ਆਧੁਨਿਕ ਏਅਰਪੋਰਟ ਵੈਸਟਰਨ ਸਿਡਨੀ ਇੰਟਰਨੈਸ਼ਨਲ (ਨੈਂਸੀ-ਬਰਡ ਵਾਲਟਨ) ਦਾ ਸ਼ਾਨਦਾਰ ਉਦਘਾਟਨ

ਔਕਲੈਂਡ, 31 ਅਕਤੂਬਰ 2026 (ਹਰਜਿੰਦਰ ਸਿੰਘ ਬਸਿਆਲਾ) – ਆਸਟਰੇਲੀਆ ਦੇ ਸਭ ਤੋਂ ਨਵੇਂ ਅਤੇ ਆਧੁਨਿਕ ਏਅਰਪੋਰਟ ਵੈਸਟਰਨ ਸਿਡਨੀ ਇੰਟਰਨੈਸ਼ਨਲ (ਨੈਂਸੀ-ਬਰਡ ਵਾਲਟਨ) ਏਅਰਪੋਰਟ (WSI) ਵਿਖੇ ਪਹਿਲੀ ਅੰਤਰਰਾਸ਼ਟਰੀ ਯਾਤਰੀ ਏਅਰਲਾਈਨ ਵਜੋਂ ਲੈਂਡ ਕਰਕੇ ਏਅਰ ਨਿਊਜ਼ੀਲੈਂਡ ਨੇ ਇੱਕ ਨਵਾਂ ਮੀਲ ਪੱਥਰ ਕਾਇਮ ਕੀਤਾ ਹੈ। ਇਹ ਇਤਿਹਾਸਕ ਸ਼ੁਰੂਆਤ ਨਿਊਜ਼ੀਲੈਂਡ ਅਤੇ ਆਸਟਰੇਲੀਆ ਦੇ ਸਭ ਤੋਂ ਤੇਜ਼ੀ ਨਾਲ ਵਧ ਰਹੇ ਖੇਤਰ ਵਿਚਕਾਰ ਸੁਖਾਲੀ ਯਾਤਰਾ ਅਤੇ ਆਰਥਿਕ ਸੰਬੰਧਾਂ ਦੇ ਨਵੇਂ ਦੁਆਰ ਖੋਲ੍ਹਦੀ ਹੈ।

ਨਵੀਂ ਉਡਾਣ ਅਤੇ ਇਤਿਹਾਸਕ ਪਲ 26 ਅਕਤੂਬਰ 2026 ਨੂੰ ਔਕਲੈਂਡ ਤੋਂ ਰਵਾਨਾ ਹੋਈ ਫਲਾਈਟ NZ165 ਨੇ ਸਵੇਰੇ 7.28 ਵਜੇ ਵੈਸਟਰਨ ਸਿਡਨੀ ਦੀ ਧਰਤੀ ’ਤੇ ਪਹਿਲਾ ਕਦਮ ਰੱਖਿਆ। ਇਸ ਤੋਂ ਬਾਅਦ ਇਹ ਫਲਾਈਟ 9.00 ਵਜੇ ਵਾਪਸੀ ਲਈ ਰਵਾਨਾ ਹੋਈ। ਇਹ ਇਤਿਹਾਸਕ ਪਲ ਸਾਲਾਂ ਦੀ ਯੋਜਨਾਬੰਦੀ ਦਾ ਨਤੀਜਾ ਹੈ। ਏਅਰ ਨਿਊਜ਼ੀਲੈਂਡ ਹੁਣ ਔਕਲੈਂਡ ਅਤੇ ਵੈਸਟਰਨ ਸਿਡਨੀ ਵਿਚਕਾਰ ਹਫ਼ਤੇ ਵਿੱਚ 3 ਦਿਨ (ਸੋਮਵਾਰ, ਬੁੱਧਵਾਰ ਅਤੇ ਸ਼ੁੱਕਰਵਾਰ) ਆਪਣੀਆਂ ਸੇਵਾਵਾਂ ਦੇਵੇਗੀ, ਜੋ ਮਾਰਚ 2027 ਤੋਂ ਬਾਅਦ ਮੰਗਲਵਾਰ, ਵੀਰਵਾਰ ਅਤੇ ਸ਼ਨੀਵਾਰ ਨੂੰ ਚੱਲਿਆ ਕਰਨਗੀਆਂ।

