ਸੋਨੇ ਅਤੇ ਚਾਂਦੀ ਦੀਆਂ ਕੀਮਤਾਂ ’ਚ ਵਾਧਾ, ਸੋਨਾ 2,600 ਰੁਪਏ ਵੱਧ ਕੇ 1,59,800 ਰੁਪਏ ਪ੍ਰਤੀ 10 ਗ੍ਰਾਮ ਹੋਇਆ

ਨਵੀਂ ਦਿੱਲੀ, 13 ਅਗਸਤ – ਰਾਸ਼ਟਰੀ ਰਾਜਧਾਨੀ ਦੇ ਸਰਰਾਫਾ ਬਾਜ਼ਾਰ ‘ਚ ਬੁੱਧਵਾਰ ਨੂੰ ਸੋਨੇ ਦੀਆਂ ਕੀਮਤਾਂ ‘ਚ ਲਗਾਤਾਰ ਸੱਤਵੇਂ ਸੈਸ਼ਨ ‘ਚ ਤੇਜ਼ੀ ਰਹੀ। ਮਜ਼ਬੂਤ ਗਲੋਬਲ ਰੁਝਾਨ ਅਤੇ ਸਰਰਾਫਾ ਮੰਗ ਦੇ ਕਾਰਨ ਸੋਨਾ 2,600 ਰੁਪਏ ਵੱਧ ਕੇ 1.59 ਲੱਖ ਰੁਪਏ ਪ੍ਰਤੀ 10 ਗ੍ਰਾਮ ‘ਤੇ ਪਹੁੰਚ ਗਿਆ। ਆਲ ਇੰਡੀਆ ਸਰਰਾਫਾ ਐਸੋਸੀਏਸ਼ਨ ਦੇ ਅਨੁਸਾਰ, 99.9 ਪ੍ਰਤੀਸ਼ਤ ਸ਼ੁੱਧਤਾ ਵਾਲੇ ਸੋਨੇ ਦੀ ਕੀਮਤ ਮੰਗਲਵਾਰ ਦੇ 1,57,200 ਰੁਪਏ ਪ੍ਰਤੀ 10 ਗ੍ਰਾਮ ਦੇ ਬੰਦ ਭਾਅ ਤੋਂ 2,600 ਰੁਪਏ ਵੱਧ ਕੇ 1,59,800 ਰੁਪਏ ਪ੍ਰਤੀ 10 ਗ੍ਰਾਮ (ਸਾਰੇ ਟੈਕਸਾਂ ਸਮੇਤ) ਹੋ ਗਈ। ਤਿੰਨ ਅਗਸਤ ਨੂੰ ਇਸ ਦਾ ਭਾਅ 1,47,400 ਰੁਪਏ ਪ੍ਰਤੀ 10 ਗ੍ਰਾਮ ਸੀ, ਅਤੇ ਪਿਛਲੇ ਸੱਤ ਸੈਸ਼ਨਾਂ ਵਿੱਚ ਇਸ ਵਿੱਚ 12,400 ਰੁਪਏ ਜਾਂ 8.4 ਪ੍ਰਤੀਸ਼ਤ ਦਾ ਵਾਧਾ ਹੋਇਆ ਹੈ। ਚਾਂਦੀ ਵੀ 4,000 ਰੁਪਏ ਵੱਧ ਕੇ 2,46,000 ਰੁਪਏ ਪ੍ਰਤੀ ਕਿਲੋਗ੍ਰਾਮ (ਸਾਰੇ ਟੈਕਸਾਂ ਸਮੇਤ) ਹੋ ਗਈ। ਪਿਛਲੇ ਸੈਸ਼ਨ ਵਿੱਚ ਇਹ 2,42,000 ਰੁਪਏ ਪ੍ਰਤੀ ਕਿਲੋਗ੍ਰਾਮ ‘ਤੇ ਬੰਦ ਹੋਈ ਸੀ।

