ਲੀਕੀ ਹੋਮ ਕੇਸ: ਦਵਿੰਦਰ ਸਿੰਘ ਰਾਹਲ ਨੂੰ ਲੱਖਾਂ ਡਾਲਰ ਹਰਜਾਨਾ ਭਰਨ ਦੇ ਹੁਕਮ

*ਅਦਾਲਤ ਨੇ ਘਰ ਦੀ ਮੁਰੰਮਤ ਅਤੇ ਪੀੜਤ ਜੋੜੇ ਦੇ ਨੁਕਸਾਨ ਲਈ 8.25 ਲੱਖ ਡਾਲਰ ਦੀ ਦੇਣਦਾਰੀ ਤੈਅ ਕੀਤੀ
ਔਕਲੈਂਡ, 15 ਮਈ, 2026 (ਹਰਜਿੰਦਰ ਸਿੰਘ ਬਸਿਆਲਾ) – ਨਿਊਜ਼ੀਲੈਂਡ ਦੀ ਕੋਰਟ ਆਫ਼ ਅਪੀਲ ਨੇ ਇੱਕ ਅਹਿਮ ਫੈਸਲਾ ਸੁਣਾਉਂਦਿਆਂ ਔਕਲੈਂਡ ਦੇ ਉੱਘੇ ਕਾਰੋਬਾਰੀ ਅਤੇ ‘ਕੁਈਨਜ਼ ਸਰਵਿਸ ਮੈਡਲ’ (QSM) ਪ੍ਰਾਪਤ ਕਰਨ ਵਾਲੇ ਸ੍ਰੀ ਦਵਿੰਦਰ ਸਿੰਘ ਰਾਹਲ ਨੂੰ ਇੱਕ ਨੌਜਵਾਨ ਜੋੜੇ ਨਾਲ ਧੋਖਾਧੜੀ ਕਰਨ ਦੇ ਦੋਸ਼ ਵਿੱਚ ਕਰੀਬ 8.25 ਲੱਖ ਡਾਲਰ ਹਰਜਾਨਾ ਅਦਾ ਕਰਨ ਦਾ ਹੁਕਮ ਦਿੱਤਾ ਹੈ।

ਕੀ ਹੈ ਪੂਰਾ ਮਾਮਲਾ?

ਸਾਲ 2020 ਵਿੱਚ ਅਮੀਤ ਭਾਰਗਵ ਅਤੇ ਰੇਨੂੰ ਖਜੂਰੀਆ ਨਾਮ ਦੇ ਇੱਕ ਜੋੜੇ ਨੇ ਮੈਨੁਕਾਊ ਵਿੱਚ ਇੱਕ ਘਰ ਖਰੀਦਿਆ ਸੀ। ਬਾਅਦ ਵਿੱਚ ਪਤਾ ਲੱਗਾ ਕਿ ਇਹ ਘਰ ਅੰਦਰੋਂ ਬੁਰੀ ਤਰ੍ਹਾਂ ਸਿੱਲ ਅਤੇ ਗਲਣ ਦਾ ਸ਼ਿਕਾਰ ਸੀ। ਅਦਾਲਤ ਵਿੱਚ ਇਹ ਸਾਬਤ ਹੋਇਆ ਕਿ ਰਾਹਲ ਨੇ ਘਰ ਦੇ ਨੁਕਸਾਂ ਨੂੰ ਛੁਪਾਉਣ ਲਈ ਉੱਪਰੋਂ ਮਾੜੀ-ਮੋਟੀ ਮੁਰੰਮਤ ਕਰਵਾ ਕੇ ਇਸ ਨੂੰ ‘ਨਵਾਂ ਰੇਨੋਵੇਟ’ ਕੀਤਾ ਦੱਸ ਕੇ ਵੇਚ ਦਿੱਤਾ ਸੀ।

ਅਦਾਲਤ ਦੀ ਸਖ਼ਤ ਟਿੱਪਣੀ

ਜੱਜ ਨੇ ਇਸ ਮਾਮਲੇ ਨੂੰ ਸਿੱਧੇ ਤੌਰ ’ਤੇ ਸੱਚਾਈ ’ਤੇ ਪਰਦਾ ਪਾਉਣ ਵਾਲਾ ਕੇਸ ਦੱਸਿਆ। ਅਦਾਲਤ ਨੇ ਰਾਹਲ ਨੂੰ ਇਸ ਧੋਖਾਧੜੀ ਦਾ ਪਪੇਟ-ਮਾਸਟਰ (ਸੂਤਰਧਾਰ) ਕਰਾਰ ਦਿੱਤਾ। ਹਾਲਾਂਕਿ ਰਾਹਲ ਨੇ ਦਲੀਲ ਦਿੱਤੀ ਸੀ ਕਿ ਘਰ ਉਸ ਦੀ ਕੰਪਨੀ (ਜੋ ਹੁਣ ਬੰਦ ਹੋ ਚੁੱਕੀ ਹੈ) ਰਾਹੀਂ ਵੇਚਿਆ ਗਿਆ ਸੀ ਅਤੇ ਉਹ ਨਿੱਜੀ ਤੌਰ ’ਤੇ ਜ਼ਿੰਮੇਵਾਰ ਨਹੀਂ ਹੈ, ਪਰ ਅਦਾਲਤ ਨੇ ਇਸ ਨੂੰ ਖਾਰਜ ਕਰ ਦਿੱਤਾ।

