ਇੱਕ ਪਾਸੇ ਜਿੱਥੇ ਇਲੈਕਟ੍ਰਿਕ ਸਕੂਟਰਾਂ ਦੀਆਂ ਕੀਮਤਾਂ ਵੱਧ ਰਹੀਆਂ ਹਨ, ਉੱਥੇ ਹੀ ਦੂਜੇ ਪਾਸੇ ਦੇਸ਼ ਦੀ ਸਭ ਤੋਂ ਵੱਡੀ ਈ-ਸਕੂਟਰ ਨਿਰਮਾਤਾ ਅਤੇ ਵਿਕਰੇਤਾ ਕੰਪਨੀ ਨੇ ਆਪਣੇ ਉਤਪਾਦਾਂ ਦੀਆਂ ਕੀਮਤਾਂ ਵਿੱਚ 10,000 ਰੁਪਏ ਤੱਕ ਦੀ ਕਟੌਤੀ ਕੀਤੀ ਹੈ। ਇਸ ਲਈ, ਜੇਕਰ ਤੁਸੀਂ ਵੀ ਈ-ਸਕੂਟਰ ਖਰੀਦਣ ਦੀ ਯੋਜਨਾ ਬਣਾ ਰਹੇ ਹੋ, ਤਾਂ ਇਹ ਸਭ ਤੋਂ ਵਧੀਆ ਮੌਕਾ ਹੈ। ਤੁਸੀਂ ਨਾ ਸਿਰਫ਼ ਆਪਣੇ ਘਰ ਇੱਕ ਸ਼ਾਨਦਾਰ ਸਕੂਟਰ ਲਿਆਓਗੇ, ਸਗੋਂ 10,000 ਰੁਪਏ ਦੀ ਵੱਡੀ ਰਕਮ ਵੀ ਬਚਾ ਸਕੋਗੇ। ਦਰਅਸਲ, ਇਲੈਕਟ੍ਰਿਕ ਦੋਪਹੀਆ ਵਾਹਨ ਨਿਰਮਾਤਾ ਕੰਪਨੀ ਓਲਾ Ola ਇਲੈਕਟ੍ਰਿਕ ਨੇ ਸੋਮਵਾਰ ਨੂੰ ਆਪਣੇ ਐਂਟਰੀ-ਲੇਵਲ ਮਾਡਲ S1X ਦੇ ਸਾਰੇ ਵਰਜ਼ਨ ਦੀਆਂ ਕੀਮਤਾਂ 5,000 ਤੋਂ 10,000 ਰੁਪਏ ਤੱਕ ਘਟਾ ਦਿੱਤੀਆਂ ਹਨ। ਕੀਮਤਾਂ ਵਿੱਚ ਇਸ ਕਟੌਤੀ ਦੇ ਨਾਲ, ਓਲਾ ਦਾ ਇਹ ਇਲੈਕਟ੍ਰਿਕ ਸਕੂਟਰ ਹੁਣ ਰਵਾਇਤੀ ਸਕੂਟਰ ਮਾਡਲਾਂ ਦੇ ਨੇੜੇ ਆ ਗਿਆ ਹੈ। ਓਲਾ Ola ਨੇ ਇਸ ਸਾਲ ਫਰਵਰੀ ‘ਚ S1X ਮਾਡਲ ਨੂੰ 79,999 ਰੁਪਏ ਦੀ ਸ਼ੁਰੂਆਤੀ ਕੀਮਤ ‘ਤੇ ਲਾਂਚ ਕੀਤਾ ਸੀ।
