ਜਾਣਕਾਰੀ: ਸੁਵਿਧਾਜਨਕ ਹਵਾਈ ਸਫਰ

-‘ਅਣਦਿੱਖ ਅਪਾਹਜਤਾ’ ਅਤੇ ਮਾਨਸਿਕ ਸਿਹਤ ਸਮੱਸਿਆਵਾਂ ਵਾਲੇ ਮੁਸਾਫਰਾਂ ਲਈ ਹੈ ਸੂਰਜਮੁਖੀ ਚਿੰਨ੍ਹ ਵਾਲੀ ਡੋਰੀ ਜਾਂ ਹਰੇ ਰੰਗ ਦਾ ਬਰੋਚ
-ਈਮੇਲ ਭੇਜ ਕੇ ਕਰ ਸਕਦੇ ਹੋ ਪ੍ਰਾਪਤ…
ਔਕਲੈਂਡ, 25 ਅਪ੍ਰੈਲ, 2026 (ਹਰਜਿੰਦਰ ਸਿੰਘ ਬਸਿਆਲਾ) – ਔਕਲੈਂਡ ਏਅਰਪੋਰਟ ਦਾ ਇਕ ਖਾਸ ਪਹਿਲੂ ਇਹ ਵੀ ਹੈ ਕਿ ਇਥੋਂ ਅਣਦਿੱਖ ਅਪਾਹਜਤਾ ਦੇ ਨਾਲ ਹਵਾਈ ਸਫ਼ਰ ਸ਼ੁਰੂ ਕਰਨ ਵਾਲਿਆਂ ਦੀ ਸਹੂਲਤ ਲਈ ‘ਹਿਡਨ ਡਿਸਏਬਲਟੀ ਸਨਫਲਾਵਰ’ ਪੋਗਰਾਮ ਮੌਜੂਦ ਹੈ। ਇਸ ਅਧੀਨ ਗਲੇ ਵਿਚ ਪਾਉਣ ਵਾਲੀ ਹਰੇ ਰੰਗ ਦੀ ਡੋਰੀ ਜਾਂ ਮੋਢੇ ਉਤੇ ਪਹਿਨੇ ਕੋਟ ਜਾਂ ਹੋਰ ਵਸਤਰਾਂ ਦੇ ਉਤੇ  ਹਰੇ ਰੰਗ ਦਾ ਬਰੋਚ ਦਿੱਤਾ ਜਾਂਦਾ ਹੈ। ਇਸਦਾ ਮੁੱਖ ਫਾਇਦਾ ਇਹ ਹੁੰਦਾ ਹੈ ਕਿ ‘ਛੁਪੀਆਂ ਬਿਮਾਰੀਆਂ’ ਜਾਂ ‘ਅਣਦਿੱਖ ਅਪਾਹਜਸਤਾ’ ਸ਼੍ਰੇਣੀ ਦੇ ਅਧੀਨ ਆਉਂਦੀਆਂ ਬਿਮਾਰੀਆਂ ਵਾਲੇ ਮੁਸਾਫ਼ਰਾ ਦਾ ਸਫ਼ਰ ਸੁਖਾਲਾ ਹੋ ਸਕਦਾ ਹੈ। ਸਟਾਫ ਤਵੱਜੋਂ ਦੇ ਨਾਲ ਉਨ੍ਹਾਂ ਨੂੰ ਜਰੂਰੀ ਸੇਵਾਵਾਂ ਸਮਝਣ ਵਿਚ ਸਹਾਇਤਾ ਕਰਦਾ ਹੈ।

ਸਨਫਲਾਵਰ ਲੇਨਯਾਰਡ ਅਤੇ ਲੈਪਲ ਪਿਨ ਕੀ ਹੈ?

