…ਏਥੇ ਵੀ ਤਾਂਬੇ ਦੀ ਚੋਰੀ?

*ਵੈਲਿੰਗਟਨ ਵਿਖੇ ਰੇਲਵੇ ਦੀ ਤਾਂਬੇ ਦੀ ਤਾਰ ਚੋਰੀ ਕਰਨ ਦੀ ਕੋਸ਼ਿਸ਼ ਤੋਂ ਬਾਅਦ ਦੂਜੀ ਗ੍ਰਿਫ਼ਤਾਰੀ, ਟਰੇਨ ਸੇਵਾਵਾਂ ਹੋਈਆਂ ਸੀ ਪ੍ਰਭਾਵਿਤ
*ਪੋਰੀਰੂਆ ਵਿਚ ਛਾਪੇਮਾਰੀ ਦੌਰਾਨ 54 ਸਾਲਾ ਵਿਅਕਤੀ ਕਾਬੂ, 2 ਸਤੰਬਰ ਨੂੰ ਅਦਾਲਤ ਵਿਚ ਹੋਵੇਗੀ ਪੇਸ਼ੀ
ਔਕਲੈਂਡ, 19 ਅਗਸਤ 2026 (ਹਰਜਿੰਦਰ ਸਿੰਘ ਬਸਿਆਲਾ) – ਨਿਊਜ਼ੀਲੈਂਡ ਦੇ ਵੈਲਿੰਗਟਨ ਤੋਂ ਇੱਕ ਵੱਡੀ ਖ਼ਬਰ ਸਾਹਮਣੇ ਆਈ ਹੈ, ਜਿੱਥੇ ਰੇਲ ਕਾਰੀਡੋਰ ਵਿੱਚੋਂ ਤਾਂਬੇ ਦੀ ਤਾਰ ਚੋਰੀ ਕਰਨ ਦੀ ਕੋਸ਼ਿਸ਼ ਦੇ ਮਾਮਲੇ ਵਿੱਚ ਪੁਲਿਸ ਨੇ ਦੂਜੀ ਗ੍ਰਿਫ਼ਤਾਰੀ ਕੀਤੀ ਹੈ। ਇਸ ਘਟਨਾ ਕਾਰਨ ਰੇਲਵੇ ਦਾ ਸਿਗਨਲ ਸਿਸਟਮ ਖਰਾਬ ਹੋ ਗਿਆ ਸੀ ਅਤੇ ਆਵਾਜਾਈ ਵਿੱਚ ਭਾਰੀ ਵਿਘਨ ਪਿਆ ਸੀ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਰੇਲ ਕਾਰੀਡੋਰ ਵਿੱਚੋਂ ਤਾਂਬੇ ਦੀ ਕੇਬਲ ਚੋਰੀ ਕਰਨ ਦੀ ਕੋਸ਼ਿਸ਼ ਕਰਨ ਅਤੇ ਸੁਰੱਖਿਆ ਸਿਗਨਲ ਸਿਸਟਮ ਨੂੰ ਨੁਕਸਾਨ ਪਹੁੰਚਾਉਣ ਦੇ ਦੋਸ਼ ਹੇਠ ਇੱਕ 54 ਸਾਲਾ ਵਿਅਕਤੀ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। 3 ਜੁਲਾਈ ਨੂੰ ਸਵੇਰੇ ਲਗਭਗ 4 ਵਜੇ, ਪੁਲਿਸ ਨੂੰ ਵੈਲਿੰਗਟਨ ਦੇ ਤਾਵਾ ਸਥਿਤ ਤਾਕਾਪੂ ਰੋਡ ਸਟੇਸ਼ਨ ’ਤੇ ਰੇਲ ਕਾਰੀਡੋਰ ਵਿੱਚ ਇੱਕ ਵਿਅਕਤੀ ਦੇ ਗੈਰ-ਕਾਨੂੰਨੀ ਤੌਰ ’ਤੇ ਦਾਖਲ ਹੋਣ ਦੀ ਸੂਚਨਾ ਮਿਲੀ ਸੀ। ਉੱਥੇ ਇੱਕ ਭਾਰੀ ਸਿਗਨਲ ਕੇਬਲ ਨੂੰ ਨੁਕਸਾਨ ਪਹੁੰਚਾਇਆ ਗਿਆ ਸੀ, ਹਾਲਾਂਕਿ ਪੁਲਿਸ ਦੇ ਪਹੁੰਚਣ ਤੋਂ ਪਹਿਲਾਂ ਹੀ ਕਥਿਤ ਦੋਸ਼ੀ ਮੌਕੇ ਤੋਂ ਫਰਾਰ ਹੋ ਗਿਆ ਸੀ।

