ਡੁਨੇਡਿਨ ਵਿੱਚ ਸ. ਗੁਰਜੀਤ ਸਿੰਘ ਕਤਲ ਕਾਂਡ: ਇਨਸਾਫ਼ ਦੀ ਦਹਿਲੀਜ਼ ’ਤੇ ਬੇਨਕਾਬ ਹੋਇਆ ਝੂਠ, ਪਰ ਪੀੜਤ ਪਰਿਵਾਰ ਦੇ ਦਿਲ ਦਾ ਦਰਦ ਅਜੇ ਵੀ ਅਧੂਰਾ!

*ਕਾਤਲ ਪਤੀ ਦੀ ਜੁੱਤੀ ਛੁਪਾਉਣ ਵਾਲੀ ਪਤਨੀ ਨੂੰ 5 ਮਹੀਨੇ ਦੀ ਘਰੇਲੂ ਨਜ਼ਰਬੰਦੀ ਦੀ ਸਜ਼ਾ, ਅਦਾਲਤ ’ਚ ਇਕੱਲੀ ਪੁੱਜੀ ਸੀ ਗੁਰਪ੍ਰੀਤ ਕੌਰ

*ਸਬੂਤ ਨਸ਼ਟ ਕਰਨ ਦੇ ਦੋਸ਼ ਹੇਠ ਹਾਈ ਕੋਰਟ ਵੱਲੋਂ ਸੁਣਾਈ ਗਈ ਸਜ਼ਾ, ਪਤੀ ਨਾਲੋਂ ਨਾਤਾ ਤੋੜ ਕੇ ਹੁਣ ਤਲਾਕ ਦੀ ਚਾਰਾਜੋਈ ’ਚ ਜੁੱਟੀ

ਔਕਲੈਂਡ, 02 ਸਤੰਬਰ 2026 (ਹਰਜਿੰਦਰ ਸਿੰਘ ਬਸਿਆਲਾ) – ਨਿਊਜ਼ੀਲੈਂਡ ਦੇ ਡੁਨੇਡਿਨ ਵਿੱਚ ਬਹੁਚਰਚਿਤ ਗੁਰਜੀਤ ਸਿੰਘ ਕਤਲ ਕਾਂਡ (28 ਜਨਵਰੀ 2024) ਵਿੱਚ ਹਾਈ ਕੋਰਟ ਵੱਲੋਂ ਇੱਕ ਅਹਿਮ ਅਦਾਲਤੀ ਫੈਸਲਾ ਸੁਣਾਇਆ ਗਿਆ ਹੈ। ਆਪਣੇ ਪਤੀ ਰਾਜਿੰਦਰ ਦੁਆਰਾ ਕੀਤੇ ਗਏ ਕਤਲ ਦੇ ਅਹਿਮ ਸਬੂਤ ਛੁਪਾਉਣ ਅਤੇ ਇਨਸਾਫ਼ ਦੇ ਰਾਹ ਵਿੱਚ ਰੁਕਾਵਟ ਪਾਉਣ ਦੇ ਦੋਸ਼ ਹੇਠ 29 ਸਾਲਾ ਗੁਰਪ੍ਰੀਤ ਕੌਰ ਨੂੰ ਬੁੱਧਵਾਰ ਨੂੰ ਪੰਜ ਮਹੀਨੇ ਦੀ ਹੋਮ ਡਿਟੈਂਸ਼ਨ (ਘਰ ਵਿੱਚ ਨਜ਼ਰਬੰਦੀ) ਦੀ ਸਜ਼ਾ ਸੁਣਾਈ ਗਈ ਹੈ। ਡੁਨੇਡਿਨ ਹਾਈ ਕੋਰਟ ਵਿੱਚ ਸੁਣਵਾਈ ਦੌਰਾਨ ਗੁਰਪ੍ਰੀਤ ਕੌਰ ਅਦਾਲਤ ਦੇ ਕਮਰੇ ਵਿੱਚ ਬਿਲਕੁਲ ਇਕੱਲੀ ਦਿਖਾਈ ਦਿੱਤੀ ਅਤੇ ਉਸ ਦੇ ਪੱਖ ਵਿੱਚ ਪਬਲਿਕ ਗੈਲਰੀ ਵਿੱਚ ਕੋਈ ਵੀ ਸਮਰਥਕ ਮੌਜੂਦ ਨਹੀਂ ਸੀ। ਜ਼ਿਕਰਯੋਗ ਹੈ ਕਿ ਇਸੇ ਅਦਾਲਤ ਵੱਲੋਂ ਪੰਜ ਮਹੀਨੇ ਪਹਿਲਾਂ ਉਸ ਦੇ 35 ਸਾਲਾ ਪਤੀ ਰਾਜਿੰਦਰ ਨੂੰ ਗੁਰਜੀਤ ਸਿੰਘ ਦੇ ਬੇਰਹਿਮੀ ਨਾਲ ਕੀਤੇ ਕਤਲ ਦੇ ਦੋਸ਼ ਹੇਠ 17.5 ਸਾਲ ਦੀ ਬਿਨਾਂ ਪੈਰੋਲ ਮਿਆਦ ਦੇ ਨਾਲ ਉਮਰ ਕੈਦ ਦੀ ਸਜ਼ਾ ਸੁਣਾਈ ਜਾ ਚੁੱਕੀ ਹੈ।

