ਪਹਿਲਗਾਮ ਨੇੜੇ 26 ਸੈਲਾਨੀਆਂ ਤੇ ਇੱਕ ਕਸ਼ਮੀਰੀ ਪੋਨੀ ਵਾਲੇ ਦੇ ਬੇਰਹਿਮੀ ਨਾਲ ਕਤਲਾਂ ਦਾ ਮੂਲ ਸੂਤਰਧਾਰ ਕੌਣ ਹੈ, ਇਹ ਡੂੰਘੀ ਜਾਂਚ ਦੇ ਬਾਅਦ ਹੀ ਪਤਾ ਲੱਗੇਗਾ। ਉਜ 2019 ਵਿੱਚ ਚੋਣਾਂ ਤੋਂ ਚੰਦ ਮਹੀਨੇ ਪਹਿਲਾਂ ਵਾਪਰੀ ਪੁਲਵਾਮਾ ਤ੍ਰਾਸਦੀ, ਜਿਸ ਵਿੱਚ ਕਰੀਬ 40 ਜਵਾਨ ਸ਼ਹੀਦ ਹੋ ਗਏ ਸਨ, ਦੇ ਅਸਲੀ ਸੂਤਰਧਾਰ ਨੂੰ ਲੈ ਕੇ ਅਜੇ ਵੀ ਵਿਵਾਦਾਂ ਦੀ ਧੁੰਦ ਛਾਈ ਹੋਈ ਹੈ। ਜੰਮੂ-ਕਸ਼ਮੀਰ ਦੇ ਤੱਤਕਾਲੀ ਰਾਜਪਾਲ ਸਤਪਾਲ ਮਲਿਕ ਦੇ ਬਿਆਨਾਂ ਨਾਲ ਪੈਦਾ ਸ਼ੰਕਿਆਂ ਦਾ ਮੋਦੀ-ਸ਼ਾਹ ਅੱਜ ਤੱਕ ਮਾਕੂਲ ਜਵਾਬ ਦੇਣ ’ਚ ਨਾਕਾਮ ਰਹੇ ਹਨ। ਬਿਹਾਰ ਅਸੈਂਬਲੀ ਚੋਣਾਂ ਤੋਂ ਪਹਿਲਾਂ 22 ਅਪ੍ਰੈਲ ਦੀ ਪਹਿਲਗਾਮ ਤ੍ਰਾਸਦੀ ਵੀ ਸ਼ੰਕੇ ਪੈਦਾ ਕਰ ਰਹੀ ਹੈ। ਵੀਰਵਾਰ ਦਿੱਲੀ ਵਿੱਚ ਸਰਬ ਪਾਰਟੀ ਮੀਟਿੰਗ ਵਿੱਚ ਸ਼ਾਮਲ ਨਾ ਹੋ ਕੇ ਬਿਹਾਰ ਦੇ ਮਧੂਬਨੀ ’ਚ ਪ੍ਰਧਾਨ ਮੰਤਰੀ ਨਰਿੰਦਰ ਦਾਮੋਦਰਦਾਸ ਮੋਦੀ ਨੇ ਦਹਾੜਨਾ ਜ਼ਰੂਰੀ ਸਮਝਿਆ। ਪਹਿਲਾਂ ਹਿੰਦੀ ਵਿੱਚ ਗਰਜੇ, ਫਿਰ ਅੰਗਰੇਜ਼ੀ ’ਚ (ਕੀ ਰੈਲੀ ਦੇ ਲੋਕਾਂ ਨੂੰ ਹਿੰਦੀ ਸਮਝ ਨਹੀਂ ਆਉਦੀ ਸੀ? ਕੀ ਮੋਦੀ ਜੀ ਦੇ ਸਾਹਮਣੇ ਤਾਮਿਲ ਤੇ ਮਲਿਆਲੀ ਬੈਠੇ ਹੋਏ ਹਨ? ) ਚੋਣਾਂ ਤੋਂ ਪਹਿਲਾਂ ਪੁਲਵਾਮਾ ਤੇ ਪਹਿਲਗਾਮ ਦੀਆਂ ਤ੍ਰਾਸਦੀਆਂ ਵਚਿੱਤਰ ਸੰਜੋਗ ਦੇ ਸੰਕੇਤ ਦਿੰਦੀਆਂ ਹਨ।
