ਪਾਕਿਸਤਾਨ ‘ਚ ਆਟਾ-ਦਾਲ ਤੋਂ ਬਾਅਦ ਪੈਟਰੋਲ-ਡੀਜ਼ਲ ਲਈ ਵੀ ਤਰਸੇ ਲੋਕ
ਇਸਲਾਮਾਬਾਦ, 16 ਸਤੰਬਰ – ਇਸਲਾਮਾਬਾਦ ਪਾਕਿਸਤਾਨ ‘ਚ ਊਰਜਾ ਸੰਕਟ ਡੂੰਘਾ ਹੁੰਦਾ ਜਾ ਰਿਹਾ ਹੈ ਅਤੇ ਇਸ ਦੇ ਨਾਲ ਹੀ ਪਾਕਿ ਪ੍ਰਧਾਨ ਮੰਤਰੀ ਸ਼ਹਿਬਾਜ਼ ਸ਼ਰੀਫ਼ ਦੀਆਂ ਮੁਸ਼ਕਲਾਂ ਵੀ ਵਧਦੀਆਂ ਜਾ ਰਹੀਆਂ ਹਨ। ਪਾਕਿਸਤਾਨ ‘ਚ ਤੇਲ ਅਤੇ ਗੈਸ ਦੀਆਂ ਕੀਮਤਾਂ ਅਸਮਾਨ ਛੂਹ ਰਹੀਆਂ ਹਨ। ਮਿਡਲ ਈਸਟ (ਮੱਧ ਪੂਰਬ) ‘ਚ ਅਮਰੀਕਾ-ਈਰਾਨ ਵਿਚਾਲੇ ਚੱਲ ਰਹੀ ਜੰਗ ਦੀ ਵਜ੍ਹਾ ਨਾਲ ਤੇਲ ਦੀਆਂ ਕੀਮਤਾਂ ਵਧ ਰਹੀਆਂ ਹਨ ਅਤੇ ਈਂਧਨ ਮਹਿੰਗਾ ਹੋ ਰਿਹਾ ਹੈ। ਇਸੇ ਦੇ ਚੱਲਦਿਆਂ ਪਾਕਿਸਤਾਨ ਸਰਕਾਰ ਪੈਟਰੋਲ ਦੀ ਖਪਤ ਘਟਾਉਣ ਦੇ ਉਪਾਵਾਂ ‘ਤੇ ਵਿਚਾਰ ਕਰ ਰਹੀ ਹੈ।
ਪਾਕਿਸਤਾਨ ‘ਚ ਅਸਮਾਨ ਛੂਹ ਰਹੀਆਂ ਪੈਟਰੋਲ-ਡੀਜ਼ਲ ਦੀਆਂ ਕੀਮਤਾਂ
ਮਿਡਲ ਈਸਟ ‘ਚ ਹਾਲਾਤ ਵਿਗੜਨ ਨਾਲ ਪਾਕਿਸਤਾਨ ‘ਚ ਪੈਟਰੋਲ ਅਤੇ ਡੀਜ਼ਲ ਦੀਆਂ ਕੀਮਤਾਂ ‘ਚ ਲਗਾਤਾਰ ਵਾਧਾ ਦੇਖਣ ਨੂੰ ਮਿਲ ਰਿਹਾ ਹੈ। ਪਾਕਿਸਤਾਨ ‘ਚ ਮੰਗਲਵਾਰ ਰਾਤ ਪੈਟਰੋਲ ਦੀਆਂ ਕੀਮਤਾਂ ‘ਚ 4.10 PKR ਪ੍ਰਤੀ ਲੀਟਰ ਅਤੇ ਹਾਈ-ਸਪੀਡ ਡੀਜ਼ਲ (HSD) ‘ਚ 6.41 PKR ਪ੍ਰਤੀ ਲੀਟਰ ਦਾ ਵਾਧਾ ਕੀਤਾ ਗਿਆ। ਪਾਕਿਸਤਾਨ ‘ਚ ਮੰਗਲਵਾਰ ਰਾਤ ਹੋਏ ਵਾਧੇ ਤੋਂ ਬਾਅਦ ਇੱਕ ਲੀਟਰ ਪੈਟਰੋਲ ਦੀ ਕੀਮਤ 384.34 ਪਾਕਿਸਤਾਨੀ ਰੁਪਏ ਅਤੇ ਇੱਕ ਲੀਟਰ ਹਾਈ-ਸਪੀਡ ਡੀਜ਼ਲ ਦੀ ਕੀਮਤ 415.83 ਪਾਕਿਸਤਾਨੀ ਰੁਪਏ ਹੋ ਗਈ ਹੈ।
ਟੈਂਸ਼ਨ ‘ਚ ਸ਼ਹਿਬਾਜ਼ ਸ਼ਰੀਫ਼
ਪਾਕਿਸਤਾਨ ‘ਚ ਲਗਾਤਾਰ ਪੈਟਰੋਲ-ਡੀਜ਼ਲ ਦੀਆਂ ਕੀਮਤਾਂ ਵਧਣ ਨਾਲ ਪਾਕਿਸਤਾਨ ਦੇ ਪ੍ਰਧਾਨ ਮੰਤਰੀ ਸ਼ਹਿਬਾਜ਼ ਸ਼ਰੀਫ਼ ਲਈ ਮੁਸ਼ਕਲਾਂ ਵਧਦੀਆਂ ਜਾ ਰਹੀਆਂ ਹਨ। ਕੀਮਤਾਂ ‘ਚ ਇਸ ਭਾਰੀ ਵਾਧੇ ਨੇ ਚਿੰਤਾ ਵਧਾ ਦਿੱਤੀ ਹੈ ਕਿ ਪਾਕਿਸਤਾਨ ਕਦੋਂ ਤੱਕ ਗਲੋਬਲ ਤੇਲ ਸੰਕਟ ਦੇ ਅਸਰ ਨੂੰ ਬਰਦਾਸ਼ਤ ਕਰ ਸਕੇਗਾ। ਪਾਕਿਸਤਾਨ ਦੇ ਜਲਵਾਯੂ ਪਰਿਵਰਤਨ ਮੰਤਰੀ ਮੁਸਾਦਿਕ ਮਲਿਕ ਨੇ ਕਿਹਾ, ‘ਸਰਕਾਰ ਆਪਣੀ ਈਂਧਨ ਰਾਹਤ ਯੋਜਨਾ ਜ਼ਰੀਏ ਵਾਧੇ ਦੇ ਕੁਝ ਹਿੱਸੇ ਦਾ ਬੋਝ ਖ਼ੁਦ ਚੁੱਕਣ ਦੀ ਕੋਸ਼ਿਸ਼ ਕਰ ਰਹੀ ਹੈ। ਪਾਕਿ ਸਰਕਾਰ ਦੀ ਇਸ ਯੋਜਨਾ ਤਹਿਤ, ਮੋਟਰਸਾਈਕਲ ਚਲਾਉਣ ਵਾਲਿਆਂ ਨੂੰ ਹਫ਼ਤੇ ‘ਚ 5 ਲੀਟਰ ਤੱਕ ਸਬਸਿਡੀ ਵਾਲਾ ਪੈਟਰੋਲ ਮਿਲੇਗਾ, ਜਦਕਿ ਕਾਰ ਮਾਲਕਾਂ ਨੂੰ ਹਰ 10 ਦਿਨਾਂ ‘ਚ 10 ਲੀਟਰ ਤੱਕ ਪੈਟਰੋਲ ‘ਤੇ ਰਾਹਤ ਮਿਲੇਗੀ।
Share this content:
Post Comment