ਜ਼ਮੀਨ ਤੋਂ ਬਾਅਦ ਹੁਣ ਅਸਮਾਨ ’ਚ ਵੀ ਦਿਖੇਗਾ ਡੌਗ ਸਕੁਐਡ ਦਾ ਜੌਹਰ
ਚੰਡੀਗੜ੍ਹ, 16 ਸਤੰਬਰ – ਜ਼ਮੀਨੀ ਜੰਗ ਦੌਰਾਨ ਆਪਣੇ ਜੌਹਰ ਦਿਖਾਉਣ ਤੋਂ ਬਾਅਦ, ਭਾਰਤੀ ਫੌਜ ਦੇ ਕੁੱਤਿਆਂ ਨੂੰ ਹੁਣ ਜਹਾਜ਼ਾਂ ਤੋਂ ਪੈਰਾਸ਼ੂਟ ਰਾਹੀਂ ਜੰਗ ਦੇ ਮੈਦਾਨ ਵਿੱਚ ਉੱਤਰਨ ਵਾਲੇ ਹਵਾਈ ਅਪਰੇਸ਼ਨਾਂ (ਏਅਰਬੋਰਨ ਅਪਰੇਸ਼ਨ) ਲਈ ਤਿਆਰ ਕੀਤਾ ਜਾ ਰਿਹਾ ਹੈ। ਆਪਣੇ ਨਿਸ਼ਾਨੇ ’ਤੇ ਪੂਰੀ ਪਕੜ ਅਤੇ ਜੰਗੀ ਤਿਆਰੀ ਦਾ ਪ੍ਰਦਰਸ਼ਨ ਕਰਦਿਆਂ, ਇੱਕ ਪੈਰਾਟਰੂਪਰ ਨੇ ਮੱਧ ਭਾਰਤ ਦੇ ਬੇਹਟ ਡਰੌਪ ਜ਼ੋਨ ਵਿੱਚ ਫੌਜੀ ਹਥਿਆਰਾਂ ਤੇ ਸਮਾਨ ਸਮੇਤ ਡੌਗ ਹੈਂਡਲਰ ਅਤੇ ਉਸ ਦੇ ਜੰਗੀ ਕੁੱਤੇ ਨਾਲ ਮਿਲ ਕੇ ਟੈਂਡਮ ਪੈਰਾਸ਼ੂਟ ਜੰਪ (ਇੱਕਠਿਆਂ ਛਾਲ) ਲਗਾਈ। ਫੌਜ ਅਨੁਸਾਰ, ਇਸ ਤੋਂ ਪਹਿਲਾਂ ਵੀ ਡੌਗ ਸੁਕਐਡ ਨਾਲ ਫ੍ਰੀ-ਫਾਲ ਛਾਲਾਂ ਲਗਾਈਆਂ ਜਾਂਦੀਆਂ ਰਹੀਆਂ ਹਨ, ਪਰ ਡੌਗ ਹੈਂਡਲਰ ਅਤੇ ਕੁੱਤੇ ਵੱਲੋਂ ਇਕੱਠਿਆਂ ਕੀਤੀ ਗਈ ਇਹ ਅਜਿਹੀ ਪਹਿਲੀ ਟੈਂਡਮ ਛਾਲ ਮੰਨੀ ਜਾ ਰਹੀ ਹੈ। ਸੈਂਟਰਲ ਕਮਾਂਡ ਨੇ ਕਿਹਾ, “ਇਹ ਸਿਪਾਹੀ ਅਤੇ ਬੇਜ਼ੁਬਾਨ ਵਿਚਕਾਰ ਭਰੋਸੇ, ਮਿਲ ਕੇ ਕੰਮ ਕਰਨ ਦੀ ਭਾਵਨਾ ਅਤੇ ਅਟੁੱਟ ਰਿਸ਼ਤੇ ਦੀ ਇੱਕ ਬੇਮਿਸਾਲ ਮਿਸਾਲ ਹੈ, ਜੋ ਮਿਸ਼ਨ ਲਈ ਪੂਰੀ ਤਰ੍ਹਾਂ ਤਿਆਰ ਹਨ। ਦੁਨੀਆ ਦੇ ਕੁਝ ਦੇਸ਼ਾਂ ਦੀਆਂ ਫੌਜਾਂ ਕੋਲ ਅਜਿਹੇ ਕੁੱਤੇ ਹਨ ਜੋ ਹਵਾਈ ਅਪਰੇਸ਼ਨਾਂ ਲਈ ਸਿਖਲਾਈ ਪ੍ਰਾਪਤ ਹਨ ਅਤੇ ਵਿਸ਼ੇਸ਼ ਫੌਜਾਂ (ਸਪੈਸ਼ਲ ਫੋਰਸਿਸ) ਨਾਲ ਅਪਰੇਸ਼ਨਾਂ ਵਿੱਚ ਹਿੱਸਾ ਲੈਂਦੇ ਹਨ। ਪਾਕਿਸਤਾਨ ਵਿੱਚ ਓਸਾਮਾ ਬਿਨ ਲਾਦੇਨ ਨੂੰ ਮਾਰਨ ਦੇ ਅਪਰੇਸ਼ਨ ਦੌਰਾਨ ਅਮਰੀਕੀ ਸੀਲ (SEAL) ਟੀਮ ਨਾਲ ਵੀ ਜੰਗੀ ਕੁੱਤੇ ਸ਼ਾਮਲ ਸਨ। ਫੌਜੀ ਕੁੱਤਿਆਂ ਲਈ ਇੱਕ ਵਿਸ਼ੇਸ਼ ਸਿਖਲਾਈ ਪ੍ਰੋਗਰਾਮ ਹੁੰਦਾ ਹੈ, ਜਿਸ ਵਿੱਚ ਉਨ੍ਹਾਂ ਨੂੰ ਜੰਗੀ ਮਾਹੌਲ ਵਿੱਚ ਢਾਲਿਆ ਜਾਂਦਾ ਹੈ ਤਾਂ ਜੋ ਉਹ ਧਮਾਕਿਆਂ, ਗੋਲੀਬਾਰੀ, ਧੂੰਏਂ ਅਤੇ ਭਗਦੜ ਦੀ ਆਵਾਜ਼ ਦੇ ਆਦੀ ਹੋ ਸਕਣ।
ਕੁੱਤੇ ਦਹਾਕਿਆਂ ਤੋਂ ਹਥਿਆਰਬੰਦ ਸੁਰੱਖਿਆ ਬਲਾਂ, ਕੇਂਦਰੀ ਹਥਿਆਰਬੰਦ ਪੁਲੀਸ ਬਲਾਂ (CAPFs) ਅਤੇ ਹੋਰ ਸੁਰੱਖਿਆ ਏਜੰਸੀਆਂ ਦਾ ਅਹਿਮ ਹਿੱਸਾ ਰਹੇ ਹਨ। ਉਹ ਪਹਿਰੇਦਾਰੀ, ਗਸ਼ਤ ਕਰਨ, ਸ਼ੱਕੀ ਵਿਅਕਤੀਆਂ ’ਤੇ ਹਮਲਾ ਕਰਨ ਤੇ ਉਨ੍ਹਾਂ ਨੂੰ ਕਾਬੂ ਕਰਨ, ਵੀ.ਆਈ.ਪੀ. ਸੁਰੱਖਿਆ, ਵਿਸਫੋਟਕਾਂ ਤੇ ਮਾਈਨਾਂ ਦਾ ਪਤਾ ਲਗਾਉਣ, ਨਸ਼ੀਲੇ ਪਦਾਰਥ ਫੜਨ ਅਤੇ ਖੋਜ ਤੇ ਰਾਹਤ ਕਾਰਜਾਂ ਵਿੱਚ ਆਪਣੀ ਭੂਮਿਕਾ ਨਿਭਾਉਂਦੇ ਹਨ। ਉਨ੍ਹਾਂ ਨੇ ਭਾਰਤੀ ਟੁਕੜੀਆਂ ਨਾਲ ਵਿਦੇਸ਼ਾਂ ਵਿੱਚ ਵੀ ਸੇਵਾਵਾਂ ਨਿਭਾਈਆਂ ਹਨ। ਮਿਲਟਰੀ ਅਪਰੇਸ਼ਨਾਂ ਦੀ ਸਫਲਤਾ ਵਿੱਚ ਅਹਿਮ ਭੂਮਿਕਾ ਨਿਭਾਉਣ ਵਾਲੇ ਇਹਨਾਂ ਕੁੱਤਿਆਂ ਨੂੰ ਫੌਜ ਦੀ ਤਾਕਤ ਵਧਾਉਣ ਵਾਲੇ (ਫੋਰਸ ਮਲਟੀਪਲਾਇਰ) ਮੰਨਿਆ ਜਾਂਦਾ ਹੈ। ਦੁਸ਼ਮਣ ਦਾ ਪਤਾ ਲਗਾਉਣ ਦੀ ਸਮਰੱਥਾ ਤੋਂ ਇਲਾਵਾ, ਉਹ ਅਜਿਹੀਆਂ ਥਾਵਾਂ ’ਤੇ ਵੀ ਪਹੁੰਚ ਸਕਦੇ ਹਨ ਜਿੱਥੇ ਮਨੁੱਖਾਂ ਲਈ ਪਹੁੰਚਣਾ ਔਖਾ ਹੁੰਦਾ ਹੈ। ਕੈਮਰਿਆਂ ਨਾਲ ਲੈਸ ਹੋਣ ’ਤੇ ਇਹ ਮਹੱਤਵਪੂਰਨ ਜਾਣਕਾਰੀ ਵੀ ਦਿੰਦੇ ਹਨ। ਉਨ੍ਹਾਂ ਦਾ ਛੋਟਾ ਆਕਾਰ ਅਤੇ ਤੇਜ਼ ਰਫ਼ਤਾਰ ਉਨ੍ਹਾਂ ਨੂੰ ਦੁਸ਼ਮਣ ਦਾ ਨਿਸ਼ਾਨਾ ਬਣਨ ਤੋਂ ਬਚਾਉਂਦੀ ਹੈ।