ਅਦਾਲਤੀ ਕਾਰਵਾਈ ਦੌਰਾਨ ਸਾਹਮਣੇ ਆਇਆ ਕਿ ਗੁਰਪ੍ਰੀਤ ਕੌਰ ਨੂੰ ਗੁਰਜੀਤ ਸਿੰਘ ਦੇ ਕਤਲ ਦੀ ਪਹਿਲਾਂ ਤੋਂ ਕੋਈ ਜਾਣਕਾਰੀ ਜਾਂ ਉਸ ਵਿੱਚ ਕੋਈ ਭਾਗੀਦਾਰੀ ਨਹੀਂ ਸੀ, ਪਰ ਉਸ ਨੇ ਵਾਰਦਾਤ ਵਾਲੀ ਰਾਤ ਆਪਣੇ ਪਤੀ ਦੁਆਰਾ ਪਾਏ ਗਏ ਜੁੱਤੇ ਛੁਪਾਉਣ ਦੀ ਕੋਸ਼ਿਸ਼ ਕੀਤੀ ਸੀ। ਪੁਲਿਸ ਰਿਪੋਰਟ ਅਨੁਸਾਰ 5 ਫਰਵਰੀ ਨੂੰ ਜਦੋਂ ਜਾਂਚ ਅਧਿਕਾਰੀ ਗੁਰਪ੍ਰੀਤ ਦੇ ਕੰਮ ਵਾਲੀ ਥਾਂ ’ਤੇ ਉਸ ਦਾ ਬਿਆਨ ਲੈਂਦੇ ਹੋਏ ਪਹੁੰਚੇ ਤਾਂ ਉਹ ਘਬਰਾ ਗਈ। ਅਫ਼ਸਰਾਂ ਨਾਲ ਜਾਣ ਤੋਂ ਪਹਿਲਾਂ ਉਹ ਆਪਣਾ ਹੈਂਡਬੈਗ ਲੈ ਕੇ ਟਾਇਲਟ ਵਿੱਚ ਗਈ ਅਤੇ ਉੱਥੇ ਕੂੜੇਦਾਨ ਵਿੱਚ ਜੁੱਤੇ ਸੁੱਟ ਦਿੱਤੇ। ਬਾਅਦ ਵਿੱਚ ਪੁਲਿਸ ਨੇ ਉਹ ਕਾਲੇ ਰੰਗ ਦੇ ਫੀਤੇ ਵਾਲੇ ਜੁੱਤੇ ਬਰਾਮਦ ਕਰ ਲਏ, ਜਿਨ੍ਹਾਂ ਦੇ ਤਲੇ ਵਿੱਚੋਂ ਕੱਚ ਦੇ ਟੁਕੜੇ ਮਿਲੇ ਜੋ ਘਟਨਾ ਵਾਲੀ ਥਾਂ ਦੀ ਟੁੱਟੀ ਹੋਈ ਖਿੜਕੀ ਨਾਲ ਮੇਲ ਖਾਂਦੇ ਸਨ।