ਕੱਟੀ ਹੋਈ ਕੇਬਲ ਕਾਰਨ ਸਿਗਨਲ ਵਿੱਚ ਖਰਾਬੀ ਆ ਗਈ, ਜਿਸ ਕਾਰਨ ਐਮਰਜੈਂਸੀ ਮੁਰੰਮਤ ਦਾ ਕੰਮ ਚੱਲਣ ਤੱਕ ਰੇਲ ਸੇਵਾਵਾਂ ਨੂੰ ਮੁਅੱਤਲ ਕਰਨਾ ਪਿਆ। ਵੈਲਿੰਗਟਨ ਪੁਲਿਸ ਦੀ ਇਨਵੈਸਟੀਗੇਸ਼ਨ ਸਪੋਰਟ ਯੂਨਿਟ ਨੇ ਮੰਗਲਵਾਰ ਨੂੰ ਪੋਰੀਰੂਆ ਦੇ ਇੱਕ ਪਤੇ ’ਤੇ ਤਲਾਸ਼ੀ ਵਾਰੰਟ ਤਾਮੀਲ ਕੀਤਾ ਅਤੇ ਉਕਤ ਵਿਅਕਤੀ ਨੂੰ ਗ੍ਰਿਫ਼ਤਾਰ ਕਰ ਲਿਆ। ਉਸ ’ਤੇ ਆਵਾਜਾਈ ਨੂੰ ਖਤਰੇ ਵਿੱਚ ਪਾਉਣ ਦਾ ਦੋਸ਼ ਲਗਾਇਆ ਗਿਆ ਹੈ ਅਤੇ ਉਹ 2 ਸਤੰਬਰ ਨੂੰ ਪੋਰੀਰੂਆ ਜ਼ਿਲ੍ਹਾ ਅਦਾਲਤ ਵਿੱਚ ਪੇਸ਼ ਹੋਵੇਗਾ। ਜ਼ਿਕਰਯੋਗ ਹੈ ਕਿ ਇਸੇ ਘਟਨਾ ਦੇ ਸਬੰਧ ਵਿੱਚ ਪਿਛਲੇ ਮਹੀਨੇ ਇੱਕ 43 ਸਾਲਾ ਵਿਅਕਤੀ ’ਤੇ ਵੀ ਦੋਸ਼ ਆਇਦ ਕੀਤੇ ਗਏ ਸਨ। ਕੀਵੀਰੇਲ ਦੇ ਜਨਰਲ ਮੈਨੇਜਰ ਵੈਲਿੰਗਟਨ ਮੈਟਰੋ ਐਂਡੀ ਲਿਓਨ ਨੇ ਕਿਹਾ ਕਿ ਰੇਲ ਉਪਕਰਣਾਂ ਵਿੱਚ ਦਖਲਅੰਦਾਜ਼ੀ ਕਰਨ ਵਾਲਾ ਕੋਈ ਵੀ ਵਿਅਕਤੀ ਆਪਣੇ ਆਪ ਨੂੰ ਅਤੇ ਹੋਰਾਂ ਨੂੰ ਗੰਭੀਰ ਨੁਕਸਾਨ ਦੇ ਖਤਰੇ ਵਿੱਚ ਪਾ ਰਿਹਾ ਹੈ। ਰੇਲ ਕਾਰੀਡੋਰ ਤੋਂ ਤਾਂਬੇ ਦੀ ਚੋਰੀ ਬਹੁਤ ਗੰਭੀਰ ਮਾਮਲਾ ਹੈ। ਸੁਰੱਖਿਆ ਦਾ ਵੱਡਾ ਜੋਖਮ ਪੈਦਾ ਕਰਨ ਦੇ ਨਾਲ-ਨਾਲ, ਇਸ ਕਿਸਮ ਦੇ ਅਪਰਾਧ ਨਾਲ ਦੇਰੀ, ਵਾਧੂ ਖਰਚੇ ਅਤੇ ਭਾਈਚਾਰੇ ਲਈ ਵਿਘਨ ਪੈਦਾ ਹੁੰਦਾ ਹੈ। ਅਸੀਂ ਤੁਰੰਤ ਕਾਰਵਾਈ ਕਰਦੇ ਹੋਏ ਗ੍ਰਿਫ਼ਤਾਰੀ ਕਰਨ ਲਈ ਪੁਲਿਸ ਦੇ ਧੰਨਵਾਦੀ ਹਾਂ ਅਤੇ ਇਸ ਤਰ੍ਹਾਂ ਦੇ ਅਪਰਾਧਾਂ ’ਤੇ ਉਨ੍ਹਾਂ ਨਾਲ ਮਿਲ ਕੇ ਕੰਮ ਕਰਨਾ ਜਾਰੀ ਰੱਖਾਂਗੇ। ਕਾਪਿਤੀ ਮਾਨਾ ਖੇਤਰ ਦੇ ਕਮਾਂਡਰ ਰੇਨੀ ਪਰਕਿਨਸ ਨੇ ਦੱਸਿਆ ਕਿ ਢਾਂਚੇ ਨੂੰ ਹੋਏ ਨੁਕਸਾਨ ਦੀ ਲਾਗਤ ਲਗਭਗ 3000 ਡਾਲਰ ਸੀ, ਪਰ ਸਵੇਰ ਦੇ ਯਾਤਰੀਆਂ ਦੀ ਦੇਰੀ ਅਤੇ ਉਤਪਾਦਕਤਾ ਦੇ ਨੁਕਸਾਨ ਦਾ ਅੰਦਾਜ਼ਾ ਨਹੀਂ ਲਗਾਇਆ ਜਾ ਸਕਦਾ। ਉਨ੍ਹਾਂ ਕਿਹਾ ਕਿ ਇਹ ਬਹੁਤ ਨਿਰਾਸ਼ਾਜਨਕ ਹੈ ਕਿ ਲੋਕ ਜਨਤਕ ਆਵਾਜਾਈ ਸੇਵਾਵਾਂ ਨੂੰ ਨੁਕਸਾਨ ਪਹੁੰਚਾ ਰਹੇ ਹਨ ਅਤੇ ਦੂਜੇ ਲੋਕਾਂ ਦੀਆਂ ਜਾਨਾਂ ਜੋਖਮ ਵਿੱਚ ਪਾਉਣ ਲਈ ਤਿਆਰ ਹਨ।