ਸਮਾਣਾ, 11 ਅਗਸਤ- ਦੇਰ ਸ਼ਾਮ ਪੀਆਰਟੀਸੀ ਬੱਸ ਦੇ ਡਰਾਈਵਰ ਨੇ ਬੱਸ ਭਾਖੜਾ ਪੁਲ ਨੇੜੇ ਸਮਾਣਾ-ਚੀਕਾ ਰੋਡ ’ਤੇ ਖੜ੍ਹੀ ਕਰ ਕੇ ਭਾਖੜਾ ਨਹਿਰ ਵਿੱਚ ਛਾਲ ਮਾਰ ਦਿੱਤੀ। ਸਿਟੀ ਪੁਲੀਸ ਨੇ ਮੌਕੇ ’ਤੇ ਪਹੁੰਚ ਕੇ ਜਾਇਜ਼ਾ ਲਿਆ ਤੇ ਪਾਣੀ ’ਚ ਰੁੜ੍ਹੇ ਡਰਾਈਵਰ ਦੀ ਭਾਲ ਲਈ ਗੋਤਾਖੋਰਾਂ ਦੀ ਟੀਮ ਬੁਲਾ ਕੇ ਭਾਲ ਸ਼ੁਰੂ ਕਰ ਦਿੱਤੀ। ਬੱਸ ਸਟੈਂਡ ਦੇ ਅੱਡਾ ਇੰਚਾਰਜ ਇੰਸਪੈਕਟਰ ਲਛਮਣ ਸਿੰਘ ਨੇ ਦੱਸਿਆ ਕਿ ਪੀਬੀ11-ਸੀਐੱਫ-9792 ਬੱਸ ਪਾਤੜਾਂ ਤੋਂ ਪਟਿਆਲਾ ਲਈ ਸ਼ਾਮ 6:20 ’ਤੇ ਕਰੀਬ 50 ਸਵਾਰੀਆਂ ਲੈ ਕੇ ਆ ਰਹੀ ਸੀ ਜਿਸ ਨੂੰ ਬੀਰੂ ਖਾਨ ਵਾਸੀ ਕਲਰ ਮਾਜਰੀ (ਪਟਿਆਲਾ) ਚਲਾ ਰਿਹਾ ਸੀ। ਉਸ ਨੇ ਬੱਸ ਭਾਖੜਾ ਪੁਲ ਨੇੜੇ ਇੱਕ ਸਾਈਡ ਖੜ੍ਹੀ ਕਰ ਕੇ ਭਾਖੜਾ ਨਹਿਰ ਵਿਚ ਛਾਲ ਮਾਰ ਦਿੱਤੀ ਜਿਸ ਕਾਰਨ ਉਹ ਪਾਣੀ ਦੇ ਤੇਜ਼ ਵਹਾਅ ਵਿੱਚ ਰੁੜ੍ਹ ਗਿਆ।
