ATM ਕਾਰਡ ਬਣਾਉਣ ਵਾਲੀ ਕੰਪਨੀ ਦੇ ਮੁਲਾਜ਼ਮਾਂ ‘ਤੇ ਡਿੱਗੀ ਗਾਜ਼, ਹਜ਼ਾਰਾਂ ਲੋਕਾਂ ਦੀ ਚਲੀ ਗਈ ਨੌਕਰੀ

ਨਵੀਂ ਦਿੱਲੀ, 31 ਜੁਲਾਈ – ਪੇਮੈਂਟ ਕੰਪਨੀ ਵੀਜ਼ਾ (VISA Cards) ਨੂੰ ਲੈ ਕੇ ਕਈ ਸਾਰੇ ਹੈਰਾਨ ਕਰਨ ਵਾਲੇ ਖੁਲਾਸੇ ਲਗਾਤਾਰ ਸਾਹਮਣੇ ਆ ਰਹੇ ਹਨ। ਦੱਸਿਆ ਜਾ ਰਿਹਾ ਹੈ ਕਿ ਕੰਪਨੀ ਆਪਣੇ ਗਲੋਬਲ ਵਰਕਫੋਰਸ ਦਾ 7% ਹਿੱਸਾ ਯਾਨੀ ਕਿ ਲਗਪਗ 2600 ਮੁਲਾਜ਼ਮਾਂ ਨੂੰ ਨੌਕਰੀ ਤੋਂ ਕੱਢਣ ਜਾ ਰਹੀ ਹੈ। ਉੱਥੇ ਹੀ, ਕੰਪਨੀ ‘ਚ ਹੋ ਰਹੀ ਛਾਂਟੀ (Lay-offs) ਨੂੰ ਲੈ ਕੇ ਕਈ ਤਰ੍ਹਾਂ ਦੇ ਦਾਅਵੇ ਵੀ ਕੀਤੇ ਜਾ ਰਹੇ ਹਨ। ਕੁਝ ਲੋਕਾਂ ਦਾ ਮੰਨਣਾ ਹੈ ਕਿ ਛਾਂਟੀ ਦਾ ਕਾਰਨ ਪਰਫਾਰਮੈਂਸ ਹੈ ਤਾਂ ਉੱਥੇ ਹੀ ਕੁਝ ਲੋਕ ਇਸ ਗੱਲ ਨਾਲ ਸਹਿਮਤ ਨਹੀਂ ਹਨ। ਅਜਿਹੇ ਵਿਚ ਆਖਿਰ ਵੀਜ਼ਾ ‘ਚ ਛਾਂਟੀ ਦਾ ਅਹਿਮ ਕਾਰਨ ਕੀ ਹੈ, ਆਓ ਜਾਣਦੇ ਹਾਂ।

ਸੋਸ਼ਲ ਮੀਡੀਆ ‘ਤੇ ਕੀ ਕਿਹਾ ਗਿਆ?

ਵੀਜ਼ਾ ਦੇ ਸਾਬਕਾ ਮੁਲਾਜ਼ਮ ਅਰਨਬ ਦਾਸ (Arnab Das) ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ ਐਕਸ (X) ‘ਤੇ ਪੋਸਟ ਕਰ ਕੇ ਆਪਣੀ ਪੁਰਾਣੀ ਟੀਮ ਨਾਲ ਹੋਈ ਇਸ ਘਟਨਾ ‘ਤੇ ਹੈਰਾਨੀ ਜਤਾਈ ਹੈ। ਉਨ੍ਹਾਂ ਲਿਖਿਆ, “ਵੀਜ਼ਾ ‘ਚ ਮੇਰੀ ਪੂਰੀ ਟੀਮ ਨੂੰ ਕੱਢ ਦਿੱਤਾ ਗਿਆ ਹੈ, ਜਿਸ ਵਿਚ ਮੇਰੇ ਮੈਨੇਜਰ ਵੀ ਸ਼ਾਮਲ ਹਨ। ਅਰਨਬ ਨੇ ਅੱਗੇ ਦੱਸਿਆ ਕਿ ਉਨ੍ਹਾਂ ਦੇ ਸਾਬਕਾ ਮੈਨੇਜਰ ਨੂੰ ਹਰ ਪਰਫਾਰਮੈਂਸ ਸਾਈਕਲ ‘ਚ ਆਊਟਸਟੈਂਡਿੰਗ ਰੇਟਿੰਗ ਮਿਲਦੀ ਸੀ। ਉਨ੍ਹਾਂ ਕੋਲ ਪ੍ਰੋਡਕਟ ਦੀ ਐਂਡ-ਟੂ-ਐਂਡ ਓਨਰਸ਼ਿਪ ਸੀ ਤੇ ਉਹ ਕੰਪਨੀ ਦੇ ਉਨ੍ਹਾਂ ਚੋਣਵੇਂ ਲੋਕਾਂ ‘ਚੋਂ ਸਨ, ਜਿਨ੍ਹਾਂ ਨੂੰ ਸਭ ਤੋਂ ਆਖਿਰ ‘ਚ ਹਟਾਉਣ ਦੀ ਉਮੀਦ ਕੀਤੀ ਜਾਂਦੀ। ਇਸ ਦੇ ਬਾਵਜੂਦ ਬੈਂਗਲੁਰੂ ‘ਚ ਉਨ੍ਹਾਂ ਨੂੰ ਨੌਕਰੀ ਤੋਂ ਬਾਹਰ ਕਰ ਦਿੱਤਾ ਗਿਆ। ਅਰਨਬ ਨੇ ਅੱਗੇ ਕਿਹਾ ਕਿ ਉਨ੍ਹਾਂ ਨੂੰ ਇਸ ਗੱਲ ਤੋਂ ਬਹੁਤ ਹੈਰਾਨੀ ਜ਼ਰੂਰ ਹੋਈ, ਪਰ ਉਹ ਦੱਸਦੇ ਹਨ ਕਿ ‘ਮੈਂ ਖੁਸ਼ ਹਾਂ, ਕਿਉਂਕਿ ਮੈਂ ਸਮਾਂ ਰਹਿੰਦੇ ਵੀਜ਼ਾ ਨੂੰ ਛੱਡ ਦਿੱਤਾ ਸੀ’।