ਚੋਣ ਜਿੱਤਣ ਮਗਰੋਂ ਬ੍ਰਾਜ਼ੀਲ ਦੇ ਰਾਸ਼ਟਰਪਤੀ ਲੂਲਾ ਦਾ ਸਿਲਵਾ ਨੇ ਟਰੰਪ ‘ਤੇ ਕਸਿਆ ਤਨਜ਼, ਕਿਹਾ ਬ੍ਰਾਜ਼ੀਲ ਕਿਸੇ ’ਤੇ ਨਿਰਭਰ ਨਹੀਂ

ਬ੍ਰਾਸੀਲੀਆ, 26 ਅਕਤੂਬਰ – ਬ੍ਰਾਜ਼ੀਲ ਦੇ ਰਾਸ਼ਟਰਪਤੀ ਲੁਈਜ਼ ਇਨਾਸਿਓ ਲੂਲਾ ਦਾ ਸਿਲਵਾ ਨੇ ਐਤਵਾਰ ਨੂੰ ਰਨਆਫ਼ ਚੋਣ ਵਿੱਚ ਕੰਜ਼ਰਵੇਟਿਵ ਵਿਰੋਧੀ ਫਲੇਵਿਓ ਬੋਲਸੋਨਾਰੋ ਨੂੰ ਹਰਾ ਕੇ ਚੌਥੀ ਵਾਰ ਰਾਸ਼ਟਰਪਤੀ ਦਾ ਅਹੁਦਾ ਜਿੱਤਿਆ। ਚੋਣ ਅਥਾਰਟੀ ਨੇ ਉਨ੍ਹਾਂ ਦੀ ਜਿੱਤ ਦੀ ਪੁਸ਼ਟੀ ਕੀਤੀ ਅਤੇ ਲਾਤੀਨੀ ਅਮਰੀਕਾ ਦੀ ਸਭ ਤੋਂ ਵੱਡੀ ਅਰਥਵਿਵਸਥਾ ਵਿੱਚ ਖੱਬੇ ਪੱਖੀ ਲੀਡਰਸ਼ਿਪ ਨੂੰ ਅੱਗੇ ਵਧਾਇਆ।

ਦੁਬਾਰਾ ਚੁਣੇ ਜਾਣ ਤੋਂ ਬਾਅਦ ਸਾਓ ਪਾਓਲੋ ਵਿੱਚ ਸੰਬੋਧਨ ਦੌਰਾਨ ਲੂਲਾ ਨੇ ਕਿਹਾ, “ਬ੍ਰਾਜ਼ੀਲ ਕਿਸੇ ਦਾ BackYard (ਪਿਛਲਾ ਵਿਹੜਾ) ਨਹੀਂ ਹੈ।” ਉਨ੍ਹਾਂ ਦੇ ਇਸ ਬਿਆਨ ਨੂੰ ਖੇਤਰ ਵਿੱਚ ਅਮਰੀਕਾ ਦੇ ਪ੍ਰਭਾਵ ’ਤੇ ਤਨਜ਼ ਵਜੋਂ ਦੇਖਿਆ ਜਾ ਰਿਹਾ ਹੈ। ਲੂਲਾ ਨੇ ਫਲੇਵਿਓ ਬੋਲਸੋਨਾਰੋ ਨੂੰ ਹਰਾਇਆ, ਜਿਨ੍ਹਾਂ ਨੇ ਟਰੰਪ ਪ੍ਰਸ਼ਾਸਨ ਨਾਲ ਨੇੜਲੇ ਸਬੰਧ ਬਣਾਉਣ ਦੀ ਵਕਾਲਤ ਕੀਤੀ ਸੀ। ਫਲੇਵਿਓ ਨੇ ਦਾਅਵਾ ਕੀਤਾ ਸੀ ਕਿ ਉਨ੍ਹਾਂ ਦੇ ਯਤਨਾਂ ਰਾਹੀਂ ਬ੍ਰਾਜ਼ੀਲ ਨੇ ਵਿਦੇਸ਼ੀ ਦਖ਼ਲਅੰਦਾਜ਼ੀ ਨੂੰ ਹਰਾਇਆ ਹੈ। ਲੂਲਾ ਨੇ ਕਿਹਾ ਕਿ ਡਿਜੀਟਲ ਪਲੇਟਫਾਰਮਾਂ ਨੂੰ ਨਿਯਮਾਂ ਦੇ ਦਾਇਰੇ ਵਿੱਚ ਲਿਆਉਣ ਦੀ ਲੋੜ ਹੈ। ਉਨ੍ਹਾਂ ਇਹ ਵੀ ਕਿਹਾ ਕਿ ਚੋਣ ਮੁਹਿੰਮ ਦੌਰਾਨ ਡਿਜੀਟਲ ਪਲੇਟਫਾਰਮਾਂ ਰਾਹੀਂ ਹੋਣ ਵਾਲੇ ਵਿਦੇਸ਼ੀ ਦਖ਼ਲ ਦਾ ਮੁਕਾਬਲਾ ਕਰਨ ਵਿੱਚ ਸਫ਼ਲਤਾ ਮਿਲੀ ਹੈ।

ਲੂਲਾ ਦੀ ਜਿੱਤ ਨੂੰ ਟਰੰਪ ਲਈ ਝਟਕੇ ਵਜੋਂ ਦੇਖਿਆ ਜਾ ਰਿਹਾ ਹੈ

ਨਿਊਜ਼ ਏਜੰਸੀ ਰਾਇਟਰਜ਼ ਦੀ ਲਾਈਵ ਚੋਣ ਕਵਰੇਜ ਅਨੁਸਾਰ, 78 ਫ਼ੀਸਦੀ ਤੋਂ ਵੱਧ ਵੋਟਾਂ ਦੀ ਗਿਣਤੀ ਹੋਣ ਮਗਰੋਂ ਲੂਲਾ 51.21 ਫ਼ੀਸਦੀ ਵੋਟਾਂ ਨਾਲ ਅੱਗੇ ਸਨ, ਜਦਕਿ ਬੋਲਸੋਨਾਰੋ ਨੂੰ 48.79 ਫ਼ੀਸਦੀ ਵੋਟਾਂ ਮਿਲੀਆਂ ਸਨ। ਚੋਣ ਅਥਾਰਟੀ ਵੱਲੋਂ ਲੂਲਾ ਦੀ ਜਿੱਤ ਦੀ ਪੁਸ਼ਟੀ ਕਰਨ ਤੋਂ ਪਹਿਲਾਂ ਹੀ ਪੋਲਸਟਰ ਡਾਟਾਫੋਲ੍ਹਾ ਨੇ ਉਨ੍ਹਾਂ ਦੀ ਜਿੱਤ ਦਾ ਅਨੁਮਾਨ ਲਾ ਲਿਆ ਸੀ। ਇਸ ਦੌਰਾਨ ਫਲੇਵਿਓ ਬੋਲਸੋਨਾਰੋ ਨੇ ਚੋਣ ਨਤੀਜਿਆਂ ਨੂੰ ਰੱਦ ਕਰਨ ਦੀ ਮੰਗ ਕੀਤੀ। ਇਸ ਜਿੱਤ ਨੂੰ ਲਾਤੀਨੀ ਅਮਰੀਕਾ ਵਿੱਚ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਸਹਿਯੋਗੀਆਂ ਲਈ ਝਟਕੇ ਵਜੋਂ ਦੇਖਿਆ ਜਾ ਰਿਹਾ ਹੈ।

ਕੌਣ ਹਨ ਫਲੇਵਿਓ ਬੋਲਸੋਨਾਰੋ?