ਇਹ ਇੱਕ ਹਰੇ ਰੰਗ ਦਾ ਰਿਬਨ ਜਾਂ ਗਲੇ ਵਿਚ ਪਾਉਣ ਵਾਲੀ ਡੋਰੀ ਤੇ ਕਾਰਡ (ਲੇਨਯਾਰਡ) ਜਾਂ ਛੋਟਾ ਪਿਨ (ਲੈਪਲ) ਹੁੰਦਾ ਹੈ ਜਿਸ ਉੱਤੇ ਚਮਕਦਾਰ ਸੂਰਜਮੁਖੀ ਦੇ ਫੁੱਲ ਬਣੇ ਹੁੰਦੇ ਹਨ। ਇਹ ਏਅਰਪੋਰਟ ਦੇ ਸਟਾਫ ਲਈ ਇੱਕ ਸੰਕੇਤ ਵਜੋਂ ਕੰਮ ਕਰਦਾ ਹੈ। ਜਦੋਂ ਕੋਈ ਮੁਸਾਫਰ ਇਸਨੂੰ ਪਹਿਨਦਾ ਹੈ, ਤਾਂ ਸਟਾਫ ਸਮਝ ਜਾਂਦਾ ਹੈ ਕਿ ਇਸ ਵਿਅਕਤੀ ਨੂੰ ਚੈੱਕ-ਇਨ, ਸੁਰੱਖਿਆ ਜਾਂਚ ਜਾਂ ਬੋਰਡਿੰਗ ਦੌਰਾਨ ਵਾਧੂ ਸਮਾਂ, ਸਬਰ ਜਾਂ ਖਾਸ ਮਦਦ ਦੀ ਲੋੜ ਹੋ ਸਕਦੀ ਹੈ। ਔਕਲੈਂਡ ਏਅਰਪੋਰਟ ਨੇ ਹਵਾਈ ਸਫਰ ਨੂੰ ਵਧੇਰੇ ਸੁਵਿਧਾਜਨਕ ਅਤੇ ਸਤਿਕਾਰਯੋਗ ਬਣਾਉਣ ਲਈ  ‘ਹਿਡਨ ਡਿਸਏਬਿਲਿਟੀ ਸਨਫਲਾਵਰ’ Hidden Disabilities Sunflower) ਪ੍ਰੋਗਰਾਮ ਨੂੰ ਸਰਗਰਮੀ ਨਾਲ ਲਾਗੂ ਕੀਤਾ ਹੋਇਆ ਹੈ। ਇਹ ਸਕੀਮ ਖਾਸ ਤੌਰ ’ਤੇ ਉਹਨਾਂ ਲੋਕਾਂ ਲਈ ਤਿਆਰ ਕੀਤੀ ਗਈ ਹੈ ਜਿਨ੍ਹਾਂ ਦੀਆਂ ਸਰੀਰਕ ਜਾਂ ਮਾਨਸਿਕ ਚੁਣੌਤੀਆਂ ਬਾਹਰੋਂ ਨਜ਼ਰ ਨਹੀਂ ਆਉਂਦੀਆਂ।

ਕੌਣ ਕਰ ਸਕਦਾ ਹੈ ਵਰਤੋਂ?

ਇਹ ਸਹੂਲਤ ਕਿਸੇ ਵੀ ਅਜਿਹੇ ਵਿਅਕਤੀ ਲਈ ਹੈ ਜਿਸ ਨੂੰ ਕੋਈ ‘ਛੁਪੀ ਹੋਈ ਅਪਾਹਜਤਾ’ (Hidden Disability) ਹੈ, ਜਿਵੇਂ ਕਿ: ਔਟਿਜ਼ਮ (Autism), ADHD ਜਾਂ ਡਿਮੈਂਸ਼ੀਆ, ਸੁਣਨ ਜਾਂ ਦੇਖਣ ਦੀ ਘੱਟ ਸ਼ਕਤੀ, ਗੰਭੀਰ ਘਬਰਾਹਟ (Anxiety) ਜਾਂ ਮਾਨਸਿਕ ਸਿਹਤ ਸਮੱਸਿਆਵਾਂ। ਜਾਂ ਕੋਈ ਅਜਿਹੀ ਪੁਰਾਣੀ ਬਿਮਾਰੀ ਜਿਸ ਨਾਲ ਭੀੜ ਵਿੱਚ ਚੱਲਣ ਜਾਂ ਖੜ੍ਹੇ ਹੋਣ ਵਿੱਚ ਦਿੱਕਤ ਆਉਂਦੀ ਹੋਵੇ।

ਕਿੱਥੋਂ ਅਤੇ ਕਿਵੇਂ ਪ੍ਰਾਪਤ ਕਰੀਏ?