ਜਸਟਿਸ ਕੈਮਰਨ ਮੈਂਡਰ ਨੇ ਫੈਸਲਾ ਸੁਣਾਉਂਦਿਆਂ ਕਿਹਾ ਕਿ ਗੁਰਪ੍ਰੀਤ ਦਾ ਇਹ ਕਦਮ ਸਿਰਫ਼ ਘਬਰਾਹਟ ਵਿੱਚ ਚੁੱਕਿਆ ਗਿਆ ਕਦਮ ਨਹੀਂ ਸੀ, ਸਗੋਂ ਪੁਲਿਸ ਦੇ ਪਹੁੰਚਣ ਤੋਂ ਪਹਿਲਾਂ ਹੀ ਜੁੱਤੇ ਘਰੋਂ ਕੰਮ ਵਾਲੀ ਥਾਂ ’ਤੇ ਲੈ ਕੇ ਆਉਣਾ ਇੱਕ ਪਹਿਲਾਂ ਤੋਂ ਬਣਾਈ ਯੋਜਨਾ ਨੂੰ ਦਰਸਾਉਂਦਾ ਹੈ। ਬਚਾਅ ਪੱਖ ਦੇ ਵਕੀਲ ਨੇ ਦਲੀਲ ਦਿੱਤੀ ਕਿ ਹਰਿਆਣਾ ਤੋਂ ਵਿਆਹ ਕੇ ਆਈ ਗੁਰਪ੍ਰੀਤ ਕੌਰ ਆਪਣੇ ਪਤੀ ਪ੍ਰਤੀ ਸੱਭਿਆਚਾਰਕ ਵਫ਼ਾਦਾਰੀ ਦੇ ਪ੍ਰਭਾਵ ਹੇਠ ਸੀ, ਜਿਸ ਨੂੰ ਧਿਆਨ ਵਿੱਚ ਰੱਖਦਿਆਂ ਅਦਾਲਤ ਨੇ ਸਜ਼ਾ ਵਿੱਚ 10 ਫੀਸਦੀ ਦੀ ਛੋਟ ਦਿੱਤੀ। ਕੁੱਲ 35 ਫੀਸਦੀ ਦੀ ਛੋਟ ਤੋਂ ਬਾਅਦ ਉਸ ਨੂੰ ਹੋਮ ਡਿਟੈਂਸ਼ਨ ਦੀ ਸਜ਼ਾ ਦਿੱਤੀ ਗਈ।

ਦੂਜੇ ਪਾਸੇ, ਮ੍ਰਿਤਕ ਗੁਰਜੀਤ ਸਿੰਘ ਦੀ ਪਤਨੀ ਅਤੇ ਭੈਣ ਨੇ ਅਦਾਲਤ ਵਿੱਚ ਆਪਣੇ ਦਰਦਨਾਕ ਬਿਆਨ ਦਰਜ ਕਰਵਾਉਂਦਿਆਂ ਕਿਹਾ ਕਿ ਇਸ ਘਟਨਾ ਨੇ ਉਨ੍ਹਾਂ ਦੀ ਜ਼ਿੰਦਗੀ ਤਬਾਹ ਕਰ ਦਿੱਤੀ ਹੈ ਅਤੇ ਗੁਰਪ੍ਰੀਤ ਨੇ ਸੱਚ ਦਾ ਸਾਥ ਦੇਣ ਦੀ ਬਜਾਏ ਕਾਤਲ ਦੀ ਮਦਦ ਕੀਤੀ। ਪਤੀ ਦੀ ਦੋਸ਼-ਸਿੱਧੀ ਤੋਂ ਬਾਅਦ ਗੁਰਪ੍ਰੀਤ ਦੇ ਆਪਣੇ ਸਹੁਰੇ ਪਰਿਵਾਰ ਨਾਲ ਸਬੰਧ ਖਰਾਬ ਹੋ ਚੁੱਕੇ ਹਨ। ਉਸ ਨੇ ਪਤੀ ਅਤੇ ਉਸ ਦੇ ਪਰਿਵਾਰ ਖ਼ਿਲਾਫ਼ ਸੁਰੱਖਿਆ ਹੁਕਮ (ਪ੍ਰੋਟੈਕਸ਼ਨ ਆਰਡਰ) ਹਾਸਲ ਕਰ ਲਏ ਹਨ ਅਤੇ ਹੁਣ ਤਲਾਕ ਲੈਣ ਦੀ ਕਾਨੂੰਨੀ ਪ੍ਰਕਿਰਿਆ ਚਲਾ ਰਹੀ ਹੈ। ਸਿਆਣਿਆਂ ਨੇ ਸੱਚ ਕਿਹਾ ਹੈ ਕਿ ‘ਸੱਚ ਦੀ ਆਵਾਜ਼ ਨਾਲ ਖੜ੍ਹੋ, ਝੂਠੀ ਵਫ਼ਾਦਾਰੀ ਦਾ ਪਾਪ ਨਾ ਚੁਣੋ!’