ਦਲਬਦਲੂਆਂ ਦੀ ਸ਼ਾਮਤ
ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨਾਲ ਨਾਸ਼ਤਾ ਕਰਨ ਵਾਲੇ ਤ੍ਰਿਣਮੂਲ ਕਾਂਗਰਸ ਦੇ ਭਾਜਪਾ-ਸਮਰਥਤ ਬਾਗੀ ਧੜਿਆਂ ਦੇ ਆਗੂਆਂ ਨੂੰ ਜ਼ਮੀਨੀ ਪੱਧਰ ‘ਤੇ ਲੋਕਾਂ ਦੇ ਗੁੱਸੇ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਕੂਚ ਬਿਹਾਰ ਦੇ ਸੰਸਦ ਮੈਂਬਰ ਜਗਦੀਸ਼ ਚੰਦਰ ਬਰਮਾ ਬਾਸੁਨੀਆ ਲਈ ਮੋਦੀ ਨਾਲ ਨਾਸ਼ਤਾ ਕਰਨ ਤੋਂ ਬਾਅਦ ਲੰਘੇ ਸੋਮਵਾਰ ਦੀ ਰਾਤ ਆਪਣੇ ਹਲਕੇ ਵਿੱਚ ਇੱਕ ਸ਼ਾਨਦਾਰ ਵਾਪਸੀ ਥੋੜ੍ਹ-ਚਿਰੀ ਸਾਬਤ ਹੋਈ। ਐੱਨ ਡੀ ਏ-ਸੰਬੰਧਤ ਐੱਨ ਸੀ ਪੀ ਆਈ ਨਾਲ ਆਪਣੇ ਵਿਵਾਦਪੂਰਨ ਗੱਠਜੋੜ ਤੋਂ ਬਾਅਦ ਰਾਸ਼ਟਰੀ ਰਾਜਧਾਨੀ ਤੋਂ ਹਫਤਿਆਂ ਬਾਅਦ ਸੀਤਾਈ ਬਾਜ਼ਾਰ ਵਾਪਸ ਆਉਣ ‘ਤੇ, ਬਾਸੁਨੀਆ ਅਤੇ ਉਸ ਦੀ ਪਤਨੀ (ਸੀਤਾਈ ਦੀ ਵਿਧਾਇਕ) ਸੰਗੀਤਾ ਰਾਏ ਨੇ ਦੇਖਿਆ ਕਿ ਲੋਕ ਗੁੱਸੇ ਵਿੱਚ ਹਨ। ਜੋੜੇ ਦੇ ਪੁਲਸ ਸੁਰੱਖਿਆ ਹੇਠ ਪਹੁੰਚਣ ਦੇ ਕੁਝ ਘੰਟਿਆਂ ਦੇ ਅੰਦਰ ਲੋਕ ਵੱਡੀ ਗਿਣਤੀ ਵਿੱਚ ਇਕੱਠੇ ਹੋ ਗਏ ਅਤੇ ਨਾਅਰੇਬਾਜ਼ੀ ਕਰ ਦਿੱਤੀ। ਨਤੀਜੇ ਵਜੋਂ ਜੋੜੇ ਨੂੰ ਹਨੇਰੇ ਦੀ ਆੜ ਵਿੱਚ ਕੂਚ ਬਿਹਾਰ ਕਸਬੇ ਵਿੱਚ ਆਪਣੇ ਸੁਰੱਖਿਅਤ ਘਰ ਵਿੱਚ ਵਾਪਸ ਜਾਣ ਲਈ ਮਜਬੂਰ ਕਰ ਦਿੱਤਾ, ਜਦੋਂ ਕਿ ਜੋੜੇ ਨੇ ਕੋਈ ਟਿੱਪਣੀ ਕਰਨ ਤੋਂ ਇਨਕਾਰ ਕਰ ਦਿੱਤਾ। ਇੱਕ ਪ੍ਰਦਰਸ਼ਨਕਾਰੀ ਨੇ ਕਿਹਾ, ”ਇਹ ਉਨ੍ਹਾਂ ਦੇ ਵਿਸ਼ਵਾਸਘਾਤ ‘ਤੇ ਗੁੱਸੇ ਦਾ ਪ੍ਰਗਟਾਵਾ ਸੀ। ਜੇ ਉਹ ਮੁੜ ਸੀਤਾਈ ਵਾਪਸ ਆਉਂਦੇ ਹਨ ਤਾਂ ਉਨ੍ਹਾਂ ਨੂੰ ਹੋਰ ਵੀ ਬੁਰੀ ਹਾਲਤ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ।
ਤ੍ਰਿਣਮੂਲ ਛੱਡ ਕੇ ਭਾਜਪਾ ਦਾ ਸਾਥ ਦੇਣ ਵਾਲਿਆਂ ਖਿਲਾਫ ਜਿਸਮਾਨੀ ਵਿਰੋਧ ਤੇਜ਼ੀ ਨਾਲ ਸ਼ਹਿਰੀ ਅਤੇ ਪੇਂਡੂ ਇਲਾਕਿਆਂ ਵਿੱਚ ਫੈਲ ਰਿਹਾ ਹੈ। ਦੱਖਣੀ ਕੋਲਕਾਤਾ ਦੇ ਗਾਰਫਾ ਵਿੱਚ ਜਿਸ ਪਾਰਟੀ ਦਫਤਰ ਨੂੰ ਪਹਿਲਾਂ ਜਾਦਵਪੁਰ ਦੀ ਸੰਸਦ ਮੈਂਬਰ ਸਯਾਨੀ ਘੋਸ਼ ਵੱਲੋਂ ਵਰਤਿਆ ਜਾਂਦਾ ਸੀ, ਉੱਤੇ ਕਬਜ਼ਾ ਕਰਕੇ ਮਮਤਾ ਦੇ ਵਫਾਦਾਰਾਂ ਨੇ ਦਰਵਾਜ਼ੇ ‘ਤੇ ਭਾਰੀ ਤਾਲਾ ਜੜ ਦਿੱਤਾ। ਕੇਸ਼ਪੁਰ ਦੇ ਵਿਧਾਇਕ ਸਿਉਲੀ ਸਾਹਾ ਨੂੰ ਵੀ ਪੱਛਮੀ ਮਿਦਨਾਪੁਰ ਵਿੱਚ ਇਨਕਲਾਬੀ ਆਜ਼ਾਦੀ ਘੁਲਾਟੀਏ ਖੁਦੀਰਾਮ ਬੋਸ ਦੇ ਜੱਦੀ ਘਰ ਵਿੱਚ ਉਨ੍ਹਾ ਦੀ ਬਰਸੀ ‘ਤੇ ਸ਼ਰਧਾਂਜਲੀ ਦੇਣ ਲਈ ਜਾਂਦੇ ਸਮੇਂ ‘ਵਾਪਸ ਜਾਓ’ ਦੇ ਨਾਅਰਿਆਂ ਦਾ ਸਾਹਮਣਾ ਕਰਨਾ ਪਿਆ। ਸਾਹਾ, ਜਿਸ ਨੂੰ ਰਿਤਾਬ੍ਰਤ ਬੈਨਰਜੀ ਦੀ ਅਗਵਾਈ ਵਾਲੇ ਧੜੇ ਦਾ ਸਾਥ ਦੇਣ ਤੋਂ ਬਾਅਦ ਵਿਧਾਨ ਸਭਾ ਵਿੱਚ ਵਿਰੋਧੀ ਧਿਰ ਦਾ ਡਿਪਟੀ ਲੀਡਰ ਨਿਯੁਕਤ ਕੀਤਾ ਗਿਆ ਸੀ, ਉੱਤੇ ਸਥਾਨਕ ਔਰਤਾਂ ਨੇ ਵਿਕਾਸ ਸੰਬੰਧੀ ਅਣਗਹਿਲੀ ਅਤੇ ਤੰਗ-ਪ੍ਰੇਸ਼ਾਨ ਕਰਨ ਦਾ ਦੋਸ਼ ਲਗਾਇਆ, ਜਿਸ ਕਾਰਨ ਸਾਹਾ ਨੂੰ ਮੁੱਖ ਮੰਤਰੀ ਸੁਵੇਂਦੂ ਅਧਿਕਾਰੀ ਦੇ ਆਉਣ ਤੋਂ ਪਹਿਲਾਂ ਸਟੇਜ ਛੱਡਣ ਲਈ ਮਜਬੂਰ ਹੋਣਾ ਪਿਆ।
