ਏਸ਼ੀਆ ਕੱਪ ਹਾਕੀ ਨਹੀਂ ਖੇਡਣਗੇ ਪਾਕਿਸਤਾਨ ਤੇ ਓਮਾਨ

20, ਅਗਸਤ – ਬਿਹਾਰ ਦੇ ਰਾਜਗੀਰ ਵਿੱਚ 29 ਅਗਸਤ ਤੋਂ ਸ਼ੁਰੂ ਹੋਣ ਵਾਲੇ ਪੁਰਸ਼ ਏਸ਼ੀਆ ਕੱਪ ਹਾਕੀ ਟੂਰਨਾਮੈਂਟ ਵਿੱਚ ਪਾਕਿਸਤਾਨ ਅਤੇ ਓਮਾਨ ਦੀ ਜਗ੍ਹਾ ਹੁਣ ਬੰਗਲਾਦੇਸ਼ ਅਤੇ ਕਜ਼ਾਖਸਤਾਨ ਖੇਡਣਗੇ। ਅੱਜ ਜਾਰੀ ਟੂਰਨਾਮੈਂਟ ਦੇ ਸ਼ਡਿਊਲ ਅਨੁਸਾਰ ਮੇਜ਼ਬਾਨ ਭਾਰਤ ਨੂੰ ਚੀਨ, ਜਪਾਨ ਅਤੇ ਕਜ਼ਾਖਸਤਾਨ ਨਾਲ ਗਰੁੱਪ ‘ਏ’ ਵਿੱਚ ਰੱਖਿਆ ਗਿਆ ਹੈ, ਜਦਕਿ ਮਲੇਸ਼ੀਆ, ਕੋਰੀਆ, ਚੀਨੀ ਤਾਇਪੇ ਅਤੇ ਬੰਗਲਾਦੇਸ਼ ਪੂਲ ‘ਬੀ’ ਵਿੱਚ ਹਨ।

ਇਸ ਅੱਠ ਟੀਮਾਂ ਦੇ ਟੂਰਨਾਮੈਂਟ ਦੇ ਜੇਤੂ ਨੂੰ ਨੈਦਰਲੈਂਡਜ਼ ਅਤੇ ਬੈਲਜੀਅਮ ਵਿੱਚ ਹੋਣ ਵਾਲੇ 2026 ਵਿਸ਼ਵ ਕੱਪ ਵਿੱਚ ਸਿੱਧੀ ਜਗ੍ਹਾ ਮਿਲੇਗੀ। ਇਹ ਮਹਾਦੀਪੀ ਟੂਰਨਾਮੈਂਟ 29 ਅਗਸਤ ਨੂੰ ਮਲੇਸ਼ੀਆ ਅਤੇ ਬੰਗਲਾਦੇਸ਼ ਵਿਚਕਾਰ ਮੈਚ ਨਾਲ ਸ਼ੁਰੂ ਹੋਵੇਗਾ, ਜਦਕਿ ਮੁਕਾਬਲੇ ਦੇ ਪਹਿਲੇ ਦਿਨ ਦੇ ਆਖਰੀ ਮੈਚ ਵਿੱਚ ਭਾਰਤ ਅਤੇ ਚੀਨ ਇੱਕ-ਦੂਜੇ ਦਾ ਸਾਹਮਣਾ ਕਰਨਗੇ। ਪੂਲ ਗੇੜ ਤੋਂ ਬਾਅਦ, ਸੁਪਰ-4 ਮੈਚ 3 ਤੋਂ 6 ਸਤੰਬਰ ਤੱਕ ਖੇਡੇ ਜਾਣਗੇ। ਸੁਪਰ-4 ਮੈਚਾਂ ਦਾ ਐਲਾਨ ਪੂਲ ਗੇੜ ਤੋਂ ਬਾਅਦ ਕੀਤਾ ਜਾਵੇਗਾ।

ਫਾਈਨਲ, ਤੀਜੇ ਸਥਾਨ ਦਾ ਪਲੇਅ-ਆਫ ਅਤੇ ਪੰਜਵੇਂ-ਛੇਵੇਂ ਸਥਾਨ ਦਾ ਵਰਗੀਕਰਨ ਮੈਚ 7 ਸਤੰਬਰ ਨੂੰ ਹੋਵੇਗਾ। ਭਾਰਤ ਸਰਕਾਰ ਨੇ ਕਿਹਾ ਸੀ ਕਿ ਉਹ ਟੂਰਨਾਮੈਂਟ ਲਈ ਪਾਕਿਸਤਾਨੀ ਖਿਡਾਰੀਆਂ ਨੂੰ ਵੀਜ਼ਾ ਦੇਵੇਗੀ ਪਰ ਪਾਕਿਸਤਾਨ ਹਾਕੀ ਫੈਡਰੇਸ਼ਨ (ਪੀਐੱਚਐੱਫ) ਨੇ ਸੁਰੱਖਿਆ ਕਾਰਨਾਂ ਦਾ ਹਵਾਲਾ ਦਿੰਦਿਆਂ ਯਾਤਰਾ ਕਰਨ ਤੋਂ ਇਨਕਾਰ ਕਰ ਦਿੱਤਾ ਸੀ। ਪ੍ਰਬੰਧਕਾਂ ਨੇ ਅੱਠ ਟੀਮਾਂ ਦੇ ਟੂਰਨਾਮੈਂਟ ਵਿੱਚ ਪਾਕਿਸਤਾਨ ਦੀ ਜਗ੍ਹਾ ਲੈਣ ਲਈ ਪਹਿਲਾਂ ਹੀ ਬੰਗਲਾਦੇਸ਼ ਨਾਲ ਸੰਪਰਕ ਕੀਤਾ ਸੀ। ਪਹਿਲਗਾਮ ਦਹਿਸ਼ਤੀ ਹਮਲੇ ਤੋਂ ਬਾਅਦ ਭਾਰਤ ਨਾਲ ਫੌਜੀ ਟਕਰਾਅ ਕਾਰਨ ਏਸ਼ੀਆ ਕੱਪ ਵਿੱਚ ਪਾਕਿਸਤਾਨ ਦਾ ਟੂਰਨਾਮੈਂਟ ਵਿੱਚ ਹਿੱਸਾ ਲੈਣਾ ਪੱਕਾ ਨਹੀਂ ਸੀ। ਕੋਰੀਆ ਟੂਰਨਾਮੈਂਟ ਦੀ ਸਭ ਤੋਂ ਸਫਲ ਟੀਮ ਹੈ, ਜਿਸ ਨੇ ਪੰਜ ਵਾਰ ਖਿਤਾਬ ਜਿੱਤਿਆ ਹੈ।