ਨੌਜਵਾਨਾਂ ਲਈ ਵੱਡੀ ਖ਼ੁਸ਼ਖ਼ਬਰੀ ; ਬੈਂਕ ਆਫ਼ ਬੜੌਦਾ ‘ਚ ਬੰਪਰ ਭਰਤੀ

ਆਗਰਾ, 10 ਨਵੰਬਰ – ਬੈਂਕਿੰਗ ਖੇਤਰ ਵਿੱਚ ਨੌਕਰੀ ਦੀ ਤਿਆਰੀ ਕਰ ਰਹੇ ਤਜਰਬੇਕਾਰ ਉਮੀਦਵਾਰਾਂ ਲਈ ਬੈਂਕ ਆਫ਼ ਬੜੌਦਾ ਨੇ ਭਰਤੀ ਕੱਢੀ ਹੈ। ਬੈਂਕ ਦੇ ਵੈਲਥ ਮੈਨੇਜਮੈਂਟ ਸਰਵਿਸਿਜ਼ (WMS) ਵਿਭਾਗ ਵਿੱਚ 837 ਅਹੁਦਿਆਂ ‘ਤੇ ਨਿਯੁਕਤੀਆਂ ਕੀਤੀਆਂ ਜਾਣਗੀਆਂ। ਆਨਲਾਈਨ ਅਰਜ਼ੀ ਪ੍ਰਕਿਰਿਆ 4 ਨਵੰਬਰ ਤੋਂ ਸ਼ੁਰੂ ਹੋ ਚੁੱਕੀ ਹੈ। ਚਾਹਵਾਨ ਉਮੀਦਵਾਰ 24 ਨਵੰਬਰ 2026 ਤੱਕ ਬੈਂਕ ਦੀ ਅਧਿਕਾਰਤ ਵੈੱਬਸਾਈਟ bankofbaroda.bank.in ਦੇ ਕਰੀਅਰ ਸੈਕਸ਼ਨ ਵਿੱਚ ਅਪਲਾਈ ਕਰ ਸਕਦੇ ਹਨ। ਸਾਰੀਆਂ ਨਿਯੁਕਤੀਆਂ ਠੇਕੇ ਦੇ ਆਧਾਰ ‘ਤੇ ਹੋਣਗੀਆਂ। ਸ਼ੁਰੂਆਤੀ ਇਕਰਾਰਨਾਮਾ ਪੰਜ ਸਾਲ ਦਾ ਹੋਵੇਗਾ, ਜਿਸ ਨੂੰ ਉਮੀਦਵਾਰ ਦੇ ਪ੍ਰਦਰਸ਼ਨ ਅਤੇ ਬੈਂਕ ਦੀ ਲੋੜ ਅਨੁਸਾਰ ਪੰਜ ਸਾਲ ਹੋਰ ਵਧਾਇਆ ਜਾ ਸਕਦਾ ਹੈ। ਤਨਖ਼ਾਹ ਯੋਗਤਾ ਅਤੇ ਤਜਰਬੇ ਦੇ ਆਧਾਰ ‘ਤੇ ਤੈਅ ਕੀਤੀ ਜਾਵੇਗੀ। ਅਰਜ਼ੀ ਦੇਣ ਲਈ ਕਿਸੇ ਵੀ ਵਿਸ਼ੇ ਵਿੱਚ ਗ੍ਰੈਜੂਏਸ਼ਨ ਹੋਣਾ ਲਾਜ਼ਮੀ ਹੈ। ਸੀਨੀਅਰ ਰਿਲੇਸ਼ਨਸ਼ਿਪ ਮੈਨੇਜਰ ਲਈ ਤਿੰਨ ਸਾਲ, ਟੈਰੀਟਰੀ ਹੈੱਡ ਲਈ ਅੱਠ ਸਾਲ, ਗਰੁੱਪ ਹੈੱਡ ਲਈ 12 ਸਾਲ ਅਤੇ ਹੈੱਡ ਇਨਵੈਸਟਮੈਂਟ ਲਈ ਦਸ ਸਾਲ ਦਾ ਸਬੰਧਤ ਤਜਰਬਾ ਮੰਗਿਆ ਗਿਆ ਹੈ। ਗਰੁੱਪ ਹੈੱਡ ਲਈ ਪੰਜ ਸਾਲ ਦਾ ਟੀਮ ਲੀਡ ਕਰਨ ਦਾ ਤਜਰਬਾ ਵੀ ਲਾਜ਼ਮੀ ਹੈ। ਸੀਨੀਅਰ ਰਿਲੇਸ਼ਨਸ਼ਿਪ ਮੈਨੇਜਰ ਲਈ ਨਿਰਧਾਰਤ NISM ਜਾਂ IRDA ਸਰਟੀਫਿਕੇਟ ਜ਼ਰੂਰੀ ਹੈ। ਅਹੁਦੇ ਅਨੁਸਾਰ ਉਮਰ ਹੱਦ 24 ਤੋਂ 50 ਸਾਲ ਤੱਕ ਹੈ।