ਫਲੇਵਿਓ ਬੋਲਸੋਨਾਰੋ ਸੈਨੇਟਰ ਹਨ ਅਤੇ ਜੇਲ੍ਹ ਵਿੱਚ ਬੰਦ ਸਾਬਕਾ ਰਾਸ਼ਟਰਪਤੀ ਜੇਅਰ ਬੋਲਸੋਨਾਰੋ ਦੇ ਪੁੱਤਰ ਹਨ। ਉਨ੍ਹਾਂ ਨੇ ਵਾਸ਼ਿੰਗਟਨ ਨਾਲ ਸਬੰਧ ਮਜ਼ਬੂਤ ਕਰਨ ਅਤੇ ਟਰੰਪ ਪ੍ਰਸ਼ਾਸਨ ਨਾਲ ਬਿਹਤਰ ਵਪਾਰਕ ਸਮਝੌਤਾ ਕਰਨ ਦੇ ਵਾਅਦੇ ਨਾਲ ਚੋਣ ਮੁਹਿੰਮ ਚਲਾਈ ਸੀ। ਲੂਲਾ ਇਸ ਤੋਂ ਪਹਿਲਾਂ 2003 ਤੋਂ 2010 ਤੱਕ ਬ੍ਰਾਜ਼ੀਲ ਦੇ ਰਾਸ਼ਟਰਪਤੀ ਰਹਿ ਚੁੱਕੇ ਹਨ। ਉਨ੍ਹਾਂ ਨੇ ਬ੍ਰਾਜ਼ੀਲ ਦੇ ਨਿਰਯਾਤ ’ਤੇ ਅਮਰੀਕੀ ਟੈਰਿਫ਼ ਅਤੇ ਵਾਸ਼ਿੰਗਟਨ ਵੱਲੋਂ ਨਸ਼ਾ ਤਸਕਰੀ ਕਰਨ ਵਾਲੇ ਗਰੁੱਪਾਂ ਨੂੰ ਵਿਦੇਸ਼ੀ ਅੱਤਵਾਦੀ ਸੰਗਠਨ ਐਲਾਨਣ ਦੇ ਕਦਮ ਦੀ ਆਲੋਚਨਾ ਕੀਤੀ ਸੀ।

ਲੂਲਾ ਨੇ ਵਿਆਪਕ ਜਨ ਭਾਗੀਦਾਰੀ ਦਾ ਦਿੱਤਾ ਸੱਦਾ

ਲੂਲਾ ਨੇ ਆਪਣੇ ਸੰਬੋਧਨ ਵਿੱਚ ਸਿਆਸੀ ਮਤਭੇਦਾਂ ਦੇ ਬਾਵਜੂਦ ਕੰਜ਼ਰਵੇਟਿਵ ਪਾਰਟੀ ਦੀ ਅਗਵਾਈ ਵਾਲੀ ਕਾਂਗਰਸ ਨਾਲ ਮਿਲ ਕੇ ਕੰਮ ਕਰਨ ਦਾ ਵਾਅਦਾ ਕੀਤਾ। ਉਨ੍ਹਾਂ ਕਿਹਾ ਕਿ ਉਹ ਪੂਰੇ ਦੇਸ਼ ਲਈ ਸਰਕਾਰ ਚਲਾਉਣਗੇ। ਉਨ੍ਹਾਂ ਕਿਹਾ, “ਮੈਂ 21.5 ਕਰੋੜ ਬ੍ਰਾਜ਼ੀਲੀ ਲੋਕਾਂ ਲਈ ਸ਼ਾਸਨ ਕਰਾਂਗਾ। ਹੁਣ ਸਾਡਾ ਕੋਈ ਚੋਣ ਵਿਰੋਧੀ ਨਹੀਂ ਹੈ। ਸਖ਼ਤ ਮੁਕਾਬਲੇ ਵਾਲੀ ਚੋਣ ਮੁਹਿੰਮ ਤੋਂ ਬਾਅਦ ਲੂਲਾ ਨੇ ਸਿਆਸੀ ਸੁਲ੍ਹਾ ਦਾ ਰਾਹ ਅਪਣਾਉਣ ਦੀ ਕੋਸ਼ਿਸ਼ ਕੀਤੀ। ਇਸ ਮੁਹਿੰਮ ਨੇ ਦੇਸ਼ ਵਿੱਚ ਸਿਆਸੀ ਮਤਭੇਦਾਂ ਨੂੰ ਹੋਰ ਡੂੰਘਾ ਕੀਤਾ ਸੀ। ਉਨ੍ਹਾਂ ਨੇ ਦੇਸ਼ ਦੇ ਸ਼ਾਸਨ ਦੇ ਤਰੀਕੇ ਵਿੱਚ ਬਦਲਾਅ ਅਤੇ ਨੀਤੀਆਂ ਬਣਾਉਣ ਦੀ ਪ੍ਰਕਿਰਿਆ ਵਿੱਚ ਲੋਕਾਂ ਦੀ ਵਧੇਰੇ ਭਾਗੀਦਾਰੀ ਦਾ ਵੀ ਵਾਅਦਾ ਕੀਤਾ। ਲੂਲਾ ਨੇ ਕਿਹਾ, “ਅਸੀਂ ਦੇਸ਼ ਚਲਾਉਣ ਦਾ ਤਰੀਕਾ ਬਦਲਾਂਗੇ ਅਤੇ ਲੋਕਾਂ ਨੂੰ ਫ਼ੈਸਲੇ ਲੈਣ ਦੀ ਪ੍ਰਕਿਰਿਆ ਵਿੱਚ ਵਧੇਰੇ ਹਿੱਸਾ ਲੈਣ ਲਈ ਤਿਆਰ ਕਰਾਂਗੇ। ਉਨ੍ਹਾਂ ਮੁਤਾਬਕ, ਚੋਣ ਮੁਹਿੰਮ ਦੌਰਾਨ ਵੋਟਰਾਂ ਨੂੰ ਇਹ ਸਮਝਾਉਣ ਵਿੱਚ ਸਫ਼ਲਤਾ ਮਿਲੀ ਕਿ ਬ੍ਰਾਜ਼ੀਲ ਦੀਆਂ ਲੋਕਤੰਤਰੀ ਸੰਸਥਾਵਾਂ ਦੀ ਰੱਖਿਆ ਲਈ ਵੋਟ ਪਾਉਣਾ ਜ਼ਰੂਰੀ ਹੈ।

