ਛਿੜੀ ਹੈ ਜੰਗ: ਹੁਣ ਤੇਲ ਦੇਖੋ-ਤੇਲ ਦੀ ਮਾਰ ਵੇਖੋ

*ਤੇਲ ਦੀਆਂ ਕੀਮਤਾਂ ’ਚ ਛੋਟ ਮਗਰੋਂ ਨਿਊਜ਼ੀਲੈਂਡ ਦੇ ਕਈ ਪੈਟਰੋਲ ਪੰਪ ਹੋਏ ਖਾਲੀ, ਲੋਕਾਂ ’ਚ ਭਾਜੜ ਵਾਲਾ ਮਾਹੌਲ
*ਸਮੁੰਦਰੀ ਰਸਤੇ ਰਾਹੀਂ ਹੋਰ 25.2 ਦਿਨਾਂ ਦਾ ਸਟਾਕ ਆ ਰਿਹਾ ਹੈ।
ਔਕਲੈਂਡ, 13 ਮਾਰਚ, 2026 (ਹਰਜਿੰਦਰ ਸਿੰਘ ਬਸਿਆਲਾ) – ਨਿਊਜ਼ੀਲੈਂਡ ਵਿੱਚ ‘ਗੱਲ’ (Gull) ਪੈਟਰੋਲ ਪੰਪਾਂ ਵੱਲੋਂ ਦਿੱਤੀ ਗਈ ਵਿਸ਼ੇਸ਼ ਛੋਟ ਕਾਰਨ ਤੇਲ ਭਰਵਾਉਣ ਵਾਲਿਆਂ ਦੀਆਂ ਲੰਬੀਆਂ ਕਤਾਰਾਂ ਲੱਗ ਗਈਆਂ, ਜਿਸ ਕਾਰਨ ਕਈ ਸਟੇਸ਼ਨਾਂ ’ਤੇ ਤੇਲ ਪੂਰੀ ਤਰ੍ਹਾਂ ਖਤਮ ਹੋ ਗਿਆ। ਮੱਧ ਪੂਰਬ ਵਿੱਚ ਚੱਲ ਰਹੇ ਤਣਾਅ ਕਾਰਨ ਤੇਲ ਦੀ ਸਪਲਾਈ ਪ੍ਰਭਾਵਿਤ ਹੋਣ ਦੇ ਡਰੋਂ ਲੋਕਾਂ ਨੇ ਵੱਡੀ ਮਾਤਰਾ ਵਿੱਚ ਤੇਲ ਖਰੀਦਣਾ ਸ਼ੁਰੂ ਕਰ ਦਿੱਤਾ ਹੈ। ਕਈ ਇਲਾਕਿਆਂ ਵਿੱਚ ਪੈਟਰੋਲ ਅਤੇ ਡੀਜ਼ਲ ਦੀ ਕਿੱਲਤ ਔਕਲੈਂਡ ਦੇ ਓਨੀਹੰਗਾ, ਹੇਂਡਰਸਨ, ਟਾਕਾਨਿਨੀ ਅਤੇ ਟਾਕਾਪੁਨਾ ਵਰਗੇ ਇਲਾਕਿਆਂ ਵਿੱਚ ਸਥਿਤ ਪੈਟਰੋਲ ਪੰਪਾਂ ’ਤੇ 95 ਅੋਕਟੇਨ ਅਤੇ ਹੋਰ ਤੇਲ ਖਤਮ ਹੋਣ ਦੀਆਂ ਖ਼ਬਰਾਂ ਹਨ। ਕੰਪਨੀ ਮੁਤਾਬਕ ਲਗਭਗ 3% ਸਟੇਸ਼ਨਾਂ ’ਤੇ ਮੰਗ ਇੰਨੀ ਜ਼ਿਆਦਾ ਸੀ ਕਿ ਸਪਲਾਈ ਘੱਟ ਪੈ ਗਈ। ਪਾਮਰਸਟਨ ਨੌਰਥ ਵਿੱਚ ਵੀ ਕੁਝ ਸੁਪਰਮਾਰਕੀਟ ਪੰਪਾਂ ’ਤੇ ਤੇਲ ਦੀ ਭਾਰੀ ਮੰਗ ਦੇਖੀ ਗਈ।

ਕੀ ਦੇਸ਼ ਵਿੱਚ ਤੇਲ ਦੀ ਕਮੀ ਹੈ?

