ਨਜ਼ਮ/ਨਦੀ, ਪਹਾੜ ਤੇ ਬਾਜ਼ਾਰ/ਜਸਿੰਤਾ ਕੇਰਕੇੱਟਾ

*ਨਦੀ,ਪਹਾੜ ਤੇ ਬਾਜ਼ਾਰ!*

……………………

*ਪਿੰਡ ‘ਚ*

*ਉਹ ਦਿਨ ਸੀ ਐਤਵਾਰ*

*ਹੱਥ ਫੜਕੇ ਨੰਨ੍ਹੀਂ ਪੀੜ੍ਹੀ ਦਾ*

*ਮੈਂ ਨਿੱਕਲ ਗਈ ਬਾਜ਼ਾਰ!*

*ਦੇਖ ਕੇ ਇੱਕ ਪਗਡੰਡੀ*

*ਸੁੱਕੇ ਰੁੱਖਾਂ ਦੇ ਵਿਚਕਾਰ*

*ਨੰਨ੍ਹੀਂ ਪੀੜ੍ਹੀ ਨੂੰ ਕਿਹਾ ਮੈਂ*

*ਦੇਖ!*

*ਇੱਥੇ ਹੀ ਹੁੰਦੀ ਸੀ*

*ਕਦੇ ਪਿੰਡ ਦੀ ਨਦੀ*

*ਅੱਗੇ ਦੇਖ*

*ਜ਼ਮੀਨ ‘ਤੇ*

*ਵੱਡੀ ਸਾਰੀ ਦਰਾੜ!*

*ਮੈਂ ਕਿਹਾ*

*ਇਸੇ ‘ਚ ਹੀ ਸਮਾ ਗਏ*

*ਸਾਰੇ ਪਹਾੜ!*

*ਅਚਾਨਕ ਉਹ*

*ਸਹਿਮ ਕੇ*

*ਲਿਪਟ ਗਈ ਮੇਰੇ ਨਾਲ*

*ਫੈਲਿਆ ਸੀ*

*ਦੂਰ ਤੱਕ ਸਾਹਮਣੇ*

*ਭਿਆਨਕ ਕਬਰਸਤਾਨ!*

*ਮੈਂ ਕਿਹਾ*

*ਦੇਖ ਰਹੀਂ ਏਂ ਨਾ ਇਸ ਨੂੰ?*

*ਇੱਥੇ ਹੀ ਸਨ ਕਦੇ*

*ਤੇਰੇ ਪੁਰਖਿਆਂ ਦੇ ਖਲਿਹਾਨ!*

*ਨੰਨ੍ਹੀਂ ਪੀੜ੍ਹੀ ਦੌੜੀ:*

*ਅਸੀਂ ਆ ਗਏ ਬਾਜ਼ਾਰ*

*ਕੀ ਕੁਸ਼ ਲੈਣਾ ਹੈ?*

*ਪੁੱਛਣ ਲੱਗਾ ਦੁਕਾਨਦਾਰ!*

*ਵੀਰੇ!*

*ਥੋੜ੍ਹੀ ਜਿਹੀ ਬਾਰਿਸ਼*

*ਥੋੜ੍ਹੀ ਜੀ ਗਿੱਲੀ ਮਿੱਟੀ*

*ਇੱਕ ਬੋਤਲ ਨਦੀ*

*ਉਹ ਡਿੱਬਾਬੰਦ ਪਹਾੜ!*

*ਉੱਧਰ ਕੰਧ ‘ਤੇ ਟੰਗੀ*

*ਇੱਕ ‘ਕੁਦਰਤ’ ਵੀ*

*ਦੇ ਦਿਉ*

*ਤੇ ਇਹ ਬਾਰਿਸ਼*

*ਇੰਨੀ ਮਹਿੰਗੀ ਕਿਉਂ*

*ਵਿਕੇ ਬਾਜ਼ਾਰ?*

*ਦੁਕਾਨਦਾਰ ਬੋਲਿਆ:*

*ਇਹ ਨਮੀਂ*

*ਇੱਥੋਂ ਦੀ ਨਹੀਂ*

*ਦੂਜੇ ਗ੍ਰਹਿ ਤੋਂ ਆਈ ਹੈ*

*ਚੱਲ ਰਹੀ ਹੈ ਮੰਦੀ*

*ਛਟਾਂਕ ਭਰ ਹੀ ਮੰਗਾਈ ਹੈ!*

*ਪੈਸੇ ਕੱਢਣ ਲਈ*

*ਫਰੋਲਿਆ ਸਾੜ੍ਹੀ ਦਾ ਪੱਲੂ*

*ਹੈਰਾਨ ਹੋਈ!*

*ਦੇਖਿਆ!*

*ਪੱਲੂ ਦੀ ਗੰਢ ‘ਚ*

*ਰੁਪਇਆਂ ਦੀ ਜਗ੍ਹਾ*

*ਮੁੜਿਆ ਪਿਆ ਸੀ*

*ਪੂਰਾ ਵਜ਼ੂਦ ਸਾਕਾਰ….*

*#ਜਸਿੰਤਾ ਕੇਰਕੇੱਟਾ*

(ਆਦਿਵਾਸੀ ਕਵਿੱਤਰੀ)

ਹਿੰਦੀ ਤੋਂ ਪੰਜਾਬੀ ਰੂਪ:

*ਯਸ਼ ਪਾਲ ਵਰਗ ਚੇਤਨਾ*

(98145 35005)।