ਇਟਲੀ ਸਰਕਾਰ ਦਾ ਵਿਦੇਸ਼ੀ ਵਿਦਿਆਰਥੀਆਂ ਨੂੰ ਝਟਕਾ ! ਸਕੂਲਾਂ ‘ਚ ਬੁਰਕ-ਹਿਜ਼ਾਬ ‘ਤੇ ਲੱਗੇਗੀ ਪਾਬੰਦੀ

ਇਟਲੀ, 21 ਸਤੰਬਰ – ਇਟਲੀ ਸਰਕਾਰ ਜਲਦ ਹੀ ਬੁਰਕੇ ਅਤੇ ਨਕਾਬ ‘ਤੇ ਪਾਬੰਦੀ ਲਗਾਉਣ ਜਾ ਰਹੀ ਹੈ। ਇਹ ਐਲਾਨ ਖੁਦ ਪ੍ਰਧਾਨ ਮੰਤਰੀ ਜੌਰਜੀਆ ਮੇਲੋਨੀ ਨੇ ਕੀਤਾ ਸੀ। ਐਤਵਾਰ ਨੂੰ ਇੱਕ ਪਾਰਟੀ ਯੂਥ ਪ੍ਰੋਗਰਾਮ ਵਿੱਚ ਆਪਣੀ ਸੱਜੇ-ਪੱਖੀ ਤਸਵੀਰ ਦਾ ਖੁਲਾਸਾ ਕਰਦੇ ਹੋਏ, ਇਟਲੀ ਦੀ ਪ੍ਰਧਾਨ ਮੰਤਰੀ ਜੌਰਜੀਆ ਮੇਲੋਨੀ ਨੇ ਐਲਾਨ ਕੀਤਾ ਕਿ ਸਰਕਾਰ ਸਕੂਲਾਂ ਵਿੱਚ ਚਿਹਰਾ ਢੱਕਣ ‘ਤੇ ਪਾਬੰਦੀ ਲਗਾਉਣ ਅਤੇ ਹਰੇਕ ਕਲਾਸ ਵਿੱਚ ਵਿਦੇਸ਼ੀ ਵਿਦਿਆਰਥੀਆਂ ਦੀ ਗਿਣਤੀ ਸੀਮਤ ਕਰਨ ਦੀ ਤਿਆਰੀ ਕਰ ਰਹੀ ਹੈ।

ਇਹ ਫੈਸਲਾ ਕਿਉਂ ਲਿਆ ਗਿਆ?

ਇਟਲੀ, ਭੂਮੱਧ ਸਾਗਰ ਦੇ ਕੇਂਦਰ ਵਿੱਚ ਸਥਿਤ ਉਨ੍ਹਾਂ ਯੂਰਪੀਅਨ ਦੇਸ਼ਾਂ ਵਿੱਚੋਂ ਇੱਕ ਹੈ, ਜਿੱਥੇ ਸਭ ਤੋਂ ਵੱਧ ਪ੍ਰਵਾਸੀ ਆਉਂਦੇ ਹਨ। ਇਸਨੇ ਪ੍ਰਵਾਸ ਨੂੰ ਇੱਕ ਮਹੱਤਵਪੂਰਨ ਮੁੱਦਾ ਅਤੇ ਲਗਾਤਾਰ ਸਰਕਾਰਾਂ ਲਈ ਇੱਕ ਵੱਡੀ ਚੁਣੌਤੀ ਬਣਾ ਦਿੱਤਾ ਹੈ। ਪ੍ਰਵਾਸੀਆਂ, ਖਾਸ ਕਰਕੇ ਮੁਸਲਿਮ ਬਹੁਗਿਣਤੀ ਵਾਲੇ ਦੇਸ਼ਾਂ ਦੇ ਲੋਕਾਂ ਦਾ ਇਤਾਲਵੀ ਸਮਾਜ ਵਿੱਚ ਏਕੀਕਰਨ ਬਹਿਸ ਦਾ ਵਿਸ਼ਾ ਬਣਿਆ ਹੋਇਆ ਹੈ। ਮੇਲੋਨੀ ਮੁਤਾਬਕ, ਇਸ ਪ੍ਰਸਤਾਵ ਵਿੱਚ ਇਹ ਵੀ ਪ੍ਰਬੰਧ ਹੋਵੇਗਾ ਕਿ ਜਿਨ੍ਹਾਂ ਵਿਦੇਸ਼ੀ ਵਿਦਿਆਰਥੀਆਂ ਨੂੰ ਇਟਲੀ ਦੇ ਸਕੂਲ ਸਿਸਟਮ ਵਿੱਚ ਘੁਲਣ-ਮਿਲਣ ਅਤੇ ਭਾਸ਼ਾ ਸਿੱਖਣ ਵਿੱਚ ਗੰਭੀਰ ਦਿੱਕਤ ਆ ਰਹੀ ਹੈ, ਉਨ੍ਹਾਂ ਦੇ ਮਾਪਿਆਂ ਲਈ ਇਤਾਲਵੀ ਭਾਸ਼ਾ ਸਿੱਖਣਾ ਲਾਜ਼ਮੀ ਕੀਤਾ ਜਾ ਸਕਦਾ ਹੈ। ਇਸ ਤੋਂ ਇਲਾਵਾ ਇਟਲੀ ਦੇ ਸਕੂਲਾਂ ਵਿੱਚ ਬੁਰਕਾ ਅਤੇ ਨਕਾਬ ਪਹਿਨਣ ’ਤੇ ਪਾਬੰਦੀ ਲਗਾਉਣ ਦੀ ਵੀ ਗੱਲ ਕਹੀ ਗਈ ਹੈ।