ਔਕਲੈਂਡ ਏਅਰਪੋਰਟ ’ਤੇ ਇਹ ਸਹੂਲਤ ਬਿਲਕੁਲ ਮੁਫ਼ਤ ਉਪਲਬਧ ਹੈ: ਈਮੇਲ ਰਾਹੀਂ: ਸਫਰ ਤੋਂ ਘੱਟੋ-ਘੱਟ 72 ਘੰਟੇ ਪਹਿਲਾਂ hiddendisability@aucklandairport.co.nz ’ਤੇ ਆਪਣਾ ਨਾਮ ਅਤੇ ਪਤਾ ਭੇਜ ਕੇ ਇਸਨੂੰ ਡਾਕ ਰਾਹੀਂ ਘਰ ਮੰਗਵਾਇਆ ਜਾ ਸਕਦਾ ਹੈ। ਏਅਰਪੋਰਟ ਤੋਂ ਪ੍ਰਾਪਤੀ: ਜੇਕਰ ਤੁਸੀਂ ਪਹਿਲਾਂ ਮੰਗਵਾਉਣਾ ਭੁੱਲ ਗਏ ਹੋ, ਤਾਂ ਤੁਸੀਂ ਏਅਰਪੋਰਟ ਦੇ ਟਰਮੀਨਲ ’ਤੇ ਸਥਿਤ ‘ਹੈਲਪ ਡੈਸਕ’ (Help Desk) ’ਤੇ ਜਾ ਕੇ ਵੀ ਇਸ ਬਾਰੇ ਪੁੱਛ ਸਕਦੇ ਹੋ।

ਏਅਰ ਨਿਊਜ਼ੀਲੈਂਡ: ਜੇਕਰ ਤੁਸੀਂ ਏਅਰ ਨਿਊਜ਼ੀਲੈਂਡ ਰਾਹੀਂ ਸਫਰ ਕਰ ਰਹੇ ਹੋ, ਤਾਂ ਉਹਨਾਂ ਦੇ ਸਟਾਫ ਕੋਲੋਂ ਵੀ ਇਸ ਦੀ ਮੰਗ ਕੀਤੀ ਜਾ ਸਕਦੀ ਹੈ।

ਇਤਿਹਾਸ: ਇੱਕ ਛੋਟੀ ਜਿਹੀ ਪਹਿਲ ਜੋ ਬਣੀ ਵਿਸ਼ਵ ਵਿਆਪੀ ਅੰਦੋਲਨ

ਸਨਫਲਾਵਰ ਲੇਨਯਾਰਡ ਦਾ ਇਤਿਹਾਸ ਸਾਲ 2016 ਵਿੱਚ ਲੰਡਨ ਦੇ ਗੈਟਵਿਕ (Gatwick) ਏਅਰਪੋਰਟ ਤੋਂ ਸ਼ੁਰੂ ਹੋਇਆ ਸੀ। ਉੱਥੋਂ ਦੇ ਪ੍ਰਸ਼ਾਸਨ ਨੇ ਦੇਖਿਆ ਕਿ ਕਈ ਮੁਸਾਫਰਾਂ ਨੂੰ ਮਦਦ ਚਾਹੀਦੀ ਹੁੰਦੀ ਸੀ ਪਰ ਉਹਨਾਂ ਦੀ ਸਮੱਸਿਆ ਦਿਖਾਈ ਨਾ ਦੇਣ ਕਾਰਨ ਉਹਨਾਂ ਨੂੰ ਲੋੜੀਂਦਾ ਸਹਿਯੋਗ ਨਹੀਂ ਮਿਲਦਾ ਸੀ। ਸੂਰਜਮੁਖੀ ਦੇ ਫੁੱਲ ਨੂੰ ਇਸ ਲਈ ਚੁਣਿਆ ਗਿਆ ਕਿਉਂਕਿ ਇਹ ਰੌਸ਼ਨੀ, ਖੁਸ਼ੀ ਅਤੇ ਹੌਂਸਲੇ ਦਾ ਪ੍ਰਤੀਕ ਹੈ। ਅੱਜ, ਇਹ ਦੁਨੀਆ ਭਰ ਦੇ 140 ਤੋਂ ਵੱਧ ਏਅਰਪੋਰਟਾਂ ਅਤੇ ਕਈ ਰੇਲਵੇ ਸਟੇਸ਼ਨਾਂ ਅਤੇ ਸੁਪਰਮਾਰਕੀਟਾਂ ਵਿੱਚ ਮਾਨਤਾ ਪ੍ਰਾਪਤ ਹੈ।

ਯਾਦ ਰੱਖਣ ਯੋਗ ਗੱਲਾਂ:

