ਪੀਐੱਮ ਮੋਦੀ ਨੇ MBBS ਦੀਆਂ 10,650 ਨਵੀਆਂ ਸੀਟਾਂ ਅਤੇ 41 ਨਵੇਂ ਮੈਡੀਕਲ ਕਾਲਜਾਂ ਨੂੰ ਦਿੱਤੀ ਪ੍ਰਵਾਨਗੀ

ਨਵੀਂ ਦਿੱਲੀ, 20 ਅਕਤੂਬਰ – ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਆਜ਼ਾਦੀ ਦਿਵਸ 2024 ‘ਤੇ 75,000 ਨਵੀਆਂ ਮੈਡੀਕਲ ਸੀਟਾਂ ਬਣਾਉਣ ਦੇ ਵਾਅਦੇ ਦੇ ਅਨੁਸਾਰ, ਨੈਸ਼ਨਲ ਮੈਡੀਕਲ ਕਮਿਸ਼ਨ (ਐਨਐਮਸੀ) ਨੇ ਅਕਾਦਮਿਕ ਸਾਲ 2024-25 ਲਈ 10,650 ਨਵੀਆਂ ਐਮਬੀਬੀਐਸ ਸੀਟਾਂ ਨੂੰ ਮਨਜ਼ੂਰੀ ਦੇ ਦਿੱਤੀ ਹੈ। ਇਸ ਨਾਲ 2024-25 ਅਕਾਦਮਿਕ ਸਾਲ ਲਈ MBBS ਸੀਟਾਂ ਦੀ ਕੁੱਲ ਗਿਣਤੀ 137,600 ਹੋ ਜਾਵੇਗੀ। ਇਸ ਵਿੱਚ ਰਾਸ਼ਟਰੀ ਮਹੱਤਵ ਵਾਲੇ ਸੰਸਥਾਨਾਂ (INIs) ਦੀਆਂ ਸੀਟਾਂ ਸ਼ਾਮਲ ਹਨ। ਇਹ ਵਾਧਾ ਭਾਰਤ ਵਿੱਚ ਡਾਕਟਰੀ ਸਿੱਖਿਆ ਤੱਕ ਪਹੁੰਚ ਨੂੰ ਵਧਾਉਣ ਲਈ ਇੱਕ ਵਿਆਪਕ ਰਣਨੀਤੀ ਦਾ ਹਿੱਸਾ ਹੈ। 41 ਨਵੇਂ ਮੈਡੀਕਲ ਕਾਲਜਾਂ ਦੇ ਜੋੜ ਨਾਲ ਦੇਸ਼ ਵਿੱਚ ਡਾਕਟਰੀ ਸੰਸਥਾਵਾਂ ਦੀ ਕੁੱਲ ਗਿਣਤੀ 816 ਹੋ ਗਈ ਹੈ।

ਕਿੰਨੀਆਂ ਅਰਜ਼ੀਆਂ ਪ੍ਰਾਪਤ ਹੋਈਆਂ?

ਐਨਐਮਸੀ ਦੇ ਮੁਖੀ ਡਾ. ਅਭਿਜਾਤ ਸ਼ੇਟ ਨੇ ਕਿਹਾ ਕਿ ਅੰਡਰਗ੍ਰੈਜੁਏਟ (ਯੂਜੀ) ਸੀਟਾਂ ਦੇ ਵਿਸਥਾਰ ਲਈ 170 ਅਰਜ਼ੀਆਂ ਪ੍ਰਾਪਤ ਹੋਈਆਂ ਸਨ। ਇਨ੍ਹਾਂ ਵਿੱਚੋਂ 41 ਸਰਕਾਰੀ ਕਾਲਜਾਂ ਤੋਂ ਅਤੇ 129 ਪ੍ਰਾਈਵੇਟ ਸੰਸਥਾਵਾਂ ਤੋਂ ਸਨ, ਜਿਨ੍ਹਾਂ ਲਈ ਕੁੱਲ 10,650 ਐੱਮਬੀਬੀਐਸ ਸੀਟਾਂ ਨੂੰ ਪ੍ਰਵਾਨਗੀ ਦਿੱਤੀ ਗਈ ਹੈ। ਐਨਐਮਸੀ ਨੂੰ ਪੋਸਟ ਗ੍ਰੈਜੂਏਟ (ਪੀਜੀ) ਕੋਰਸਾਂ ਲਈ ਨਵੀਆਂ ਅਤੇ ਨਵੀਨੀਕਰਨ ਸੀਟਾਂ ਲਈ 3,500 ਤੋਂ ਵੱਧ ਅਰਜ਼ੀਆਂ ਪ੍ਰਾਪਤ ਹੋਈਆਂ ਹਨ। ਡਾ. ਸ਼ੇਤ ਨੇ ਕਿਹਾ ਕਿ ਕਮਿਸ਼ਨ ਨੂੰ ਲਗਪਗ 5,000 ਪੀਜੀ ਸੀਟਾਂ ਜੋੜਨ ਦੀ ਉਮੀਦ ਹੈ, ਜਿਸ ਨਾਲ ਦੇਸ਼ ਭਰ ਵਿੱਚ ਪੀਜੀ ਸੀਟਾਂ ਦੀ ਕੁੱਲ ਗਿਣਤੀ 67,000 ਹੋ ਜਾਵੇਗੀ।

ਇਹ ਪ੍ਰਕਿਰਿਆ ਕਦੋਂ ਪੂਰੀ ਹੋਵੇਗੀ?

ਇਸ ਸਾਲ ਯੂਜੀ ਅਤੇ ਪੀਜੀ ਦੋਵਾਂ ਸੀਟਾਂ ਵਿੱਚ ਕੁੱਲ ਵਾਧਾ ਲਗਪਗ 15,000 ਹੋਣ ਦੀ ਉਮੀਦ ਹੈ। ਹਾਲਾਂਕਿ, ਅੰਤਿਮ ਪ੍ਰਵਾਨਗੀ ਪ੍ਰਕਿਰਿਆ ਅਤੇ ਕਾਉਂਸਲਿੰਗ ਵਿੱਚ ਕੁਝ ਦੇਰੀ ਹੋਈ ਹੈ। ਅਧਿਕਾਰੀਆਂ ਨੇ ਭਰੋਸਾ ਦਿੱਤਾ ਹੈ ਕਿ ਇਹ ਪ੍ਰਕਿਰਿਆਵਾਂ ਨਿਰਧਾਰਤ ਸਮਾਂ ਸੀਮਾ ਦੇ ਅੰਦਰ ਪੂਰੀਆਂ ਕੀਤੀਆਂ ਜਾਣਗੀਆਂ।