ਇਤਾਲਵੀ ਭਾਸ਼ਾ ‘ਤੇ ਮੇਲੋਨੀ ਨੇ ਕੀ ਕਿਹਾ ?

ਮੇਲੋਨੀ ਨੇ ਕਿਹਾ ਕਿ ਜੇਕਰ ਕਿਸੇ ਕਲਾਸ ਵਿੱਚ ਸਿਰਫ਼ ਇੱਕ ਅਜਿਹਾ ਬੱਚਾ ਹੈ, ਜਿਸ ਨੂੰ ਇਤਾਲਵੀ ਭਾਸ਼ਾ ਸਮਝ ਨਹੀਂ ਆਉਂਦੀ, ਤਾਂ ਉਹ ਆਪਣੇ ਸਹਿਪਾਠੀਆਂ ਅਤੇ ਅਧਿਆਪਕਾਂ ਦੀ ਮਦਦ ਨਾਲ ਜਲਦੀ ਭਾਸ਼ਾ ਸਿੱਖ ਸਕਦਾ ਹੈ ਅਤੇ ਸਕੂਲ ਦੇ ਮਾਹੌਲ ਵਿੱਚ ਘੁਲ-ਮਿਲ ਸਕਦਾ ਹੈ। ਪਰ ਜੇਕਰ ਭਾਸ਼ਾ ਨਾ ਸਮਝਣ ਵਾਲੇ ਵਿਦਿਆਰਥੀਆਂ ਦੀ ਗਿਣਤੀ ਜ਼ਿਆਦਾ ਹੋ ਜਾਵੇ ਜਾਂ ਉਹ ਕਲਾਸ ਵਿੱਚ ਬਹੁਮਤ ਵਿੱਚ ਆ ਜਾਣ ਤਾਂ ਇਹ ਏਕੀਕਰਨ ਦੀ ਬਜਾਏ ਅਣਦੇਖੀ ਦੀ ਸਥਿਤੀ ਬਣ ਜਾਂਦੀ ਹੈ। ਹਾਲਾਂਕਿ, ਮੇਲੋਨੀ ਨੇ ਇਹ ਸਪੱਸ਼ਟ ਨਹੀਂ ਕੀਤਾ ਕਿ ਇੱਕ ਕਲਾਸ ਵਿੱਚ ਵੱਧ ਤੋਂ ਵੱਧ ਕਿੰਨੇ ਵਿਦੇਸ਼ੀ ਵਿਦਿਆਰਥੀਆਂ ਨੂੰ ਪੜ੍ਹਨ ਦੀ ਇਜਾਜ਼ਤ ਦਿੱਤੀ ਜਾਵੇਗੀ। ਰਿਸਰਚ ਸੰਸਥਾ ‘ਫੋਂਡਾਜ਼ਿਓਨ ISMU’ ਦੇ ਅਨੁਸਾਰ, ਇਟਲੀ ਦੇ ਸਕੂਲਾਂ ਵਿੱਚ ਪੜ੍ਹ ਰਹੇ ਵਿਦਿਆਰਥੀਆਂ ਵਿੱਚੋਂ 11.6 ਫੀਸਦੀ ਇਟਲੀ ਦੇ ਨਾਗਰਿਕ ਨਹੀਂ ਹਨ, ਯਾਨੀ ਹਰ 100 ਵਿਦਿਆਰਥੀਆਂ ਵਿੱਚੋਂ ਲਗਭਗ 12 ਵਿਦਿਆਰਥੀ ਵਿਦੇਸ਼ੀ ਨਾਗਰਿਕ ਹਨ। ਬੁਰਕੇ ਅਤੇ ਨਕਾਬ ਬਾਰੇ ਮੇਲੋਨੀ ਨੇ ਕਿਹਾ ਕਿ ਸਕੂਲ ਜਾਣ ਸਮੇਂ ਚਿਹਰਾ ਢੱਕਿਆ ਨਹੀਂ ਹੋਣਾ ਚਾਹੀਦਾ।