ਪੀੜਤ ਜੋੜੇ ਦੀ ਹਾਲਤ

ਪੀੜਤ ਜੋੜੇ ਨੇ ਦੱਸਿਆ ਕਿ ਉਨ੍ਹਾਂ ਨੇ ਆਪਣੇ ਜੀਵਨ ਦੀ ਜਮ੍ਹਾਂ ਪੂੰਜੀ ਅਤੇ 30 ਸਾਲਾਂ ਦਾ ਕਰਜ਼ਾ ਲੈ ਕੇ ਇਹ ਘਰ ਖਰੀਦਿਆ ਸੀ। ਲੀਕੀ ਹੋਣ ਕਾਰਨ ਘਰ ਦੀ ਕੀਮਤ ਕਰਜ਼ੇ ਨਾਲੋਂ ਵੀ ਘੱਟ ਰਹਿ ਗਈ, ਜਿਸ ਕਾਰਨ ਉਹ ’ਨੈਗੇਟਿਵ ਇਕੁਇਟੀ’ ਵਿੱਚ ਫਸ ਗਏ। ਉਨ੍ਹਾਂ ਨੂੰ ਆਪਣੇ ਛੋਟੇ ਬੱਚੇ ਨਾਲ ਸਿੱਲ੍ਹੇ ਅਤੇ ਬਿਮਾਰੀ ਵਾਲੇ ਮਾਹੌਲ ਵਿੱਚ ਰਹਿਣ ਲਈ ਮਜਬੂਰ ਹੋਣਾ ਪਿਆ।

ਫੈਸਲੇ ਦੇ ਮੁੱਖ ਅੰਸ਼:

ਨਿੱਜੀ ਜ਼ਿੰਮੇਵਾਰੀ: ਅਦਾਲਤ ਨੇ ਕਿਹਾ ਕਿ ਰਾਹਲ ਆਪਣੀ ਕੰਪਨੀ ਦੇ ਪਿੱਛੇ ਨਹੀਂ ਲੁਕ ਸਕਦਾ; ਉਹ ਨਿੱਜੀ ਤੌਰ ’ਤੇ ਹਰਜਾਨਾ ਭਰਨ ਲਈ ਪਾਬੰਦ ਹੈ।
ਹਰਜਾਨਾ: ਜੋੜੇ ਨੂੰ ਹੋਏ ਨੁਕਸਾਨ ਅਤੇ ਮਾਨਸਿਕ ਪਰੇਸ਼ਾਨੀ ਲਈ ਕੁੱਲ 825,000 ਡਾਲਰ ਦੇ ਕਰੀਬ ਰਾਸ਼ੀ ਦੇਣ ਦਾ ਹੁਕਮ ਦਿੱਤਾ ਗਿਆ।
ਸਬਕ: ਜੋੜੇ ਦੀ ਵਕੀਲ ਸਾਰਾਹ ਰੋਅ ਨੇ ਕਿਹਾ ਕਿ ਇਹ ਫੈਸਲਾ ਉਨ੍ਹਾਂ ਵਿਕਰੇਤਾਵਾਂ ਲਈ ਸਬਕ ਹੈ ਜੋ ਘਰਾਂ ਦੇ ਨੁਕਸ ਛੁਪਾ ਕੇ ਖਰੀਦਦਾਰਾਂ ਨੂੰ ਗੁੰਮਰਾਹ ਕਰਦੇ ਹਨ।
ਦਵਿੰਦਰ ਸਿੰਘ ਰਾਹਲ, ਜੋ ਪਹਿਲਾਂ ‘ਜਸਟਿਸ ਆਫ਼ ਦਾ ਪੀਸ’ ਵੀ ਰਹਿ ਚੁੱਕੇ ਹਨ, ਲਈ ਇਹ ਫੈਸਲਾ ਇੱਕ ਵੱਡਾ ਝਟਕਾ ਮੰਨਿਆ ਜਾ ਰਿਹਾ ਹੈ।