆ ਐ।*
*” ਚਿੱਟੀ ਸਿਉੱਕ ” ਨੇ ਹਰ ਬੰਦੇ ਦਾ ਦਿਮਾਗ ਚੱਟਿਆ ਐ!*
ਸਾਧ ਲਾਣਾ ਧਰਮ ਦੀ ਬੰਦੂਕ ਫੜ ਕੇ ਸਾਡੇ ਮਨ ਦੇ ਅੰਦਰ ” ਨਰਕ ਤੇ ਸਵਰਗ ” ਦਾ ਬੀਜ ਬੀਜਿਆ ਜਿਹੜਾ ” ਮਨੂੰਵਾਦੀਆਂ ” ਨੇ ਦਿੱਤਾ ਸੀ। ਉਸ ਅੰਧਵਿਸਵਾਸ਼ ਦੇ ਉਗੇ ਬੂਟੇ ਨੂੰ “ਚਿੱਟੀ ਸਿਉੱਕ ” ( ਸਾਧ ਸੰਤ ਤੇ ਡੇਰੇਦਾਰ ) ਨੇ ਲੋਕਾਂ ਦੇ ਖੂਨ ਦੇ ਨਾਲ ਸਿੰਜਿਆ! ਸਵਰਗ ਦੀਆਂ ਟਿਕਟਾਂ ਦੇਣ ਵਾਲੀ ਅੱਜ ਇਹ ” ਚਿੱਟੀ ਸਿਉੰਕ ” ਧਰਤੀ ਵਿੱਚ ਸਮਾਅ ਗਈ ਜਾਂ ਅਸਮਾਨ ਚੜ੍ਹ ਗਈ ਸੀ? ਕਿਧਰੇ ਨਜ਼ਰ ਨੀ ਆ ਰਹੀ! ਆਮ ਲੋਕਾਂ ਦੀ ਚੇਤਨਾ ਨੂੰ ਖੂੰਡਾ ਕਰਨ ਲਈ ਸਿੱਖਾਂ ਦੇ ਭੇਖ ਵਿੱਚ ਤੇ ਸਿੱਖੀ ਦੇ ਪ੍ਰਚਾਰ ਦੇ ਨਾਂ ਤੇ ਇਹਨਾਂ ਸਾਧਾਂ ਨੇ ਦੁਕਾਨਾਂ ਖੋਲ੍ਹੀਆਂ ਜੋ ਹੁਣ ਵੱਡੀਆਂ ਕੰਪਨੀਆਂ ਬਣ ਗਈਆਂ ਹਨ। ਇਸ ਚਿੱਟੀ ਸਿਉੰਕ ਨੂੰ ਪਾਲਣ ਪੋਸ਼ਣ ਦਾ ਕੰਮ ਬੀਬੀਆਂ ਨੇ ਕੀਤਾ ਤੇ ਆਪਣੇ ਬਲ ‘ਤੇ ਘਰਦਿਆਂ ਨੂੰ ਨਾਲ਼ ਤੋਰਿਆ ! ਸਿੱਟਾ ਕੀ ਨਿਕਲਿਆ ? ਲੋਕਾਂ ਦੀ ਸੋਚ ਸਮਝ ਨੂੰ ਘੁਣ ਲੱਗ ਗਿਆ ਜੋ ਹੌਲੀ ਹੌਲੀ ਖਤਮ ਹੋਣ ਲੱਗੀ। ਲੋਕ ਮਾਨਸਿਕਤਾ ਪੱਖੋਂ ਊਣੇ ਹੋ ਗਏ। ਪੰਜਾਬ ਦੇ ਵਿੱਚ ਹਰ ਤੀਜੇ ਪਿੰਡ ਨਿੱਕੀਆਂ ਤੇ ਮੋਟੀਆਂ ਸਿਉੰਕ ਦੀਆਂ ਦੁਕਾਨਾਂ ਤੇ ਵੱਡੇ ਮਾਲਜ਼ ਹਨ। ਜਿੱਥੇ ਧਰਮ ਦੇ ਨਾਂ ਹੇਠਾਂ ਵਪਾਰ ਹੁੰਦਾ ! ਇਹਨਾਂ ਡੇਰਿਆਂ ਵਿੱਚ ਦੇਹ ਦੇ ਵਪਾਰ ਤੋਂ ਸਵਰਗ ਤੱਕ ਭੇਜਣ ਦੀ ਬੁਕਿੰਗ ਕੀਤੀ ਜਾਂਦੀ ਹੈ! ਇਹਨਾਂ ਦੀ ਪਛਾਣ ਮੋਟੇ ਢਿੱਡ, ਚਿੱਟੇ ਬਸਤਰ ਤੇ ਨਾਲ ਬੰਦੂਕਾਂ ਵਾਲੇ…ਵਿਹਲੜ ਫੌਜਾਂ ਕਰਨ ਬੀਬੀਆਂ / ਬੀਬਿਆਂ ਦੇ ਸਿਰ ਮੌਜਾਂ..