ਹਵਾਈ ਅੱਡਿਆਂ ਅਤੇ ਔਕਲੈਂਡ ਵਿਚਕਾਰ ਦੂਰੀ ਔਕਲੈਂਡ ਤੋਂ ਵੈਸਟਰਨ ਸਿਡਨੀ ਏਅਰਪੋਰਟ ਦੀ ਹਵਾਈ ਦੂਰੀ ਲਗਭਗ 2150 ਕਿਲੋਮੀਟਰ ਤੋਂ 2200 ਕਿਲੋਮੀਟਰ ਹੈ ਅਤੇ ਸਿੱਧੀ ਉਡਾਣ ਦਾ ਸਮਾਂ ਲਗਭਗ ਸਵਾ 3 ਤੋਂ ਸਾਢੇ 3 ਘੰਟੇ ਹੈ। ਇਹ ਸਿਡਨੀ ਹਵਾਈ ਅੱਡੇ ਤੋਂ ਲਗਪਗ 52 ਕਿਲੋਮੀਟਰ ਦੂਰ ਬਣਿਆ ਨਵਾਂ ਏਅਰਪੋਰਟ ਹੈ। ਪੁਰਾਣਾ ਸਿਡਨੀ ਏਅਰਪੋਰਟ (ਸਿਡਨੀ ਕਿੰਗਸਫੋਰਡ ਸਮਿਥ – SYD, ਮੈਸਕੋਟ) ਪੂਰੀ ਤਰ੍ਹਾਂ ਬੰਦ ਨਹੀਂ ਹੋਵੇਗਾ, ਬਲਕਿ ਦੋਵੇਂ ਏਅਰਪੋਰਟ ਨਾਲ-ਨਾਲ ਚੱਲਣਗੇ।

ਏਅਰਪੋਰਟ ਵਿੱਚ ਕੀ ਹੈ ਖਾਸ, ਨਵਾਂ ਅਤੇ ਵੱਖਰਾ? ਇਹ ਆਸਟਰੇਲੀਆ ਦਾ ਪਹਿਲਾ ਗ੍ਰੀਨਫੀਲਡ ਏਅਰਪੋਰਟ ਹੈ ਜੋ ਬਿਨਾਂ ਕਿਸੇ ਕਰਫਿਊ (ਰਾਤ ਦੀ ਰੁਕਾਵਟ) ਦੇ 24 ਘੰਟੇ ਨਿਰੰਤਰ ਚੱਲੇਗਾ (ਜਦਕਿ ਪੁਰਾਣੇ ਏਅਰਪੋਰਟ ’ਤੇ ਰਾਤ 11.00 ਤੋਂ ਸਵੇਰੇ 6.00 ਤੱਕ ਕਰਫਿਊ ਹੁੰਦਾ ਹੈ)। ਇੱਥੇ ਘਰੇਲੂ (Domestic) ਅਤੇ ਅੰਤਰਰਾਸ਼ਟਰੀ (International) ਦੋਵੇਂ ਉਡਾਣਾਂ ਇੱਕੋ ਹੀ ਟਰਮੀਨਲ ਛੱਤ ਹੇਠੋਂ ਸੰਚਾਲਿਤ ਹੋਣਗੀਆਂ, ਜਿਸ ਨਾਲ ਕਨੈਕਟਿੰਗ ਯਾਤਰੀਆਂ ਦਾ ਸਮਾਂ ਬਚੇਗਾ।

