ਨਵੀਂ ਦਿੱਲੀ, 27 ਨਵੰਬਰ – ਗੂਗਲ ਮੈਪਸ ਦੀ ਵਜ੍ਹਾ ਨਾਲ ਬਹੁਤ ਸਾਰੇ ਲੋਕ ਹਰ ਰੋਜ਼ ਆਪਣੀ ਮੰਜ਼ਿਲ ‘ਤੇ ਪਹੁੰਚਦੇ ਹਨ। ਇਹ ਉਦੋਂ ਲਾਭਦਾਇਕ ਹੈ, ਜਦੋਂ ਤੁਹਾਨੂੰ ਰਸਤਾ ਨਹੀਂ ਪਤਾ ਹੁੰਦਾ ਪਰ ਇਸ ਵਾਰ ਗੂਗਲ ਮੈਪ ਦੀ ਵਰਤੋਂ ਕਰਨਾ ਤਿੰਨ ਲੋਕਾਂ ਦੀ ਮੌਤ ਦਾ ਕਾਰਨ ਬਣ ਗਿਆ। ਇਹ ਹਾਦਸਾ ਉੱਤਰ ਪ੍ਰਦੇਸ਼ ਦੇ ਬਰੇਲੀ ਜ਼ਿਲ੍ਹੇ ਦੇ ਫਰੀਦਪੁਰ ਥਾਣਾ ਖੇਤਰ ‘ਚ GPS ‘ਤੇ ਸਹੀ ਜਾਣਕਾਰੀ ਅਪਡੇਟ ਨਾ ਹੋਣ ਕਾਰਨ ਵਾਪਰਿਆ। ਅਜਿਹੇ ‘ਚ ਗੂਗਲ ਮੈਪ ਦੀ ਵਰਤੋਂ ਕਰਦੇ ਸਮੇਂ ਕੁਝ ਜ਼ਰੂਰੀ ਗੱਲਾਂ ਦਾ ਧਿਆਨ ਰੱਖਣਾ ਬਹੁਤ ਜ਼ਰੂਰੀ ਹੈ।
ਮੈਪ ਦੀ ਵਰਤੋਂ ਕਰਦਿਆਂ ਰਹੋ ਸਾਵਧਾਨ
– ਭਾਵੇਂ ਗੂਗਲ ਮੈਪ ਜ਼ਿਆਦਾਤਰ ਸਹੀ ਜਾਣਕਾਰੀ ਦਿੰਦਾ ਹੈ, ਕਈ ਵਾਰ ਇਸ ‘ਤੇ ਭਰੋਸਾ ਕਰਨਾ ਜੋਖ਼ਮ ਭਰਿਆ ਸਾਬਿਤ ਹੁੰਦਾ ਹੈ।
– ਕੁਝ ਦਿਨ ਪਹਿਲਾਂ ਦੋ ਦੋਸਤ ਮੈਪ ਕਾਰਨ ਗਲਤ ਰਸਤੇ ‘ਤੇ ਚਲੇ ਗਏ, ਜਿਸ ਕਾਰਨ ਹਾਦਸਾ ਵਾਪਰਿਆ।
– ਜੇ ਤੁਸੀਂ ਗੂਗਲ ਮੈਪ ਦੀ ਵਰਤੋਂ ਕਰ ਕੇ ਕਿਤੇ ਜਾ ਰਹੇ ਹੋ, ਤਾਂ ਜਾਣ ਤੋਂ ਪਹਿਲਾਂ ਇਕ ਵਾਰ ਜਾਂਚ ਕਰੋ ਕਿ ਮੈਪ ‘ਤੇ ਕੋਈ ਗ਼ਲਤ ਗਤੀਵਿਧੀ ਤਾਂ ਦਿਖਾਈ ਨਹੀਂ ਦੇ ਰਹੀ।
– ਕਈ ਵਾਰ ਮੈਪ ਨਦੀਆਂ, ਅਣਜਾਣ ਜਾਂ ਸੁੰਨਸਾਨ ਰਸਤਾ ਦਿਖਾਉਣਾ ਸ਼ੁਰੂ ਹੋ ਜਾਂਦਾ ਹੈ ਅਤੇ ਕੁਝ ਲੋਕ ਉਨ੍ਹਾਂ ‘ਤੇ ਚੱਲ ਪੈਂਦੇ ਹਨ, ਪਰ ਅਜਿਹਾ ਕਰਨਾ ਜੋਖ਼ਮ ਭਰਿਆ ਹੋ ਸਕਦਾ ਹੈ। ਇਸ ਲਈ ਅਜਿਹਾ ਕਰਨ ਤੋਂ ਬਚਣਾ ਚਾਹੀਦਾ ਹੈ।
