ਪੈਟਰੋਲ-ਡੀਜ਼ਲ ’ਤੇ ਸਰਕਾਰ ਨੇ ਘਟਾਇਆ ਟੈਕਸ

ਨਵੀਂ ਦਿੱਲੀ, 17 ਸਤੰਬਰ – ਕੇਂਦਰ ਸਰਕਾਰ ਨੇ ਪੈਟਰੋਲ, ਡੀਜ਼ਲ ਅਤੇ ਏਵੀਏਸ਼ਨ ਟਰਬਾਈਨ ਫਿਊਲ (ATF) ’ਤੇ ਟੈਕਸ ਵਿਚ ਕਟੌਤੀ ਦਾ ਵੱਡਾ ਐਲਾਨ ਕੀਤਾ ਹੈ। ਡੀਜ਼ਲ ਨਿਰਯਾਤ ਸ਼ੁਲਕ ਵਿਚ 5 ਰੁਪਏ ਦੀ ਕਟੌਤੀ ਕੀਤੀ ਗਈ ਹੈ। ਹੁਣ ਡੀਜ਼ਲ ’ਤੇ ਵਿੰਡਫਾਲ ਟੈਕਸ 25 ਰੁਪਏ ਤੋਂ ਘਟ ਕੇ 20 ਰੁਪਏ ਪ੍ਰਤੀ ਲੀਟਰ ਹੋ ਗਿਆ ਹੈ। ਜੈੱਟ ਫਿਊਲ (ATF) ਦੇ ਨਿਰਯਾਤ ’ਤੇ ਲੱਗਣ ਵਾਲਾ ਟੈਕਸ 19 ਰੁਪਏ ਤੋਂ ਘਟਾ ਕੇ 15 ਰੁਪਏ ਪ੍ਰਤੀ ਲੀਟਰ ਕਰ ਦਿੱਤਾ ਗਿਆ ਹੈ। ਪੈਟਰੋਲ ਨਿਰਯਾਤ ’ਤੇ ਟੈਕਸ 1.5 ਰੁਪਏ ਤੋਂ ਘਟਾ ਕੇ 0.5 ਰੁਪਏ ਪ੍ਰਤੀ ਲੀਟਰ ਕਰ ਦਿੱਤਾ ਗਿਆ ਹੈ। ਇਸਨੂੰ ਸਪੈਸ਼ਲ ਐਡੀਸ਼ਨਲ ਐਕਸਾਈਜ਼ ਡਿਊਟੀ (SAED) ਦੇ ਰੂਪ ਵਿਚ ਲਿਆ ਜਾਵੇਗਾ। ਪੈਟਰੋਲ-ਡੀਜ਼ਲ ’ਤੇ ਟੈਕਸ ਕਟੌਤੀ ਦੀ ਖ਼ਬਰ ਸੁਣਦਿਆਂ ਹੀ ਪਹਿਲਾ ਸਵਾਲ ਇਹੀ ਆਉਂਦਾ ਹੈ ਕਿ ਇਸਦਾ ਫਾਇਦਾ ਕੀ ਆਮ ਆਦਮੀ ਨੂੰ ਹੋਵੇਗਾ? ਸਿੱਧੀ ਗੱਲ ਇਹ ਹੈ ਕਿ ਪੈਟਰੋਲ ਅਤੇ ਡੀਜ਼ਲ ’ਤੇ ਵਿੰਡਫਾਲ ਟੈਕਸ ਵਿਚ ਕਟੌਤੀ ਨਾਲ ਫਿਲਹਾਲ ਤੁਹਾਡੀ ਅਤੇ ਸਾਡੀ ਜੇਬ ਨੂੰ ਕੋਈ ਰਾਹਤ ਨਹੀਂ ਮਿਲਣ ਵਾਲੀ। ਇਸਦਾ ਫਾਇਦਾ ਦੇਸ਼ ਦੀਆਂ ਤੇਲ ਰਿਫਾਈਨਰੀ ਅਤੇ ਨਿਰਯਾਤਕ ਕੰਪਨੀਆਂ ਦੀ ਝੋਲੀ ਵਿਚ ਜਾਵੇਗਾ।