ਪੁਲ ਤੋਂ ਨਦੀ ‘ਚ ਜਾ ਡਿੱਗੀ ਸਵਾਰੀਆਂ ਨਾਲ ਭਰੀ ਬੱਸ, 16 ਦੀ ਮੌ*ਤ

ਨੋਮ ਪੇਨ, 21 ਨਵੰਬਰ, 2025 : ਕੰਬੋਡੀਆ ਦੇ ਮੱਧ ਸੂਬੇ ਕਾਂਪੋਂਗ ਥੌਮ ਵਿੱਚ ਅੱਜ ਸਵੇਰੇ ਇੱਕ ਦਿਲ ਦਹਿਲਾ ਦੇਣ ਵਾਲਾ ਸੜਕ ਹਾਦਸਾ ਵਾਪਰ ਗਿਆ। ਦੱਸ ਦੇਈਏ ਕਿ ਇੱਥੇ ਸਵਾਰੀਆਂ ਨਾਲ ਭਰੀ ਇੱਕ ਬੱਸ ਪੁਲ ਤੋਂ ਸਿੱਧਾ ਨਦੀ ਵਿੱਚ ਜਾ ਡਿੱਗੀ, ਜਿਸ ਵਿੱਚ ਘੱਟੋ-ਘੱਟ 16 ਲੋਕਾਂ ਦੀ ਮੌਤ ਹੋ ਗਈ ਅਤੇ ਕਈ ਲੋਕ ਜ਼ਖਮੀ ਹੋ ਗਏ। ਪੁਲਿਸ ਦੀ ਮੁੱਢਲੀ ਜਾਂਚ ਵਿੱਚ ਸਾਹਮਣੇ ਆਇਆ ਹੈ ਕਿ ਡਰਾਈਵਰ ਨੂੰ ਨੀਂਦ ਦੀ ਝਪਕੀ ਆਉਣ ਕਾਰਨ ਇਹ ਭਿਆਨਕ ਹਾਦਸਾ ਵਾਪਰਿਆ ਹੈ। ਪੁਲਿਸ ਅਧਿਕਾਰੀ ਸਿਵ ਸੋਵਨਾ ਨੇ ਦੱਸਿਆ ਕਿ ਇਹ ਬੱਸ ਸਿਏਮ ਰੀਪ ਤੋਂ ਰਾਜਧਾਨੀ ਨੋਮ ਪੇਨ (Phnom Penh) ਵੱਲ ਜਾ ਰਹੀ ਸੀ। ਸਿਏਮ ਰੀਪ ਉਹੀ ਥਾਂ ਹੈ ਜਿੱਥੇ ਪ੍ਰਸਿੱਧ ਅੰਗਕੋਰ ਵਾਟ (Angkor Wat) ਮੰਦਰ ਸਥਿਤ ਹੈ। ਬੱਸ ਵਿੱਚ ਕਰੀਬ 40 ਯਾਤਰੀ ਸਵਾਰ ਸਨ ਅਤੇ ਸਾਰੇ ਕੰਬੋਡੀਆਈ ਨਾਗਰਿਕ ਦੱਸੇ ਜਾ ਰਹੇ ਹਨ।

ਰਾਤ ਭਰ ਚੱਲਿਆ ਰੈਸਕਿਊ, ਵਧਿਆ ਮੌਤ ਦਾ ਅੰਕੜਾ

ਹਾਦਸੇ ਤੋਂ ਤੁਰੰਤ ਬਾਅਦ ਰਾਹਤ ਅਤੇ ਬਚਾਅ ਕਾਰਜ (Rescue Operation) ਸ਼ੁਰੂ ਕੀਤਾ ਗਿਆ। ਵੀਰਵਾਰ ਰਾਤ ਤੱਕ ਚੱਲੇ ਸਰਚ ਆਪ੍ਰੇਸ਼ਨ ਤੋਂ ਬਾਅਦ ਮ੍ਰਿਤਕਾਂ ਦਾ ਅੰਕੜਾ 13 ਤੋਂ ਵੱਧ ਕੇ 16 ਹੋ ਗਿਆ। ਜ਼ਖਮੀਆਂ ਨੂੰ ਇਲਾਜ ਲਈ ਨੇੜਲੇ ਹਸਪਤਾਲਾਂ (Hospitals) ਵਿੱਚ ਭਰਤੀ ਕਰਵਾਇਆ ਗਿਆ ਹੈ।

ਸੜਕ ਹਾਦਸਿਆਂ ਦੇ ਅੰਕੜੇ ਡਰਾਉਣ ਵਾਲੇ

ਲੋਕ ਨਿਰਮਾਣ ਅਤੇ ਟਰਾਂਸਪੋਰਟ ਮੰਤਰਾਲੇ (Ministry of Public Works and Transport) ਦੇ ਅੰਕੜਿਆਂ ਮੁਤਾਬਕ, ਕੰਬੋਡੀਆ ਵਿੱਚ ਸੜਕ ਹਾਦਸੇ ਇੱਕ ਵੱਡੀ ਸਮੱਸਿਆ ਹਨ।