ਅਮਰੀਕੀ ਮੱਧਕਾਲੀ ਚੋਣਾਂ ‘ਚ ਸੁਹਾਸ ਸੁਬਰਾਮਣੀਅਮ ਤੇ ਪੀਆ ਡਾਂਡੀਆ ਦੀ ਜਿੱਤ

ਵਾਸ਼ਿੰਗਟਨ, 4 ਨਵੰਬਰ – ਅਮਰੀਕਾ ਦੀਆਂ ਮੱਧਕਾਲੀ ਚੋਣਾਂ ਦੇ ਸ਼ੁਰੂਆਤੀ ਨਤੀਜੇ ਸਾਹਮਣੇ ਆ ਰਹੇ ਹਨ। ਇਨ੍ਹਾਂ ਚੋਣਾਂ ਵਿਚ ਭਾਰਤੀ ਮੂਲ ਦੇ ਡੈਮੋਕ੍ਰੇਟਿਕ ਆਗੂ ਸੁਹਾਸ ਸੁਬਰਾਮਣੀਅਮ ਅਤੇ ਅਰੁਣਾ ਮਿਲਰ ਦੀ ਜਿੱਤ ਦਾ ਅਨੁਮਾਨ ਲਗਾਇਆ ਗਿਆ ਹੈ। ਫਲੋਰੀਡਾ ਵਿਚ ਕਾਂਗਰਸ ਦੀ ਇਕ ਅਹਿਮ ਸੀਟ ‘ਤੇ ਡੈਮੋਕ੍ਰੇਟਿਕ ਪਾਰਟੀ ਦੀ ਪੀਆ ਡਾਂਡੀਆ ਨੇ ਚੋਣ ਜਿੱਤ ਲਈ ਹੈ। ਉੱਧਰ, ਓਹਾਇਓ ਵਿਚ ਗਵਰਨਰ ਦੇ ਅਹੁਦੇ ਲਈ ਹੋਈ ਚੋਣ ਵਿਚ ਰਿਪਬਲਿਕਨ ਪਾਰਟੀ ਦੇ ਵਿਵੇਕ ਰਾਮਾਸਵਾਮੀ ਪਿੱਛੇ ਰਹਿ ਗਏ ਹਨ।

ਸੁਹਾਸ ਸੁਬਰਾਮਣੀਅਮ ਦੀ ਜਿੱਤ ਤੈਅ

ਵਰਜੀਨੀਆ ਦੇ 10ਵੇਂ ਕਾਂਗਰਸਨਲ ਜ਼ਿਲ੍ਹੇ ਵਿਚ ਸੁਹਾਸ ਸੁਬਰਾਮਣੀਅਮ ਚੋਣ ਜਿੱਤ ਰਹੇ ਹਨ। ਇੱਥੇ ਡੈਮੋਕ੍ਰੇਟਿਕ ਉਮੀਦਵਾਰ ਸੁਬਰਾਮਣੀਅਮ ਨੂੰ ਲਗਪਗ 63 ਫ਼ੀਸਦੀ ਵੋਟਾਂ ਮਿਲੀਆਂ, ਜਦਕਿ ਉਨ੍ਹਾਂ ਦੇ ਰਿਪਬਲਿਕਨ ਵਿਰੋਧੀ ਡੇਵ ਬੇਕਵਿਥ ਨੂੰ 37 ਫ਼ੀਸਦੀ ਵੋਟਾਂ ਮਿਲੀਆਂ। ਹੁਣ ਤੱਕ ਅਨੁਮਾਨਿਤ ਵੋਟਾਂ ਵਿਚੋਂ ਲਗਪਗ 95 ਫ਼ੀਸਦੀ ਦੀ ਗਿਣਤੀ ਹੋ ਚੁੱਕੀ ਹੈ। ਇਸ ਜਿੱਤ ਨਾਲ ਸੁਹਾਸ ਸੁਬਰਾਮਣੀਅਮ ਨੂੰ ਦੋ ਸਾਲ ਦਾ ਦੂਜਾ ਕਾਰਜਕਾਲ ਮਿਲ ਗਿਆ ਹੈ। ਉਹ ਪਹਿਲੀ ਵਾਰ 2025 ਵਿਚ ਕਾਂਗਰਸ ਵਿਚ ਪਹੁੰਚੇ ਸਨ। ਸਾਲ 2024 ਵਿਚ ਉਹ ਵਰਜੀਨੀਆ ਤੋਂ ਕਾਂਗਰਸ ਦੇ ਪਹਿਲੇ ਭਾਰਤੀ-ਅਮਰੀਕੀ ਮੈਂਬਰ ਬਣੇ ਸਨ। ਉਨ੍ਹਾਂ ਦੇ ਵਿਰੁੱਧ ਆਜ਼ਾਦ ਉਮੀਦਵਾਰ ਅਹਿਸਨ ਮਲਿਕ ਵੀ ਚੋਣ ਮੈਦਾਨ ਵਿਚ ਸਨ।

