ਸੋਨਾ ਚਾਂਦੀ ਦੀਆਂ ਕੀਮਤਾਂ ‘ਚ ਆਈ ਇਤਿਹਾਸਿਕ ਗਿਰਾਵਟ, ਜਾਣੋ ਕਿੰਨਾ ਪਿਆ ਫ਼ਰਕ

ਨਵੀਂ ਦਿੱਲੀ, 31 ਜਨਵਰੀ – ਸੋਨੇ ਅਤੇ ਚਾਂਦੀ ਦੀਆਂ ਕੀਮਤਾਂ ਵਿੱਚ ਤੇਜ਼ੀ ਨਾਲ ਗਿਰਾਵਟ ਆਈ ਹੈ। ਜਿਸ ਨਾਲ ਗਾਹਕਾਂ ਦੇ ਚਿਹਰੇ ਖਿੜ ਗਏ ਹਨ। ਦੱਸ ਦੇਈਏ ਕਿ ਸਰਾਫ਼ਾ ਬਾਜ਼ਾਰ ਵਿੱਚ ਪਿਛਲੇ 24 ਘੰਟਿਆਂ ਦੌਰਾਨ ਵੱਡੀ ਉਥਲ-ਪੁਥਲ ਦੇਖਣ ਨੂੰ ਮਿਲੀ ਹੈ, ਜਿਸ ਕਾਰਨ ਨਿਵੇਸ਼ਕਾਂ ਦੇ ਕਰੋੜਾਂ ਰੁਪਏ ਡੁੱਬ ਗਏ ਹਨ। ਚਾਂਦੀ ਦੀਆਂ ਕੀਮਤਾਂ ਵਿੱਚ 1.30 ਲੱਖ ਰੁਪਏ ਅਤੇ ਸੋਨੇ ਦੀਆਂ ਕੀਮਤਾਂ ਵਿੱਚ 40 ਹਜ਼ਾਰ ਰੁਪਏ ਤੋਂ ਵੱਧ ਦੀ ਭਾਰੀ ਗਿਰਾਵਟ ਦਰਜ ਕੀਤੀ ਗਈ ਹੈ।

ਕੀਮਤਾਂ ਵਿੱਚ ਇਤਿਹਾਸਕ ਗਿਰਾਵਟ 

ਮਲਟੀ ਕਮੋਡਿਟੀ ਐਕਸਚੇਂਜ (MCX) ‘ਤੇ ਵੀਰਵਾਰ ਰਾਤ ਨੂੰ ਚਾਂਦੀ 4.20 ਲੱਖ ਰੁਪਏ ਪ੍ਰਤੀ ਕਿਲੋ ‘ਤੇ ਕਾਰੋਬਾਰ ਕਰ ਰਹੀ ਸੀ, ਜੋ ਅਚਾਨਕ ਡਿੱਗ ਕੇ ਸ਼ੁੱਕਰਵਾਰ ਰਾਤ ਤੱਕ 2.90 ਲੱਖ ਰੁਪਏ ਰਹਿ ਗਈ। ਇਸੇ ਤਰ੍ਹਾਂ ਸੋਨਾ (ਅਪ੍ਰੈਲ ਵਾਇਦਾ) ਵੀ ਆਪਣੇ 1.93 ਲੱਖ ਰੁਪਏ ਦੇ ਉੱਚਤਮ ਪੱਧਰ ਤੋਂ ਫਿਸਲ ਕੇ 1.52 ਲੱਖ ਰੁਪਏ ਤੱਕ ਆ ਗਿਆ ਹੈ। ਜ਼ਿਕਰਯੋਗ ਹੈ ਕਿ ਚਾਂਦੀ ਵਿੱਚ 2011 ਅਤੇ ਸੋਨੇ ਵਿੱਚ 2013 ਤੋਂ ਬਾਅਦ ਇਹ ਸਭ ਤੋਂ ਵੱਡੀ ਗਿਰਾਵਟ ਦੇਖੀ ਗਈ ਹੈ।

ਜਾਣੋ ਕਿਉਂ ਡਿੱਗੀਆਂ ਕੀਮਤਾਂ? 

ਬਾਜ਼ਾਰ ਵਿੱਚ ਇਸ ਵੱਡੀ ਗਿਰਾਵਟ ਦਾ ਮੁੱਖ ਕਾਰਨ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਵੱਲੋਂ ਫੈਡਰਲ ਰਿਜ਼ਰਵ ਦੇ ਮੁਖੀ ਵਜੋਂ ਜੇਰੋਮ ਪਾਵੇਲ ਦੀ ਥਾਂ ਕੇਵਿਨ ਵਾਰਸ਼ ਨੂੰ ਚੁਣਨ ਦੀਆਂ ਖ਼ਬਰਾਂ ਹਨ। ਕੇਵਿਨ ਵਾਰਸ਼ ਨੂੰ ਬਾਜ਼ਾਰ ਵਿੱਚ ਸਖ਼ਤ ਮੌਦਰਿਕ ਨੀਤੀਆਂ ਰੱਖਣ ਵਾਲੇ ਅਧਿਕਾਰੀ ਵਜੋਂ ਜਾਣਿਆ ਜਾਂਦਾ ਹੈ। ਹਾਲਾਂਕਿ ਘੱਟ ਵਿਆਜ ਦਰਾਂ ਸੋਨੇ-ਚਾਂਦੀ ਲਈ ਚੰਗੀਆਂ ਮੰਨੀਆਂ ਜਾਂਦੀਆਂ ਹਨ, ਪਰ ਮੌਜੂਦਾ ਹਾਲਾਤ ਵਿੱਚ ਨਿਵੇਸ਼ਕ ਕਿਸੇ ਵੀ ਨਕਾਰਾਤਮਕ ਖ਼ਬਰ ਦਾ ਸਹਾਰਾ ਲੈ ਕੇ ਮੁਨਾਫਾ ਵਸੂਲੀ ਕਰ ਰਹੇ ਹਨ। ਮਾਹਿਰਾਂ ਅਨੁਸਾਰ, ਇਹ ਗਿਰਾਵਟ ਬੁਨਿਆਦੀ ਕਾਰਨਾਂ ਨਾਲੋਂ ਕਿਤੇ ਜ਼ਿਆਦਾ ਭਾਵਨਾਤਮਕ ਅਤੇ ਤਕਨੀਕੀ ਹੈ।