ਹੁਣ ਇੰਦੌਰ ‘ਚ ਨਹੀਂ ਹੋਣਗੇ ਸਈਅਦ ਮੁਸ਼ਤਾਕ ਅਲੀ ਟਰਾਫੀ ਮੈਚ

ਇੰਦੌਰ, 6 ਦਸੰਬਰ – ਕੈਪਟਨ ਮੁਸ਼ਤਾਕ ਅਲੀ ਦੇ ਸ਼ਹਿਰ ਇੰਦੌਰ ਵਿੱਚ ਉਨ੍ਹਾਂ ਦੇ ਨਾਮ ‘ਤੇ ਹੋਣ ਵਾਲੇ ਘਰੇਲੂ ਟੀ-20 ਟੂਰਨਾਮੈਂਟ ਦੇ ਨਾਕਆਊਟ ਦੌਰ ਦੇ ਮੈਚ ਇਸ ਵਾਰ ਨਹੀਂ ਹੋਣਗੇ। ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ (BCCI) ਨੇ ਹੁਣ ਇਨ੍ਹਾਂ ਮੈਚਾਂ ਦੀ ਮੇਜ਼ਬਾਨੀ ਪੁਣੇ ਨੂੰ ਸੌਂਪ ਦਿੱਤੀ ਹੈ। ਪੁਣੇ ਵਿੱਚ ਹੀ ਮੁਕਾਬਲੇ ਦਾ ਫਾਈਨਲ ਵੀ ਹੋਵੇਗਾ। ਸੁਪਰ ਲੀਗ 12 ਦਸੰਬਰ ਤੋਂ ਸ਼ੁਰੂ ਹੋਵੇਗੀ ਅਤੇ ਫਾਈਨਲ 18 ਦਸੰਬਰ ਨੂੰ ਖੇਡਿਆ ਜਾਵੇਗਾ। ਬੀ.ਸੀ.ਸੀ.ਆਈ. ਦੇ ਸਕੱਤਰ ਦੇਵਜੀਤ ਸੈਕੀਆ ਨੇ ਸ਼ੁੱਕਰਵਾਰ ਨੂੰ ਇਸ ਦੀ ਪੁਸ਼ਟੀ ਕੀਤੀ। ਟੂਰਨਾਮੈਂਟ ਦੇ ਸਮੂਹ ਦੌਰ ਦੇ ਮੁਕਾਬਲੇ ਲਖਨਊ, ਅਹਿਮਦਾਬਾਦ, ਹੈਦਰਾਬਾਦ ਅਤੇ ਕੋਲਕਾਤਾ ਵਿੱਚ ਖੇਡੇ ਜਾ ਰਹੇ ਹਨ। ਇਸ ਤੋਂ ਬਾਅਦ ਸੁਪਰ ਲੀਗ ਅਤੇ ਫਾਈਨਲ ਇੰਦੌਰ ਵਿੱਚ ਹੋਣੇ ਸਨ। ਸ਼ਹਿਰ ਦੇ ਦੋ ਮੈਦਾਨਾਂ ‘ਤੇ ਰੋਜ਼ਾਨਾ ਚਾਰ ਮੈਚ ਖੇਡਣ ਦੀ ਯੋਜਨਾ ਸੀ ਪਰ ਉਸ ਸਮੇਂ ਦੌਰਾਨ ਇੰਦੌਰ ਵਿੱਚ ਹੋਟਲ ਦੇ ਕਮਰਿਆਂ ਦੀ ਭਾਰੀ ਕਮੀ ਸੀ। ਸ਼ਹਿਰ ਵਿੱਚ ਡਾਕਟਰਾਂ ਦੀ ਇੱਕ ਵੱਡੀ ਕਾਨਫਰੰਸ ਹੋਣ ਕਾਰਨ ਜ਼ਿਆਦਾਤਰ ਹੋਟਲ ਬੁੱਕ ਸਨ। ਅਜਿਹੇ ਵਿੱਚ ਅੱਠ ਟੀਮਾਂ, ਉਨ੍ਹਾਂ ਦੇ ਵੱਡੇ ਸਪੋਰਟ ਸਟਾਫ ਅਤੇ ਬ੍ਰੌਡਕਾਸਟ ਕਰੂ ਨੂੰ ਠਹਿਰਾਉਣ ਲਈ ਲੋੜੀਂਦੇ ਹੋਟਲ ਉਪਲਬਧ ਨਹੀਂ ਸਨ। ਸੁਪਰ ਲੀਗ ਵਿੱਚ ਅੱਠ ਟੀਮਾਂ ਖੇਡਣਗੀਆਂ, ਜਿਨ੍ਹਾਂ ਨੂੰ ਦੋ ਗਰੁੱਪਾਂ ਵਿੱਚ ਵੰਡਿਆ ਜਾਵੇਗਾ।

ਪੁਣੇ ਕਰੇਗਾ 13 ਮੈਚਾਂ ਦੀ ਮੇਜ਼ਬਾਨੀ

ਪੁਣੇ ਵਿੱਚ ਇਸ ਟੂਰਨਾਮੈਂਟ ਦੇ ਕੁੱਲ 13 ਮੈਚ ਖੇਡੇ ਜਾਣਗੇ। ਇਸ ਸ਼ਹਿਰ ਦੇ ਦੋ ਮੈਦਾਨ ਇਨ੍ਹਾਂ ਮੈਚਾਂ ਦੀ ਮੇਜ਼ਬਾਨੀ ਕਰਨਗੇ। ਮਹਾਰਾਸ਼ਟਰ ਕ੍ਰਿਕਟ ਗਰਾਊਂਡ ‘ਤੇ ਟੂਰਨਾਮੈਂਟ ਦੇ ਮੈਚ ਖੇਡੇ ਜਾਣਗੇ। ਇਸ ਤੋਂ ਇਲਾਵਾ ਗਹੁਣਜੇ ਸਟੇਡੀਅਮ ਨੂੰ ਵੀ ਮੈਚਾਂ ਦੀ ਮੇਜ਼ਬਾਨੀ ਸੌਂਪੀ ਗਈ ਹੈ।