ਗ਼ਰੀਬੀ ਘਟਾਉਣ ਦੇ ਰਿਕਾਰਡ ਨੂੰ ਮਿਲਿਆ ਸਮਰਥਨ

ਇਹ ਰਨਆਫ਼ ਚੋਣ ਦੋ ਸਿਆਸੀ ਧਿਰਾਂ ਵਿਚਾਲੇ ਮੁੜ ਮੁਕਾਬਲਾ ਸੀ, ਜਿਨ੍ਹਾਂ ਨੇ ਹਾਲ ਹੀ ਦੇ ਸਾਲਾਂ ਵਿੱਚ ਬ੍ਰਾਜ਼ੀਲ ਦੀ ਸਿਆਸਤ ਨੂੰ ਵੰਡਿਆ ਹੈ। ਪਿਛਲੀਆਂ ਰਾਸ਼ਟਰਪਤੀ ਚੋਣਾਂ ਵਿੱਚ ਲੂਲਾ ਨੇ ਜੇਅਰ ਬੋਲਸੋਨਾਰੋ ਨੂੰ 1985 ਵਿੱਚ ਦੇਸ਼ ਵਿੱਚ ਲੋਕਤੰਤਰ ਦੀ ਵਾਪਸੀ ਤੋਂ ਬਾਅਦ ਸਭ ਤੋਂ ਘੱਟ ਫ਼ਰਕ ਨਾਲ ਹਰਾਇਆ ਸੀ। ਇਸ ਮਹੀਨੇ ਦੇ ਸ਼ੁਰੂ ਵਿੱਚ ਹੋਏ ਪਹਿਲੇ ਗੇੜ ਵਿੱਚ ਫਲੇਵਿਓ ਬੋਲਸੋਨਾਰੋ ਲੂਲਾ ਤੋਂ 22 ਲੱਖ ਤੋਂ ਵੱਧ ਵੋਟਾਂ ਨਾਲ ਅੱਗੇ ਸਨ, ਜਿਸ ਕਾਰਨ ਦੂਜੇ ਗੇੜ ਵਿੱਚ ਸਖ਼ਤ ਮੁਕਾਬਲੇ ਦੀ ਸੰਭਾਵਨਾ ਬਣੀ। ਲੂਲਾ ਦੇ ਸਮਰਥਕਾਂ ਨੇ ਗ਼ਰੀਬੀ ਘਟਾਉਣ ਅਤੇ ਪਛੜੇ ਭਾਈਚਾਰਿਆਂ ਦੀ ਮਦਦ ਕਰਨ ਦੇ ਉਨ੍ਹਾਂ ਦੇ ਰਿਕਾਰਡ ਕਾਰਨ ਉਨ੍ਹਾਂ ਦਾ ਸਮਰਥਨ ਕੀਤਾ। ਦੂਜੇ ਪਾਸੇ, ਬੋਲਸੋਨਾਰੋ ਦੇ ਸਮਰਥਕਾਂ ਨੇ ਵਧਦੀਆਂ ਕੀਮਤਾਂ ਅਤੇ ਟੈਕਸਾਂ ਦਾ ਮੁੱਦਾ ਚੁੱਕਿਆ ਅਤੇ ਲੂਲਾ ਦੇ ਸਿਆਸੀ ਧੜੇ ’ਤੇ ਭ੍ਰਿਸ਼ਟਾਚਾਰ ਦੇ ਦੋਸ਼ ਲਾਏ।