ਮਮਤਾ ਦੇ ਵਫਾਦਾਰਾਂ ਨੇ ਹਾਲੀ ਸ਼ਹਿਰ ਵਿਖੇ ਸਾਬਕਾ ਮੁੱਖ ਮੰਤਰੀ ਦੇ ਕਾਫਲੇ ‘ਤੇ ਹੋਏ ਹਮਲੇ ਦੇ ਖਿਲਾਫ ਵਿਧਾਨ ਸਭਾ ਕੰਪਲੈਕਸ ਵਿੱਚ ਸੋਮਵਾਰ ਤਿੱਖਾ ਵਿਰੋਧ ਪ੍ਰਦਰਸ਼ਨ ਕੀਤਾ। ਮੇਟੀਆਬੁਰੁਜ਼ ਦੇ ਵਿਧਾਇਕ ਅਬਦੁਲ ਖਾਲਿਕ ਮੁੱਲਾ, ਬਸੀਰਹਾਟ ਉੱਤਰ ਦੇ ਵਿਧਾਇਕ ਮੁਹੰਮਦ ਤੌਸੀਫ ਰਹਿਮਾਨ ਅਤੇ ਬਰੂਈਪੁਰ ਪੂਰਬ ਦੇ ਵਿਧਾਇਕ ਵਿਵਾਸ ਸਰਦਾਰ, ਜਿਨ੍ਹਾਂ ਨੇ ਆਪਣੇ ਆਪ ਨੂੰ ਪਹਿਲਾਂ ਬਾਗੀ ਰਿਤਾਬ੍ਰਤ ਦੀ ਅਗਵਾਈ ਵਾਲੇ ਬਲਾਕ ਨਾਲ ਜੋੜਿਆ ਸੀ, ਜਲੂਸ ਵਿੱਚ ਬਾਲੀਗੰਜ ਦੇ ਵਿਧਾਇਕ ਸੋਭਾਨਦੇਬ ਚੱਟੋਪਾਧਿਆਏ ਅਤੇ ਬੇਲੇਘਾਟਾ ਦੇ ਵਿਧਾਇਕ ਕੁਨਾਲ ਘੋਸ਼ ਵਰਗੀਆਂ ਹਸਤੀਆਂ ਨਾਲ ਸ਼ਾਮਲ ਹੋ ਕੇ ਆਪਣੇ-ਆਪ ਨੂੰ ਜਨਤਕ ਗੁੱਸੇ ਤੋਂ ਬਚਾਉਣ ਦੀ ਕੋਸ਼ਿਸ਼ ਕੀਤੀ। ਰਹਿਮਾਨ ਨੇ ਕਿਹਾ ਕਿ ਜਿੱਥੇ ਦੀਦੀ ਹੈ, ਉਹ ਵੀ ਉੱਥੇ ਹੈ। ਮਮਤਾ ਬੈਨਰਜੀ ਦੀ ਤਸਵੀਰ ਤੋਂ ਬਿਨਾਂ ਉਸ ਨੂੰ 500 ਵੋਟਾਂ ਵੀ ਨਹੀਂ ਮਿਲਣੀਆਂ ਸਨ। ਸਰਦਾਰ ਨੇ ਐਲਾਨ ਕੀਤਾ, ”ਸਾਡੀ ਸਰਬਉੱਚ ਲੀਡਰ ‘ਤੇ ਹਮਲਾ ਹੋਇਆ ਹੈ।
