ਸਵਿਮਿੰਗ ਪੂਲ ਵਿਚ ਨਹਾਉਣ ਤੋਂ ਬਾਅਦ ਬੱਚੇ ਨੇ ਤੋੜਿਆ ਦਮ

ਲੁਧਿਆਣਾ, 5 ਸਤੰਬਰ – ਲੁਧਿਆਣਾ ਤੋਂ ਇਕ ਲਾਈਵ ਵੀਡੀਓ ਸਾਹਮਣੇ ਆਈ ਹੈ ਜਿਸ ਵਿੱਚ ਇੱਕ 15 ਸਾਲਾ ਲੜਕੇ ਦੀ ਸਵਿਮਿੰਗ ਪੂਲ ਦੇ ਕਿਨਾਰੇ ਤੈਰਾਕੀ ਕਰਨ ਤੋਂ ਬਾਅਦ ਮੌਤ ਹੋ ਗਈ। ਉਹ ਆਪਣੇ ਇੱਕ ਸਾਥੀ ਨਾਲ ਸਵਿਮਿੰਗ ਪੂਲ ਦੇ ਕਿਨਾਰੇ ‘ਤੇ ਬੈਠਾ ਸੀ ਉਦੋਂ ਹੀ ਅਚਾਨਕ ਉਸ ਨੂੰ ਬੇਚੈਨੀ ਮਹਿਸੂਸ ਹੋਣ ਲੱਗੀ ਅਤੇ ਉਹ ਲਗਾਤਾਰ ਆਪਣੇ ਸਰੀਰ ਨੂੰ ਖਿੱਚਣ ਲੱਗ ਪਿਆ। ਜਦੋਂ ਉਸ ਨੂੰ ਬਹੁਤ ਜ਼ਿਆਦਾ ਬੇਚੈਨੀ ਮਹਿਸੂਸ ਹੋਣ ਲੱਗੀ, ਤਾਂ ਉਹ ਉੱਠਿਆ ਅਤੇ ਤੁਰਨ ਦੀ ਕੋਸ਼ਿਸ਼ ਕੀਤੀ, ਪਰ ਉਹ ਤੁਰ ਨਾ ਸਕਿਆ। ਉਸ ਦੇ ਪੈਰ ਡਗਮਗਾਉਣ ਲੱਗੇ; ਡਿੱਗਣ ਦੇ ਡਰੋਂ ਉਹ ਛੇਤੀ ਹੀ ਵਾਪਸ ਉੱਥੇ ਹੀ ਬੈਂਚ ‘ਤੇ ਬੈਠ ਗਿਆ ਜਿੱਥੇ ਉਹ ਆਪਣੇ ਦੋਸਤ ਨਾਲ ਬੈਠਾ ਹੋਇਆ ਸੀ।

ਅਚਾਨਕ ਉਸ ਨੂੰ ਛਾਤੀ ਵਿੱਚ ਦਰਦ ਹੋਇਆ ਅਤੇ ਉਸ ਦੀ ਮੌਤ ਹੋ ਗਈ। ਪਰਿਵਾਰ ਅਨੁਸਾਰ, ਵੰਸ਼ ਕਾਫ਼ੀ ਸਮੇਂ ਤੋਂ ਦਿਲ ਦੀ ਬਿਮਾਰੀ ਤੋਂ ਪੀੜਤ ਸੀ ਅਤੇ ਏਮਜ਼ (AIIMS), ਦਿੱਲੀ ਵਿਖੇ ਉਸ ਦਾ ਇਲਾਜ ਚੱਲ ਰਿਹਾ ਸੀ। ਇਹ ਬੱਚਾ ਬਿੰਦਰਾ ਕਲੋਨੀ (ਵਾਰਡ ਨੰਬਰ 87) ਦਾ ਰਹਿਣ ਵਾਲਾ ਸੀ ਅਤੇ ਉਸ ਦੇ ਪਰਿਵਾਰ ਵਿੱਚ ਇੱਕ ਛੋਟੀ ਭੈਣ ਹੈ। ਖਬਰਾਂ ਅਨੁਸਾਰ ਇਹ ਘਟਨਾ 29 ਅਗਸਤ ਨੂੰ ਵਾਪਰੀ ਸੀ, ਪਰ ਹੁਣ ਇਸ ਦੁਖਦਾਈ ਘਟਨਾ ਦੀ ਇੱਕ ਵੀਡੀਓ ਸਾਹਮਣੇ ਆਈ ਹੈ। ਵੰਸ਼ ਦੇ ਪਿਤਾ ਵਿੱਕੀ ਕੱਪੜੇ ਦਾ ਕਾਰੋਬਾਰ ਕਰਦੇ ਹਨ। ਉਸ ਦੇ ਮਾਤਾ-ਪਿਤਾ ਅੱਜ ਉਸਦੀਆਂ ਅਸਥੀਆਂ ਜਲ-ਪ੍ਰਵਾਹ ਕਰਨ ਲਈ ਹਰਿਦੁਆਰ ਗਏ ਹਨ।