ਭਵਿੱਖ ਵਿੱਚ ਆਜ਼ਾਦ ਇਤਿਹਾਸਕਾਰ ਹੀ ਇਸ ਅਜੀਬੋ-ਗਰੀਬ ਵਚਿੱਤਰਤਾ ਦੀ ਅਸਲੀਅਤ ਸਾਹਮਣੇ ਲਿਆ ਸਕਣਗੇ। ਮੋਦੀ ਦੇ ਤੇਵਰਾਂ ਤੋਂ ਪਤਾ ਲੱਗਦਾ ਹੈ ਕਿ 2019 ਤੋਂ ਵੀ ਵੱਡੀ ਸਰਜੀਕਲ ਸਟਰਾਈਕ ਹੋ ਸਕਦੀ ਹੈ। ਉਦੋਂ ਸਰਕਾਰ ਨੇ ਚੋਣਾਂ ਵਿੱਚ ਇਸ ਦਾ ਕਾਫੀ ਫਾਇਦਾ ਉਠਾਇਆ ਸੀ। ਜੁਮਲਾ ਵੀ ਹੈਮੋਦੀ ਹੈ ਤੋ ਮੁਮਕਿਨ ਹੈ। ਪਰ ਸਰਕਾਰ ਨੂੰ ਕੋਈ ਵੀ ਜਵਾਬੀ ਕਾਰਵਾਈ ਕਰਨ ਤੋਂ ਪਹਿਲਾਂ ਇਹ ਸਮਝ ਲੈਣਾ ਚਾਹੀਦਾ ਹੈ ਕਿ ਜੰਮੂ-ਕਸ਼ਮੀਰ ਨੂੰ ਕੇਂਦਰ ਸ਼ਾਸਤ ਪ੍ਰਦੇਸ਼ ਵਿੱਚ ਬਦਲਣ ਤੋਂ ਬਾਅਦ ਉੱਥੇ ਦੀ ਅਮਨ-ਕਾਨੂੰਨ ਦੀ ਜ਼ਿੰਮੇਵਾਰੀ ਕੇਂਦਰ ਦੇ ਗ੍ਰਹਿ ਮੰਤਰਾਲੇ ਤੇ ਲੈਫਟੀਨੈਂਟ ਗਵਰਨਰ ਦੀ ਹੈ। ਚੁਣੀ ਹੋਈ ਉਮਰ ਸਰਕਾਰ ਕੋਲ ਤਾਂ ਸਿਪਾਹੀ ਤੱਕ ਦੀ ਤਾਇਨਾਤੀ ਤੇ ਤਬਾਦਲੇ ਦੇ ਅਧਿਕਾਰ ਨਹੀਂ।
ਇਹ ਅਹਿਮ ਸਵਾਲ ਉੱਠਦਾ ਹੈ ਕਿ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਨੇ 8 ਅਪ੍ਰੈਲ ਨੂੰ ਕਸ਼ਮੀਰ ਵਿੱਚ ਸੁਰੱਖਿਆ ਵਿਵਸਥਾ ਸੰਬੰਧੀ ਬੈਠਕ ਵਿੱਚ ਕਿਹੜੀ ਗੱਲ ਦੀ ਸਮੀਖਿਆ ਕੀਤੀ ਸੀ ਤੇ ਕਿਹੜੀ ਰਣਨੀਤੀ ਬਣਾਈ ਸੀ? ਇੱਕ ਅਜਿਹੀ ਥਾਂ, ਜਿੱਥੇ ਗਰਮੀਆਂ ਵਿੱਚ ਰੋਜ਼ਾਨਾ ਢਾਈ-ਤਿੰਨ ਹਜ਼ਾਰ ਸੈਲਾਨੀਆਂ ਇਕੱਠੇ ਹੁੰਦੇ ਹਨ, ਜਵਾਨਾਂ ਦੀ ਇੱਕ ਟੁਕੜੀ ਵੀ ਤਾਇਨਾਤ ਕਿਉ ਨਹੀਂ ਕੀਤੀ ਗਈ? ਐੱਮ ਆਈ ਐੱਮ ਆਈ ਐੱਮ ਦੇ ਆਗੂ ਅਸਦੂਦੀਨ ਓਵੈਸੀ ਦੀ ਮੰਨੀਏ ਤਾਂ ਉੱਥੇ ਪਹਿਲਾਂ ਸੀ ਆਰ ਪੀ ਐੱਫ ਦੀਆਂ ਦੋ ਟੁਕੜੀਆਂ ਹੁੰਦੀਆਂ ਸਨ। ਜੇ ਇਹ ਸਹੀ ਹੈ ਤਾਂ ਫਿਰ ਸਵਾਲ ਉੱਠਦਾ ਹੈ ਕਿ ਉਨ੍ਹਾਂ ਨੂੰ ਹਟਾਇਆ ਕਿਉ ਗਿਆ? ਇਸ ਤੋਂ ਪਹਿਲਾਂ 17 ਅਪ੍ਰੈਲ ਦੇ ਨੇੜੇ-ਤੇੜੇ ਆਰ ਐੱਸ ਐੱਸ ਤੇ ਦੱਖਣਪੰਥੀ ਜਥੇਬੰਦੀਆਂ ਨਾਲ ਜੁੜੇ ਤਮਾਮ ਸੋਸ਼ਲ ਮੀਡੀਆ ਦੀਆਂ ਪੋਸਟਾਂ ਵਿੱਚ ਖੁੱਲ੍ਹੇਆਮ ਇਹ ਗੱਲ ਲਿਖੀ ਤੇ ਕਹੀ ਜਾ ਰਹੀ ਸੀ ਕਿ ਕੁਝ ਹੋਣ ਵਾਲਾ ਹੈ। ਇਸ ਦੌਰਾਨ ਮੋਦੀ ਨੇ ਰਾਸ਼ਟਰਪਤੀ ਨਾਲ ਮੁਲਾਕਾਤ ਵੀ ਕੀਤੀ ਸੀ।
ਫਿਰ ਸ਼ਾਹ ਕਸ਼ਮੀਰ ਗਏ। ਭਾਜਪਾ ਪ੍ਰਧਾਨ ਜੇ ਪੀ ਨੱਢਾ ਦੀ ਸ਼ਾਹ ਨਾਲ ਮੁਲਾਕਾਤ ਹੋਈ। ਘਟਨਾ ਤੋਂ ਇੱਕ ਦਿਨ ਪਹਿਲਾਂ ਲੈਫਟੀਨੈਂਟ ਗਵਰਨਰ ਮਨੋਜ ਸਿਨਹਾ ਯੂ ਪੀ ਚਲੇ ਗਏ। ਇਸ ਤੋਂ ਪਹਿਲਾਂ ਮੌਸਮ ਖਰਾਬ ਹੋਣ ਦੀ ਪੇਸ਼ੀਨਗੋਈ ਦੇ ਬਹਾਨੇ ਮੋਦੀ ਨੇ ਕਸ਼ਮੀਰ ਦੌਰਾ ਰੱਦ ਕਰ ਦਿੱਤਾ ਸੀ। ਕੁਲ ਮਿਲਾ ਕੇ ਇਹੀ ਕਿਹਾ ਜਾ ਸਕਦਾ ਹੈ ਕਿ ਕੁਝ ਹੋਣ ਵਾਲਾ ਸੀ। ਇਸ ਦੀ ਪਿੱਠ-ਭੂਮੀ ’ਤੇ ਵੀ ਨਜ਼ਰ ਦੌੜਾਉਣ ਦੀ ਲੋੜ ਹੈ। ਆਰ ਐੱਸ ਐੱਸ ਭਾਜਪਾ ਪ੍ਰਧਾਨ ਆਪਣੀ ਮਰਜ਼ੀ ਦਾ ਬਣਾਉਣ ਲਈ ਦਬਾਅ ਪਾ ਰਿਹਾ ਹੈ। ਮੋਦੀ ਇਸ ਲਈ ਤਿਆਰ ਨਹੀਂ। ਕੌਮਾਂਤਰੀ ਮੈਗਜ਼ੀਨ ‘ਟਾਈਮ’ ਵੱਲੋਂ ਦੁਨੀਆ ਦੇ ਪ੍ਰਭਾਵੀ 100 ਲੋਕਾਂ ਦੀ ਜਾਰੀ ਸੂਚੀ ਵਿੱਚ ਮੋਦੀ ਦਾ ਨਾਂਅ ਨਜ਼ਰ ਨਹੀਂ ਆਇਆ। ਅਮਰੀਕਾ ਦੇ ਟਰੰਪ ਪ੍ਰਸ਼ਾਸਨ ਨੇ ਭਾਰਤੀਆਂ ਨੂੰ ਜਿਸ ਤਰ੍ਹਾਂ ਬੇੜੀਆਂ ਵਿੱਚ ਜਕੜ ਕੇ ਘੱਲਿਆ, ਉਸ ਨਾਲ ਸਰਕਾਰ ਦੀ ਬਦਨਾਮੀ ਹੋਈ।
