ਰੁਪਏ ਨੇ ਫੜੀ ਰਫ਼ਤਾਰ; ਡਾਲਰ ਦੇ ਮੁਕਾਬਲੇ 29 ਪੈਸੇ ਮਜ਼ਬੂਤ ਹੋ ਕੇ 94.62 ’ਤੇ ਪਹੁੰਚਿਆ

ਨਵੀਂ ਦਿੱਲੀ, 21 ਅਕਤੂਬਰ – ਘਰੇਲੂ ਬਾਜ਼ਾਰ ਵਿੱਚ ਹਾਂ-ਪੱਖੀ ਰੁਝਾਨ ਅਤੇ ਅਮਰੀਕੀ ਡਾਲਰ ਦੀ ਮੰਗ ਨੂੰ ਠੱਲ੍ਹ ਪਾਉਣ ਲਈ ਭਾਰਤੀ ਰਿਜ਼ਰਵ ਬੈਂਕ (ਆਰ.ਬੀ.ਆਈ.) ਦੇ ਦਖ਼ਲ ਦੇ ਸਹਾਰੇ, ਬੁੱਧਵਾਰ ਨੂੰ ਸ਼ੁਰੂਆਤੀ ਕਾਰੋਬਾਰ ਦੌਰਾਨ ਅਮਰੀਕੀ ਕਰੰਸੀ ਦੇ ਮੁਕਾਬਲੇ ਰੁਪਿਆ 29 ਪੈਸੇ ਮਜ਼ਬੂਤ ਹੋ ਕੇ 94.62 ’ਤੇ ਪਹੁੰਚ ਗਿਆ ਹੈ। ਮਾਹਿਰਾਂ ਅਨੁਸਾਰ, ਰੁਪਏ ਨੂੰ ਇਹ ਹੁਲਾਰਾ ਜੀਓ (Jio) ਦੇ ਆਈ.ਪੀ.ਓ. (IPO) ਨਾਲ ਜੁੜੇ ਵਿਦੇਸ਼ੀ ਡਾਲਰਾਂ ਦੇ ਦੇਸ਼ ਵਿੱਚ ਆਉਣ ਕਾਰਨ ਮਿਲਿਆ ਹੈ, ਜੋ ਕਿ ਅੱਜ ਬੁੱਧਵਾਰ ਤੋਂ ਹੀ ਆਮ ਲੋਕਾਂ ਲਈ ਨਿਵੇਸ਼ ਵਾਸਤੇ ਖੁੱਲ੍ਹ ਗਿਆ ਹੈ। ਹਾਲਾਂਕਿ, ਕੱਚੇ ਤੇਲ ਦੀਆਂ ਵਧੀਆਂ ਕੀਮਤਾਂ ਅਤੇ ਮਜ਼ਬੂਤ ਅਮਰੀਕੀ ਡਾਲਰ ਨੇ ਰੁਪਏ ਦੇ ਇਸ ਵਾਧੇ ਨੂੰ ਕੁਝ ਹੱਦ ਤੱਕ ਸੀਮਤ ਵੀ ਰੱਖਿਆ ਹੈ। ਅੰਤਰਬੈਂਕ ਵਿਦੇਸ਼ੀ ਮੁਦਰਾ ਬਾਜ਼ਾਰ ਵਿੱਚ ਰੁਪਿਆ 94.78 ’ਤੇ ਮਜ਼ਬੂਤੀ ਨਾਲ ਖੁੱਲ੍ਹਿਆ ਅਤੇ ਬਾਅਦ ਵਿੱਚ ਹੋਰ ਮਜ਼ਬੂਤ ਹੁੰਦਿਆਂ 94.62 ’ਤੇ ਜਾ ਪਹੁੰਚਿਆ, ਜੋ ਕਿ ਪਿਛਲੇ ਬੰਦ ਦੇ ਮੁਕਾਬਲੇ 29 ਪੈਸੇ ਦਾ ਸਪੱਸ਼ਟ ਵਾਧਾ ਦਰਸਾਉਂਦਾ ਹੈ। ਇਸ ਤੋਂ ਪਹਿਲਾਂ ਸੋਮਵਾਰ ਨੂੰ ਅਮਰੀਕੀ ਡਾਲਰ ਦੇ ਮੁਕਾਬਲੇ ਰੁਪਿਆ 2 ਪੈਸੇ ਘਟ ਕੇ 94.91 ’ਤੇ ਬੰਦ ਹੋਇਆ ਸੀ, ਜਦਕਿ ਮੰਗਲਵਾਰ ਨੂੰ ਦਸਹਿਰੇ ਦੇ ਤਿਉਹਾਰ ਕਾਰਨ ਵਿਦੇਸ਼ੀ ਮੁਦਰਾ ਬਾਜ਼ਾਰ ਬੰਦ ਰਿਹਾ ਸੀ।

ਚੁਆਇਸ ਬ੍ਰੋਕਿੰਗ ਦੇ ਕਮੋਡਿਟੀ ਐਂਡ ਕਰੰਸੀ ਐਨਾਲਿਸਟ ਆਮਿਰ ਮਕਦਾ ਨੇ ਇਸ ਬਾਰੇ ਦੱਸਿਆ ਕਿ ਇਹ ਮਜ਼ਬੂਤੀ ਮੁੱਖ ਤੌਰ ’ਤੇ ਜੀਓ ਆਈ.ਪੀ.ਓ. ਨਾਲ ਜੁੜੇ ਡਾਲਰਾਂ ਦੇ ਪਰਵਾਹ ਅਤੇ ਰਿਜ਼ਰਵ ਬੈਂਕ ਦੇ ਸਹਿਯੋਗ ਸਦਕਾ ਆਈ ਹੈ। ਆਈ.ਪੀ.ਓ. ਅਲਾਟਮੈਂਟ ਦੌਰਾਨ ਡਾਲਰ ਦੇ ਪਰਵਾਹ ਨੂੰ ਸੁਚਾਰੂ ਰੱਖਣ ਲਈ ਵਿਦੇਸ਼ੀ ਨਿਵੇਸ਼ਕ ਸਪਾਟ ਬਾਜ਼ਾਰ ਵਿੱਚ ਰੁਪਏ ਬਦਲੇ ਡਾਲਰ ਵੇਚ ਕੇ ਥੋੜ੍ਹੇ ਸਮੇਂ ਯਾਨੀ ਇੱਕ ਹਫ਼ਤੇ ਦੇ ਅੰਦਰ ਮੁੜ ਖਰੀਦਣ ਦੇ ਸਮਝੌਤਿਆਂ ਦੀ ਵਰਤੋਂ ਕਰ ਰਹੇ ਹਨ। ਇਸ ਦੇ ਬਾਵਜੂਦ ਤੇਲ ਦੀਆਂ ਉੱਚੀਆਂ ਕੀਮਤਾਂ ਘਰੇਲੂ ਕਰੰਸੀ ਲਈ ਰੁਕਾਵਟ ਬਣੀਆਂ ਹੋਈਆਂ ਹਨ। ਮਕਦਾ ਮੁਤਾਬਕ ਅੱਜ ਦੇ ਪੂਰੇ ਸੈਸ਼ਨ ਦੌਰਾਨ ਰੁਪਏ ਦੇ 94.00 ਤੋਂ 94.75 ਦੇ ਦਾਇਰੇ ਵਿੱਚ ਹੀ ਵਿਚਰਨ ਦੀ ਉਮੀਦ ਹੈ। ਦੂਜੇ ਪਾਸੇ, ਛੇ ਪ੍ਰਮੁੱਖ ਮੁਦਰਾਵਾਂ ਦੇ ਮੁਕਾਬਲੇ ਡਾਲਰ ਦੀ ਤਾਕਤ ਨੂੰ ਮਾਪਣ ਵਾਲਾ ਡਾਲਰ ਸੂਚਕਾਂਕ 0.06 ਫ਼ੀਸਦੀ ਦੇ ਮਾਮੂਲੀ ਵਾਧੇ ਨਾਲ 101.58 ’ਤੇ ਕਾਰੋਬਾਰ ਕਰ ਰਿਹਾ ਸੀ। ਵਿਸ਼ਵ ਪੱਧਰ ’ਤੇ ਬ੍ਰੈਂਟ ਕਰੂਡ ਫਿਊਚਰਜ਼ 1.42 ਫ਼ੀਸਦੀ ਚੜ੍ਹ ਕੇ 110.33 ਅਮਰੀਕੀ ਡਾਲਰ ਪ੍ਰਤੀ ਬੈਰਲ ’ਤੇ ਰਿਹਾ।