ਗੁਰਦਾਸਪੁਰ , 26 ਅਕਤੂਬਰ – ਬਟਾਲਾ ਦੇ ਮੁਹੱਲਾ ਚੰਦਰ ਨਗਰ ਦੀ ਗਲੀ ਨੰਬਰ ਇਕ ਵਿਚ ਬਾਅਦ ਦੁਪਹਿਰ 3 ਵਜ ਕੇ 22 ਮਿੰਟ (ਗਵਾਂਢ ਲੱਗੇ ਸੀ.ਸੀ.ਟੀ.ਵੀ ਕੈਮਰੇ ਅਨੁਸਾਰ) ਤੇ ਇਕ ਸ਼ਾਤਰ ਚੋਰ ਨਕਲੀ ਚਾਬੀ ਲਾ ਕੇ ਅਜੀਤ ਸਿੰਘ ਦੇ ਘਰ ਦੇ ਗੇਟ ਕੋਲ ਲੱਗੀ ਸਕੂਟਰੀ ਚੁਰਾ ਕੇ ਲੈ ਗਿਆ। ਸੀਸੀਟੀਵੀ ਕੈਮਰੇ ਅਨੁਸਾਰ ਚੋਰ ਗਲੀ ਵਿਚ ਪਹਿਲਾਂ ਇਧਰ ਓਧਰ ਫਿਰਦਾ ਰਿਹਾ ਅਤੇ ਫਿਰ ਨਾਲ ਵਾਲੇ ਘਰ ਦੀ ਥੜੀ ਤੇ ਬੈਠ ਗਿਆ। ਕੁਝ ਚਿਰ ਬਾਅਦ ਉਹ ਉਠ ਕੇ ਸਕੂਟਰੀ ਕੋਲ ਆਇਆ ਅਤੇ ਚਾਬੀ ਲਗਾ ਕੇ ਸਕੂਟਰ ਤੇ ਬੈਠ ਕੇ ਉਹ ਸਕੂਟਰੀ ਨੂੰ ਰੇੜ ਕੇ ਘਰ ਤੋਂ ਅੱਗੇ ਲੈ ਗਿਆ ਅਤੇ ਫਿਰ ਸਕੂਟਰੀ ਸਟਾਰਟ ਕਰਕੇ ਡੀ.ਏ.ਵੀ ਸਕੂਲ ਵਾਲੇ ਪਾਸੇ ਚਲਾ ਗਿਆ। ਸ਼ਾਤਰ ਚੋਰ ਦੀ ਕੈਮਰੇ ਚੋਂ ਲਈ ਤਸਵੀਰ ਜਦ ਮੁਹੱਲੇ ਵਿੱਚ ਹੋਰ ਲੋਕਾਂ ਨੂੰ ਵਿਖਾਈ ਤਾਂ ਉਹਨਾ ਨੇ ਦੱਸਿਆ ਕਿ ਮੁਹੱਲੇ ਵਿਚ ਲੱਗੇ ਸੀਸੀਟੀਵੀ ਕੈਮਰਿਆਂ ਅਨੁਸਾਰ ਇਸ ਚੋਰ ਨੇ ਕਈ ਸਕੂਟਰ/ਮੋਟਰਸਾਈਕਲ ਚੁਰਾਏ ਹਨ। ਮੁਹੱਲਾ ਨਿਵਾਸੀਆਂ ਅਨੁਸਾਰ ਕਈ ਵਾਰ ਪੁਲਿਸ ਨੂੰ ਸੂਚਿਤ ਕਰਨ ਦੇ ਬਾਵਜੂਦ ਇਹ ਚੋਰ ਹਜੇ ਤੱਕ ਕਾਬੂ ਨਹੀਂ ਆਇਆ ਹੈ ਤੇ ਲਗਾਤਾਰ ਦੋ ਪਹੀਆ ਗੱਡੀਆਂ ਚੋਰੀ ਕਰ ਰਿਹਾ ਹੈ।
