ਜਲੰਧਰ, 11 ਮਾਰਚ – ਡਿਪਟੀ ਡਾਇਰੈਕਟਰ, ਜਿਲ੍ਹਾ ਬਿਊਰੋ ਆਫ ਰੋਜ਼ਗਾਰ ਉਤਪਤੀ, ਹੁਨਰ ਵਿਕਾਸ ਅਤੇ ਸਿਖਲਾਈ, ਜਲੰਧਰ ਨੀਲਮ ਮਹੇ ਨੇ ਦੱਸਿਆ ਕਿ ਜ਼ਿਲ੍ਹਾ ਪ੍ਰਸ਼ਾਸਨ ਜਲੰਧਰ ਦੀ ਅਗਵਾਈ ਹੇਠ ਜ਼ਿਲ੍ਹਾ ਰੋਜਗਾਰ ਤੇ ਕਾਰੋਬਾਰ ਬਿਊਰੋ, ਜਲੰਧਰ ਦਫ਼ਤਰ ਵਿਖੇ ਮਹੀਨਾ ਮਾਰਚ- 2025 ਤੋਂ ਪੰਜਾਬ ਸਿਵਲ ਸਰਵਿਸਜ਼ ਇਮਤਿਹਾਨ-2025 (PCS) ਦੀ ਮੁਫਤ ਕੋਚਿੰਗ ਸ਼ੁਰੂ ਕੀਤੀ ਜਾ ਰਹੀ ਹੈ। ਉਨ੍ਹਾਂ ਦੱਸਿਆ ਇਹ ਪੰਜਾਬ ਸਿਵਲ ਸਰਵਿਸ ਇਮਤਿਹਾਨ-2025 (ਪੀ.ਸੀ.ਐਸ.) ਦੀ ਕੋਚਿੰਗ ਲੈਣ ਦੇ ਚਾਹਵਾਨ ਪ੍ਰਾਰਥੀ ਜਿਨ੍ਹਾਂ ਦੀ ਮੁੱਢਲੀ ਵਿੱਦਿਅਕ ਯੋਗਤਾ ਗ੍ਰੈਜੂਏਸ਼ਨ, ਉਮਰ ਸੀਮਾ 21-37 ਸਾਲ (ਅਨੁਸੂਚਿਤ ਜਾਤੀ ਲਈ ਉਪਰਲੀ ਉਮਰ ਸੀਮਾ 42 ਸਾਲ ਅਤੇ ਦਿਵਿਆਂਗਜਨਾਂ ਲਈ 47 ਸਾਲ) ਹੋਵੇ, ਉਹ ਇਹ ਮੁਫਤ ਕੋਚਿੰਗ ਲੈਣ ਲਈ ਯੋਗ ਹੋਣਗੇ।
ਉਨ੍ਹਾਂ ਦੱਸਿਆ ਕਿ ਇਹ ਉੱਚ ਕੋਟੀ ਦੀ ਕੋਚਿੰਗ ਹੋਵੇਗੀ, ਜਿਸਦੇ ਵਧੀਆ ਨਤੀਜੇ ਆਉਣੇ ਸੁਭਾਵਿਕ ਹਨ। ਉਨ੍ਹਾਂ ਦੱਸਿਆ ਕਿ ਉਕਤ ਮੁਫ਼ਤ ਕੋਚਿੰਗ ਲੈਣ ਦੇ ਚਾਹਵਾਨ ਪ੍ਰਾਰਥੀ ਆਪਣੀ ਵਿੱਦਿਅਕ ਯੋਗਤਾ ਦੇ ਸਰਟੀਫਿਕੇਟਾਂ, ਅਧਾਰ ਕਾਰਡ, ਜਾਤੀ ਦਾ ਸਰਟੀਫਿਕੇਟ ਆਦਿ ਦਸਤਾਵੇਜਾਂ ਸਹਿਤ 13 ਮਾਰਚ 2025 ਨੂੰ ਸਵੇਰ 09:00 ਵਜੇ ਜ਼ਿਲ੍ਹਾ ਰੋਜ਼ਗਾਰ ਤੇ ਕਾਰੋਬਾਰ ਬਿਊਰੋ ਵਿਖੇ ਮੁੱਢਲੀ ਸਕਰੀਨਿੰਗ ਵਿੱਚ ਸ਼ਾਮਿਲ ਹੋ ਸਕਦੇ ਹਨ।
