AI ‘ਤੇ ਅਮਰੀਕੀ ਸਰਕਾਰ ਦਾ ਵੱਡਾ ਐਕਸ਼ਨ, ਪੂਰੀ ਦੁਨੀਆ ਲਈ ਬੰਦ ਕੀਤਾ ਐਂਥਰੋਪਿਕ ਦਾ ਅਤਿ-ਆਧੁਨਿਕ ਮਾਡਲ
ਵਾਸ਼ਿੰਗਟਨ, 13 ਜੂਨ – ਅਮਰੀਕਾ ਨੇ ਰਾਸ਼ਟਰੀ ਸੁਰੱਖਿਆ ਅਤੇ ਬਰਾਮਦ ਨਿਯੰਤਰਣ (ਐਕਸਪੋਰਟ ਕੰਟਰੋਲ) ਦੇ ਤਹਿਤ ਆਰਟੀਫੀਸ਼ੀਅਲ ਇੰਟੈਲੀਜੈਂਸ (AI) ਦੇ ਖੇਤਰ ਵਿੱਚ ਵੱਡੀ ਕਾਰਵਾਈ ਕੀਤੀ ਹੈ। ਅਮਰੀਕੀ ਪ੍ਰਸ਼ਾਸਨ ਨੇ ਪ੍ਰਮੁੱਖ AI ਕੰਪਨੀ ‘ਐਂਥਰੋਪਿਕ’ ਦੇ ਸਭ ਤੋਂ ਐਡਵਾਂਸਡ ਏ.ਆਈ. ਪ੍ਰੋਗਰਾਮਾਂ ਤੱਕ ਵਿਦੇਸ਼ੀ ਨਾਗਰਿਕਾਂ, ਕਰਮਚਾਰੀਆਂ ਅਤੇ ਕਿਸੇ ਵੀ ਗੈਰ-ਅਮਰੀਕੀ ਸੰਸਥਾ ਦੇ ਐਕਸੈਸ ‘ਤੇ ਪੂਰੀ ਤਰ੍ਹਾਂ ਰੋਕ ਲਗਾ ਦਿੱਤੀ ਹੈ। ਇਸ ਆਦੇਸ਼ ਤੋਂ ਬਾਅਦ ਕੰਪਨੀ ਨੇ ਤੁਰੰਤ ਪ੍ਰਭਾਵ ਨਾਲ ਆਪਣੇ Fable 5 ਅਤੇ Mythos 5 ਮਾਡਲਾਂ ਦੀਆਂ ਸੇਵਾਵਾਂ ਰੋਕ ਦਿੱਤੀਆਂ ਹਨ। ਹਾਲਾਂਕਿ, ਕੰਪਨੀ ਨੇ ਸਪੱਸ਼ਟ ਕੀਤਾ ਹੈ ਕਿ ਕਲਾਊਡ ਦੇ ਹੋਰ ਸਾਰੇ ਮਾਡਲ ਪਹਿਲਾਂ ਵਾਂਗ ਹੀ ਕੰਮ ਕਰਦੇ ਰਹਿਣਗੇ। ਦੂਜੇ ਪਾਸੇ, ਕੰਪਨੀ ਨੇ ਟਰੰਪ ਪ੍ਰਸ਼ਾਸਨ ਦੇ ਇਸ ਕਦਮ ਨੂੰ ਇੱਕ ਗ਼ਲਤਫ਼ਹਿਮੀ ਦੱਸਦਿਆਂ ਜਲਦੀ ਹੀ ਸੇਵਾਵਾਂ ਬਹਾਲ ਹੋਣ ਦੀ ਉਮੀਦ ਜਤਾਈ ਹੈ।
ਕਿਸੇ ਵੀ ਵਿਦੇਸ਼ੀ ਨੂੰ ਐਕਸੈਸ ਦੇਣ ‘ਤੇ ਰੋਕ
ਅਮਰੀਕਾ ਨੇ ਨਿਰਯਾਤ ਨਿਯੰਤਰਣ ਦੇ ਤਹਿਤ ਐਂਥਰੋਪਿਕ ਲਈ ਇਹ ਨਵਾਂ ਨਿਯਮ ਜਾਰੀ ਕੀਤਾ ਹੈ। ਨਵੇਂ ਨਿਯਮ ਦੇ ਤਹਿਤ ਵਿਦੇਸ਼ੀ ਨਾਗਰਿਕਾਂ, ਕਰਮਚਾਰੀਆਂ ਅਤੇ ਕਿਸੇ ਵੀ ਗੈਰ-ਅਮਰੀਕੀ ਸੰਸਥਾ ਨੂੰ ਐਂਥਰੋਪਿਕ ਦੇ ਐਡਵਾਂਸਡ AI ਪ੍ਰੋਗਰਾਮਾਂ ਤੱਕ ਐਕਸੈਸ ਦੇਣ ‘ਤੇ ਪਾਬੰਦੀ ਲਗਾ ਦਿੱਤੀ ਗਈ ਹੈ। ਅਮਰੀਕੀ ਸਰਕਾਰ ਦੇ ਇਸ ਫ਼ੈਸਲੇ ‘ਤੇ ਕੰਪਨੀ ਨੇ ਨਾਰਾਜ਼ਗੀ ਵੀ ਜ਼ਾਹਰ ਕੀਤੀ ਹੈ ਅਤੇ ਕਿਹਾ ਕਿ ਅਮਰੀਕੀ ਸਰਕਾਰ ਦੇ ਹੁਕਮਾਂ ਦਾ ਸਿੱਧਾ ਅਸਰ ਇਹ ਹੋਇਆ ਹੈ ਕਿ ਨਿਯਮਾਂ ਦੀ ਪਾਲਣਾ ਯਕੀਨੀ ਬਣਾਉਣ ਲਈ ਸਾਨੂੰ ਆਪਣੇ ਸਾਰੇ ਗਾਹਕਾਂ ਲਈ Fable 5 ਅਤੇ Mythos 5 ਦੀਆਂ ਸੇਵਾਵਾਂ ਤੁਰੰਤ ਪ੍ਰਭਾਵ ਨਾਲ ਬੰਦ ਕਰਨੀਆਂ ਪੈ ਰਹੀਆਂ ਹਨ, ਭਾਵੇਂ ਉਹ ਐਂਥਰੋਪਿਕ ਦੇ ਵਿਦੇਸ਼ੀ ਨਾਗਰਿਕ ਕਰਮਚਾਰੀ ਹੀ ਕਿਉਂ ਨਾ ਹੋਣ। ਕੰਪਨੀ ਨੇ ਅੱਗੇ ਕਿਹਾ ਕਿ ਇਸ ਆਦੇਸ਼ ਕਾਰਨ ਪ੍ਰਭਾਵਿਤ ਹੋਣ ਵਾਲੇ ਗਾਹਕਾਂ ਤੋਂ ਉਹ ਮੁਆਫੀ ਮੰਗਦੇ ਹਨ। ਕੰਪਨੀ ਦਾ ਅਨੁਮਾਨ ਹੈ ਕਿ ਇਹ ਕਿਸੇ ਤਰ੍ਹਾਂ ਦੀ ਗ਼ਲਤਫ਼ਹਿਮੀ ਹੈ। ਜਲਦੀ ਹੀ ਅਸੀਂ ਸਰਕਾਰ ਦੀ ਇਸ ਗ਼ਲਤਫ਼ਹਿਮੀ ਨੂੰ ਦੂਰ ਕਰਕੇ ਦੁਬਾਰਾ ਸਰਵਿਸ ਸ਼ੁਰੂ ਕਰਾਂਗੇ।
ਕਿਉਂ ਚਰਚਾ ਵਿੱਚ ਹੈ ਐਂਥਰੋਪਿਕ ਦਾ ਮਿਥੋਸ (Mythos)?
ਜ਼ਿਕਰਯੋਗ ਹੈ ਕਿ ਐਂਥਰੋਪਿਕ ਨੇ ਹਾਲ ਹੀ ਵਿੱਚ ਮਿਥੋਸ AI ਲੈਵਲ ਦਾ AI ਮਾਡਲ ਲਾਂਚ ਕੀਤਾ ਹੈ। ਖ਼ਾਸ ਗੱਲ ਇਹ ਹੈ ਕਿ ਇਸ ਦਾ ਐਕਸੈਸ ਆਮ ਲੋਕਾਂ ਨੂੰ ਵੀ ਮਿਲੇਗਾ। ਮਿਥੋਸ ਦੀ ਲਾਂਚਿੰਗ ਦੌਰਾਨ ਕੰਪਨੀ ਨੇ ਦੱਸਿਆ ਸੀ ਕਿ ਇਸ ਨੂੰ ਖ਼ਾਸ ਤੌਰ ‘ਤੇ ਸਰਕਾਰ ਅਤੇ ਚੋਣਵੀਆਂ ਕੰਪਨੀਆਂ ਲਈ ਤਿਆਰ ਕੀਤਾ ਗਿਆ ਹੈ। ਕੰਪਨੀ ਮੁਤਾਬਕ, ਮਿਥੋਸ ਨੂੰ ਵਿਸ਼ੇਸ਼ ਤੌਰ ‘ਤੇ ਸਾਈਬਰ ਸੁਰੱਖਿਆ (ਸਾਈਬਰ ਸਿਕਿਉਰਿਟੀ) ਅਤੇ ਗੁੰਝਲਦਾਰ ਸੌਫਟਵੇਅਰ ਕੋਡ ਦਾ ਪਤਾ ਲਗਾਉਣ ਲਈ ਡਿਜ਼ਾਈਨ ਕੀਤਾ ਗਿਆ ਹੈ।
Share this content:
Post Comment