ਇਸ ਨਾਲ ਤੁਹਾਨੂੰ ਲਾਈਨਾਂ ਵਿੱਚੋਂ ਤੇਜ਼ੀ ਨਾਲ ਨਿਕਲਣ (Fast Track) ਦੀ ਗਰੰਟੀ ਨਹੀਂ ਮਿਲਦੀ, ਪਰ ਸਟਾਫ ਤੁਹਾਡੀ ਸਹੂਲਤ ਅਨੁਸਾਰ ਪ੍ਰਕਿਰਿਆ ਨੂੰ ਹੌਲੀ ਕਰ ਸਕਦਾ ਹੈ। ਤੁਹਾਨੂੰ ਆਪਣੀ ਬਿਮਾਰੀ ਦਾ ਕੋਈ ਸਬੂਤ ਦਿਖਾਉਣ ਦੀ ਲੋੜ ਨਹੀਂ ਹੈ; ਇਹ ਪੂਰੀ ਤਰ੍ਹਾਂ ਤੁਹਾਡੇ ਭਰੋਸੇ ’ਤੇ ਅਧਾਰਿਤ ਹੈ।

ਭਾਰਤ ਵਿੱਚ ਸਥਿਤੀ

ਦਿੱਲੀ ਏਅਰਪੋਰਟ (IGI): ਦਿੱਲੀ ਏਅਰਪੋਰਟ ਨੇ ਅਧਿਕਾਰਤ ਤੌਰ ’ਤੇ ‘ਹਿਡਨ ਡਿਸਏਬਿਲਿਟੀ ਸਨਫਲਾਵਰ’ ਪ੍ਰੋਗਰਾਮ ਨਾਲ ਸਾਂਝੇਦਾਰੀ ਕੀਤੀ ਹੈ। ਮੁਸਾਫਰ ਉੱਥੇ ਸਥਿਤ ਹੈਲਪ ਡੈਸਕ ਜਾਂ ਜਾਣਕਾਰੀ ਕੇਂਦਰਾਂ ਤੋਂ ਇਹ ਲੇਨਯਾਰਡ ਪ੍ਰਾਪਤ ਕਰ ਸਕਦੇ ਹਨ। ਦੁਨੀਆ ਭਰ ਵਿੱਚ ਮਾਨਤਾ ਪ੍ਰਾਪਤ ਹੋਣ ਦੇ ਨਾਲ-ਨਾਲ ਹੁਣ ਭਾਰਤ ਦੇ ਮੁੱਖ ਹਵਾਈ ਅੱਡਿਆਂ, ਜਿਵੇਂ ਕਿ ਦਿੱਲੀ ਏਅਰਪੋਰਟ, ਨੇ ਵੀ ਇਸ ਸਹੂਲਤ ਨੂੰ ਅਪਣਾ ਲਿਆ ਹੈ। ਇਸ ਨਾਲ ਹੁਣ ਨਿਊਜ਼ੀਲੈਂਡ ਤੋਂ ਭਾਰਤ ਜਾਣ ਵਾਲੇ ਮੁਸਾਫਰਾਂ ਨੂੰ ਉੱਥੇ ਵੀ ਵਿਸ਼ੇਸ਼ ਸਹਿਯੋਗ ਮਿਲਣਾ ਆਸਾਨ ਹੋ ਜਾਵੇਗਾ।

ਮੁਸਾਫਰਾਂ ਲਈ ਸਲਾਹ:

ਭਾਵੇਂ ਤੁਸੀਂ ਭਾਰਤ ਦੇ ਕਿਸੇ ਅਜਿਹੇ ਏਅਰਪੋਰਟ ’ਤੇ ਹੋਵੋ ਜਿੱਥੇ ਸਨਫਲਾਵਰ ਸਕੀਮ ਨਹੀਂ ਹੈ, ਫਿਰ ਵੀ ਤੁਸੀਂ ਏਅਰਲਾਈਨ ਨੂੰ ਟਿਕਟ ਬੁੱਕ ਕਰਦੇ ਸਮੇਂ DPNA (Disabled Person with Intellectual or Developmental Disability needing assistance) ਕੋਡ ਰਾਹੀਂ ਆਪਣੀ ਸਥਿਤੀ ਬਾਰੇ ਜਾਣਕਾਰੀ ਦੇ ਸਕਦੇ ਹੋ।