ਅਸੀਂ ਇਸ ਦਾ ਜ਼ੋਰਦਾਰ ਵਿਰੋਧ ਕਰ ਰਹੇ ਹਾਂ। ਅਸੀਂ ਮਮਤਾ ਦੇ ਚੋਣ ਨਿਸ਼ਾਨ ‘ਤੇ ਜਿੱਤੇ ਹਾਂ। ਸਾਰੇ 80 ਤ੍ਰਿਣਮੂਲ ਵਿਧਾਇਕਾਂ ਨੂੰ ਇਸ ਦਾ ਵਿਰੋਧ ਕਰਨਾ ਚਾਹੀਦਾ ਹੈ।” ਇਹ ਰੱਖਿਆਤਮਕ ਕੋਰੀਓਗ੍ਰਾਫੀ ਘੱਟਗਿਣਤੀ ਬਹੁਤਾਤ ਵਾਲੇ ਮੁਰਸ਼ਿਦਾਬਾਦ ਦੇ ਤਿੰਨ ਸੰਸਦ ਮੈਂਬਰਾਂ ਨੂੰ ਵੀ ਦਰਪੇਸ਼ ਇੱਕ ਗੰਭੀਰ ਸੰਕਟ ਨੂੰ ਦਰਸਾਉਂਦੀ ਹੈ। ਅਬੂ ਤਾਹਿਰ ਖਾਨ, ਖਲੀਲੁਰ ਰਹਿਮਾਨ ਅਤੇ ਯੂਸਫ ਪਠਾਨ ਆਪਣੀ ਸਿਆਸੀ ਜ਼ਮੀਨ ਬਚਾਉਣ ਲਈ ਜੱਦੋਜਹਿਦ ਕਰ ਰਹੇ ਹਨ। ਸਥਾਨਕ ਪ੍ਰਤੀਕਿਰਿਆ ਦੀ ਇੱਕ ਲਹਿਰ ਨੂੰ ਰੋਕਣ ਦੀ ਕੋਸ਼ਿਸ਼ ਵਿੱਚ ਇਨ੍ਹਾਂ ਤਿੰਨਾਂ ਨੇ ਵਿਵਾਦਪੂਰਨ ਬੰਗਾਲ ਐੱਸ ਆਈ ਆਰ ਅਤੇ ਮਸਜਿਦਾਂ ਤੋਂ ਮਾਈਕ੍ਰੋਫ਼ੋਨ ਹਟਾਉਣ ਦੇ ਆਲੇ-ਦੁਆਲੇ ਜਨਤਕ ਚਿੰਤਾ ਨੂੰ ਹਥਿਆਰ ਬਣਾਉਣ ਦੀ ਕੋਸ਼ਿਸ਼ ਕੀਤੀ ਤਾਂ ਜੋ ਆਪਣੇ-ਆਪ ਨੂੰ ਘੱਟਗਿਣਤੀ ਅਧਿਕਾਰਾਂ ਦੇ ਰਾਖਿਆਂ ਵਜੋਂ ਦੁਬਾਰਾ ਪੇਸ਼ ਕੀਤਾ ਜਾ ਸਕੇ। ਫਿਰ ਵੀ ਸਥਾਨਕ ਲੋਕਾਂ ਨੇ ਇਸ ਪਹੁੰਚ ਨੂੰ ਦਹਿਸ਼ਤ-ਸੰਚਾਲਤ ਬਚਾਅ ਰਣਨੀਤੀਆਂ ਵਜੋਂ ਖਾਰਜ ਕਰ ਦਿੱਤਾ। ਤ੍ਰਿਣਮੂਲ ਕਾਂਗਰਸ ਦੀ ਟਿਕਟ ‘ਤੇ ਜਿੱਤ ਕੇ ਮਮਤਾ ਦਾ ਸਾਥ ਛੱਡਣ ਵਾਲਿਆਂ ਤੋਂ ਲੋਕ ਹਿਸਾਬ ਮੰਗਣ ਲੱਗ ਪਏ ਹਨ ਅਤੇ ਕੁਝ ਦਿਨਾਂ ਤੱਕ ਅਜਿਹੀਆਂ ਖਬਰਾਂ ਵੀ ਆ ਸਕਦੀਆਂ ਹਨ ਕਿ ਫਲਾਂ ਥਾਂ ਫਲਾਂ ਦਲਬਦਲੂ ‘ਤੇ ਲੋਕਾਂ ਨੇ ਪੱਥਰ ਤੇ ਅੰਡੇ ਵਰ੍ਹਾਏ।
Share this content:
Post Comment