– ਜੇ ਤੁਹਾਨੂੰ ਮੈਪ ਸਮਝ ਨਹੀਂ ਆਉਂਦਾ, ਤਾਂ ਸਥਾਨਕ ਲੋਕਾਂ ਤੋਂ ਮਦਦ ਲੈਣ ਦੀ ਕੋਸ਼ਿਸ਼ ਕਰੋ। ਇਸ ਨਾਲ ਤੁਹਾਡਾ ਕੁਝ ਮਿੰਟ ਦਾ ਸਮਾਂ ਖਰਚ ਹੋਵੇਗਾ ਪਰ ਤੁਹਾਨੂੰ ਸਹੀ ਜਾਣਕਾਰੀ ਮਿਲੇਗੀ।
– ਮੈਪ ਦੀਆਂ ਨਵੀਆਂ ਵਿਸ਼ੇਸ਼ਤਾਵਾਂ ਨਾਲ ਖ਼ੁਦ ਨੂੰ ਅਪਡੇਟ ਰੱਖਣਾ ਬਹੁਤ ਜ਼ਰੂਰੀ ਹੈ, ਤਾਂ ਜੋ ਜੇ ਤੁਹਾਨੂੰ ਮੁਸ਼ਕਲ ਆਉਂਦੀ ਹੈ ਤਾਂ ਤੁਸੀਂ ਇਨ੍ਹਾਂ ਵਿਸ਼ੇਸ਼ਤਾਵਾਂ ਦੀ ਮਦਦ ਲੈ ਸਕਦੇ ਹੋ।
– ਕਿਤੇ ਵੀ ਜਾਣ ਤੋਂ ਪਹਿਲਾਂ ਮੈਪ ਨੂੰ ਅਪਡੇਟ ਕਰਨਾ ਵੀ ਬਹੁਤ ਜ਼ਰੂਰੀ ਹੈ।
Google Maps ‘ਤੇ ਕਦੋਂ ਕਰਨਾ ਚਾਹੀਦਾ ਭਰੋਸਾ
ਮੈਪ ‘ਤੇ ਅੱਖਾਂ ਬੰਦ ਕਰ ਕੇ ਭਰੋਸਾ ਕਰਨਾ ਠੀਕ ਨਹੀਂ ਹੈ। ਤੁਸੀਂ ਗੂਗਲ ਮੈਪ ਦੀ ਮਦਦ ਲੈ ਸਕਦੇ ਹੋ ਪਰ ਇਸ ‘ਤੇ ਭਰੋਸਾ ਨਹੀਂ ਕਰ ਸਕਦੇ। ਜੇ ਤੁਸੀਂ ਕਿਸੇ ਵੱਡੀ ਸੜਕ ‘ਤੇ ਜਾ ਰਹੇ ਹੋ, ਤਾਂ ਇੱਥੇ ਮੈਪ ਵਧੀਆ ਕੰਮ ਕਰਦਾ ਹੈ, ਕਮਜ਼ੋਰ ਇੰਟਰਨੈੱਟ ਦੀ ਸਥਿਤੀ ਵਿਚ ਗੂਗਲ ਮੈਪ ਤੁਹਾਨੂੰ ਮੁਸ਼ਕਲ ਵਿੱਚ ਪਾ ਸਕਦਾ ਹੈ। ਇਸ ਲਈ ਹਮੇਸ਼ਾ ਚੰਗਾ ਇੰਟਰਨੈੱਟ ਕੁਨੈਕਸ਼ਨ ਬਣਾਈ ਰੱਖੋ। ਨਾਲ ਹੀ ਨਕਸ਼ੇ ਦੀ ਵਰਤੋਂ ਕਰਦੇ ਸਮੇਂ ਸਾਵਧਾਨ ਰਹਿਣਾ ਬਹੁਤ ਜ਼ਰੂਰੀ ਹੈ।