ਕਈ ਡੌਗ ਸਕੁਐਡਸ ਨੂੰ ਬਹਾਦਰੀ ਪੁਰਸਕਾਰਾਂ ਨਾਲ ਵੀ ਨਵਾਜਿਆ ਗਿਆ ਹੈ, ਜਦੋਂ ਕਿ ਕੁਝ ਅਪਰੇਸ਼ਨਾਂ ਦੌਰਾਨ ਜ਼ਖਮੀ ਜਾਂ ਸ਼ਹੀਦ ਵੀ ਹੋਏ ਹਨ। ਡਿਊਟੀ ਦੌਰਾਨ ਸ਼ਹੀਦ ਹੋਣ ਵਾਲੇ ਕੁੱਤਿਆਂ ਨੂੰ ਪੂਰੇ ਫੌਜੀ ਸਨਮਾਨਾਂ ਨਾਲ ਅੰਤਿਮ ਵਿਦਾਈ ਦਿੱਤੀ ਜਾਂਦੀ ਹੈ। ਅਤਿਵਾਦ ਵਿਰੋਧੀ ਅਪਰੇਸ਼ਨਾਂ ਦੇ ਨਾਲ-ਨਾਲ ਆਫ਼ਤ ਰਾਹਤ ਮਿਸ਼ਨਾਂ ਵਿੱਚ ਕੁੱਤਿਆਂ ਦੀ ਲਗਾਤਾਰ ਵਰਤੋਂ ਨੂੰ ਦੇਖਦਿਆਂ, ਫੌਜ ਹੁਣ ਆਪਣੇ ਇਹਨਾਂ ‘ਚਾਰ-ਚੁਫੇਰੇ ਜੰਗਜੂਆਂ’ ਲਈ ਨਵੇਂ ਸੁਰੱਖਿਆ ਉਪਕਰਨ ਜਿਵੇਂ ਕਿ ਬੁਲੇਟਪਰੂਫ ਜੈਕਟਾਂ (ਮੋਡਿਊਲਰ ਬੁਲੇਟਪਰੂਫ ਵੈਸਟ) ਅਤੇ ਸਮਾਰਟ ਕਾਲਰ ਤਿਆਰ ਕਰ ਰਹੀ ਹੈ ਤਾਂ ਜੋ ਉਨ੍ਹਾਂ ਦੇ ਜਾਨੀ ਨੁਕਸਾਨ ਨੂੰ ਘਟਾਇਆ ਜਾ ਸਕੇ। ਡਿਊਟੀ ਦੌਰਾਨ ਕੁੱਤਿਆਂ ਨੂੰ ਖ਼ਰਾਬ ਮੌਸਮ, ਭਾਰੀ ਸਰੀਰਕ ਮਿਹਨਤ ਅਤੇ ਖ਼ਤਰਨਾਕ ਮਾਹੌਲ ਦਾ ਸਾਹਮਣਾ ਕਰਨਾ ਪੈਂਦਾ ਹੈ, ਜਿਸ ਨਾਲ ਉਨ੍ਹਾਂ ਨੂੰ ਗਰਮੀ, ਥਕਾਵਟ, ਸਾਹ ਦੀਆਂ ਬੀਮਾਰੀਆਂ ਅਤੇ ਦਿਲ ਦੀਆਂ ਸਮੱਸਿਆਵਾਂ ਹੋ ਸਕਦੀਆਂ ਹਨ। ਸਮਾਰਟ ਕਾਲਰ ਕੁੱਤਿਆਂ ਦੇ ਸਰੀਰ ਦੇ ਤਾਪਮਾਨ, ਨਬਜ਼, ਸਾਹ ਦੀ ਗਤੀ, ਦਿਲ ਦੀ ਧੜਕਣ ਅਤੇ ਕੈਲੋਰੀ ਦੀ ਖਪਤ ਵਰਗੀਆਂ ਸਰੀਰਕ ਗਤੀਵਿਧੀਆਂ ’ਤੇ ਨਜ਼ਰ ਰੱਖੇਗਾ।
Share this content:
Post Comment