ਨਹੀਂ ਰੁਕਦੀ ਨਸ਼ਾ ਤਸਕਰੀ

*ਟੌਰੰਗਾ ਬੰਦਰਗਾਹ ’ਤੇ ਵੱਡੀ ਕਾਰਵਾਈ: ਕੰਟੇਨਰ ਦੀ ਛੱਤ ਵਿੱਚੋਂ 48 ਕਿੱਲੋ ਕੋਕੀਨ ਬਰਾਮਦ
*ਪਨਾਮਾ ਦੇ ਬਾਲਬੋਆ ਤੋਂ ਆਏ ਇੱਕ ਕੰਟੇਨਰ ਵਿੱਚ ਲੁਕਾਇਆ ਗਿਆ ਸੀ।
ਔਕਲੈਂਡ, 13 ਅਪ੍ਰੈਲ, 2026 (ਹਰਜਿੰਦਰ ਸਿੰਘ ਬਸਿਆਲਾ) – ਨਿਊਜ਼ੀਲੈਂਡ ਦੇ ਕਸਟਮ ਵਿਭਾਗ ਨੇ ਟੌਰੰਗਾ ਬੰਦਰਗਾਹ (Port of Tauranga) ’ਤੇ ਇੱਕ ਵੱਡੀ ਸਫਲਤਾ ਹਾਸਲ ਕਰਦਿਆਂ ਇੱਕ ਰੈਫ੍ਰਿਜਰੇਟਿਡ ਕੰਟੇਨਰ ਵਿੱਚੋਂ 48 ਕਿੱਲੋ ਕੋਕੀਨ ਜ਼ਬਤ ਕੀਤੀ ਹੈ। ਅੰਤਰਰਾਸ਼ਟਰੀ ਬਾਜ਼ਾਰ ਵਿੱਚ ਇਸ ਨਸ਼ੀਲੇ ਪਦਾਰਥ ਦੀ ਕੀਮਤ ਲਗਭਗ 16.8 ਮਿਲੀਅਨ ਡਾਲਰ (1.68 ਕਰੋੜ ਡਾਲਰ) ਦੱਸੀ ਜਾ ਰਹੀ ਹੈ।

ਛੱਤ ਦੀ ਇਨਸੂਲੇਸ਼ਨ ਵਿੱਚ ਛੁਪਾਇਆ ਸੀ ਨਸ਼ਾ

ਕਸਟਮ ਅਧਿਕਾਰੀਆਂ ਅਨੁਸਾਰ ਇਹ ਨਸ਼ਾ ਪਨਾਮਾ ਦੇ ਬਾਲਬੋਆ ਤੋਂ ਆਏ ਇੱਕ ਕੰਟੇਨਰ ਵਿੱਚ ਲੁਕਾਇਆ ਗਿਆ ਸੀ। ਤਸਕਰਾਂ ਨੇ ਨਸ਼ੇ ਨੂੰ ਲੁਕਾਉਣ ਲਈ ਬਹੁਤ ਹੀ ਗੁੰਝਲਦਾਰ ਤਰੀਕਾ ਅਪਣਾਇਆ ਸੀ। ਕੋਕੀਨ ਨੂੰ ਕੰਟੇਨਰ ਦੇ ਅੰਦਰਲੇ ਹਿੱਸੇ ਦੀ ਬਜਾਏ, ਉਸ ਦੀ ਛੱਤ ਅਤੇ ਉੱਪਰਲੀ ਪਰਤ ਦੇ ਵਿਚਕਾਰ ਲੱਗੀ ਇਨਸੂਲੇਸ਼ਨ ਲਾਈਨਿੰਗ ਵਿੱਚ ਬਹੁਤ ਸਫਾਈ ਨਾਲ ਛੁਪਾਇਆ ਹੋਇਆ ਸੀ। ਕਸਟਮ ਮੈਰੀਟਾਈਮ ਗਰੁੱਪ ਦੇ ਮੈਨੇਜਰ ਪੌਲ ਕੈਂਪਬੈਲ ਨੇ ਕਿਹਾ ਕਿ ਤਸਕਰ ਹੁਣ ਪੁਰਾਣੇ ਤਰੀਕਿਆਂ ਨੂੰ ਛੱਡ ਕੇ ਨਵੇਂ ਅਤੇ ਗੁੰਝਲਦਾਰ ਤਰੀਕੇ ਅਪਣਾ ਰਹੇ ਹਨ, ਜੋ ਇਹ ਦਰਸਾਉਂਦਾ ਹੈ ਕਿ ਅਪਰਾਧਿਕ ਗਿਰੋਹ ਨਿਊਜ਼ੀਲੈਂਡ ਦੀ ਸਪਲਾਈ ਚੇਨ ਵਿੱਚ ਸੰਨ੍ਹ ਲਾਉਣ ਲਈ ਕਿੰਨੇ ਸਰਗਰਮ ਹਨ।

