‘ਇੱਕ ਯੁੱਗ ਦਾ ਅੰਤ’, ਵੈਸਟਇੰਡੀਜ਼ ਦੇ ਮਹਾਨ ਆਲਰਾਊਂਡਰ ਗਾਰਫੀਲਡ ਸੋਬਰਸ ਦਾ ਹੋਇਆ ਦਿਹਾਂਤ
ਨਵੀਂ ਦਿੱਲੀ, 18 ਜੁਲਾਈ – ਕ੍ਰਿਕਟ ਜਗਤ ਲਈ ਸ਼ੁੱਕਰਵਾਰ ਰਾਤ ਇੱਕ ਦੁਖਦਾਈ ਖ਼ਬਰ ਸਾਹਮਣੇ ਆਈ। ਵੈਸਟਇੰਡੀਜ਼ ਦੇ ਮਹਾਨ ਆਲਰਾਊਂਡਰ ਸਰ ਗਾਰਫੀਲਡ ਸੋਬਰਜ਼ ਦਾ 89 ਸਾਲ ਦੀ ਉਮਰ ਵਿੱਚ ਦੇਹਾਂਤ ਹੋ ਗਿਆ ਹੈ। ਉਨ੍ਹਾਂ ਦੇ ਦਿਹਾਂਤ ਨਾਲ ਕ੍ਰਿਕਟ ਦੇ ਇੱਕ ਸੁਨਹਿਰੇ ਯੁੱਗ ਦਾ ਅੰਤ ਹੋ ਗਿਆ ਹੈ। ਸੋਬਰਜ਼ ਨੇ ਆਪਣੇ ਸ਼ਾਨਦਾਰ ਕਰੀਅਰ ਦੌਰਾਨ 93 ਟੈਸਟ ਅਤੇ 1 ਵਨਡੇ ਮੈਚ ਖੇਡਿਆ।.
ਬੋਰਡ ਨੇ ਦਿੱਤੀ ਜਾਣਕਾਰੀ
ਵੈਸਟਇੰਡੀਜ਼ ਕ੍ਰਿਕਟ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ ਐਕਸ ‘ਤੇ ਸੋਬਰਜ਼ ਦੇ ਦੇਹਾਂਤ ਦੀ ਜਾਣਕਾਰੀ ਦਿੱਤੀ। ਬੋਰਡ ਨੇ ਲਿਖਿਆ, “ਇੱਕ ਸ਼ਾਨਦਾਰ ਪਾਰੀ ਦਾ ਅੰਤ ਹੋ ਗਿਆ। ਸਰ ਗਾਰਫੀਲਡ ਸੋਬਰਜ਼ ਹੁਣ ਅਤੇ ਹਮੇਸ਼ਾ ਸਾਡੇ ਦਿਲਾਂ ਵਿੱਚ ਰਹਿਣਗੇ।”
ਟੈਸਟ ਕ੍ਰਿਕਟ ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ
28 ਜੁਲਾਈ 1936 ਨੂੰ ਬਾਰਬਾਡੋਸ ਵਿੱਚ ਜਨਮੇ ਸਰ ਗਾਰਫੀਲਡ ਸੋਬਰਜ਼ ਨੇ ਟੈਸਟ ਕ੍ਰਿਕਟ ਦੀਆਂ 160 ਪਾਰੀਆਂ ਵਿੱਚ 57.78 ਦੀ ਔਸਤ ਨਾਲ 8032 ਦੌੜਾਂ ਬਣਾਈਆਂ। ਇਸ ਦੌਰਾਨ ਉਨ੍ਹਾਂ ਨੇ 30 ਅਰਧ ਸੈਂਕੜੇ ਅਤੇ 26 ਸੈਂਕੜੇ ਲਗਾਏ। ਟੈਸਟ ਕ੍ਰਿਕਟ ਵਿੱਚ ਉਨ੍ਹਾਂ ਦਾ ਸਭ ਤੋਂ ਵਧੀਆ ਸਕੋਰ ਨਾਬਾਦ 365 ਦੌੜਾਂ ਸੀ।
ਗੇਂਦਬਾਜ਼ੀ ਵਿੱਚ ਵੀ ਦਿਖਾਇਆ ਜਲਵਾ
ਵੈਸਟਇੰਡੀਜ਼ ਦੇ ਇਸ ਮਹਾਨ ਆਲਰਾਊਂਡਰ ਨੇ ਗੇਂਦਬਾਜ਼ੀ ਵਿੱਚ ਵੀ ਆਪਣੀ ਕਾਬਲੀਅਤ ਦਿਖਾਈ। ਉਨ੍ਹਾਂ ਨੇ 93 ਟੈਸਟ ਮੈਚਾਂ ਦੀਆਂ 159 ਪਾਰੀਆਂ ਵਿੱਚ 235 ਵਿਕਟਾਂ ਹਾਸਲ ਕੀਤੀਆਂ। ਉਨ੍ਹਾਂ ਦੀ ਗੇਂਦਬਾਜ਼ੀ ਔਸਤ 34.03 ਅਤੇ ਇਕਾਨਮੀ 2.22 ਰਹੀ। ਉਨ੍ਹਾਂ ਨੇ 6 ਵਾਰ ਪੰਜ ਵਿਕਟਾਂ ਅਤੇ 8 ਵਾਰ ਚਾਰ ਵਿਕਟਾਂ ਲੈਣ ਦਾ ਕਾਰਨਾਮਾ ਕੀਤਾ। ਇੱਕ ਮੈਚ ਵਿੱਚ ਉਨ੍ਹਾਂ ਦਾ ਸਰਵੋਤਮ ਪ੍ਰਦਰਸ਼ਨ 8/80 ਰਿਹਾ।
ਸਿਰਫ਼ ਇੱਕ ਵਨਡੇ ਮੈਚ ਖੇਡਿਆ
5 ਸਤੰਬਰ 1973 ਨੂੰ ਸੋਬਰਜ਼ ਨੇ ਆਪਣਾ ਵਨਡੇ ਡੈਬਿਊ ਕੀਤਾ। ਆਪਣੇ ਇਕਲੌਤੇ ਵਨਡੇ ਮੈਚ ਵਿੱਚ ਉਹ ਦੌੜ ਨਹੀਂ ਬਣਾ ਸਕੇ, ਪਰ ਉਨ੍ਹਾਂ ਨੇ ਇੱਕ ਵਿਕਟ ਜ਼ਰੂਰ ਹਾਸਲ ਕੀਤੀ। ਘਰੇਲੂ ਕ੍ਰਿਕਟ ਵਿੱਚ ਵੀ ਉਨ੍ਹਾਂ ਦਾ ਰਿਕਾਰਡ ਸ਼ਾਨਦਾਰ ਰਿਹਾ। ਉਨ੍ਹਾਂ ਨੇ 383 ਫਰਸਟ ਕਲਾਸ ਮੈਚਾਂ ਵਿੱਚ 28,314 ਦੌੜਾਂ ਬਣਾਈਆਂ ਅਤੇ 1043 ਵਿਕਟਾਂ ਹਾਸਲ ਕੀਤੀਆਂ।
Share this content:
Post Comment