ਅਰੁਣਾ ਮਿਲਰ ਵੀ ਜਿੱਤ ਵੱਲ

ਗੁਆਂਢੀ ਸੂਬੇ ਮੈਰੀਲੈਂਡ ਵਿਚ ਭਾਰਤੀ-ਅਮਰੀਕੀ ਲੈਫਟੀਨੈਂਟ ਗਵਰਨਰ ਅਰੁਣਾ ਮਿਲਰ ਨੂੰ ਇਕ ਹੋਰ ਕਾਰਜਕਾਲ ਮਿਲ ਸਕਦਾ ਹੈ। ਡੈਮੋਕ੍ਰੇਟਿਕ ਪਾਰਟੀ ਦੀ ਟਿਕਟ ‘ਤੇ ਮੂਰ ਨਾਲ ਚੋਣ ਲੜ ਰਹੀ ਮਿਲਰ ਨੇ ਰਿਪਬਲਿਕਨ ਲੈਫਟੀਨੈਂਟ ਗਵਰਨਰ ਉਮੀਦਵਾਰ ਰੌਬ ਕ੍ਰੋਪ ਨੂੰ ਹਰਾਇਆ। ਕ੍ਰੋਪ ਸਾਬਕਾ ਸਟੇਟ ਡੈਲੀਗੇਟ ਡੈਨ ਕੌਕਸ ਦੇ ਸਾਥੀ ਉਮੀਦਵਾਰ ਸਨ। ਮਿਲਰ ਦੇ ਮੁੜ ਚੁਣੇ ਜਾਣ ਨਾਲ ਅਮਰੀਕਾ ਦੇ ਉੱਚ ਸੂਬਾਈ ਕਾਰਜਕਾਰੀ ਅਹੁਦਿਆਂ ਵਿਚੋਂ ਇਕ ‘ਤੇ ਭਾਰਤੀ-ਅਮਰੀਕੀ ਨੁਮਾਇੰਦਗੀ ਬਰਕਰਾਰ ਰਹੇਗੀ।

ਪੀਆ ਡਾਂਡੀਆ ਨੇ ਜਿੱਤੀ ਚੋਣ

ਸ਼ੁਰੂਆਤੀ ਅੰਕੜਿਆਂ ਮੁਤਾਬਕ ਫਲੋਰੀਡਾ ਦੇ 22ਵੇਂ ਕਾਂਗਰਸਨਲ ਜ਼ਿਲ੍ਹੇ ਵਿਚ ਡੈਮੋਕ੍ਰੇਟਿਕ ਉਮੀਦਵਾਰ ਪੀਆ ਡਾਂਡੀਆ ਨੇ ਰਿਪਬਲਿਕਨ ਉਮੀਦਵਾਰ ਕੇਸੀ ਅਸਕਰ ਨੂੰ ਹਰਾ ਦਿੱਤਾ ਹੈ। ਪੀਆ ਨੂੰ 51.9 ਫ਼ੀਸਦੀ ਵੋਟਾਂ ਮਿਲੀਆਂ, ਜਦਕਿ ਅਸਕਰ ਨੂੰ 48.1 ਫ਼ੀਸਦੀ ਵੋਟਾਂ ਮਿਲੀਆਂ। ਇੱਥੇ ਅਨੁਮਾਨਿਤ ਵੋਟਾਂ ਵਿਚੋਂ ਲਗਪਗ 97.6 ਫ਼ੀਸਦੀ ਦੀ ਗਿਣਤੀ ਹੋ ਚੁੱਕੀ ਹੈ। ਇਹ ਮੁਕਾਬਲਾ ਕਾਫ਼ੀ ਸਖ਼ਤ ਰਿਹਾ ਅਤੇ ਇਸ ਨੇ ਸਭ ਦਾ ਧਿਆਨ ਖਿੱਚਿਆ, ਕਿਉਂਕਿ ਇਹ ਉਨ੍ਹਾਂ ਅਹਿਮ ਚੋਣ ਖੇਤਰਾਂ ਵਿਚੋਂ ਇਕ ਹੈ, ਜਿਨ੍ਹਾਂ ਦੇ ਨਤੀਜੇ ਪ੍ਰਤੀਨਿਧੀ ਸਭਾ (ਹਾਊਸ) ‘ਤੇ ਕੰਟਰੋਲ ਤੈਅ ਕਰਨ ਵਿਚ ਭੂਮਿਕਾ ਨਿਭਾ ਸਕਦੇ ਹਨ।

ਵਿਵੇਕ ਰਾਮਾਸਵਾਮੀ ਹਾਰੇ ਚੋਣ

ਸ਼ੁਰੂਆਤੀ ਨਤੀਜਿਆਂ ਵਿਚ ਓਹਾਇਓ ਵਿਚ ਗਵਰਨਰ ਦੇ ਅਹੁਦੇ ਲਈ ਹੋਈ ਚੋਣ ਵਿਚ ਡੈਮੋਕ੍ਰੇਟਿਕ ਉਮੀਦਵਾਰ ਐਮੀ ਐਕਟਨ ਨੇ ਭਾਰਤੀ-ਅਮਰੀਕੀ ਰਿਪਬਲਿਕਨ ਆਗੂ ਵਿਵੇਕ ਰਾਮਾਸਵਾਮੀ ਨੂੰ ਹਰਾ ਦਿੱਤਾ ਹੈ। ਇਹ ਨਤੀਜੇ ਭਾਰਤੀ-ਅਮਰੀਕੀ ਡੈਮੋਕ੍ਰੇਟਿਕ ਆਗੂਆਂ ਲਈ ਸ਼ੁਰੂਆਤੀ ਸਫ਼ਲਤਾਵਾਂ ਹਨ, ਜਦਕਿ ਕਈ ਹੋਰ ਅਹਿਮ ਸੀਟਾਂ ‘ਤੇ ਸਥਿਤੀ ਹਾਲੇ ਵੀ ਸਪੱਸ਼ਟ ਨਹੀਂ ਹੋਈ ਹੈ।