ਜ਼ਮੀਨ ਤੇ ਸੋਹਣੀਆਂ ਬੀਬੀਆਂ ਦੇ ਮਾਲਕ! ਸਵਰਗ ਦੇ ਟਿਕਟ ਕੁਲੈਕਟਰ ! ਵੱਡੇ ਚੋਲੇ, ਵੱਡੀ ਗੱਡੀ, ਨਾਲ ਬੈਠਾਉਦੇ ਸੋਹਣੀ ਨੱਢੀ, ਜਿਹੜੀ ਹੁੰਦੀ ਘਰੋਂ ਕੱਢੀ ! ਕਿਰਤ ਵਿਹੂਣੀ ਖਾਵੇ ਖੀਰ, ਨਾ ਕੋਈ ਗੁਰੂ ਤੇ ਨਾ ਹੀ ਪੀਰ.. ਬਚ ਕੇ ਰਹੋ ਮੇਰੇ ਵੀਰ!
ਪ੍ਰੋਫੈਸਰ ਪੂਰਨ ਸਿੰਘ ਦਾ ਕਹਿਣਾ ਕਿ *’ ਪੰਜਾਬ ਗੁਰਾਂ ਦੇ ਨਾਂ ‘ਤੇ ਵਸਦਾ ਹੈ।’*
ਸਾਧ ਕਹਿੰਦੇ ਹਨ ਕਿ ਇਹ ਸੰਗਤ ਸਾਡੀ ਐ, ਉਹ ਇਸ ਸੰਗਤ ਨੂੰ ਵੋਟਾਂ ਵੇਲੇ ਵੇਚਦੇ ਹਨ ਤੇ ਸਿਆਸੀ ਵਪਾਰੀਆਂ ਤੋਂ ਮਾਲ ਲੈਂਦੇ ਹਨ। ਇਸੇ ਕਰਕੇ ਸਾਧਾਂ ਦੇ ਡੇਰਿਆਂ ਦੀ ਜ਼ਮੀਨ ਜਾਇਦਾਦ ਰੂੜੀ ਵਾਂਗੂੰ ਵਧਦੀ ਜਾ ਰਹੀ ਹੈ। ਸੱਚ ਹੈ..ਕਿ ‘ ਚਿੱਟੀ ਸਿਉੰਕ ” ਨੇ ਸ਼ਬਦ ਗੁਰੂ ਦੇ ਨਾਲੋਂ ਲੋਕਾਈ ਨੂੰ ਤੋੜਿਆ ਤੇ” ਦੇਹਧਾਰੀ ਗੁਰੂ ” ਦੇ ਨਾਲ ਸਾਜਿਸ਼ ਅਧੀਨ ਜੋੜਿਆ ਹੈ। ਅੱਜ ਸਿੱਖਾਂ ਦਾ ਭਰੋਸਾ ” ਦੇਹਧਾਰੀ.ਚਿੱਟੀ ਸਿਉੰਕ ” ਤੇ ਹੈ ਤੇ ਗੁਰੂ ਗ੍ਰੰਥ ਸਾਹਿਬ ‘ਤੇ ਨਹੀਂ ! ਇਸ ਚਿੱਟੀ ਸਿਉੰਕ ਨੇ ਜਿੰਨਾ ਨੁਕਸਾਨ ਸਮਾਜ ਤੇ ਸਿੱਖੀ ਦਾ ਕੀਤਾ ਸ਼ਾਇਦ ਹੋਰ ਕਿਸੇ ਸਰਕਾਰ ਨੇ ਕੀਤਾ ਹੋਵੇ ? ਅਸੀਂ ਗੁਰੂ ਸਾਹਿਬਾਨ ਜੀ ਦੀਆਂ ਜਨਮ ਸ਼ਤਾਬਦੀ ਮਨਾਉਂਦੇ ਹਾਂ ! ਪਰ ਗੁਰੂ ਸ਼ਬਦ ਨਹੀਂ ਮੰਨਦੇ । ਉਹਨਾਂ ਸਾਨੂੰ “ਸ਼ਬਦ ਤੇ ਰਬਾਬ ” ਦਿੱਤੀ ਤੇ ਗੁਰੂ ਗੋਬਿੰਦ ਸਿੰਘ ਜੀ ਨੇ ਹੱਕ ਤੇ ਸੱਚ ਦੀ ਜੰਗ ਲੜਨ ਲਈ ਸਾਨੂੰ ਕਿਰਪਾਨ ਦਿੱਤੀ! ਅਠਾਰਵੀਂ ਸਦੀ ਦੇ ਵਿੱਚ ਲਿਖੀਆਂ ਸਾਖੀਆਂ ਨੂੰ ਅਸੀਂ ਸੱਚ ਮੰਨਿਆਂ ਤੇ ਹੌਲੀ ਹੌਲੀ ” ਸ਼ਬਦ ਗੁਰੂ ” ਦੇ ਨਾਲੋਂ ਮਾਨਸਿਕ ਤੌਰ ਤੇ ਪਰੇ ਹੁੰਦੇ ਗਏ ਤੇ ਸਰੀਰਕ ਤੌਰ ਉਤੇ ਡੇਰਿਆਂ ਤੇ ਠਾਠਾਂ ਨਾਲ ਜੁੜਦੇ ਰਹੇ ! ਪੰਜਾਬ ਹੀ ਨਹੀਂ ਬਦੇਸ਼ਾਂ ਦੇ ਵਿੱਚ ਇਹ ਚਿੱਟੀ ਸਿਉੰਕ ਪੁਜ ਗਈ ਹੈ ਜੋ ਸਿਰਫ ਦਿਮਾਗ ਹੀ ਚੱਟਦੀ ਹੈ ਤੇ ਹੋਰ ਕੀ ਕੀ ਚੱਟਦੇ ਤੇ ਪੱਟਦੇ ਹਨ ਹੁਣ ਕੋਈ ਓਹਲਾ ਤੇ ਪਰਦਾ ਨਹੀਂ ! ਆ ਜਿਹੜੇ ਪੰਜਾਬ ਦੇ ਵਿੱਚ “ਸਰਕਾਰੀ ਹੜ੍ਹ ” ਆਏ ਹਨ ਇਸ ਨੇ ਪੰਜਾਬ ਦੇ ਲੋਕਾਂ ਦੇ ਮਨਾਂ ਤੇ ਪਏ ਭਰਮ ਦੇ ਪਰਦੇ ਨੂੰ ਉਤਾਰਿਆ ਤੇ ਦੂਜਾ ਲੋਕਾਂ ਨੂੰ ਪਤਾ ਲੱਗਿਆ ਕਿ ਉਹਨਾਂ ਦਾ ਆਪਣਾ ਤੇ ਪਰਾਇਆ ਕੌਣ ਹੈ? ਇਸ ਚਿੱਟੀ ਸਿਉਕ ਦੇ ਵਿੱਚ ਸਿਆਸਤਦਾਨ ਵੀ ਹਨ…ਸਾਧ ਲਾਣਾ ਤਾਂ ਹੈ ਹੀ! ਹੁਣ ਚੋਰ ਤੇ ਸਿਆਸੀ ਗੁੱਡੇ ਰਲ ਗਏ ਹਨ। ਚਿੱਟੀ ਸਿਉਕ ਵਾਲਿਆਂ ਵਿੱਚੋਂ ਕੁੱਝ ਨੂੰ ਛੱਡਕੇ ਬਾਕੀ ਸਾਧ ਤੇ ਸੰਤ ਜੋ ਸਮਾਜ ਨੂੰ ਲੱਗੀ ਚਿੱਟੀ ਸਿਉਕ ਹਨ, ਜਿਨ੍ਹਾਂ ਦਾ ਕੰਮ ਲੋਕਾਂ ਦੇ ਦਿਮਾਗਾਂ ਨੂੰ ਚਰਨਾ ਹੈ ਤੇ ਦੇਹ ਤੇ ਮਾਇਆ ਨੂੰ ਆਪਣੇ ਲਈ ਵਰਤਣਾ ਹੈ। ਇਹ ਚਿੱਟੀ ਸਿਉਂਕ ਦੇਹ ਤੇ ਮਾਇਆ ਤੇ ਜ਼ਮੀਨ ਵੀ ਚਰ ਜਾਂਦੀ ਹੈ! ਇਸ ਚਿੱਟੀ ਸਿਉਕ ਤੋਂ ਬਚਣ ਲਈ ਗੁਰੂ ਜੀ ਨੇ ਬਾਣੀ ਰਚੀ ਹੈ ਪਰ ਅਸੀਂ ਬਾਣੀ ਨੂੰ ਨਹੀਂ ਸਗੋਂ ਬਾਣੇ ਨੂੰ ਮੰਨਦੇ, ਚਿੱਟੇ ਚੋਲਿਆਂ ਵਾਲੀ ਸਿਉਂਕ ਤੋਂ ਬਚਣ ਲਈ ਸ਼ਬਦ ਗੁਰੂ ਨਾਲ ਜੁੜੋ…ਸ਼ਬਦ ਦੇ ਜੀਵਨ ਦਾ ਫਲਸਫਾ ਹੈ..ਚਿੱਟੀ ਸਿਉਕ ਕੋਲ ਕੁੱਝ ਨਹੀਂ !