ਕਸਟਮ ਵਿਭਾਗ ਦੀ ਮੁਸਤੈਦੀ

ਪੌਲ ਕੈਂਪਬੈਲ ਨੇ ਇਸ ਕਾਰਵਾਈ ਨੂੰ ਕਸਟਮ ਅਧਿਕਾਰੀਆਂ ਦੀ ਮੁਹਾਰਤ ਅਤੇ ਸਖ਼ਤ ਸਿਖਲਾਈ ਦਾ ਨਤੀਜਾ ਦੱਸਿਆ। ਉਨ੍ਹਾਂ ਕਿਹਾ, ‘ਅਸੀਂ ਨਿਊਜ਼ੀਲੈਂਡ ਦੀਆਂ ਬੰਦਰਗਾਹਾਂ ਨੂੰ ਅਪਰਾਧਿਕ ਨੈੱਟਵਰਕਾਂ ਲਈ ਇੱਕ ਅਸੁਰੱਖਿਅਤ ਥਾਂ ਬਣਾਉਣ ਲਈ ਵਚਨਬੱਧ ਹਾਂ।” ਕਸਟਮ ਵਿਭਾਗ ਨੇ ਆਮ ਜਨਤਾ ਅਤੇ ਬੰਦਰਗਾਹ ’ਤੇ ਕੰਮ ਕਰਨ ਵਾਲੇ ਕਰਮਚਾਰੀਆਂ ਨੂੰ ਅਪੀਲ ਕੀਤੀ ਹੈ ਕਿ ਜੇਕਰ ਉਨ੍ਹਾਂ ਨੂੰ ਕੋਈ ਵੀ ਸ਼ੱਕੀ ਗਤੀਵਿਧੀ ਨਜ਼ਰ ਆਵੇ ਤਾਂ ਉਹ ਤੁਰੰਤ 0800 WE PROTECT (0800 937 768) ਜਾਂ ਕ੍ਰਾਈਮ ਸਟੌਪਰਸ ’ਤੇ ਸੂਚਨਾ ਦੇਣ।

ਨਿਊਜ਼ੀਲੈਂਡ ਵਿੱਚ ਕੋਕੀਨ ਦੀ ਵਧਦੀ ਮੰਗ

ਨਿਊਜ਼ੀਲੈਂਡ ਵਿੱਚ ਪਿਛਲੇ ਕੁਝ ਸਾਲਾਂ ਦੌਰਾਨ ਕੋਕੀਨ ਦੀ ਵਰਤੋਂ ਵਿੱਚ ਭਾਰੀ ਵਾਧਾ ਦੇਖਿਆ ਗਿਆ ਹੈ। 80 ਅਤੇ 90 ਦੇ ਦਹਾਕੇ ਵਿੱਚ ਨਿਊਜ਼ੀਲੈਂਡ ਵਿੱਚ ਕੋਕੀਨ ਨਾ ਦੇ ਬਰਾਬਰ ਸੀ, ਪਰ ਹੁਣ ਵਿਸ਼ਵ ਪੱਧਰ ’ਤੇ ਵੱਧ ਰਹੀ ਸਪਲਾਈ ਕਾਰਨ ਇੱਥੇ ਵੀ ਇਸ ਦਾ ਰੁਝਾਨ ਵਧਿਆ ਹੈ। ਪੁਲਿਸ ਦੁਆਰਾ ਜਾਰੀ ਕੀਤੇ ਗਏ ‘ਵੈਸਟਵਾਟਰ ਟੈਸਟਿੰਗ’ (ਸੀਵਰੇਜ ਪਾਣੀ ਦੀ ਜਾਂਚ) ਦੇ ਅੰਕੜਿਆਂ ਮੁਤਾਬਕ, ਕੋਕੀਨ ਦੀ ਵਰਤੋਂ ਆਪਣੇ ਸਿਖਰ ’ਤੇ ਪਹੁੰਚ ਗਈ ਹੈ। ਵਰਤੋਂ ਵਿੱਚ ਦੁੱਗਣਾ ਵਾਧਾ: ਪਿਛਲੇ ਇੱਕ ਸਾਲ ਵਿੱਚ ਕੋਕੀਨ ਦੀ ਵਰਤੋਂ ਲਗਭਗ ਦੁੱਗਣੀ ਹੋ ਗਈ ਹੈ, ਜੋ ਕਿ ਹੁਣ ਔਸਤਨ 9.4 ਕਿੱਲੋ ਪ੍ਰਤੀ ਹਫ਼ਤਾ ਤੱਕ ਪਹੁੰਚ ਗਈ ਹੈ।

ਸੁਰੱਖਿਆ ਏਜੰਸੀਆਂ ਦੀ ਚਿੰਤਾ

ਨਿਊਜ਼ੀਲੈਂਡ ਡਰੱਗ ਫਾਊਂਡੇਸ਼ਨ ਦੀ ਕਾਰਜਕਾਰੀ ਨਿਰਦੇਸ਼ਕ ਸਾਰਾਹ ਹੈਲਮ ਨੇ ਕਿਹਾ ਕਿ ਨਿਊਜ਼ੀਲੈਂਡ ਭਾਵੇਂ ਇੱਕ ਛੋਟਾ ਬਾਜ਼ਾਰ ਹੈ, ਪਰ ਨਸ਼ਾ ਤਸਕਰਾਂ ਲਈ ਇਹ ਬਹੁਤ ਜ਼ਿਆਦਾ ਮੁਨਾਫੇ ਵਾਲਾ ਦੇਸ਼ ਬਣ ਗਿਆ ਹੈ। ਪੁਲਿਸ ਅਸਿਸਟੈਂਟ ਕਮਿਸ਼ਨਰ ਕੋਰੀ ਪਾਰਨੇਲ ਨੇ ਵੀ ਪੁਸ਼ਟੀ ਕੀਤੀ ਹੈ ਕਿ ਦੇਸ਼ ਵਿੱਚ ਕੋਕੀਨ ਦੀ “ਮਜ਼ਬੂਤ ਮੰਗ” ਬਣੀ ਹੋਈ ਹੈ, ਜੋ ਸਮਾਜ ਲਈ ਇੱਕ ਗੰਭੀਰ ਚਿੰਤਾ ਦਾ ਵਿਸ਼ਾ ਹੈ।