ਜਪਜੀਤ ਕੌਰ ਨੇ ਜੈਵਲਿਨ ਥਰੋਅ ’ਚ ਜਿੱਤਿਆ ਸੋਨ ਤਗ਼ਮਾ

ਜਲੰਧਰ, 27 ਅਕਤੂਬਰ – ਆਪਣੇ ਪ੍ਰਦਰਸ਼ਨ ਤੋਂ ਠੀਕ ਪਹਿਲਾਂ, ਜਪਜੀਤ ਕੌਰ ਚੈੱਕ ਗਣਰਾਜ ਦੇ ਵਿਸ਼ਵ ਰਿਕਾਰਡ ਹੋਲਡਰ ਜਾਨ ਜ਼ੇਲੇਜ਼ਨੀ (Jan Železný) ਅਤੇ ਓਲੰਪਿਕ ਚੈਂਪੀਅਨ ਨੀਰਜ ਚੋਪੜਾ ਦੀਆਂ ਵੀਡੀਓਜ਼ ਦੇਖ ਰਹੀ ਸੀ ਅਤੇ ਇਸ ਤੋਂ ਬਾਅਦ ਉਸ ਨੇ ਚੇਨਈ ਵਿੱਚ ਹੋਈ 41ਵੀਂ ਰਾਸ਼ਟਰੀ ਜੂਨੀਅਰ ਅਥਲੈਟਿਕਸ ਚੈਂਪੀਅਨਸ਼ਿਪ ਵਿੱਚ 39.96 ਮੀਟਰ ਦੀ ਆਪਣੀ ਨਿੱਜੀ ਸਰਵੋਤਮ ਥਰੋਅ ਨਾਲ ਜੈਵਲਿਨ ਥਰੋਅ (ਨੇਜ਼ਾ ਸੁੱਟਣ) ਵਿੱਚ ਸੋਨ ਤਗ਼ਮਾ ਆਪਣੇ ਨਾਂ ਕੀਤਾ। ਜਪਜੀਤ ਨੇ ਦੱਸਿਆ ਕਿ ਜੈਵਲਿਨ ਦੇ ਇਹਨਾਂ ਦੋ ਦਿੱਗਜਾਂ ਦੀਆਂ ਵੀਡੀਓਜ਼ ਦੇਖਣ ਨਾਲ ਉਸ ਨੂੰ ਆਪਣਾ ਸਰਵੋਤਮ ਪ੍ਰਦਰਸ਼ਨ ਕਰਨ ਦੀ ਪ੍ਰੇਰਨਾ ਮਿਲੀ ਅਤੇ ਮੁਕਾਬਲੇ ਤੋਂ ਪਹਿਲਾਂ ਉਸ ਦਾ ਆਤਮ-ਵਿਸ਼ਵਾਸ ਵਧਿਆ। ਉਸ ਦੀ ਇਹ ਤਾਜ਼ਾ ਪ੍ਰਾਪਤੀ ਉਸ ਦੇ ਇੱਕ ਹੋਰ ਬਹਿਤਰੀਨ ਪ੍ਰਦਰਸ਼ਨ ਤੋਂ ਇੱਕ ਮਹੀਨੇ ਬਾਅਦ ਆਈ ਹੈ, ਜਦੋਂ ਉਸ ਨੇ 37ਵੀਂ ਨੌਰਥ ਜ਼ੋਨ ਜੂਨੀਅਰ ਅਥਲੈਟਿਕਸ ਚੈਂਪੀਅਨਸ਼ਿਪ ਵਿੱਚ 38.37 ਮੀਟਰ ਦੀ ਥਰੋਅ ਨਾਲ ਜੈਵਲਿਨ ਥਰੋਅ ਵਿੱਚ ਚਾਂਦੀ ਦਾ ਤਗ਼ਮਾ ਜਿੱਤਿਆ ਸੀ।

ਜਪਜੀਤ ਇੱਕ ਮਜ਼ਬੂਤ ਖੇਡ ਪਿਛੋਕੜ ਵਾਲੇ ਪਰਿਵਾਰ ਨਾਲ ਸਬੰਧ ਰੱਖਦੀ ਹੈ। ਉਸ ਦੇ ਦਾਦਾ ਜੀ, ਗੁਰਪਾਲ ਸਿੰਘ, ਇੱਕ ਸੇਵਾਮੁਕਤ ਪ੍ਰਿੰਸੀਪਲ ਅਤੇ ਰਾਸ਼ਟਰੀ ਪੱਧਰ ਦੇ ਸਾਬਕਾ ਕਬੱਡੀ ਖਿਡਾਰੀ ਹਨ। 1966 ਵਿੱਚ ਸਪੋਰਟਸ ਕਾਲਜ, ਜਲੰਧਰ ਤੋਂ ਗ੍ਰੈਜੂਏਟ ਹੋਏ ਗੁਰਪਾਲ ਸਿੰਘ ਪੂਰੀ ਜ਼ਿੰਦਗੀ ਖੇਡਾਂ ਨਾਲ ਨੇੜਿਓਂ ਜੁੜੇ ਰਹੇ ਹਨ। ਉਹ ਫਿਲਹਾਲ ਰੇਲ ਕੋਚ ਫੈਕਟਰੀ (RCF) ਕਪੂਰਥਲਾ ਦੇ ਫਿਟਨੈੱਸ ਕੋਚ ਸਤਨਾਮ ਸਿੰਘ ਦੀ ਦੇਖ-ਰੇਖ ਹੇਠ ਸਿਖਲਾਈ ਲੈ ਰਹੀ ਹੈ, ਜੋ ਉਸ ਦੀ ਤਾਕਤ ਵਧਾਉਣ ਅਤੇ ਥਰੋਅ ਦੀ ਤਕਨੀਕ ਨੂੰ ਬਿਹਤਰ ਬਣਾਉਣ ਵਿੱਚ ਮਦਦ ਕਰ ਰਹੇ ਹਨ। ਉਸ ਦੇ ਪਿਤਾ, ਬਿਕਰਮਜੀਤ ਸਿੰਘ, ਵੀ ਖੇਡ ਵਿਭਾਗ ਵਿੱਚ ਜੈਵਲਿਨ ਥਰੋਅ ਦੇ ਕੋਚ ਹਨ। ਉਹ ਜਪਜੀਤ ਨੂੰ ਇੱਕ ਆਤਮ-ਵਿਸ਼ਵਾਸੀ ਐਥਲੀਟ ਦੱਸਦੇ ਹਨ ਜੋ ਸਿੱਖਣ ਅਤੇ ਸੁਧਾਰ ਕਰਨ ਲਈ ਹਮੇਸ਼ਾ ਉਤਸ਼ਾਹਿਤ ਰਹਿੰਦੀ ਹੈ।