ਨਵੀਆਂ ਅਤੇ ਆਧੁਨਿਕ ਮਸ਼ੀਨਾਂ ਦੀ ਵਰਤੋਂ

1. ਬਾਇਓਮੈਟ੍ਰਿਕ ਸਿਸਟਮ: ਯਾਤਰੀਆਂ ਦੇ ਚੈੱਕ-ਇਨ ਅਤੇ ਬੋਰਡਿੰਗ ਲਈ ਡਿਜੀਟਲ ਅਤੇ ਬਾਇਓਮੈਟ੍ਰਿਕ ਆਈਡੈਂਟੀਫਿਕੇਸ਼ਨ ਮਸ਼ੀਨਾਂ ਲਗਾਈਆਂ ਗਈਆਂ ਹਨ।
2. 5-ਕਿਲੋਮੀਟਰ ਲੰਬਾ ਆਟੋਮੇਟਿਡ ਬੈਗੇਜ ਸਿਸਟਮ: ਸਾਮਾਨ ਦੀ ਤੇਜ਼ ਅਤੇ ਸੁਰੱਖਿਅਤ ਸਕੈਨਿੰਗ ਲਈ 5km ਲੰਬਾ ਆਟੋਮੈਟਿਕ ਬੈਗੇਜ ਹੈਂਡਲਿੰਗ ਸਿਸਟਮ ਬਣਾਇਆ ਗਿਆ ਹੈ ਜੋ ਪ੍ਰਤੀ ਘੰਟਾ 2000 ਬੈਗ ਪ੍ਰੋਸੈਸ ਕਰ ਸਕਦਾ ਹੈ।
3. ਏਆਈ ਅਤੇ ਡਿਜੀਟਲ ਬਾਇਓਸਕਿਓਰਿਟੀ: ਬੈਗੇਜ ਚੈਕਿੰਗ ਲਈ AI-ਅਧਾਰਿਤ ਐਡਵਾਂਸਡ 3D ਸਕੈਨਰ ਮਸ਼ੀਨਾਂ ਲਗਾਈਆਂ ਗਈਆਂ ਹਨ।
4. ਡਿਜੀਟਲ ਅਰਾਈਵਲ ਡੈਕਲੇਰੇਸ਼ਨ: ਆਸਟਰੇਲੀਆ ਟਰੈਵਲ ਡੈਕਲੇਰੇਸ਼ਨ ਨੂੰ ਪੂਰੀ ਤਰ੍ਹਾਂ ਡਿਜੀਟਲ ਮਸ਼ੀਨਾਂ ਨਾਲ ਜੋੜਿਆ ਗਿਆ ਹੈ।

ਕੌਣ ਸੀ ਨੈਂਸੀ-ਬਰਡ ਵਾਲਟਨ?ਭਾਰਤ ਨਾਲ ਵੀ ਰਿਹਾ ਹੈ ਖਾਸ ਸਬੰਧ ਨੈਂਸੀ-ਬਰਡ ਵਾਲਟਨ (Nancy-Bird Walton) ਆਸਟਰੇਲੀਆ ਦੀ ਇੱਕ ਮਸ਼ਹੂਰ ਅਤੇ ਇਤਿਹਾਸਕ ਮਹਿਲਾ ਪਾਇਲਟ ਸੀ, ਜਿਸ ਨੇ ਹਵਾਈ ਖੇਤਰ (Aviation) ਵਿੱਚ ਔਰਤਾਂ ਲਈ ਨਵੇਂ ਰਾਹ ਖੋਲ੍ਹੇ।

ਮੁੱਢਲਾ ਜੀਵਨ ਅਤੇ ਜਜ਼ਬਾ ਨੈਂਸੀ-ਬਰਡ ਦਾ ਜਨਮ 16 ਅਕਤੂਬਰ 1915 ਨੂੰ ਨਿਊ ਸਾਊਥ ਵੇਲਜ਼, ਆਸਟਰੇਲੀਆ ਵਿੱਚ ਹੋਇਆ ਸੀ। ਬਚਪਨ ਤੋਂ ਹੀ ਉਸ ਨੂੰ ਅਸਮਾਨ ਵਿੱਚ ਉੱਡਣ ਦਾ ਬਹੁਤ ਸ਼ੌਕ ਸੀ। ਮਾਤਰ 13 ਸਾਲ ਦੀ ਉਮਰ ਵਿੱਚ ਉਸ ਨੇ ਆਪਣੀ ਪਹਿਲੀ ਹਵਾਈ ਯਾਤਰਾ ਕੀਤੀ ਅਤੇ 17 ਸਾਲ ਦੀ ਉਮਰ ਵਿੱਚ ਉਸ ਨੇ ਮਸ਼ਹੂਰ ਆਸਟਰੇਲੀਆਈ ਪਾਇਲਟ ਚਾਰਲਸ ਕਿੰਗਸਫੋਰਡ ਸਮਿਥ (Sir Charles Kingsford Smith) ਤੋਂ ਉਡਾਣ ਸਿੱਖਣੀ ਸ਼ੁਰੂ ਕੀਤੀ।