ਟਰੰਪ ਪ੍ਰਸ਼ਾਸਨ ਨਾਲ ਸਬੰਧਾਂ ’ਤੇ ਪੈ ਸਕਦਾ ਹੈ ਅਸਰ

ਚੋਣ ਮੁਹਿੰਮ ਦੌਰਾਨ ਬ੍ਰਾਜ਼ੀਲ ਪ੍ਰਤੀ ਅਮਰੀਕਾ ਦੀ ਨੀਤੀ ਇੱਕ ਅਹਿਮ ਮੁੱਦਾ ਬਣ ਕੇ ਉੱਭਰੀ। ਲੂਲਾ ਨੇ ਟਰੰਪ ਦੇ ਵਪਾਰਕ ਕਦਮਾਂ ਅਤੇ ਸੰਗਠਿਤ ਅਪਰਾਧ ਨਾਲ ਨਜਿੱਠਣ ਦੇ ਤਰੀਕੇ ਦੀ ਆਲੋਚਨਾ ਕੀਤੀ। ਫਲੇਵਿਓ ਬੋਲਸੋਨਾਰੋ ਨੇ ਵ੍ਹਾਈਟ ਹਾਊਸ ਨਾਲ ਆਪਣੇ ਸਬੰਧਾਂ ’ਤੇ ਜ਼ੋਰ ਦਿੱਤਾ ਅਤੇ ਕਿਹਾ ਕਿ ਬ੍ਰਾਜ਼ੀਲ ਨੂੰ ਟਰੰਪ ਪ੍ਰਸ਼ਾਸਨ ਨਾਲ ਬਿਹਤਰ ਸਮਝੌਤੇ ਦੀ ਲੋੜ ਹੈ। ਇਸ ਵਿੱਚ ਦੁਰਲੱਭ ਧਰਤੀ ਦੇ ਖਣਿਜਾਂ ਦਾ ਖੇਤਰ ਵੀ ਸ਼ਾਮਲ ਹੈ। ਬ੍ਰਾਜ਼ੀਲ ਦਾ ਅਨੁਮਾਨ ਹੈ ਕਿ ਦੇਸ਼ ਵਿੱਚ ਦੁਰਲੱਭ ਧਰਤੀ ਦੇ ਖਣਿਜਾਂ ਦੇ ਭੰਡਾਰ 2.1 ਕਰੋੜ ਟਨ ਤੱਕ ਹੋ ਸਕਦੇ ਹਨ, ਜੋ ਚੀਨ ਤੋਂ ਬਾਅਦ ਦੁਨੀਆ ਵਿੱਚ ਦੂਜੇ ਸਥਾਨ ’ਤੇ ਹਨ। ਬੋਲਸੋਨਾਰੋ ਨੇ ਅਮਰੀਕੀ ਸਰਕਾਰ ਤੋਂ ਮਦਦ ਮਿਲਣ ਦੀ ਗੱਲ ਤੋਂ ਇਨਕਾਰ ਕੀਤਾ।