ਸਿਹਤਮੰਦ ਰਹਿਣ ਲਈ ਕਿੰਨੇ ਘੰਟਿਆਂ ਦੀ ਜ਼ਰੂਰੀ ਹੈ ਨੀਂਦ

ਨਵੀਂ ਦਿੱਲੀ, 17 ਸਤੰਬਰ – ਅੱਜਕੱਲ੍ਹ ਦੀ ਜੀਵਨਸ਼ੈਲੀ ’ਚ ਨੀਂਦ ਨਾਲ ਸਮਝੌਤਾ ਕਰਨਾ ਆਮ ਗੱਲ ਹੋ ਗਈ ਹੈ। ਕੁਝ ਲੋਕ 4-5 ਘੰਟੇ ਦੀ ਨੀਂਦ ਲੈਂਦੇ ਹਨ, ਜਦਕਿ ਕੁਝ ਲੋਕ 10-12 ਘੰਟੇ ਤੱਕ ਵੀ ਸੌਂਦੇ ਹਨ। ਪਰ ਕੀ ਤੁਸੀਂ ਜਾਣਦੇ ਹੋ ਕਿ ਘੱਟ ਜਾਂ ਜ਼ਿਆਦਾ ਸੌਣਾ ਤੁਹਾਡੀ ਉਮਰ ਨੂੰ ਤੇਜ਼ੀ ਨਾਲ ਵਧਾ ਸਕਦਾ ਹੈ? ਜੀ ਹਾਂ, ਲਗਭਗ 5 ਲੱਖ ਲੋਕਾਂ ‘ਤੇ ਕੀਤੀ ਗਈ ਇੱਕ ਸਟਡੀ ’ਚ ਸਾਹਮਣੇ ਆਇਆ ਹੈ ਕਿ ਲੋੜ ਤੋਂ ਘੱਟ ਜਾਂ ਜ਼ਿਆਦਾ ਨੀਂਦ ਲੈਣਾ ਬਾਇਓਲਾਜਿਕਲ ਏਜ ਦੇ ਤੇਜ਼ੀ ਨਾਲ ਵਧਣ ਤੇ ਸਮੇਂ ਤੋਂ ਪਹਿਲਾਂ ਮੌਤ ਦੇ ਖਤਰੇ ਨਾਲ ਜੁੜਿਆ ਹੋ ਸਕਦਾ ਹੈ। ਇਸ ਲਈ ਤੁਸੀਂ ਕਿੰਨੀ ਦੇਰ ਸੌਂਦੇ ਹੋ, ਇਸ ਵੱਲ ਧਿਆਨ ਦੇਣਾ ਜ਼ਰੂਰੀ ਹੈ। ਆਓ, ਇਸ ਬਾਰੇ ਹੋਰ ਜਾਣਦੇ ਹਾਂ।

ਰਿਸਰਚ ਮੁਤਾਬਕ, 6 ਘੰਟਿਆਂ ਤੋਂ ਘੱਟ ਸੌਣ ਵਾਲੇ ਲੋਕਾਂ ’ਚ ਕਿਸੇ ਵੀ ਕਾਰਨ ਕਰਕੇ ਮੌਤ ਦਾ ਖਤਰਾ 50% ਜ਼ਿਆਦਾ ਦੇਖਿਆ ਗਿਆ। ਉੱਥੇ ਹੀ, 6-8 ਘੰਟੇ ਸੌਣ ਵਾਲੇ ਲੋਕਾਂ ਦੇ ਮੁਕਾਬਲੇ 8 ਘੰਟਿਆਂ ਤੋਂ ਵੱਧ ਸੌਣ ਵਾਲਿਆਂ ’ਚ ਇਹ ਖਤਰਾ 40% ਪਾਇਆ ਗਿਆ। ਸਰੀਰ ਦੇ ਅੰਗਾਂ ਤੇ ਲਿੰਗ ਦੇ ਹਿਸਾਬ ਨਾਲ ਬਾਇਓਲਾਜਿਕਲ ਏਜ ’ਚ ਸਭ ਤੋਂ ਘੱਟ ਅੰਤਰ 6.4 ਤੋਂ 7.8 ਘੰਟਿਆਂ ਦੇ ਵਿਚਕਾਰ ਦੇਖਿਆ ਗਿਆ। ਇਸ ਸਟੱਡੀ ਮੁਤਾਬਕ, ਔਰਤਾਂ ਲਈ 6.5 ਤੋਂ 7.8 ਘੰਟੇ ਤੇ ਮਰਦਾਂ ਲਈ 6.4 ਤੋਂ 7.7 ਘੰਟੇ ਦੀ ਨੀਂਦ ਸਭ ਤੋਂ ਬਿਹਤਰ ਪਾਈ ਗਈ। ਇਸ ਦਾ ਅਸਰ ਦਿਲ, ਦਿਮਾਗ, ਲਿਵਰ, ਇਮਿਊਨ ਸਿਸਟਮ, ਚਮੜੀ, ਐਂਡੋਕ੍ਰਾਈਨ ਸਿਸਟਮ, ਫੈਟ ਟਿਸ਼ੂ ਤੇ ਪੈਨਕ੍ਰਿਆਜ਼ ‘ਤੇ ਵੀ ਦੇਖਿਆ ਗਿਆ। ਹਾਲਾਂਕਿ, ਇਹ ਸਟੱਡੀ ਸਿੱਧੇ ਤੌਰ ‘ਤੇ ਇਹ ਸਾਬਤ ਨਹੀਂ ਕਰਦੀ ਕਿ ਨੀਂਦ ਦੀ ਕਮੀ ਜਾਂ ਜ਼ਿਆਦਾ ਸੌਣਾ ਸਮੇਂ ਤੋਂ ਪਹਿਲਾਂ ਮੌਤ ਜਾਂ ਉਮਰ ਵਧਣ ਦਾ ਕਾਰਨ ਬਣਦਾ ਹੈ।

