ਹੜ੍ਹ ਦੀ ਮਾਰ ਹੇਠ ਆਏ ਨੇਪਾਲ ਨੂੰ ਭਾਰਤ ਨੇ ਭੇਜੀ ਪਹਿਲੀ ਖੇਪ

ਵਿਦੇਸ਼ ਮੰਤਰਾਲੇ ਅਨੁਸਾਰ, ਇਸ ਤੋਂ ਬਾਅਦ ਪ੍ਰਧਾਨ ਮੰਤਰੀ ਦਫ਼ਤਰ, ਗ੍ਰਹਿ ਮੰਤਰਾਲੇ, ਰੱਖਿਆ ਮੰਤਰਾਲੇ ਅਤੇ ਵਿਦੇਸ਼ ਮੰਤਰਾਲੇ ਦੇ ਅਧਿਕਾਰੀਆਂ ਵਿਚਕਾਰ ਇੱਕ ਮੀਟਿੰਗ ਹੋਈ ਅਤੇ ਰਾਸ਼ਟਰੀ ਰਾਜਧਾਨੀ ਖੇਤਰ ਸਥਿਤ ਦੋ ਹਵਾਈ ਫ਼ੌਜ ਅੱਡਿਆਂ (ਪਾਲਮ ਅਤੇ ਹਿੰਡਨ) ਤੋਂ ਰਾਹਤ ਸਮੱਗਰੀ ਲਿਜਾਣ ਲਈ ਤਿਆਰ ਰਹਿਣ ਦਾ ਨਿਰਦੇਸ਼ ਦਿੱਤਾ ਗਿਆ। ਰਾਤ ਕਰੀਬ 8:35 ਵਜੇ ਗਾਜ਼ੀਆਬਾਦ ਦੇ ਹਿੰਡਨ ਏਅਰਬੇਸ ਤੋਂ ਰਾਹਤ ਸਮੱਗਰੀ ਲੈ ਕੇ ਹਵਾਈ ਫ਼ੌਜ ਦਾ ਟਰਾਂਸਪੋਰਟ ਜਹਾਜ਼ ਸੀ-130ਜੇ ਕਾਠਮੰਡੂ ਲਈ ਰਵਾਨਾ ਹੋਇਆ। ਇੱਕ ਹੋਰ ਫ਼ੌਜੀ ਟਰਾਂਸਪੋਰਟ ਜਹਾਜ਼ ਵੀਰਵਾਰ ਸਵੇਰੇ ਕਾਠਮੰਡੂ ਭੇਜਿਆ ਜਾਵੇਗਾ। ਅਗਲੇ ਕੁਝ ਦਿਨਾਂ ’ਚ ਭਾਰਤ ਕੁਝ ਹੋਰ ਰਾਹਤ ਸਮੱਗਰੀ ਭੇਜ ਸਕਦਾ ਹੈ। ਭਾਰਤੀ ਹਵਾਈ ਫ਼ੌਜ ਨੇ ਆਪਣੇ ਟਰਾਂਸਪੋਰਟ ਜਹਾਜ਼ਾਂ ਦੇ ਬੇੜੇ (ਸੀ-17, ਸੀ-130ਜੇ ਅਤੇ ਸੀ-295 ਸ਼ਾਮਲ) ਨੂੰ ਤਿਆਰ ਰੱਖਿਆ ਹੈ। ਵਿਦੇਸ਼ ਮੰਤਰੀ ਐੱਸ. ਜੈਸ਼ੰਕਰ ਨੇ ਐਕਸ ’ਤੇ ਦੱਸਿਆ ਕਿ ਭਾਰਤ ਨੇ ਮਾਨਵੀ ਸਹਾਇਤਾ ਅਤੇ ਆਫ਼ਤ ਰਾਹਤ ਦੇ ਤੌਰ ’ਤੇ ਨੇਪਾਲ ਨੂੰ 10 ਟਨ ਸਮੱਗਰੀ ਭੇਜੀ ਹੈ। ਇਸ ’ਚ ਕੰਬਲ, ਹਾਈਜੀਨ ਕਿੱਟ, ਸੋਲਰ ਲੈਂਪ ਅਤੇ ਦਵਾਈਆਂ ਸ਼ਾਮਲ ਹਨ।

ਰਸੂਵਾ ਤੋਂ ਲੰਘਦਾ ਹੈ ਕੈਲਾਸ਼ ਯਾਤਰਾ ਦਾ ਮੁੱਖ ਮਾਰਗ

ਨੇਪਾਲ ਦੇ ਰਸੂਵਾ ਜ਼ਿਲ੍ਹੇ ਦੇ ਸਿਆਫ਼ਰੂਬੇਸੀ, ਤਿਮੁਰੇ ਅਤੇ ਰਸੂਵਾਗੜ੍ਹੀ ਸਰਹੱਦੀ ਖੇਤਰ ’ਚ ਹੜ੍ਹ ਆਇਆ ਹੋਇਆ ਹੈ। ਇਸ ਖੇਤਰ ’ਚੋਂ ਹੀ ਕੈਲਾਸ਼-ਮਾਨਸਰੋਵਰ ਯਾਤਰਾ ਦਾ ਮੁੱਖ ਸੜਕੀ ਮਾਰਗ ਲੰਘਦਾ ਹੈ। ਯਾਤਰੀ ਕਾਠਮੰਡੂ ਤੋਂ ਤਿਮੁਰੇ ਹੁੰਦੇ ਹੋਏ ਨੇਪਾਲ-ਚੀਨ ਸਰਹੱਦ ’ਤੇ ਸਥਿਤ ਰਸੂਵਾਗੜ੍ਹੀ ਪਹੁੰਚਦੇ ਹਨ ਅਤੇ ਫਿਰ ਤਿੱਬਤ ਦੇ ਕੇਰੁੰਗ ਇਲਾਕੇ ਤੋਂ ਹੁੰਦੇ ਹੋਏ ਦਾਰਚੇਨ ਅਤੇ ਕੈਲਾਸ਼ ਜਾਂਦੇ ਹਨ। ਇਸ ਨੂੰ ਨੇਪਾਲ ਤੋਂ ਕੈਲਾਸ਼ ਜਾਣ ਵਾਲਾ ਸਭ ਤੋਂ ਲੋਕਪ੍ਰਿਯ ਅਤੇ ਸਭ ਤੋਂ ਛੋਟਾ ਸੜਕੀ ਮਾਰਗ ਮੰਨਿਆ ਜਾਂਦਾ ਹੈ।