DoT ਨੇ Vi ਤੇ ਠੋਕਿਆ ₹27 ਕਰੋੜ ਦਾ ਜੁਰਮਾਨਾ ਨੋਟਿਸ
ਨਵੀਂ ਦਿੱਲੀ, 1 ਅਗਸਤ – ਕਰਜ਼ੇ ਦੇ ਬੋਝ ਹੇਠ ਦੱਬੀ ਟੈਲੀਕੌਮ ਕੰਪਨੀ ਵੋਡਾਫੋਨ ਆਈਡੀਆ ਦੀਆਂ ਮੁਸ਼ਕਲਾਂ ਘਟਣ ਦਾ ਨਾਂ ਨਹੀਂ ਲੈ ਰਹੀਆਂ। ਕੰਪਨੀ ਨੂੰ ਹੁਣ ਭਾਰਤ ਸਰਕਾਰ ਦੇ ਦੂਰਸੰਚਾਰ ਵਿਭਾਗ (DoT) ਵੱਲੋਂ ਇਕ ਵੱਡਾ ਝਟਕਾ ਲੱਗਾ ਹੈ। ਦੂਰਸੰਚਾਰ ਵਿਭਾਗ ਨੇ ਸਪੈਕਟ੍ਰਮ ਰੋਲਆਊਟ ਜ਼ਿੰਮੇਵਾਰੀਆਂ ਨੂੰ ਪੂਰਾ ਨਾ ਕਰਨ ਕਾਰਨ ਕੰਪਨੀ ‘ਤੇ ₹26.83 ਕਰੋੜ ਦਾ ਜੁਰਮਾਨਾ ਲਗਾਇਆ ਹੈ। ਕੰਪਨੀ ਨੂੰ ਮਿਲੇ ₹26.83 ਕਰੋੜ ਦੇ ਜੁਰਮਾਨੇ ਦੇ ਨੋਟਿਸ ਦਾ ਅਸਰ ਇਸ ਦੇ ਸ਼ੇਅਰਾਂ ‘ਤੇ ਦੇਖਣ ਨੂੰ ਮਿਲ ਸਕਦਾ ਹੈ। ਸ਼ੁੱਕਰਵਾਰ ਨੂੰ ਇਸ ਦੇ ਸ਼ੇਅਰ 1.09% ਵਾਧੇ ਦੇ ਨਾਲ 13 ਰੁਪਏ ਦੇ ਪੱਧਰ ‘ਤੇ ਬੰਦ ਹੋਏ ਸਨ। ਪਿਛਲੇ ਇੱਕ ਮਹੀਨੇ ‘ਚ ਇਸ ਦੇ ਸ਼ੇਅਰ 10 ਫ਼ੀਸਦੀ ਤੋਂ ਵੱਧ ਟੁੱਟ ਚੁੱਕੇ ਹਨ।
ਕੀ ਹੈ ਪੂਰਾ ਮਾਮਲਾ?
ਵੋਡਾਫੋਨ ਆਈਡੀਆ ਵੱਲੋਂ ਸ਼ੇਅਰ ਬਾਜ਼ਾਰਾਂ (NSE ਅਤੇ BSE) ਨੂੰ ਦਿੱਤੀ ਗਈ ਅਧਿਕਾਰਤ ਜਾਣਕਾਰੀ ਅਨੁਸਾਰ, ਇਹ ਨੋਟਿਸ 2022 ‘ਚ ਹੋਈ ਸਪੈਕਟ੍ਰਮ ਨਿਲਾਮੀ (Spectrum Auction 2022) ਨਾਲ ਜੁੜਿਆ ਹੋਇਆ ਹੈ। ਕੰਪਨੀ ‘ਤੇ ਦੋਸ਼ ਹੈ ਕਿ ਉਸ ਨੇ ਨਿਲਾਮੀ ਦੀਆਂ ਸ਼ਰਤਾਂ ਤਹਿਤ ਨਿਰਧਾਰਤ ‘ਘੱਟੋ-ਘੱਟ ਰੋਲਆਊਟ ਜ਼ਿੰਮੇਵਾਰੀਆਂ’ ਦਾ ਪਾਲਣ ਨਹੀਂ ਕੀਤਾ ਹੈ। ਸਰਲ ਸ਼ਬਦਾਂ ‘ਚ ਕਹੀਏ ਤਾਂ ਸਪੈਕਟ੍ਰਮ ਵੰਡ ਤੋਂ ਬਾਅਦ ਕੰਪਨੀ ਨੂੰ ਇਕ ਨਿਸ਼ਚਿਤ ਸਮੇਂ ਦੇ ਅੰਦਰ ਨੈੱਟਵਰਕ ਦਾ ਵਿਸਤਾਰ ਕਰਨਾ ਸੀ, ਜਿਸ ਵਿਚ ਉਹ ਅਸਫ਼ਲ ਰਹੀ ਹੈ।
ਇਸੇ ਉਲੰਘਣਾ ਕਾਰਨ ਦੂਰਸੰਚਾਰ ਵਿਭਾਗ ਨੇ ₹26.83 ਕਰੋੜ ਦੇ ਭੁਗਤਾਨ ਦਾ ਹੁਕਮ ਦਿੱਤਾ ਹੈ। ਵੋਡਾਫੋਨ ਆਈਡੀਆ ਨੂੰ ਇਹ ਨੋਟਿਸ 31 ਜੁਲਾਈ 2026 ਨੂੰ ਪ੍ਰਾਪਤ ਹੋਇਆ। ਕੰਪਨੀ ਨੇ ਸਪੱਸ਼ਟ ਕੀਤਾ ਹੈ ਕਿ ਉਹ ਵਰਤਮਾਨ ‘ਚ ਇਸ ਨੋਟਿਸ ਦੀ ਸਮੀਖਿਆ ਕਰ ਰਹੀ ਹੈ ਅਤੇ ਇਸ ਮਾਮਲੇ ਵਿੱਚ ਅਗਲੇ ਕਾਨੂੰਨੀ ਜਾਂ ਪ੍ਰਸ਼ਾਸਨਿਕ ਕਦਮਾਂ ਦਾ ਮੁਲਾਂਕਣ ਕਰ ਰਹੀ ਹੈ। ਰਾਹਤ ਦੀ ਗੱਲ ਇਹ ਹੈ ਕਿ ਕੰਪਨੀ ਨੇ ਫਿਲਹਾਲ ਆਪਣੇ ਕੰਮਕਾਜ ‘ਤੇ ਕਿਸੇ ਵੀ ਵੱਡੇ ਵਿੱਤੀ ਪ੍ਰਭਾਵ ਤੋਂ ਇਨਕਾਰ ਕੀਤਾ ਹੈ। ਕੰਪਨੀ ਦੇ ਮੁਤਾਬਕ, ਇਸ ਨੋਟਿਸ ਨਾਲ ਉਨ੍ਹਾਂ ਦੇ ਰੋਜ਼ਾਨਾ ਦੇ ਕੰਮਕਾਜ ‘ਤੇ ਕੋਈ ਅਸਰ ਨਹੀਂ ਪਵੇਗਾ।
Share this content:
Post Comment