ਫ਼ਸਲਾਂ ’ਤੇ ਕਾਲੇ ਬੱਦਲ, ਕਿਸਾਨ ਚਿੰਤਾ ‘ਚ

ਹਰਿਆਣਾ, 20 ਮਾਰਚ – ਪਿਛਲੇ ਪੰਜ ਦਿਨਾਂ ਵਿੱਚ ਮੀਂਹ ਦੇ ਦੂਜੇ ਦੌਰ ਨੇ ਸੂਬੇ ਭਰ ਦੇ ਕਿਸਾਨਾਂ ਵਿੱਚ ਚਿੰਤਾ ਵਧਾ ਦਿੱਤੀ ਹੈ, ਕਿਉਂਕਿ ਵਿਛੀਆਂ ਹੋਈਆਂ ਫ਼ਸਲਾਂ ਨੇ ਪੈਦਾਵਾਰ ਅਤੇ ਝਾੜ ਬਾਰੇ ਫ਼ਿਕਰ ਪੈਦਾ ਕਰ ਦਿੱਤੇ ਹਨ। ਇਸ ਵਾਛੜ ਨੇ ਘੱਟੋ-ਘੱਟ ਤਾਪਮਾਨ ਵਿੱਚ ਗਿਰਾਵਟ ਲਿਆਂਦੀ ਹੈ। ਔਸਤ ਘੱਟੋ-ਘੱਟ ਤਾਪਮਾਨ ਵਿੱਚ 1.2 ਡਿਗਰੀ ਸੈਲਸੀਅਸ ਦੀ ਕਮੀ ਆਈ ਹੈ, ਜਿਸ ਨਾਲ ਇਹ ਸੂਬੇ ਦੇ ਆਮ ਮੌਸਮੀ ਪੱਧਰ ਦੇ ਨੇੜੇ ਪਹੁੰਚ ਗਿਆ ਹੈ। ਸੋਨੀਪਤ ਵਿੱਚ ਸਭ ਤੋਂ ਘੱਟ ਤਾਪਮਾਨ 14.3 ਡਿਗਰੀ ਸੈਲਸੀਅਸ ਦਰਜ ਕੀਤਾ ਗਿਆ। ਖੇਤੀਬਾੜੀ ਅਤੇ ਕਿਸਾਨ ਭਲਾਈ ਵਿਭਾਗ ਨੇ ਕਿਸਾਨਾਂ ਦੇ ਹੋਏ ਨੁਕਸਾਨ ਦਾ ਜਾਇਜ਼ਾ ਲੈਣਾ ਸ਼ੁਰੂ ਕਰ ਦਿੱਤਾ ਹੈ।

ਰੋਹਤਕ ਜ਼ਿਲ੍ਹੇ ਵਿੱਚ ਸਭ ਤੋਂ ਵੱਧ 22.4 ਐੱਮ ਐੱਮ ਮੀਂਹ ਦਰਜ ਕੀਤਾ ਗਿਆ ਹੈ, ਇਸ ਤੋਂ ਬਾਅਦ ਸੋਨੀਪਤ ਵਿੱਚ 19 ਐੱਮ ਐੱਮ, ਪਾਣੀਪਤ ਵਿੱਚ 13.5 ਐੱਮ ਐੱਮ, ਮਹਿੰਦਰਗੜ੍ਹ ਅਤੇ ਚਰਖੀ ਦਾਦਰੀ ਵਿੱਚ 12.5-12.5 ਐੱਮ ਐੱਮ, ਭਿਵਾਨੀ ਅਤੇ ਪਲਵਲ ਵਿੱਚ 10-10 ਐੱਮ ਐੱਮ, ਗੁਰੂਗ੍ਰਾਮ ਵਿੱਚ 6.5 ਐੱਮ ਐੱਮ, ਅੰਬਾਲਾ ਵਿੱਚ 5.7 ਐੱਮ ਐੱਮ, ਕਰਨਾਲ ਵਿੱਚ 5.4 ਐੱਮ ਐੱਮ, ਯਮੁਨਾਨਗਰ ਵਿੱਚ 4.5 ਐੱਮ ਐੱਮ, ਜੀਂਦ ਵਿੱਚ 4.2 ਐੱਮ ਐੱਮ, ਸਿਰਸਾ ਵਿੱਚ 3.5 ਐੱਮ ਐੱਮ ਅਤੇ ਹਿਸਾਰ ਵਿੱਚ 3.3 ਐੱਮ ਐੱਮ ਮੀਂਹ ਪਿਆ ਹੈ।

ਖੇਤੀਬਾੜੀ ਅਤੇ ਕਿਸਾਨ ਭਲਾਈ ਵਿਭਾਗ ਨੇ ਦੱਸਿਆ ਹੈ ਕਿ ਅਜੇ ਤੱਕ ਫ਼ਸਲਾਂ ਦੇ ਨੁਕਸਾਨ ਦੀ ਕੋਈ ਰਸਮੀ ਰਿਪੋਰਟ ਪ੍ਰਾਪਤ ਨਹੀਂ ਹੋਈ ਹੈ। ਹਾਲਾਂਕਿ, ਅਧਿਕਾਰੀਆਂ ਨੇ ਸਵੀਕਾਰ ਕੀਤਾ ਕਿ ਫ਼ਸਲਾਂ ਦੇ ਵਿਛ ਜਾਣ ਨਾਲ ਝਾੜ ‘ਤੇ ਅਸਰ ਪੈ ਸਕਦਾ ਹੈ। ਖੇਤੀਬਾੜੀ ਵਿਭਾਗ ਦੇ ਡਿਪਟੀ ਡਾਇਰੈਕਟਰ ਡਾ. ਵਜ਼ੀਰ ਸਿੰਘ ਨੇ ਕਿਹਾ, “ਅਸੀਂ ਜ਼ਿਲ੍ਹੇ ਭਰ ਦੀ ਸਥਿਤੀ ਦਾ ਜਾਇਜ਼ਾ ਲੈ ਰਹੇ ਹਾਂ। ਕਿਸਾਨਾਂ ਨੂੰ ਸਲਾਹ ਦਿੱਤੀ ਜਾਂਦੀ ਹੈ ਕਿ ਉਹ ਆਪਣੇ ਖੇਤਾਂ ਵਿੱਚ ਪਾਣੀ ਖੜ੍ਹਾ ਨਾ ਹੋਣ ਦੇਣ। ਬੀਕੇਯੂ (ਸਰ ਛੋਟੂ ਰਾਮ) ਦੇ ਬੁਲਾਰੇ ਬਹਾਦਰ ਸਿੰਘ ਮਹਿਲਾ ਨੇ ਸਰਕਾਰ ਨੂੰ ਨੁਕਸਾਨ ਦਾ ਮੁਲਾਂਕਣ ਕਰਨ ਅਤੇ ਮੁਆਵਜ਼ਾ ਦੇਣ ਲਈ ਸਰਵੇਖਣ ਕਰਨ ਦੀ ਅਪੀਲ ਕੀਤੀ ਹੈ।