ਨਾਮੀ ਬ੍ਰਾਂਡ ਵੀ ਨਹੀਂ ਸੁਰੱਖਿਅਤ! ਬੇਬੀ ਫੂਡ ‘ਚ ਮਿਲੇ ਹਾਨੀਕਾਰਕ ਤੱਤ

ਜਾਂਚ ਵਿੱਚ ਕੀ ਸਾਹਮਣੇ ਆਇਆ?

ਸਰਕਾਰੀ ਅੰਕੜਿਆਂ ਅਨੁਸਾਰ, ਫੂਡ ਸੇਫਟੀ ਐਂਡ ਸਟੈਂਡਰਡਜ਼ ਅਥਾਰਟੀ ਆਫ ਇੰਡੀਆ (FSSAI) ਵੱਲੋਂ ਇਨ੍ਹਾਂ ਉਤਪਾਦਾਂ ਦੀ ਲਗਾਤਾਰ ਜਾਂਚ ਕੀਤੀ ਜਾ ਰਹੀ ਹੈ। ਸਾਲ 2024-25 ਵਿੱਚ ਬੱਚਿਆਂ ਲਈ ਮਿਲਕ ਫਾਰਮੂਲਾ ਅਤੇ ਬੇਬੀ ਫੂਡ ਦੇ 522 ਸੈਂਪਲਾਂ ਦੀ ਜਾਂਚ ਕੀਤੀ ਗਈ ਸੀ। ਇਨ੍ਹਾਂ ਵਿੱਚੋਂ 45 ਉਤਪਾਦ ਨਿਰਧਾਰਤ ਮਾਪਦੰਡਾਂ ’ਤੇ ਖਰੇ ਨਹੀਂ ਉਤਰੇ। ਇਨ੍ਹਾਂ ਵਿੱਚ 5 ਸੈਂਪਲ ਅਸੁਰੱਖਿਅਤ ਪਾਏ ਗਏ, 18 ਸੈਂਪਲ ਸਬ-ਸਟੈਂਡਰਡ ਭਾਵ ਘਟੀਆ ਗੁਣਵੱਤਾ ਵਾਲੇ ਸਨ, ਜਦਕਿ 22 ਸੈਂਪਲਾਂ ਵਿੱਚ ਗਲਤ ਲੇਬਲਿੰਗ ਅਤੇ ਗੁੰਮਰਾਹਕੁੰਨ ਦਾਅਵੇ ਮਿਲੇ। ਇਸ ਤੋਂ ਪਹਿਲਾਂ ਦੇ ਸਾਲਾਂ ਵਿੱਚ ਵੀ ਬੇਬੀ ਪ੍ਰੋਡਕਟਸ ਦੇ ਸੈਂਪਲਾਂ ਵਿੱਚ ਅਜਿਹੀਆਂ ਖਾਮੀਆਂ ਸਾਹਮਣੇ ਆਈਆਂ ਹਨ। ਇਹ ਅੰਕੜੇ ਦਰਸਾਉਂਦੇ ਹਨ ਕਿ ਬਾਜ਼ਾਰ ਵਿੱਚ ਸਖ਼ਤ ਨਿਯਮਾਂ ਦੀ ਲੋੜ ਹੈ, ਤਾਂ ਜੋ ਬੱਚਿਆਂ ਦੀ ਸਿਹਤ ਨਾਲ ਕਿਸੇ ਵੀ ਤਰ੍ਹਾਂ ਦਾ ਖਿਲਵਾੜ ਨਾ ਹੋ ਸਕੇ।

