ਕਿਸਾਨਾਂ ਦੀ ਸਬਸਿਡੀ ਵਾਲੀ ਖਾਦ ਪਲਾਈਵੁੱਡ ਫੈਕਟਰੀਆਂ ਤੱਕ ਪਹੁੰਚ ਰਹੀ !

7, ਮਈ – ਦੇਸ਼ ਦੇ ਕਿਸਾਨਾਂ ਲਈ ਸਰਕਾਰ ਵੱਲੋਂ ਸਬਸਿਡੀ ’ਤੇ ਦਿੱਤੀ ਜਾਣ ਵਾਲੀ ਯੂਰੀਆ ਖਾਦ ਨੂੰ ਲੈ ਕੇ ਵੱਡਾ ਖੁਲਾਸਾ ਸਾਹਮਣੇ ਆਇਆ ਹੈ। ਸਟਿੰਗ ਆਪਰੇਸ਼ਨ ਦੌਰਾਨ ਖੁਫੀਆ ਕੈਮਰੇ ਵਿੱਚ ਕਈ ਅਜਿਹੇ ਦ੍ਰਿਸ਼ ਕੈਦ ਹੋਏ, ਜਿੱਥੇ ਰਾਤ ਦੇ ਸਮੇਂ ਮਿਨੀ ਟਰੱਕਾਂ ਵਿੱਚ ਭਰੀਆਂ ਪੀਲੀਆਂ ਬੋਰੀਆਂ ਫੈਕਟਰੀਆਂ ਵੱਲ ਭੇਜੀਆਂ ਜਾ ਰਹੀਆਂ ਸਨ। ਜਾਂਚ ਵਿੱਚ ਸਾਹਮਣੇ ਆਇਆ ਕਿ ਇਹ ਬੋਰੀਆਂ ਕਿਸਾਨਾਂ ਲਈ ਸਬਸਿਡੀ ’ਤੇ ਦਿੱਤੀ ਜਾਣ ਵਾਲੀ ਯੂਰੀਆ ਦੀਆਂ ਸਨ। ਦਰਅਸਲ MDF ਅਤੇ ਪਲਾਈਵੁੱਡ ਉਦਯੋਗ ਵਿੱਚ ਯੂਰੀਆ ਦੀ ਵਰਤੋਂ ਕੀਤੀ ਜਾਂਦੀ ਹੈ। ਉਦਯੋਗਿਕ ਵਰਤੋਂ ਲਈ Technical Grade Urea ਕਾਫ਼ੀ ਮਹਿੰਗੀ ਹੁੰਦੀ ਹੈ, ਜਦਕਿ ਕਿਸਾਨਾਂ ਨੂੰ ਮਿਲਣ ਵਾਲੀ ਸਬਸਿਡੀ ਵਾਲੀ ਯੂਰੀਆ ਬਹੁਤ ਸਸਤੀ ਪੈਂਦੀ ਹੈ।

ਇਸੇ ਕੀਮਤੀ ਫਰਕ ਕਾਰਨ ਯੂਰੀਆ ਦੀ ਕਾਲਾਬਾਜ਼ਾਰੀ ਦਾ ਵੱਡਾ ਨੈੱਟਵਰਕ ਸਰਗਰਮ ਹੋਣ ਦੇ ਦਾਅਵੇ ਕੀਤੇ ਗਏ ਹਨ। ਜਾਂਚ ਮੁਤਾਬਿਕ ਕੇਂਦਰ ਸਰਕਾਰ ਹਰ ਸਾਲ ਕਰੀਬ 2 ਲੱਖ ਕਰੋੜ ਰੁਪਏ ਦੀ ਸਬਸਿਡੀ ਯੂਰੀਆ ’ਤੇ ਦਿੰਦੀ ਹੈ ਤਾਂ ਜੋ ਕਿਸਾਨਾਂ ਨੂੰ ਸਸਤੀ ਖਾਦ ਮਿਲ ਸਕੇ। ਇੱਕ ਬੋਰੀ ਯੂਰੀਆ ਦੀ ਅਸਲੀ ਕੀਮਤ ਲਗਭਗ 3800 ਰੁਪਏ ਦੱਸੀ ਗਈ ਹੈ, ਪਰ ਸਬਸਿਡੀ ਕਾਰਨ ਇਹ ਕਿਸਾਨਾਂ ਨੂੰ ਕਰੀਬ 266 ਰੁਪਏ ਵਿੱਚ ਮਿਲਦੀ ਹੈ। ਦੂਜੇ ਪਾਸੇ ਉਦਯੋਗਿਕ ਯੂਰੀਆ ਦੀ ਕੀਮਤ 80 ਰੁਪਏ ਪ੍ਰਤੀ ਕਿਲੋ ਤੱਕ ਦੱਸੀ ਜਾ ਰਹੀ ਹੈ।