ਇਸ ਦੇ ਸਭ ਤੋਂ ਐਡਵਾਂਸ ਵਰਜ਼ਨ ਦੀ ਕੀਮਤ 1,09,999 ਰੁਪਏ ਰੱਖੀ ਗਈ ਹੈ। ਓਲਾ ਇਲੈਕਟ੍ਰਿਕ ਦੇ ਚੀਫ ਮਾਰਕੀਟਿੰਗ ਅਫਸਰ ਅੰਸ਼ੁਲ ਖੰਡੇਲਵਾਲ ਨੇ ਕਿਹਾ ਹੈ ਕਿ ਇਸ ਐਂਟਰੀ-ਲੈਵਲ ਸਕੂਟਰ ਦੀਆਂ ਕੀਮਤਾਂ ਤੁਰੰਤ ਪ੍ਰਭਾਵ ਨਾਲ ਘਟਾਈਆਂ ਗਈਆਂ ਹਨ ਅਤੇ ਅਗਲੇ ਹਫਤੇ ਤੋਂ ਇਨ੍ਹਾਂ ਦੀ ਸਪਲਾਈ ਵੀ ਸ਼ੁਰੂ ਹੋ ਜਾਵੇਗੀ। ਕਟੌਤੀ ਦੇ ਐਲਾਨ ਤੋਂ ਬਾਅਦ, ਇਸ ਮਾਡਲ ਦੇ ਸ਼ੁਰੂਆਤੀ ਵਰਜ਼ਨ ਦੀ ਕੀਮਤ 69,999 ਰੁਪਏ ਹੋ ਗਈ ਹੈ, ਜਦੋਂ ਕਿ ਸਭ ਤੋਂ ਉੱਨਤ ਵਰਜ਼ਨ ਦੀ ਕੀਮਤ ਹੁਣ 99,999 ਰੁਪਏ ਹੋਵੇਗੀ। ਖੰਡੇਲਵਾਲ ਨੇ ਕਿਹਾ, ਅਸੀਂ ਮਹਿਸੂਸ ਕਰਦੇ ਹਾਂ ਕਿ ਭਾਰਤ ਨੂੰ ਹੋਰ ਵੀ ਬਹੁਤ ਚਾਹੀਦਾ ਹੈ, ਭਾਰਤ ਨੂੰ ਅਜਿਹੀ ਕੀਮਤ ਦੀ ਲੋੜ ਹੈ ਜਿਸ ‘ਤੇ ਖਪਤਕਾਰ ਅਸਲ ਵਿੱਚ ਈਵੀ ਨੂੰ ਅਪਣਾ ਸਕਣ ਅਤੇ ਸਾਡੀ ਈਵੀ ਇੱਕ ਆਮ ਆਦਮੀ ਦੀ ਸਵਾਰੀ ਬਣ ਸਕੇ। ਖੰਡੇਲਵਾਲ ਨੇ ਕਿਹਾ, ਇੱਕ ਇਲੈਕਟ੍ਰਿਕ ਸਕੂਟਰ ਦੀ ਔਸਤ ਕੀਮਤ 1 ਲੱਖ ਰੁਪਏ ਹੋਣ ਦੇ ਨਾਲ, ਖਪਤਕਾਰਾਂ ਦਾ ਪ੍ਰਤੀਕਰਮ ਇਹ ਰਿਹਾ ਹੈ ਕਿ ਜਦੋਂ ਇਸ ਦੀ ਕੀਮਤ ਪੈਟਰੋਲ ਸਕੂਟਰਾਂ ਦੇ ਬਰਾਬਰ ਹੋਵੇਗੀ, ਤਾਂ ਉਹ ਇਸ ਬਾਰੇ ਸੋਚਣਗੇ। ਇਸ ਰਾਏ ਨੂੰ ਧਿਆਨ ਵਿੱਚ ਰੱਖਦਿਆਂ ਕੀਮਤਾਂ ਘਟਾਉਣ ਦਾ ਫੈਸਲਾ ਕੀਤਾ ਗਿਆ ਹੈ। ਜ਼ਾਹਿਰ ਹੈ ਕਿ ਖਪਤਕਾਰ ਇਹ ਨਹੀਂ ਸੋਚਦਾ ਕਿ ਉਹ ਅਗਲੇ 5 ਸਾਲਾਂ ਵਿੱਚ ਕਿੰਨੀ ਬਚਤ ਕਰੇਗਾ। ਇਸ ਦੀ ਬਜਾਇ, ਉਹ ਉਸ ਕੀਮਤ ਬਾਰੇ ਜ਼ਿਆਦਾ ਸੋਚਦਾ ਹੈ ਜੋ ਉਸ ਨੂੰ ਅੱਜ ਹੀ ਅਦਾ ਕਰਨੀ ਪੈ ਰਹੀ ਹੈ।