ਸਰਕਾਰੀ ਅੰਕੜਿਆਂ ਮੁਤਾਬਕ ਫਿਲਹਾਲ ਦੇਸ਼ ਵਿੱਚ ਘਬਰਾਉਣ ਦੀ ਲੋੜ ਨਹੀਂ ਹੈ। ਵਣਜ ਅਤੇ ਰੁਜ਼ਗਾਰ ਮੰਤਰਾਲੇ ਅਨੁਸਾਰ:

W ਦੇਸ਼ ਦੇ ਅੰਦਰ 32.8 ਦਿਨਾਂ ਦਾ ਪੈਟਰੋਲ ਸਟਾਕ ਮੌਜੂਦ ਹੈ।
W ਸਮੁੰਦਰੀ ਰਸਤੇ ਰਾਹੀਂ ਹੋਰ 25.2 ਦਿਨਾਂ ਦਾ ਸਟਾਕ ਆ ਰਿਹਾ ਹੈ।
W ਜ਼ਿਆਦਾਤਰ ਤੇਲ ਕੰਪਨੀਆਂ ਨੇ ਕਿਹਾ ਹੈ ਕਿ ਸਪਲਾਈ ਚੇਨ ਵਿੱਚ ਕੋਈ ਵੱਡੀ ਰੁਕਾਵਟ ਨਹੀਂ ਹੈ।
ਮਾਹਰਾਂ ਦੀ ਚੇਤਾਵਨੀ: ‘ਪੈਨਿਕ ਬਾਇੰਗ’ (ਡਰ ਕੇ ਖਰੀਦਦਾਰੀ) ਪਾ ਰਹੀ ਹੈ ਦਬਾਅ
ਏਏ ਦੇ ਬੁਲਾਰੇ ਟੈਰੀ ਕੋਲਿਨਜ਼ ਨੇ ਕਿਹਾ ਕਿ ਜਦੋਂ ਲੋਕ ਡਰ ਕੇ ਜ਼ਰੂਰਤ ਤੋਂ ਜ਼ਿਆਦਾ ਤੇਲ ਖਰੀਦਦੇ ਹਨ, ਤਾਂ ਸਿਸਟਮ ’ਤੇ ਬੇਲੋੜਾ ਦਬਾਅ ਪੈਂਦਾ ਹੈ। ਇਸ ਨਾਲ ਉਨ੍ਹਾਂ ਪੰਪਾਂ ’ਤੇ ਤੇਲ ਜਲਦੀ ਖਤਮ ਹੋ ਜਾਂਦਾ ਹੈ ਜਿੱਥੇ ਅਗਲੀ ਡਿਲੀਵਰੀ ਆਉਣ ਵਿੱਚ ਅਜੇ ਸਮਾਂ ਹੁੰਦਾ ਹੈ।

ਘਰਾਂ ਵਿੱਚ ਤੇਲ ਜਮ੍ਹਾਂ ਕਰਨ ਦਾ ਖਤਰਾ-ਇੰਸ਼ੋਰੈਂਸ ਭਰਪਾਈ ਤੋਂ ਹੋ ਸਕਦਾ ਇਨਕਾਰ

ਬੀਮਾ ਮਾਹਰਾਂ ਨੇ ਚੇਤਾਵਨੀ ਦਿੱਤੀ ਹੈ ਕਿ ਜੇਕਰ ਕੋਈ ਵਿਅਕਤੀ ਘਰ ਵਿੱਚ ਵੱਡੀ ਮਾਤਰਾ ਵਿੱਚ ਪੈਟਰੋਲ ਜਮ੍ਹਾਂ ਕਰਦਾ ਹੈ, ਤਾਂ ਇਹ ਅੱਗ ਲੱਗਣ ਦਾ ਵੱਡਾ ਖਤਰਾ ਬਣ ਸਕਦਾ ਹੈ। ਅਜਿਹੀ ਸਥਿਤੀ ਵਿੱਚ, ਬੀਮਾ ਕੰਪਨੀਆਂ ਨੁਕਸਾਨ ਦੀ ਭਰਪਾਈ ਕਰਨ ਤੋਂ ਇਨਕਾਰ ਵੀ ਕਰ ਸਕਦੀਆਂ ਹਨ।