ਪੰਜਾਬ ਦੇ ਲੋਕ ਇਸ ਚਿੱਟੀ ਸਿਉਂਕ ਤੋਂ ਤਾਂ ਹੀ ਬਚ ਸਕਦੇ ਹਨ ਜੇ ਅਸੀਂ ਪਖੰਡ ਛੱਡਕੇ ਸ਼੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਨਾਲ ਜੁੜਾਂਗੇ ਤੇ ਸ਼ਬਦ ਤੇ ਅਮਲ ਕਰਾਂਗੇ? ਪਰ ਚਿੱਟੀ ਸਿਉਕ ਨੇ ਸਾਡੇ ਵਿਰਾਸਤ ਤੇ ਵਿਰਸੇ ਨੂੰ ਖਤਮ ਕਰਨ ਵਿੱਚ ਅਹਿਮ ਭੂਮਿਕਾ ਨਿਭਾਈ ਹੈ! ਸਿੱਖੀ ਦੇ ਨਾਲ਼ ਜੁੜੀਆਂ ਸਾਰੀਆਂ ਹੀ ਇਤਿਹਾਸਕ ਥਾਂਵਾਂ ਖਤਮ ਕਰਕੇ ਚਿੱਟਾ ਮਾਰਬਲ ਲਾ ਦਿੱਤਾ ਹੈ ਤਾਂ ਕਿ ਅਗਲੀਆਂ ਨਸਲਾਂ ਨੂੰ ਪਤਾ ਨਾ ਲੱਗੇ ਕਿ ਸਾਡੀ ਵਿਰਾਸਤ ਕੀ ਸੀ ? ਹੁਣ ਸਾਧ ਲਾਣੇ ਤੋਂ ਬਚਿਆ ਕਿਵੇਂ ਜਾਵੇ ? ਪੰਜਾਬੀਓ ਘਰਾਂ ਤੇ ਪਿੰਡਾਂ ਦੇ ਵਿੱਚ ਲਾਇਬ੍ਰੇਰੀਆਂ ਬਣਾਓ। ਸਾਹਿਤ ਦੇ ਨਾਲ ਜੁੜੋ ਤੇ ਸਾਧਾਂ ਦੇ ਡੇਰਿਆਂ ਵੱਲੋਂ ਮੁੜੋ। ਇਸ ਚਿੱਟੀ ਸਿਉਕ ਤੋਂ ਬਚਣ ਲਈ ਸਾਨੂੰ ਕਿਤਾਬਾਂ ਦੇ ਨਾਲ ਜੁੜਨਾ ਪਵੇਗਾ..ਜੋ ਸਭ ਤੋਂ ਨੇੜੇ ਹਨ..ਚਿੱਟੀ ਸਿਉਕ ਉਹ ਡੇਰੇਦਾਰ ਹਨ ਜਾਂ ਸਿਆਸਤਦਾਨ ਇਹਨਾਂ ਤੋਂ ਬਚੋ! ਜੋ ਸੇਵਾ ਦੇ ਨਾਂ ਹੇਠ ਹਰ ਧੰਦਾ ਤੇ ਵਪਾਰ ਕਰਦੇ ਹਨ.!
ਆਪਣੇ ਆਪ ਨੂੰ ਸਸਤਾ ਨਾ ਵੇਚੋ…
ਨਰਕ ਸਵਰਗ ਸਭ ਧਰਤੀ ਉਤੇ ਹੈ..