ਇਤਿਹਾਸਕ ਉਪਲਬਧੀਆਂ

• ਸਭ ਤੋਂ ਛੋਟੀ ਉਮਰ ਦੀ ਲਾਇਸੰਸਸ਼ੁਦਾ ਪਾਇਲਟ: 1933 ਵਿੱਚ, 19 ਸਾਲ ਦੀ ਉਮਰ ਵਿੱਚ, ਉਸ ਨੇ ਆਸਟਰੇਲੀਆ ਵਿੱਚ ਕਮਰਸ਼ੀਅਲ ਪਾਇਲਟ ਲਾਇਸੰਸ ਪ੍ਰਾਪਤ ਕੀਤਾ। ਉਹ ਕਮਰਸ਼ੀਅਲ ਲਾਇਸੰਸ ਹਾਸਲ ਕਰਨ ਵਾਲੀ ਆਸਟਰੇਲੀਆ ਦੀ ਸਭ ਤੋਂ ਛੋਟੀ ਉਮਰ ਦੀ ਮਹਿਲਾ ਬਣੀ।
• ਏਅਰ ਐਂਬੂਲੈਂਸ ਸੇਵਾ (Royal Flying Doctor Service): 1930 ਦੇ ਦਹਾਕੇ ਵਿੱਚ ਉਸ ਨੇ ਆਸਟਰੇਲੀਆ ਦੇ ਦੂਰ-ਦੁਰਾਡੇ ਅਤੇ ਪੱਛੜੇ ਇਲਾਕਿਆਂ ਵਿੱਚ ਬੀਮਾਰਾਂ ਅਤੇ ਲੋੜਵੰਦਾਂ ਲਈ ਹਵਾਈ ਐਂਬੂਲੈਂਸ ਸੇਵਾ ਸ਼ੁਰੂ ਕੀਤੀ, ਜਿਸ ਨਾਲ ਕਈ ਲੱਖਾਂ ਲੋਕਾਂ ਦੀ ਜਾਨ ਬਚਾਈ ਜਾ ਸਕੀ।

ਮਾਣ-ਸਨਮਾਨ ਅਤੇ ਵਿਰਾਸਤ 1950 ਵਿੱਚ ਉਸ ਨੇ ‘ਆਸਟਰੇਲੀਅਨ ਵੂਮੈਨ ਪਾਇਲਟਸ ਐਸੋਸੀਏਸ਼ਨ’ ਦੀ ਸਥਾਪਨਾ ਕੀਤੀ ਅਤੇ ਕਈ ਸਾਲਾਂ ਤੱਕ ਇਸ ਦੀ ਪ੍ਰਧਾਨ ਰਹੀ। ਸਮਾਜ ਅਤੇ ਹਵਾਨੌਰ ਖੇਤਰ ਵਿੱਚ ਦਿੱਤੇ ਯੋਗਦਾਨ ਲਈ ਉਸ ਨੂੰ 1966 ਵਿੱਚ Order of the British Empire (OBE) ਅਤੇ 1990 ਵਿੱਚ Officer of the Order of Australia (AO) ਨਾਲ ਸਨਮਾਨਿਤ ਕੀਤਾ ਗਿਆ।

ਨੈਂਸੀ-ਬਰਡ ਵਾਲਟਨ ਦਾ ਦਿਹਾਂਤ 13 ਜਨਵਰੀ 2009 ਨੂੰ 93 ਸਾਲ ਦੀ ਉਮਰ ਵਿੱਚ ਹੋਇਆ। ਉਹ ਆਸਟਰੇਲੀਆਈ ਇਤਿਹਾਸ ਵਿੱਚ “First Lady of Aviation” ਦੇ ਨਾਮ ਨਾਲ ਹਮੇਸ਼ਾ ਜਾਣੀ ਜਾਵੇਗੀ।