ਦੱਖਣੀ ਏਸ਼ੀਆਈ ਸ਼ਹਿਰਾਂ ਦਾ ਹਾਲ

ਦਿੱਲੀ, ਚੇਨਈ ਤੇ ਕਰਾਚੀ ਦੇ 16,287 ਬਾਲਗਾਂ ‘ਤੇ ਕੀਤੀ ਗਈ ਇੱਕ ਸਟਡੀ ’ਚ ਲੋਕਾਂ ਦੇ ਨੀਂਦ ਦੇ ਪੈਟਰਨ ਨੂੰ ਲੈ ਕੇ ਕੁਝ ਹੈਰਾਨ ਕਰਨ ਵਾਲੇ ਅੰਕੜੇ ਸਾਹਮਣੇ ਆਏ ਹਨ। ਇੱਕ ਬਾਲਗ ਨੂੰ ਔਸਤਨ 7.3 ਘੰਟਿਆਂ ਦੀ ਨੀਂਦ ਦੀ ਲੋੜ ਹੁੰਦੀ ਹੈ। ਹਾਲਾਂਕਿ, ਇਸ ਸਟਡੀ ’ਚ 5.5% ਲੋਕ 5 ਘੰਟਿਆਂ ਤੋਂ ਘੱਟ ਸੌਂ ਰਹੇ ਸਨ, 12.4% ਲੋਕ 9 ਘੰਟਿਆਂ ਤੋਂ ਵੱਧ ਸੌਂਦੇ ਸਨ, 12% ਬਾਲਗ ਇਨਸੌਮਨੀਆ ਦੀ ਸਮੱਸਿਆ ਨਾਲ ਜੂਝ ਰਹੇ ਸਨ ਤੇ 14.5% ਲੋਕਾਂ ਨੂੰ ਖਰਾਟਿਆਂ ਦੀ ਸ਼ਿਕਾਇਤ ਸੀ।

ਨੀਂਦ ਦੀ ਗੁਣਵੱਤਾ ਵੀ ਜ਼ਰੂਰੀ

ਤੁਸੀਂ ਕਿੰਨੀ ਦੇਰ ਸੌਂਦੇ ਹੋ, ਸਿਰਫ਼ ਇਸ ‘ਤੇ ਧਿਆਨ ਦੇਣਾ ਕਾਫ਼ੀ ਨਹੀਂ ਹੈ। ਤੁਹਾਡੀ ਨੀਂਦ ਕਿੰਨੀ ਡੂੰਘੀ ਹੈ ਤੇ ਉਸ ’ਚ ਕੰਸਿਸਟੈਂਸੀ (ਨਿਯਮਿਤਤਾ) ਕਿੰਨੀ ਹੈ, ਇਹ ਵੀ ਉਤਨਾ ਹੀ ਜ਼ਰੂਰੀ ਹੈ। ਹਰ ਵਿਅਕਤੀ ਲਈ ਸੌਣ ਦਾ ਕੋਈ ਇੱਕ ਨਿਸ਼ਚਿਤ ਸਹੀ ਸਮਾਂ ਨਹੀਂ ਹੁੰਦਾ। ਲਗਾਤਾਰ 6 ਘੰਟਿਆਂ ਤੋਂ ਘੱਟ ਜਾਂ ਬਹੁਤ ਜ਼ਿਆਦਾ ਸੌਣਾ ਇਸ ਗੱਲ ਦਾ ਸੰਕੇਤ ਹੋ ਸਕਦਾ ਹੈ ਕਿ ਤੁਹਾਡੀ ਨੀਂਦ ਦੀ ਗੁਣਵੱਤਾ ਬਿਹਤਰ ਨਹੀਂ ਹੈ, ਤੁਹਾਡਾ ਸਰੀਰ ਪੂਰੀ ਤਰ੍ਹਾਂ ਤਾਜ਼ਗੀ ਮਹਿਸੂਸ ਨਹੀਂ ਕਰ ਰਿਹਾ ਜਾਂ ਤੁਹਾਨੂੰ ਕੋਈ ਅੰਦਰੂਨੀ ਸਿਹਤ ਸਮੱਸਿਆ ਹੋ ਸਕਦੀ ਹੈ। ਅਜਿਹੀ ਸਥਿਤੀ ਦਿਲ ਤੇ ਮੈਟਾਬੋਲਿਜ਼ਮ ਨਾਲ ਜੁੜੇ ਖਤਰਿਆਂ ਨੂੰ ਵਧਾ ਸਕਦੀ ਹੈ।