ਸੋਨਾ ਤੇ ਚਾਂਦੀ ਦੀਆਂ ਕੀਮਤਾਂ ‘ਚ ਮੁੜ ਆਇਆ ਉਛਾਲ

ਨਵੀਂ ਦਿੱਲੀ, 15 ਦਸੰਬਰ – ਸੋਮਵਾਰ ਸਵੇਰੇ ਬਾਜ਼ਾਰ ਖੁੱਲ੍ਹਦੇ ਹੀ ਸੋਨੇ ਅਤੇ ਚਾਂਦੀ ਦੀਆਂ ਕੀਮਤਾਂ ਵਿੱਚ ਜ਼ਬਰਦਸਤ ਉਛਾਲ ਦੇਖਣ ਨੂੰ ਮਿਲਿਆ, ਜਿਸ ਨਾਲ ਨਿਵੇਸ਼ਕਾਂ ਅਤੇ ਖਰੀਦਦਾਰਾਂ ਦੀਆਂ ਨਜ਼ਰਾਂ ਮੁੜ ਇਨ੍ਹਾਂ ‘ਤੇ ਟਿਕ ਗਈਆਂ ਹਨ। ਸੋਮਵਾਰ, 15 ਦਸੰਬਰ ਨੂੰ ਮਲਟੀ ਕਮੋਡਿਟੀ ਐਕਸਚੇਂਜ (MCX) ‘ਤੇ ਸੋਨੇ ਅਤੇ ਚਾਂਦੀ ਦੋਵਾਂ ਵਿੱਚ ਤੇਜ਼ੀ ਦੇਖਣ ਨੂੰ ਮਿਲੀ। ਫਰਵਰੀ 2026 ਐਕਸਪਾਇਰੀ ਵਾਲਾ 24 ਕੈਰਟ ਸੋਨਾ 1.18 ਫੀਸਦੀ ਦੀ ਵਾਧੇ ਨਾਲ ₹1,578 ਚੜ੍ਹ ਕੇ ₹1,35,200 ਪ੍ਰਤੀ 10 ਗ੍ਰਾਮ ‘ਤੇ ਪਹੁੰਚ ਗਿਆ। ਕਾਰੋਬਾਰ ਦੌਰਾਨ ਸੋਨਾ ₹1,35,380 ਦੇ ਉੱਚ ਪੱਧਰ ‘ਤੇ ਪਹੁੰਚਿਆ, ਜਦੋਂ ਕਿ ਹੇਠਲਾ ਪੱਧਰ ₹1,34,204 ਰਿਹਾ। ਇਸ ਤੋਂ ਪਹਿਲਾਂ, ਸ਼ੁੱਕਰਵਾਰ, 12 ਦਸੰਬਰ ਨੂੰ ਸੋਨਾ ₹1,33,622 ‘ਤੇ ਬੰਦ ਹੋਇਆ ਸੀ।

ਚਾਂਦੀ ਨੇ ਫਿਰ ਦਿਖਾਈ ਤੂਫਾਨੀ ਤੇਜ਼ੀ

ਮਾਰਚ ਐਕਸਪਾਇਰੀ ਵਾਲੀ ਚਾਂਦੀ 2.10 ਫੀਸਦੀ ਉਛਲ ਕੇ ₹4,041 ਮਜ਼ਬੂਤ ਹੋਈ ਅਤੇ ₹1,96,892 ਪ੍ਰਤੀ ਕਿਲੋ ‘ਤੇ ਟ੍ਰੇਡ ਕਰਨ ਲੱਗੀ। ਕਾਰੋਬਾਰ ਦੌਰਾਨ ਇਸਦਾ ਉੱਚ ਪੱਧਰ ₹1,97,131 ਅਤੇ ਹੇਠਲਾ ਪੱਧਰ ₹1,94,681 ਰਿਹਾ। ਪਿਛਲੇ ਕਾਰੋਬਾਰੀ ਦਿਨ, 12 ਦਸੰਬਰ ਨੂੰ ਚਾਂਦੀ ₹1,92,851 ‘ਤੇ ਬੰਦ ਹੋਈ ਸੀ। ਖਾਸ ਗੱਲ ਇਹ ਹੈ ਕਿ ਸ਼ੁੱਕਰਵਾਰ ਨੂੰ ਚਾਂਦੀ ਨੇ ਪਹਿਲੀ ਵਾਰ ₹2,01,000 ਪ੍ਰਤੀ ਕਿਲੋ ਦੇ ਇਤਿਹਾਸਕ ਪੱਧਰ ਨੂੰ ਛੂਹਿਆ ਸੀ।