ਲੇਮਨ ਮਾਰਕਿਟਸ ਡੈਸਕ ਦੇ ਰਿਸਰਚ ਹੈੱਡ ਗੌਰਵ ਗਰਗ ਨੇ ਕਿਹਾ ਕਿ ਘਰੇਲੂ ਬਾਜ਼ਾਰਾਂ ‘ਚ ਸੋਨੇ ਦੀਆਂ ਕੀਮਤਾਂ ‘ਚ ਵਾਧਾ ਹੋਇਆ ਕਿਉਂਕਿ ਨਿਵੇਸ਼ਕਾਂ ਨੇ ਅਮਰੀਕੀ ਮਹਿੰਗਾਈ ਦੇ ਅੰਕੜਿਆਂ ਤੋਂ ਪਹਿਲਾਂ ਸੁਰੱਖਿਅਤ ਨਿਵੇਸ਼ ਵਜੋਂ ਖਰੀਦਦਾਰੀ ਵਧਾਈ, ਜਦੋਂ ਕਿ ਪੱਛਮੀ ਏਸ਼ੀਆ ‘ਚ ਲਗਾਤਾਰ ਭੂ-ਰਾਜਨੀਤਿਕ ਤਣਾਅ ਨੇ ਕੀਮਤੀ ਧਾਤੂਆਂ ਦੀ ਮੰਗ ਨੂੰ ਸਮਰਥਨ ਦਿੱਤਾ। ਐੱਚ.ਡੀ.ਐੱਫ.ਸੀ. ਸਕਿਓਰਿਟੀਜ਼ ਦੇ ਸੀਨੀਅਰ ਵਿਸ਼ਲੇਸ਼ਕ (ਕਮੋਡਿਟੀ) ਸੌਮਿਲ ਗਾਂਧੀ ਨੇ ਕਿਹਾ ਕਿ ਅਮਰੀਕੀ ਬਾਂਡ ਯੀਲਡ (ਪ੍ਰਤੀਫਲ) ‘ਚ ਗਿਰਾਵਟ ਅਤੇ ਡਾਲਰ ‘ਚ ਸਥਿਰਤਾ ਨੇ ਵੀ ਕੀਮਤੀ ਧਾਤੂਆਂ ਨੂੰ ਸਮਰਥਨ ਦਿੱਤਾ। ਉਨ੍ਹਾਂ ਕਿਹਾ ਕਿ ਹਾਲਾਂਕਿ, ਅਮਰੀਕੀ ਮਹਿੰਗਾਈ ਦੇ ਅੰਕੜਿਆਂ ਤੋਂ ਪਹਿਲਾਂ ਨਿਵੇਸ਼ਕਾਂ ਦੇ ਸਾਵਧਾਨ ਰਹਿਣ ਕਾਰਨ ਵਾਧਾ ਸੀਮਤ ਰਿਹਾ। ਗਾਂਧੀ ਨੇ ਕਿਹਾ, “ਬਾਜ਼ਾਰ ਦੇ ਲੋਕ ਲਗਾਤਾਰ ਵਧਦੀਆਂ ਕੀਮਤਾਂ ਦੇ ਦਬਾਅ ਦੇ ਸੰਕੇਤਾਂ ਲਈ ਅੰਕੜਿਆਂ ਦਾ ਬਾਰੀਕੀ ਨਾਲ ਮੁਲਾਂਕਣ ਕਰਨਗੇ, ਖਾਸ ਕਰਕੇ ਪੈਟਰੋਲ ਦੀਆਂ ਵਧੀਆਂ ਕੀਮਤਾਂ ਨੂੰ ਦੇਖਦੇ ਹੋਏ, ਜੋ ਮਹਿੰਗਾਈ ਦੀਆਂ ਚਿੰਤਾਵਾਂ ਨੂੰ ਕੇਂਦਰ ‘ਚ ਰੱਖ ਸਕਦੀਆਂ ਹਨ ਅਤੇ ਫੈਡਰਲ ਰਿਜ਼ਰਵ ਨੂੰ ਸਾਵਧਾਨ ਰੁਖ਼ ਬਣਾਏ ਰੱਖਣ ਲਈ ਉਤਸ਼ਾਹਿਤ ਕਰ ਸਕਦੀਆਂ ਹਨ।”