ਜ਼ਿੰਦਗੀ ਅਣਖ ਤੇ ਜਿਉਣ ਲਈ ਹੈ
ਨਾ ਕਿ ਸਿਉਕ ਦੀ ਸੇਵਾ ਸੰਭਾਲ ਲਈ !
ਜਾਗੋ..ਸੰਭਲੋ…
ਇਸ ਚਿੱਟੀ ਮੱਖੀ.ਚਿੱਟੀ ਸਿਉਕ ਤੇ
ਚਿੱਟੇ ਸਿਆਸਤਦਾਨਾਂ ਤੋਂ ਬਚ ਹੁੰਦਾ, ਬਚ ਜਾਵੋ..
ਹੁਣ ਮਨ ਦੇ ਜਾਲੇ ਉਤਾਰਨ ਲਈ ਕਿਤਾਬਾਂ ਨੂੰ ਪੜ੍ਹੋ
ਜੰਮਣਾ, ਜਿਉਣਾ ਤੇ ਮਰਨਾ ਸਭ ਸੱਚ ਹੈ!
ਨਾ ਮਰਨ ਤੋਂ ਡਰੋ, ਮੌਤ ਅਟੱਲ ਹੈ..ਫੇਰ ਡਰ ਕਿਸਦਾ ਹੈ ? ਭਲਾ ਕੋਈ ਸਾਧ ਮੌਤ ਤੋਂ ਬਚਿਆ ਹੈ ?
ਇਹ ਚਿੱਟੀ ਸਿਉਂਕ ਜੋ ਸਵਰਗ ਦੀਆਂ ਟਿਕਟਾਂ ਦੇੰਦੀ ਸੀ? ਇਹਨਾਂ ਦੀਆਂ ਕਰਤੂਤਾਂ ਸਾਹਮਣੇ ਆ ਰਹੀਆਂ ਹਨ। ਪਰ ਅੰਨ੍ਹੀ ਸ਼ਰਧਾ ਵਿੱਚ ਖੀਵੀ ਹੋਈ ਭੀੜ ਆਪਣੇ ਜਿਸਮ ਤੇ ਮਾਇਆ ਲੁਟਾਈ ਜਾ ਰਹੀ ਹੈ। ਹੁਣ ਚਿੱਟੀ ਸਿਉਂਕ ਨੇ ਭਗਵੇਂ ਬਸਤਰ ਪਾ ਲਵੇ ਹਨ! ਬਾਬਿਆਂ ਦੀਆਂ ਧੁਰ ਦਰਗਾਹ ਵਾਲੀਆਂ ਵੀਡੀਓ ਵੀ ਸਾਹਮਣੇ ਆਉਣ ਲੱਗੀਆਂ ਹਨ। ਪਰ ਮਾਨਸਿਕ ਤੌਰ ਤੇ ਬੀਮਾਰ ਲੋਕਾਂ ਨੂੰ ਸਮਝ ਨਹੀਂ ਆਉਂਦੀ ਕਿ ਉਹ ਉਥੇ ਕਰਨ ਕੀ ਜਾਂਦੇ ਹਨ? ਚਿੱਟੀ ਸਿਉਂਕ ਤੋਂ ਬਚਣ ਸ਼੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਵਿਚਾਰਧਾਰਾ ਨੂੰ ਆਪਣੇ ਜੀਵਨ ਦੇ ਅਮਲ ਵਿੱਚ ਲਿਆਉਣ ਦੀ ਲੋੜ ਹੈ। ਗੁਰਬਾਣੀ ਪੜ੍ਹਨ ਲਈ ਤੇ ਵਿਚਾਰਨ ਲਈ ਹੈ। ਉਹ ਮੱਥੇ ਟੇਕਣ ਤੇ ਸੁਖਾਂ ਪੂਰੀਆਂ ਕਰਨ ਦੀ ਵਸਤੂ ਨਹੀਂ। ਗਿਆਨ ਦਾ ਭੰਡਾਰ ਹੈ, ਉਸਦੇ ਨਾਲ ਤਨੋ ਮਨੋ ਜੁੜੋ ਤੇ ਇਹਨਾਂ ਡੇਰਿਆਂ ਤੇ ਠਾਠਾਂ ਤੋਂ ਗੁਰੂ ਗ੍ਰੰਥ ਸਾਹਿਬ ਜੀ ਵੱਲ ਮੁੜੋ।