ਸਾਵਧਾਨੀ ਜ਼ਰੂਰੀ

ਨਵਜੰਮੇ ਬੱਚੇ ਸਭ ਤੋਂ ਜ਼ਿਆਦਾ ਸੰਵੇਦਨਸ਼ੀਲ ਹੁੰਦੇ ਹਨ। ਇਸ ਲਈ ਉਨ੍ਹਾਂ ਦੇ ਖਾਣੇ ਵਿੱਚ ਕਿਸੇ ਵੀ ਤਰ੍ਹਾਂ ਦੀ ਗੜਬੜ ਗੰਭੀਰ ਖ਼ਤਰਾ ਪੈਦਾ ਕਰ ਸਕਦੀ ਹੈ। ਇਸ ਦੇ ਬਾਵਜੂਦ ਬੇਬੀ ਪ੍ਰੋਡਕਟਸ ਦੀ ਜਾਂਚ ਦੌਰਾਨ ਗੁੰਮਰਾਹਕੁੰਨ ਲੇਬਲਿੰਗ, ਮਾਈਕ੍ਰੋਬੀਅਲ ਕੰਟੈਮੀਨੇਸ਼ਨ, ਕੀਟਨਾਸ਼ਕ, ਭਾਰੀ ਧਾਤਾਂ ਅਤੇ ਪੋਸ਼ਕ ਤੱਤਾਂ ਬਾਰੇ ਗਲਤ ਜਾਣਕਾਰੀ ਵਰਗੀਆਂ ਸਮੱਸਿਆਵਾਂ ਸਾਹਮਣੇ ਆਉਂਦੀਆਂ ਰਹਿੰਦੀਆਂ ਹਨ। ਇਸ ਲਈ ਸਿਰਫ਼ ਕਿਸੇ ਨਾਮੀ ਬ੍ਰਾਂਡ ਦਾ ਹੋਣਾ ਵੀ ਹੁਣ ਸੁਰੱਖਿਆ ਦੀ ਗਾਰੰਟੀ ਨਹੀਂ ਮੰਨੀ ਜਾ ਸਕਦੀ।

ਐਕਸਪਾਇਰ ਹੋਇਆ ਖਾਣਾ ਅਤੇ ਖੰਡ ਦਾ ਮਾਮਲਾ

ਹਾਲ ਹੀ ਵਿੱਚ ਬੈਂਗਲੁਰੂ ਵਿੱਚ ਇੱਕ ਕੰਪਨੀ ਖ਼ਿਲਾਫ਼ ਕਾਰਵਾਈ ਦੌਰਾਨ 3.7 ਮੀਟ੍ਰਿਕ ਟਨ ਐਕਸਪਾਇਰ ਹੋ ਚੁੱਕਾ ਬੇਬੀ ਫੂਡ ਜ਼ਬਤ ਕੀਤਾ ਗਿਆ, ਜਿਸ ਨੂੰ ਅਦਾਲਤ ਦੇ ਹੁਕਮ ’ਤੇ ਨਸ਼ਟ ਕਰ ਦਿੱਤਾ ਗਿਆ। ਬੱਚਿਆਂ ਦੇ ਖਾਣੇ ਦੇ ਮਾਮਲੇ ਵਿੱਚ ਇਸ ਤਰ੍ਹਾਂ ਐਕਸਪਾਇਰੀ ਡੇਟ ਲੰਘ ਜਾਣਾ ਬਹੁਤ ਗੰਭੀਰ ਖ਼ਤਰਾ ਪੈਦਾ ਕਰ ਸਕਦਾ ਹੈ। ਇਸ ਤੋਂ ਇਲਾਵਾ ਖਾਣੇ ਵਿੱਚ ਵਾਧੂ ਖੰਡ ਦੀ ਜ਼ਿਆਦਾ ਮਾਤਰਾ ਅਤੇ ਪੋਸ਼ਣ ਨਾਲ ਸਬੰਧਤ ਗਲਤ ਜਾਣਕਾਰੀ ਵੀ ਚਿੰਤਾ ਦਾ ਵਿਸ਼ਾ ਹੈ।

ਅੱਗੇ ਦਾ ਰਸਤਾ ਕੀ ਹੋਣਾ ਚਾਹੀਦਾ ਹੈ?

ਅਮਰੀਕਾ ਵਰਗੇ ਦੇਸ਼ਾਂ ਵਿੱਚ ਜਦੋਂ ਕਿਸੇ ਉਤਪਾਦ ਵਿੱਚ ਖ਼ਰਾਬੀ ਪਾਈ ਜਾਂਦੀ ਹੈ ਤਾਂ ਜਨਤਕ ਨੋਟਿਸ ਜਾਰੀ ਕਰਕੇ ਉਤਪਾਦ ਦਾ ਲਾਟ ਨੰਬਰ ਅਤੇ ਐਕਸਪਾਇਰੀ ਡੇਟ ਦੱਸ ਕੇ ਲੋਕਾਂ ਨੂੰ ਸਾਵਧਾਨ ਕੀਤਾ ਜਾਂਦਾ ਹੈ।