ਅਮਰੀਕਾ ‘ਚ ਸਰਵਰ ਡਾਊਨ ਹੋਣ ਕਾਰਨ ਫੇਸਬੁੱਕ ਤੇ ਇੰਸਟਾਗ੍ਰਾਮ ਦੀਆਂ ਸੇਵਾਵਾਂ ਠੱਪ

ਵਾਸ਼ਿੰਗਟਨ, 21 ਸਤੰਬਰ – ਐਤਵਾਰ ਦਾ ਦਿਨ ਅਮਰੀਕਾ ਵਿੱਚ ਕਈ ਸੋਸ਼ਲ ਮੀਡੀਆ ਯੂਜ਼ਰਾਂ ਲਈ ਕਾਫ਼ੀ ਨਿਰਾਸ਼ਾਜਨਕ ਰਿਹਾ। ਮੈਟਾ ਕੰਪਨੀ ਦੇ ਦੋ ਸਭ ਤੋਂ ਪ੍ਰਸਿੱਧ ਪਲੇਟਫਾਰਮ ਫੇਸਬੁੱਕ ਅਤੇ ਇੰਸਟਾਗ੍ਰਾਮ ਅਚਾਨਕ ਠੱਪ ਹੋ ਗਏ। ਸਰਵਰ ਡਾਊਨ ਹੋਣ ਕਾਰਨ ਹਜ਼ਾਰਾਂ ਯੂਜ਼ਰਾਂ ਨੂੰ ਆਪਣੇ ਅਕਾਊਂਟ ਵਰਤਣ ਵਿੱਚ ਭਾਰੀ ਦਿੱਕਤਾਂ ਦਾ ਸਾਹਮਣਾ ਕਰਨਾ ਪਿਆ। ਵੈੱਬਸਾਈਟਾਂ ਅਤੇ ਐਪਸ ਦੀ ਤਕਨੀਕੀ ਖ਼ਰਾਬੀ ‘ਤੇ ਨਜ਼ਰ ਰੱਖਣ ਵਾਲੀ ਮਸ਼ਹੂਰ ਵੈੱਬਸਾਈਟ ਡਾਊਨਡਿਟੈਕਟਰ ਨੇ ਇਸ ਆਊਟੇਜ ਦੀ ਜਾਣਕਾਰੀ ਦਿੱਤੀ। ਵੈੱਬਸਾਈਟ ਦੇ ਅੰਕੜਿਆਂ ਅਨੁਸਾਰ, ਐਤਵਾਰ ਰਾਤ 9:11 ਵਜੇ ਤੱਕ ਫੇਸਬੁੱਕ ਵਿੱਚ ਖ਼ਰਾਬੀ ਸਬੰਧੀ 17,000 ਤੋਂ ਵੱਧ ਸ਼ਿਕਾਇਤਾਂ ਦਰਜ ਕੀਤੀਆਂ ਗਈਆਂ ਸਨ। ਉੱਥੇ ਹੀ, ਇੰਸਟਾਗ੍ਰਾਮ ਲਈ ਵੀ 5,000 ਤੋਂ ਵੱਧ ਯੂਜ਼ਰਾਂ ਨੇ ਐਪ ਦੇ ਕੰਮ ਨਾ ਕਰਨ ਦੀ ਰਿਪੋਰਟ ਦਰਜ ਕਰਵਾਈ।

ਡਾਊਨਡਿਟੈਕਟਰ ਇੱਕ ਅਜਿਹਾ ਪਲੇਟਫਾਰਮ ਹੈ, ਜੋ ਦੁਨੀਆ ਭਰ ਦੀਆਂ ਆਨਲਾਈਨ ਸੇਵਾਵਾਂ ਅਤੇ ਵੈੱਬਸਾਈਟਾਂ ਵਿੱਚ ਆਉਣ ਵਾਲੇ ਆਊਟੇਜ ਨੂੰ ਟਰੈਕ ਕਰਦਾ ਹੈ। ਇਹ ਵੈੱਬਸਾਈਟ ਵੱਖ-ਵੱਖ ਸਰੋਤਾਂ ਤੋਂ ਡਾਟਾ ਇਕੱਠਾ ਕਰਦੀ ਹੈ। ਇਸ ਵਿੱਚ ਮੁੱਖ ਤੌਰ ‘ਤੇ ਉਹ ਸ਼ਿਕਾਇਤਾਂ ਸ਼ਾਮਲ ਹੁੰਦੀਆਂ ਹਨ, ਜੋ ਆਮ ਯੂਜ਼ਰ ਕਿਸੇ ਵੈੱਬਸਾਈਟ ਜਾਂ ਐਪ ਦੇ ਸਹੀ ਤਰੀਕੇ ਨਾਲ ਕੰਮ ਨਾ ਕਰਨ ‘ਤੇ ਸਿੱਧੇ ਇਸ ਪਲੇਟਫਾਰਮ ‘ਤੇ ਦਰਜ ਕਰਵਾਉਂਦੇ ਹਨ।