Google meet ਦੇ ਸਰਵਰ ਡਾਊਨ ਕਾਰਨ ਯੂਜ਼ਰਸ ਪਰੇਸ਼ਾਨ

ਨਵੀਂ ਦਿੱਲੀ, 26 ਨਵੰਬਰ – ਸਾਲ 2025 ਨੂੰ ਹੁਣ ‘ਇੰਟਰਨੈੱਟ ਆਊਟੇਜ’ ਦਾ ਸਾਲ ਕਿਹਾ ਜਾਣ ਲੱਗਾ ਹੈ, ਕਿਉਂਕਿ ਤਕਨੀਕੀ ਖਾਮੀਆਂ ਦਾ ਸਿਲਸਿਲਾ ਰੁਕਣ ਦਾ ਨਾਂ ਨਹੀਂ ਲੈ ਰਿਹਾ। ਦੱਸ ਦੇਈਏ ਕਿ ਹੁਣ ਬੁੱਧਵਾਰ  ਨੂੰ ਭਾਰਤ ਵਿੱਚ ਗੂਗਲ ਮੀਟ ਦੀਆਂ ਸੇਵਾਵਾਂ ਅਚਾਨਕ ਠੱਪ ਹੋ ਗਈਆਂ। ਵੀਡੀਓ ਕਾਲ ਅਤੇ ਆਨਲਾਈਨ ਮੀਟਿੰਗ ਲਈ ਵਰਤੇ ਜਾਣ ਵਾਲੇ ਇਸ ਲੋਕਪ੍ਰਿਯ ਪਲੇਟਫਾਰਮ ਨੇ ਕੰਮ ਕਰਨਾ ਬੰਦ ਕਰ ਦਿੱਤਾ, ਜਿਸ ਨਾਲ ਦਫ਼ਤਰਾਂ ਦੇ ਕੰਮਕਾਜ ‘ਤੇ ਬੁਰਾ ਅਸਰ ਪਿਆ। ਕਈ ਯੂਜ਼ਰਸ ਨੇ ਸ਼ਿਕਾਇਤ ਕੀਤੀ ਕਿ ਉਹ ਆਪਣੀਆਂ ਜ਼ਰੂਰੀ ਮੀਟਿੰਗਾਂ ਜੁਆਇਨ ਨਹੀਂ ਕਰ ਪਾ ਰਹੇ ਸਨ।

Downdetector ‘ਤੇ ਸ਼ਿਕਾਇਤਾਂ ਦਾ ਅੰਬਾਰ

ਸਮੱਸਿਆ ਦੀ ਗੰਭੀਰਤਾ ਦਾ ਅੰਦਾਜ਼ਾ ਇਸੇ ਗੱਲ ਤੋਂ ਲਗਾਇਆ ਜਾ ਸਕਦਾ ਹੈ ਕਿ ਆਊਟੇਜ ਟਰੈਕਿੰਗ ਵੈੱਬਸਾਈਟ ਡਾਊਨਡਿਟੈਕਟਰ (Downdetector) ‘ਤੇ ਸ਼ਿਕਾਇਤਾਂ ਦਾ ਹੜ੍ਹ ਆ ਗਿਆ। ਸਵੇਰੇ 11:49 ਵਜੇ ਤੱਕ ਭਾਰਤ ਵਿੱਚ 981 ਤੋਂ ਵੱਧ ਯੂਜ਼ਰਸ ਨੇ ਇਸ ਦਿੱਕਤ ਬਾਰੇ ਰਿਪੋਰਟ ਕੀਤਾ। ਯਾਨੀ ਇੱਕ ਵੱਡੀ ਗਿਣਤੀ ਵਿੱਚ ਲੋਕਾਂ ਨੂੰ ਇਸ ਤਕਨੀਕੀ ਵਿਘਨ ਦਾ ਸਾਹਮਣਾ ਕਰਨਾ ਪਿਆ ਅਤੇ ਉਨ੍ਹਾਂ ਦਾ ਕੰਮ ਵਿਚਕਾਰ ਹੀ ਅਟਕ ਗਿਆ।

ਪਹਿਲਾਂ ਵੀ ਠੱਪ ਹੋਏ ਸਨ ਵੱਡੇ ਪਲੇਟਫਾਰਮ

ਜ਼ਿਕਰਯੋਗ ਹੈ ਕਿ ਇਹ ਪਹਿਲੀ ਵਾਰ ਨਹੀਂ ਹੈ ਜਦੋਂ ਇੰਟਰਨੈੱਟ ਆਊਟੇਜ ਕਾਰਨ ਵੱਡੇ ਪਲੇਟਫਾਰਮ ਪ੍ਰਭਾਵਿਤ ਹੋਏ ਹੋਣ। ਹਾਲ ਹੀ ਵਿੱਚ ਐਕਸ (X), ਕੈਨਵਾ (Canva) ਅਤੇ ਚੈਟਜੀਪੀਟੀ (ChatGPT) ਵਰਗੀਆਂ ਵੱਡੀਆਂ ਵੈੱਬਸਾਈਟਾਂ ਵੀ ਕੁਝ ਸਮੇਂ ਲਈ ਬੰਦ ਹੋ ਗਈਆਂ ਸਨ। ਇਸ ਤੋਂ ਇਲਾਵਾ, ਇੱਕ ਹਫ਼ਤੇ ਪਹਿਲਾਂ ਕਲਾਊਡਫਲੇਅਰ (Cloudflare) ਵਿੱਚ ਆਈ ਸਮੱਸਿਆ ਨੇ ਵੀ ਕਈ ਵੈੱਬਸਾਈਟਾਂ ਨੂੰ ਠੱਪ ਕਰ ਦਿੱਤਾ ਸੀ, ਜਿਸਨੂੰ ਬਾਅਦ ਵਿੱਚ ਠੀਕ ਕਰ ਲਿਆ ਗਿਆ ਸੀ।