ਭਾਰਤ ਨਾਲ ਸਬੰਧ

1. ਅੰਤਰਰਾਸ਼ਟਰੀ ਮਹਿਲਾ ਪਾਇਲਟ ਕਾਨਫਰੰਸ (1986): 1986 ਵਿੱਚ ਨੈਂਸੀ-ਬਰਡ ਵਾਲਟਨ ਨੇ ਭਾਰਤ ਦਾ ਦੌਰਾ ਕੀਤਾ ਸੀ, ਜਿੱਥੇ ਉਹ ਇੱਕ ਵਿਸ਼ੇਸ਼ ਅੰਤਰਰਾਸ਼ਟਰੀ ਮਹਿਲਾ ਪਾਇਲਟ ਕਾਨਫਰੰਸ ਵਿੱਚ ਮੁੱਖ ਬੁਲਾਰੇ ਵਜੋਂ ਸ਼ਾਮਲ ਹੋਈ ਸੀ। ਉਸ ਨੇ ਭਾਰਤੀ ਮਹਿਲਾ ਪਾਇਲਟਾਂ ਨਾਲ ਆਪਣੇ ਤਜਰਬੇ ਸਾਂਝੇ ਕੀਤੇ ਅਤੇ ਉਨ੍ਹਾਂ ਨੂੰ ਹਵਾਨੌਰ (Aviation) ਦੇ ਖੇਤਰ ਵਿੱਚ ਅੱਗੇ ਵਧਣ ਲਈ ਪ੍ਰੇਰਿਤ ਕੀਤਾ।
2. ਏਸ਼ੀਆ ਅਤੇ ਭਾਰਤ ਵਿੱਚ ਔਰਤਾਂ ਲਈ ਪ੍ਰੇਰਨਾ: ਉਸ ਵੱਲੋਂ 1950 ਵਿੱਚ ਸਥਾਪਿਤ ਕੀਤੀ ਗਈ “Australian Women Pilots’ Association” (AWPA) ਅਤੇ ਉਸ ਦੀ ਆਟੋਬਾਇਓਗ੍ਰਾਫੀ “My God! It’s a Woman” ਨੇ ਭਾਰਤ ਸਮੇਤ ਪੂਰੇ ਏਸ਼ੀਆ ਦੀਆਂ ਉੱਭਰਦੀਆਂ ਮਹਿਲਾ ਪਾਇਲਟਾਂ ਲਈ ਇੱਕ ਵੱਡਾ ਮਾਰਗਦਰਸ਼ਨ ਕੀਤਾ।

ਦਿੱਲੀ ਏਅਰਪੋਰਟ ’ਤੇ ਹੋਇਆ ਸੀ ਸਾਮਾਨ ਗੁੰਮ 1986 ਵਿੱਚ ਤਾਜ ਪੈਲੇਸ ਵਿਖੇ ਆਯੋਜਿਤ ਇੱਕ ਅੰਤਰਰਾਸ਼ਟਰੀ ਮਹਿਲਾ ਫਲਾਇੰਗ ਕਾਨਫਰੰਸ ਵਿੱਚ ਬੋਲਣ ਲਈ ਭਾਰਤ ਯਾਤਰਾ ਦੌਰਾਨ, ਨੈਂਸੀ ਜਦੋਂ ਦਿੱਲੀ ਏਅਰਪੋਰਟ ਪਹੁੰਚੀ ਤਾਂ ਉਸ ਦਾ ਸਮਾਨ ਗੁੰਮ ਹੋ ਗਿਆ ਸੀ। ਜਦੋਂ ਏਅਰਪੋਰਟ ਅਧਿਕਾਰੀਆਂ ਨੇ ਇਹ ਕਹਿ ਦਿੱਤਾ ਕਿ ਸਮਾਨ ਹੁਣ ਨਹੀਂ ਮਿਲ ਸਕਦਾ, ਤਾਂ ਨੈਂਸੀ ਆਪਣੇ ਫੈਸਲੇ ’ਤੇ ਡਟੀ ਰਹੀ ਅਤੇ ਉਨ੍ਹਾਂ ਨੂੰ ਬੜੀ ਨਰਮਾਈ ਨਾਲ ਦੱਸਿਆ ਕਿ ਉਹ ਠੀਕ ਦੋ ਘੰਟਿਆਂ ਵਿੱਚ ਭਾਰਤ ਦੇ ਪ੍ਰਧਾਨ ਮੰਤਰੀ ਨੂੰ ਮਿਲਣ ਜਾ ਰਹੀ ਹੈ ਅਤੇ ਉਹ ਆਪਣੇ ਯਾਤਰਾ ਵਾਲੇ ਕੱਪੜਿਆਂ ਵਿੱਚ ਉਨ੍ਹਾਂ ਨੂੰ ਮਿਲਣ ਦਾ ਕੋਈ ਇਰਾਦਾ ਨਹੀਂ ਰੱਖਦੀ।